Kúnnuɖetɔ́ Jehovah Tɔn lɛ ka Ði Nǔ nú Jezu À?

Ganji. Mǐ ɖi nǔ nú Jezu, é wɛ ɖɔ: “Nyɛ wɛ nyí ali ɔ, bo nyí nǔgbo ɔ, bo ka lɛ́ nyí gbɛ̀ ɔ. Mɛ ɖebǔ sixu yì Tɔ́ ɔ gɔ́n nyɛ mɛvo ǎ.” (Jaan 14:6) Mǐ ɖi nǔ ɖɔ Jezu gosin jixwé bo wá ayikúngban jí, lobo sɔ́ gbɛ̀ maɖóblɔ̌ tɔn jó dó xɔ gbɛ̀ nú mǐ. (Matie 20:28) Kú tɔn kpo fínfɔ́n sín kú tɔn kpo hun ali nú mɛ ɖěɖee ɖi nǔ n’i lɛ é bɔ ye na mɔ gbɛ̀ mavɔmavɔ. (Jaan 3:16) Mǐ lɛ́ ɖi nǔ ɖɔ Jezu ɖò acɛ kpa wɛ dìn bo nyí Axɔ́su nú Axɔ́suɖuto Mawu tɔn e na hɛn fífá wá ayikúngban ɔ bǐ jí zaanɖé dìn é. (Nǔɖexlɛ́mɛ 11:15) É ɖò mɔ̌ có, tɛn e nyí Jezu tɔn é wɛ mǐ nɔ sɔ́ n’i, éɖesu ɖɔ: “Tɔ́ ɔ hugǎn mì.” (Jaan 14:28) Enɛ wu ɔ, mǐ nɔ sɛn Jezu ǎ, ɖó mǐ ɖi nǔ ɖɔ é kún nyí Mawu Nǔbǐwukpétɔ́ ɔ ó.