Jezu Klisu: Mɛsiya E Sín Akpá È Dó É

BONU mǐ na dó sixu tuùn Mɛsiya ɔ, Jehovah Mawu gbɔn gbeyiɖɔ tɔn lɛ gègě jí bo na mǐ mɔ jɛ mɛ dó jiji, sinsɛnzɔ́ kpo kú Mɛhwlɛngantɔ́ enɛ e sín akpá è dó é tɔn kpo wu hlɛ́nhlɛ́n. Nǔɖɔɖ’ayǐ Biblu tɔn enɛ lɛ bǐ jɛ dó Jezu Klisu wu. Lee ye jɛ dó wutu tɔn pɛ́ɛ́ bo lɛ́ jɛ hlɛ́nhlɛ́n gbɔn é jiwǔ. Mi nú mǐ ni ba dò nú nǔɖɔɖ’ayǐ e kúnkplá Mɛsiya ɔ sín jiji kpo yɔkpɔvumɛ tɔn kpo é ɖé lɛ.

Gbeyiɖɔ Ezayi ɖɔ ɖ’ayǐ ɖɔ Axɔsu Davidi sín kúnkan mɛ wɛ è na jì Mɛsiya ɔ ɖè. (Isaïe 9:7) Kúnkan Davidi tɔn mɛ wɛ è jì Jezu ɖè nugbǒ.—Matie 1:1, 6-17.

Gbeyiɖɔ Mawu tɔn ɖevo e nɔ nyí Mika é ɖɔ ɖ’ayǐ ɖɔ è na jì vǐ enɛ ɖò “Bɛteleyɛmu Eflata,” lobɔ é na wá huzu axɔsu ɖé. (Mika 5:2) Hwenu e è jì Jezu é ɔ, toxo wè wɛ ɖò Izlayɛli bo nɔ nyí Bɛteleyɛmu. Ðokpo ɖò Nazalɛti kpá ɖò tò ɔ sín taligbé, bɔ wegɔ ɔ ɖò Jeluzalɛmu kpá ɖò Juda. Bɛteleyɛmu e ɖò Jeluzalɛmu kpá é wɛ è nɔ ylɔ ɖɔ Eflata ɖ’ayǐ. Toxo enɛ mɛ wɛ è jì Jezu ɖè, lee nǔɖɔɖ’ayǐ ɔ ɖɔ gbɔn é pɛ́ɛ́!—Matie 2:1.

Xóɖɔɖ’ayǐ Biblu tɔn ɖevo ɖɔ ɖɔ è na ylɔ Vǐ Mawu tɔn ɔ “sín Ejipu.” Hwenu e Jezu ɖò kpɛví é ɔ, è sɔ́ ɛ yì Ejipu. È kplá ɛ sín dɔ̌n ɖò kú Elodu tɔn gudo. Hǔn, nǔ e è ɖɔ ɖ’ayǐ é jɛ.—Hoshéa 11:1; Matie 2:15.

Ðò gbàví “Nǔɖɔɖ’ayǐ e kúnkplá Mɛsiya ɔ é Ðé Lɛ” jí é mɛ ɔ, wemafɔ e è slɛ́ dó “Nǔɖɔɖ’ayǐ” glɔ lɛ é na mɔ jɛ mɛ dó Mɛsiya ɔ wu hlɛ́nhlɛ́n. Kɛnklɛn bo sɔ́ wemafɔ enɛ lɛ jlɛ dó ɖěɖee è slɛ́ dó “Jijɛ Tɔn” glɔ lɛ é wu. Mɔ̌ biblo na zɔ́n bɔ nùɖiɖi e a ɖó ɖɔ Xó Mawu tɔn nyí nugbǒ é na lidǒ.

Hwenu e a na ɖò wemafɔ enɛ lɛ gbéjé kpɔ́n wɛ é ɔ, hɛn dó ayi mɛ ɖɔ è wlan nǔɖɔɖ’ayǐ lɛ é ɔ, xwè kanweko mɔkpan ko wá yì có è wá jì Jezu. Jezu ɖɔ: “Nǔ e è ko wlan dó wu ce ɖò Mɔyizi sín sɛ́n ɔ mɛ, bo wlan dó wu ce ɖò gbeyiɖɔ Mawu tɔn lɛ sín wema mɛ, bo lɛ́ wlan dó wu ce ɖò hanwema lɛ mɛ ɔ bǐ ɖó na jɛ.” (Luka 24:44) Biblu xlɛ́ céɖécéɖé ɖɔ ye jɛ nugbǒ, lobo jɛ hlɛ́nhlɛ́n.