Nǔsisɔ nú Wema E Ðò Taji Hú Wema lɛ Bǐ É

“Un ko ɖò nukún ɖó wɛ sín xwè 19 ɖíe!” Etɛ ɖó nukún wɛ nɔví mǐtɔn ka ɖè? Owe-Wiwe Glẹki Tọn Lẹ—Lẹdogbedevomẹ Aihọn Yọyọ Tọn wɛ, dó gbè éɖesunɔ tɔn Bengali mɛ. Nǔ ɖokpo ɔ wɛ mɛ gegě ɖɔ hwenu e è ɖè Lẹdogbedevomẹ Aihọn Yọyọ Tọn tɔ́n dó gbè yetɔn mɛ é. Amɔ̌, a ko kan nǔ e Biblu enɛ lɛ lilɛ lilɛ dó gbè ɖevo mɛ bo lɛ́ ɖetɔ́n nɔ byɔ lɛ é byɔ hwiɖée kpɔ́n à?

Jɛ nukɔn hwɛ̌ ɔ, è nɔ sɔ́ azɔ̌ d’así nú gbɛ̌ta lilɛdógbeɖevomɛ tɔn ɖé ɖò alixlɛ́mɛ Wěɖegbɛ́ Nǔwlanwlán Tɔn Hagbɛ̌ Alixlɛ́mɛtɔ́ ɔ tɔn glɔ́. Táan nabi é ka nɔ byɔ ɖò gbɛ̌ta ɖé sí bonu é na lilɛ Biblu ɔ dó gbè ɖevo mɛ? Nicholas Ahladis e nɔ w’azɔ̌ xá Azɔ̌xɔsa Lilɛdógbeɖevomɛ tɔn e ɖò Warwick ɖò New York é tinmɛ ɖɔ: “Nǔ gegě wɛ è nɔ kpɔ́n, kaka jɛ lilɛdógbeɖevomɛtɔ́ nabi e ɖò azɔ̌ ɔ na wà wɛ lɛ é, lee gbè ɔ ɖó gǒflɛ́mɛ sɔ́ é kpo lee nǔxatɔ́ lɛ nɔ mɔ nukúnnú jɛ lee nǔ lɛ ɖè gbɔn ɖò Biblu sín táan mɛ é mɛ gbɔn é kpo jí. È nɔ lɛ́ kpɔ́n ɖɔ vogbingbɔn ka ɖò gbè ɔ mɛ sín xá ɖé mɛ jɛ xá ɖé mɛ à jí. Enyi è má ɖó zɛ̌nzɛ̌n ɔ, é nɔ byɔ xwè ɖokpo jɛ atɔn ɖò gbɛ̌ta ɖé sí cobɔ é na lilɛ Owe-Wiwe Glẹki Tọn Lẹ ɔ kɛɖɛ dó gbè ɖevo mɛ, bo ka nɔ byɔ xwè ɛnɛ alǒ hú mɔ̌ cobɔ é na lilɛ Biblu ɔ blebu dó gbè ɖevo mɛ. Nú è na lilɛ dó tókúnɔgbe mɛ ɔ, é tlɛ nɔ ɖu hwenu hú mɔ̌.”

Gɔ́ nú gbɛ̌ta lilɛdógbeɖevomɛ tɔn ɔ, è lɛ́ ɖó hudo mɛ ɖevo lɛ tɔn bá lilɛ Biblu ɔ dó gbè ɖevo mɛ. È ɖó hudo nǔxatɔ́ e gosin xá vovo mɛ, bo ka sɔ́ yeɖée jó kpo jlǒ kpo é ɖé lɛ tɔn, bonu ye na ɖɔ nǔ e ye lin dó lilɛdógbeɖevomɛ ɔ wu é. Hweɖelɛnu ɔ, ye sixu gosin tò vovo mɛ. Nǔ e wu ye ɖ’ayi bo ɖɔ lɛ é nɔ d’alɔ lilɛdógbeɖevomɛtɔ́ lɛ bonu lilɛdógbeɖevomɛ ɔ na sɔgbe, ɖò wɛn, bo lɛ́ ɖò gbɛ̀. È na ɖɔ ɔ, lee mɛ e nɔ kplɔ́n azɔ̌ mɛ ɖò Biblu lilɛ lilɛ dó gbè ɖevo mɛ kpáxwé, bo nɔ nɔ Afrique du Sud é ɖé ɖɔ gbɔn é ɔ, “lilɛdógbeɖevomɛtɔ́ lɛ nɔ mɔ ɖɔ azɔ̌ kpinkpɛn ɖé wɛ emi ɖó bo na wà nú Jehovah kpo mɛ e nɔ xà Xó tɔn lɛ é kpo.”

Nú è fó lilɛdógbeɖevomɛ Biblu ɔ tɔn ɔ, è ɖó na zín, bo lɛ́ dó akpa na. Bo na dó kpé enɛ wu ɔ, é hwe bǐ ɔ, wemazínxɔsa lɛ nɔ zán “ajɔxanú” wǒ elɔ lɛ: wema, wemasin (encre), nǔ e è nɔ zán dó bló akpa lɛ é, kɔ́lu, akpa ɔ sín nɛgbé, nǔ e è nɔ tɛ́dó akpa ɔ xomɛ é, kan e nɔ gbɔn Biblu ɔ xomɛ lɛ é, kan tlitli e wu è nɔ tɔ̀ wema ɔ dó é, nǔ e nɔ gbɔn akpa ɔ sín xomɛ ɖò nɛgbé é, kpo azɔ̌wanú e nɔ d’alɔ bɔ è nɔ blá Biblu ɔ ɖó bǔ é kpo. Ðò 2019 ɔ, ɖɔ̌la Amɛlika tɔn livi 20 jɛji wɛ è zán dó azɔ̌wanú enɛ lɛ kɛɖɛ tamɛ, bo na dó sɔnǔ nú Biblu ɔ. Mɛ e nɔ wà azɔ̌ ɖò wemazínxɔsa mǐtɔn lɛ é w’azɔ̌ nú ganxixo 300 000 jɛji ɖò xwè enɛ mɛ, bo na dó sɔnǔ nú Biblu lɛ lobo sɛ́ ye dó.

Etɛwu è ka zán hwenu kpo akwɛ kpo dó azɔ̌ enɛ lɛ takúnmɛ sɔmɔ̌? Joel Blue e nɔ wà azɔ̌ ɖò azɔ̌xɔsa mǐtɔn e nɔ kpé nukún dó wemazínzín wu gbɔn gbɛ̀ ɔ bǐ mɛ é ɖɔ: “Biblu wɛ nyí wema e ɖò taji hugǎn ɖò wema e mǐ nɔ sɔnǔ na lɛ é mɛ é. Enɛ wu ɔ, mǐ ba ɖɔ lee é cí é ni wlí yɛ̌yi nú Mawu e mǐ nɔ sɛn é kpo wɛn e mǐ nɔ jlá é kpo.”

Gɔ́ nú Lẹdogbedevomẹ Aihọn Yọyọ Tọn e mǐ sɔnǔ na nú mɛ bǐ kpaa é ɔ, mǐ lɛ́ sɔnǔ nú ɖevo lɛ nú mɛ ɖěɖee ɖó hudo bǔnɔ lɛ é. Ði kpɔ́ndéwú ɔ, Lẹdogbedevomẹ Aihọn Yọyọ Tọn e è sɔnǔ na ɖó nukúntɔ́nnɔ lɛ sín nǔwlanwlán lɔ jí é tíìn dó gbè wǒ mɛ. É sixu byɔ ganxixo tantɔn cobɔ è na sɔnǔ nú Biblu ɖé blebu ɖó nukúntɔ́nnɔ lɛ sín nǔwlanwlán lɔ jí, bɔ nú è cá akpáxwé tɔn lɛ ɖě dó ɖě nu ɔ, é hwe bǐ ɔ, é nɔ bló mɛtlu 2,3. Gankpá ɖé lɛ tíìn bɔ wema akpa fɛ́ɖɛ́fɛ́ɖɛ́nɔ lɛ kɛɖɛ wɛ è yí gbè na bɔ ye na byɔ mɛ. Mǐ lɛ́ sɔnǔ nú Biblu bǔnɔ ɖé nú gantɔ́ ɖěɖee nɔ nɔ gankpá enɛ lɛ mɛ lɛ é.

Lẹdogbedevomẹ Aihọn Yọyọ Tọn nɔ wà ɖagbe nú mɛ e nɔ xà lɛ é. Ðǒ ayi nǔ e jɛ ɖò agun e nɔ dó Kiluba-gbè ɖò xá e è nɔ ylɔ́ ɖɔ Tombe ɖò République Démocratique du Congo é mɛ é wu. Tombe ɖó kilomɛtlu 1 700 jɛji dó azinkan tò ɔ tɔn. Biblu ɖokpo géé jɛn ɖò agun ɔ mɛ bo ɖò Kiluba-gbè mɛ bɔ Kúnnuɖetɔ́ lɛ nɔ zán, lobɔ xókwín e è zán ɖ’emɛ lɛ é ko dóxó. Biblu ɖokpo enɛ ɔ jɛn ye nɔ hwé nú yeɖée lɛ bo na dó sixu sɔnǔ nú kplé lɛ. Amɔ̌, sín août 2018 ɔ, Lẹdogbedevomẹ Aihọn Yọyọ Tọn blebu tɔn tɔ́n dó Kiluba-gbè mɛ, bɔ mɛ e ɖò agun ɔ mɛ lɛ é bǐ mɔ.

Nɔví nyɔnu e nɔ dó Allemagne-gbè é ɖé ɖɔ dó Lẹdogbedevomẹ Aihọn Yọyọ Tọn e è vɔ́ jlaɖó ɖò gbè tɔn mɛ é wu ɖɔ: “Un sɔ́ nɔ ɖɔ, é jɛxa ɖɔ má xà Biblu ɖě ǎ. É nyɔ́ wà ɔ, un nɔ kanbyɔ nyiɖée ɖɔ, ‘Hwetɛnu un ka sixu vlɔ́n kan nú xixa tɔn ganji d’eji?’” Gantɔ́ ɖé wlán ɖɔ: “È na Lẹdogbedevomẹ Aihọn Yọyọ Tọn ɖokpo mì, b’ɛ ɖò gbɛzán ce huzu wɛ. Un mɔ nukúnnú jɛ Xó Mawu tɔn mɛ sɔ lě kpɔ́n cobo wá jɛ lilɛdógbeɖevomɛ elɔ xà jí ǎ. Un ba na tuùn nǔ dó Kúnnuɖetɔ́ Jehovah tɔn lɛ wu d’eji kpo lee nyi lɔ na huzu Kúnnuɖetɔ́ ɖé gbɔn é kpo.”

Nǔ ɖěɖee è nɔ na dó sɔnǔ nú Lẹdogbedevomẹ Aihọn Yọyọ Tọn ɔ lɛ é nɔ sù mɛ ɖěɖee nɔ xà lɛ é nukúnmɛ tawun. Wlɛnwín ɖěɖee ɖò donate.jw.org jí lɛ é wɛ è nɔ zán dó na nǔ enɛ lɛ dó azɔ̌ e wà wɛ mǐ ɖè gbɔn gbɛ̀ ɔ bǐ mɛ é tamɛ. É na cɛ nú mi nú alɔhundónanǔmɛ mitɔn.