Jezu ná ɖó nǔ hɛ̌n nu

Hwenu e Jezu ɖo ayǐkúngban jí é ɔ, é ɖe wǎnyíyí ɖaxó xlɛ́ gbɛtɔ́ lɛ́, ɖo tají ɔ, mɛ ɖěɖěe nyí wamamɔnɔ lɛ́ é kpó mɛ ɖěɖěe flú lɛ́ é kpó. (Matíe 9:36) É tlɛ sɔ́ gbɛ tɔn dó sá vɔ̌ dó mɛ ɖěvo lɛ́ tamɛ. (Matíe 20:28; Jaan 15:13) Zaanɖé din ɔ, é ná lɛ́ ɖe wǎnyíyí e é ɖó nú gbɛtɔ́ lɛ́ é xlɛ́ gbɔn acɛ kpó hlɔ̌nhlɔ́n kpó e é ɖó, ɖó é nyí Axɔ́sú nú Axɔ́súɖuto Mawu tɔn wútu é zínzán dó ɖó nǔ hɛ̌n nu gbɔn ayǐkúngban ɔ bǐ jí gblamɛ.

Biblu zán xógbe lómílómí lɛ́ dó tín nǔ e Jezu ná wa lɛ́ é mɛ gbɔn lě:

• “Wamamɔnɔ e ɖo togun ɔ mɛ lɛ́ ɖě sín hwɛ jɔ hǔn, axɔ́sú ɔ ní nɔ ɖɔ hwɛ tɔn jɔ. É ní nɔ́ nya xɛ ɖo mɛmaɖómɛɖé lɛ́ jí.”—Ðɛhan 72:4.

Nɛ̌ mǐ ka sixú xlɛ́ ɖɔ nǔ e Jezu ko wa nú mǐ, bo ná lɛ́ wá wa nú mǐ lɛ́ é su nukún mǐtɔn mɛ gbɔn? Ali e nu mǐ sixú wa mɔ̌ ɖe é ɖokpó wɛ nyí ɖɔ mǐ ná kplɔ́n nǔ dó “wɛn ɖagbe Axɔ́súɖuto Mawu tɔn tɔn” e é jlá é wú. (Luki 4:43) Xa xóta “Étɛ́ ka nyí Axɔ́súɖuto Mawu tɔn?”