Nǔ e jɛ nǔgbó nǔgbó bó nɔ hɛn nǔɖiɖi lí dǒ lɛ́ é

Kúnnuɖetɔ́ Jehovah tɔn lɛ́ nɔ ké ya nú nǔɖitɔ́ hǎtɔ́ yětɔn lɛ́ tawun. (1 Piyɛ́ɛ 2:17) Lěe nǔ nɔ cí nú nɔví nyɔ̌nu Tannis, éé nɔ nɔ Kenya é wɛ é nɔ cí nú mǐ mɛ gěgé. É ɖɔ: “Un nɔ yí wǎn ná bó ná tuun lěe nɔví ce vívɛ́ e gbɔn gbɛ ɔ bǐ mɛ lɛ́ é ɖe gbɔn é.” Nɛ̌ Tannis kpó Kúnnuɖetɔ́ lǐvi mɔ̌kpán ɖěvo lɛ́ kpó ka nɔ wa gbɔn bó nɔ tuun nǔ e ɖo jijɛ wɛ lɛ́ é? Sín 2013 ɔ, mǐ kpé wú bó ɖo mɔ̌ wa wɛ gbɔn nǔ e ɖo akpáxwé Nǔ e jɛ lɛ́ é sín agbasá glɔ́ ɖo tɛn Ɛntɛnɛ́ti tɔn mǐtɔn jw.org jí lɛ́ é xixa gblamɛ.

Ðo Nǔ e jɛ lɛ́ é sín agbasá ɔ, è nɔ ɖó gbe ɖejidéwú lɛ́ dó Kúnnuɖetɔ́ Jehovah tɔn lɛ́ wú, dó xóta lěhun lɛ́ jí: Biblu ɖiɖetɔ́n, sɔhɛnmɛzɔ́, tuto xɔgbígbá tɔn lɛ́ kpó nǔ tají ɖěvo e jɛ lɛ́ é kpó. É nɔ lɛ́ ɖɔ xó nú mǐ dó nɔví súnnu kpó nɔví nyɔ̌nu kpó mǐtɔn ɖěɖěe è wlí dó ganmɛ ɖó nǔɖiɖi yětɔn wú lɛ́ é wú. Nǔ e jɛ bó dó wǔsyɛ́n lanmɛ nú mɛ bó kúnkplá nǔjlájlá bǔnɔ lɛ́ kpó Flǐn bíbló kpó lɛ́ é lɔmɔ̌ nɔ ɖo Nǔ e jɛ lɛ́ é sín agbasá. Mɛ̌ mɛ̌ e ka nɔ ba xóta yɔ̌yɔ́ énɛ́ lɛ́? Nɛ̌ è ka nɔ sɔ́ nǔ nú xóta énɛ́ lɛ́ gbɔn?

Ayi ɖíɖó nǔ e jɛ lɛ́ é wú kpó gbe yětɔn ɖíɖó kpó

Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo hɔ̌nkan gbɛ ɔ tɔn mǐtɔn é wɛ nɔ kpé nukún dó Nǔ e jɛ lɛ́ é sín agbasá wú. Azɔ̌xɔsá énɛ́ nɔ wa azɔ̌ ɖo alixlɛ́mɛ Wěɖegbɛ́ titoblónúnǔtɔ́ lɛ́ tɔn Hǎgbɛ́ alixlɛ́mɛtɔ́ ɔ tɔn glɔ́. Nɔví súnnu kpó nɔví nyɔ̌nu kpó 100 jɛjí wɛ nɔ w’azɔ̌ ɖo Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo hɔ̌nkan gbɛ ɔ tɔn mǐtɔn é, bɔ gěgé yětɔn nyí mɛɖéezéjótɔ́ e ɖo zɔ lɛ́ é. Nǔwlántɔ́ lɛ́, dobanúnǔtɔ́ lɛ́, desɛ́ɛnɖetɔ́ lɛ́ kpó lǐlɛ́dógbeɖévomɛtɔ́ lɛ́ kpó ɖo yě mɛ. Mɛ ɖěvo lɛ́ nɔ ɖɔ xó ɖó kpɔ́ xá axɔ́súzɔ́watɔ́ lɛ́, akɔwé lɛ́, mɛ̌si lɛ́ kpó xójɛɖotozɔ́watɔ́ lɛ́ kpó. Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo alaxɔ lɛ́ mɛ gbɔn gbɛ ɔ bǐ mɛ lɛ́ é 80 jɛjí wɛ nɔ d’alɔ Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo hɔ̌nkan gbɛ ɔ tɔn mǐtɔn é ɖo azɔ̌ ɔ kɔn.

Bó ná dó sɔ́ nǔ nú nǔ e jɛ lɛ́ é sín xóta ɖé ɔ, Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo hɔ̌nkan gbɛ ɔ tɔn mǐtɔn é nɔ wa azɔ̌ alɔ ɖo alɔ mɛ xá Azɔ̌xɔsá mɔjɛmɛ e kan mɛ bǐ lɛ́ é tɔn, éé ɖo alaxɔ lɛ́ mɛ lɛ́ é. Ényí nɔví lɛ́ wá gbeta ɔ kɔn ɖɔ tan ɖé nyɔ́, bɔ è hɛn ɔ è ná kpi ɔ, yě nɔ ba do nú nǔ dó xóta ɔ jí, bó nɔ xo mɔjɛmɛ lɛ́ kplé. Nǔ kinkanbyɔ́ mɛ lɛ́ kpó xó ɖiɖɔ xá akɔwé lɛ́ kpó sixú ɖ’é mɛ. Ényí yě xo mɔjɛmɛ lɛ́ kplé gúdo ɔ, è nɔ wlán nǔ e jɛ lɛ́ é sín xóta ɔ, jlá ɖó, vɔ́ xa, sɔ́ fɔtóo lɛ́ d’é mɛ, bó nɔ sɛ́ dó Wěɖegbɛ́ titoblónúnǔtɔ́ lɛ́ tɔn bónú é ná ná gbe.

Xógbe nǔsumɛnukúnmɛ tɔn lɛ́

Nɛ̌ nǔ ka nɔ cí nú Mawusɛntɔ́ hǎtɔ́ mǐtɔn lɛ́ dó akpáxwé Nǔ e jɛ lɛ́ é sín agbasá wú? Cheryl e nyí nɔví nyɔ̌nu ɖé bó nɔ nɔ Philippines é ɖɔ: “Un nɔ yí wǎn nú nǔ e jɛ bó kúnkplá tutoblónúnǔ Jehovah tɔn kpó togun tɔn kpó lɛ́ é xixa dó bɛ́ kéze ce ná.”

Nǔxatɔ́ gěgé ɖɔ xó dó vogbingbɔn e yě mɔ ɖo Nǔ e jɛ lɛ́ é sín agbasá, éé ɖo jw.org jí é kpó xójɛɖoto ɖěvo lɛ́ kpó tɛ́ntin é wú. Tatiana, éé nɔ nɔ Kazakhstan é ɖɔ: “É su nukún ce mɛ ɖɔ un sixú gán jɛ akpáxwé nǔ e jɛ lɛ́ é, éé ɖo jw.org jí é wú. Akpáxwé ɖejidéwú ɖé wɛ, bó nɔ ɖɔ nǔ lɛ́ lěe yě ɖe gbɔn é.” Nɔví nyɔ̌nu ɖé nɔ nɔ Mexique bó nyí Alma, lobo ɖɔ: “Nú è sɔ́ akpáxwé Nǔ e jɛ lɛ́ é sín agbasá ɔ jlɛ́ dó nǔ nyanya e mǐ nɔ se ɖo xójɛɖoto lɛ́ mɛ lɛ́ é wú ɔ, Nǔ e jɛ lɛ́ é sín agbasá ɔ nɔ dó wǔsyɛ́n lanmɛ nú mɛ tawun.”

Akpáxwé ɖejidéwú ɖé kpowun wɛ Nǔ e jɛ lɛ́ é sín agbasá ɔ nyí ǎ, loɔ, é nɔ lɛ́ hɛn nǔɖiɖi mɛtɔn lí dǒ. Bernard, éé nɔ nɔ Kenya é ɖɔ: “Nǔ e jɛ lɛ́ é sín agbasá ɔ d’alɔ mì bɔ un nɔ mɔ nɔví súnnu kpó nɔví nyɔ̌nu kpó e gbɔn gbɛ ɔ bǐ mɛ lɛ́ é dó mɔ xwédo ce, yě ná bó nɔ nɔ fí ɖěbǔ ɔ nɛ́. Un nɔ kpé wú bó nɔ ylɔ́ nyǐkɔ yětɔn, bó nɔ lɛ́ ɖɔ ninɔmɛ e mɛ yě ɖe tawun lɛ́ é ɖo ɖɛ ce lɛ́ mɛ.” Nɔví nyɔ̌nu e nɔ nyí Bybron, bɔ é lɔ nɔ nɔ Kenya é ɖɔ: “Hweɖébǔnu e un mɔ xóta ɖé bɔ é ɖɔ ɖɔ è ɖe Biblu tɔ́n dó gbe ɖěvo mɛ é ɔ, é nɔ sɔ́ akpakpa mì! Xóta énɛ́ lɛ́ nɔ flín mì ɖɔ Jehovah kún nɔ ɖe mɛɖé ɖó vo ɖo mɛɖé mɛ ó.”

Nǔ e jɛ lɛ́ é ɖěɖěe ɖɔ xó dó nɔví mǐtɔn e è ɖo ya dó ná wɛ lɛ́ é wú lɛ́ é lɔ tlɛ sixú dó wǔsyɛ́n lanmɛ nú mǐ. Jackline, éé nɔ nɔ Kenya é ɖɔ: “Tamɛ linlin dó akɔ́nkpinkpan yětɔn jí ná hlɔ̌nhlɔ́n nǔɖiɖi ce tawun. Un nɔ tɛ́n kpɔ́n hwebǐnu bó ná tuun nǔ e nɔ d’alɔ yě bɔ yě nɔ dɛ é. Un mɔ ɖɔ nǔ e mɛ lɛ́ nɔ kpɔ́n dó mɔ nǔ kléwún kléwún lɛ́ é, ɖi ɖɛxixo, Biblu xixa kpó hanjiji ɖésú kpó ɖo tají tawun bónú nɔví mǐtɔn lɛ́ ná kpo ɖo hlɔ̌nhlɔ́n mɔ wɛ.”

Nǔ e jɛ lɛ́ é ɖěɖěe nɔ ɖɔ xó dó adla lɛ́ wú lɛ́ é nɔ su nɔví nyɔ̌nu Beatriz, éé nɔ nɔ Costa Rica é nukúnmɛ. É ɖɔ: “Nǔ e jɛ lɛ́ é sín agbasá nɔ zɔ́n bɔ un nɔ mɔ lěe tutoblónúnǔ mǐtɔn nɔ yá wǔ sú nǔ e hudó nɔví mǐtɔn lɛ́ é sín do ganjí kpó wǎnyíyí kpó gbɔn é. Énɛ́ zɔ́n bɔ un kú d’é jí ɖɔ tutoblónúnǔ Jehovah tɔn wɛ.”

É su nukún mǐtɔn mɛ tawun ɖɔ mǐ nɔ se nǔ yaɖéyaɖé e kúnkplá kplékplé nɔví lɛ́ tɔn mǐtɔn e gbɔn gbɛ ɔ bǐ mǐ lɛ́ é é! Nǔ e mi nɔ ná dó azɔ̌ e mǐ nɔ wa gbɔn gbɛ ɔ bǐ mɛ é takúnmɛ, bɔ mɛ gěgé nɔ ná gbɔn donate.jw.org jí lɛ́ é mɛvo ɔ, nǔ sixú nyí mɔ̌ ǎ. É ná cɛ nú mi nú alɔhundónánǔmɛ mitɔn.