Huzu Kpannukɔn Awovi kpo Mɔ Tɔn lɛ Kpo

1, 2. Mɛ̌ mɛ̌ é baptɛm sín hwenu lɛ ka nɔ víví na?

ENYI a ɖò Jehovah sɛ̀n wɛ dìn é ɔ, xwè ko jɛ ɔ, a na ko ɖótó xóɖiɖɔ baptɛm tɔn gègě ɖò kpléɖókpɔ́ lɛ jí. É ɖò mɔ̌ có, hweɖebǔnu e a ɖò nǔwiwa mɔhun lɛ tɛnmɛ bo mɔ bɔ mɛ e ja baptɛm bló gbé lɛ é site bo na xlɛ́ ɖɔ emi ko ɖò gbesisɔmɛ é ɔ, xomɛ nɔ hun we. Hwe enɛ lɛ nu ɔ, kpléɖókpɔ́watɔ́ lɛ nɔ ɖó awǎjijɛ ɖaxó ɖé, bɔ alɔxixo kpo ayi bǐ kpo nɔ jɛ túnú tɔn. Ðasin sixu wá yì dó we hwenu e a mɔ bɔ gbɛtɔ́ gbɛ̌nu ɖevo ko lɛ́ xlɛ́ ɖɔ emi ɖò Jehovah sín akpáxwé é. Kpɔ́n lee xomɛ nɔ hun mǐ sɔ hwe mɔhun lɛ nu é!

² Azɔn klewun ɖé jɛn mǐdɛɛ lɛ sixu mɔ bɔ è bló baptɛm ɖò xwè ɖé mɛ ɖò xá mǐtɔn mɛ, amɔ̌, è jɔwu wɛnsagun lɛ bɔ yedɛɛ lɛ nɔ mɔ azɔn gègě. Enyi ye mɔ bonu gbɛtɔ́ afatɔ́n donu mɔkpan gbɔn gbɛ̀ ɔ bǐ mɛ ɖò gigɔnú tutoblonunu Jehovah tɔn e nukún nɔ mɔ é wɛ ɖò aklunɔzán gbla ɖokpo ɖokpo mɛ ɔ, kpɔ́n lee ‘awǎ e ye nɔ jɛ dó ta yetɔn mɛ ɖò jixwé é’ na nɔ syɛn sɔ́ é! (Luki 15:7, 10) Enyi wɛnsagun lɛ mɔ nukɔnyiyi enɛ ɔ, é ɖò wɛn ɖɔ xomɛ nɔ hun ye!​—Ajée 2:7.

“AWOVI Ɔ ÐÒ LƐLƐ̌ . . . WƐ KINNIKINNI E ÐÒ ADǍN JÍ É ÐƆHUN”

3. Etɛwu Satáan ka ɖò lɛlɛ̌ wɛ “kinnikinni e ɖò adǎn jí é ɖɔhun”? Etɛ é ka jló na wà?

³ Amɔ̌, nùɖíɖó gbigbɔ mɛ tɔn ɖevo lɛ tíìn bɔ xomɛ nɔ wlí ye ɖò baptɛm enɛ lɛ hwenu. Enyi Satáan kpo awovi lɛ kpo mɔ bonu gbɛtɔ́ afatɔ́n mɔkpan lɛkɔ sín gbɛ̀ gblègblé elɔ mɛ ɔ, xomɛ nɔ sìn ye. Nugbǒ wɛ, ɖó Satáan flé nu ɖɔ wanyiyi adodwé kún nɔ sísɛ́ gbɛtɔ́ lɛ ɖebǔ bonu ye na sɛ̀n Jehovah ó, lé mɛ ɖě kún na nɔ gbeji ɖò mɛtɛnkpɔn syɛnsyɛn mɛ ó. (Xà Jɔbu 2:4, 5.) Hweɖebǔnu e mɛɖé zé éɖée jó nú Jehovah é ɔ, enɛ nɔ xlɛ́ ɖɔ Satáan nyí adingbannɔ. É nɔ cí ɖɔ é ɖu tómɛ afatɔ́n mɔkpan ɖò aklunɔzán gbla lɛ bǐ mɛ. Nǔ e wu é nɔ “ɖò lɛlɛ̌ . . . wɛ kinnikinni e ɖò adǎn jí é ɖɔhun, bo ɖò mɛ e é na vún ɖu ɔ ba wɛ” é nɛ. (1 Piyɛ́ɛ 5:8) “Kinnikinni” enɛ jló ɖesu bo na vún mǐ ɖò gbigbɔ lixo bo na dó hɛn nǔ gblé dó mǐ wu alǒ bo na tlɛ sɛ́n kàn nú kancica e ɖò mǐ kpo Mawu kpo tɛntin é.​—Ðɛhan 7:2, 3; 2 Timɔtée 3:12.

4, 5. (a) Ali taji wè tɛ lɛ nu Jehovah ka sú ali dó Satáan ɖè? (b) Ganjɛwu tɛ Klisanwun nugbǒ ɖé ka sixu ɖó?

⁴ Mǐ ɖó kɛntɔ́ e ɖò xomɛsin jí é ɖé có, mǐ ɖó hwɛjijɔ ɖebǔ bo na ɖò xɛsi jí ǎ. Aniwu? Ðó Jehovah sú ali dó “kinnikinni [enɛ] e ɖò adǎn jí é” ɖò ali taji wè nu. Ðětɛ lɛ? Nukɔntɔn ɔ, Jehovah ko ɖɔ ɖ’ayǐ ɖɔ “mɛ wɔbuwɔbu ɖé” na xò “ya ɖaxó” e ja é zlɛ́, ye wɛ nyí Klisanwun nugbǒ lɛ. (Nǔɖexlɛ́mɛ 7:9, 14) Nǔɖɔɖ’ayǐ Mawu tɔn lɛ ka nɔ xó kpò gbeɖé ǎ. Enɛ wu ɔ, Satáan ɖesu tlɛ tuùn ɖɔ alɔ emitɔn kún sixu jɛ togun Mawu tɔn ɔ bǐ wu ó.

⁵ Ali wegɔ e è sù d’é ɔ jɛ wě ɖò xó nugbǒ taji e sunnu gbejinɔtɔ́ hwexónu tɔn lɛ ɖokpo ɖɔ é ɖé mɛ. Gbeyiɖɔ Azalyahu ɖɔ nú Axɔsu Asa ɖɔ: “Nú mi ɖò kpɔ́ xá Mawu Mavɔmavɔ jɛn wɛ ɔ, é lɔ na ɖò kpɔ́ xá mi.” (2 Tan 15:2; xà 1 Kɔlɛntinu lɛ 10:13.) Kpɔ́ndéwú Biblu tɔn gègě xlɛ́ ɖɔ ɖò hwexónu ɔ, Satáan kún kpé mɛsɛntɔ́ Mawu tɔn e sɛkpɔ ɛ majomajo lɛ é ɖě wu bo vún ɖu gbeɖé ó. (Eblée lɛ 11:4-40) Égbé ɔ, enyi Klisanwun ɖé sɛkpɔ Mawu majomajo ɔ, é na kpéwú bo na huzu kpannukɔn Awovi bo tlɛ na ɖu ɖò jǐ tɔn. Enɛ wu wɛ Xó Mawu Tɔn na mǐ ganjɛwu ɖɔ: “Mi lodǒ ɖò awovi nukɔn; enɛ ɔ, é na hɔn yì zɔ nú mi.”​—Jaki 4:7.

‘NǓÐOYƐSWÍMƐ NYANYA LƐ NA FUN AHWAN XÁ WƐ MǏ ÐÈ’

6. Etɛ Satáan ka nɔ wà bo na dó vún Klisanwun lɛ ɖokpo ɖokpo ɖu?

⁶ Satáan sixu ɖu ɖò ahwan ɔ jí ǎ, amɔ̌, enyi mɛɖé ɖò mǐ mɛ bo ma ɖò acéjí ǎ ɔ, é sixu ɖu ɖò jǐ tɔn. Satáan tuùn ɖɔ enyi emi tɛnkpɔn bo vɔ́da nú kancica e ɖò mǐ kpo Jehovah kpo tɛntin é ɔ, emi na kpéwú bo vún mǐ ɖu. Nɛ̌ é ka nɔ tɛnkpɔn bo na wà enɛ gbɔn? É nɔ nya gbě mǐtɔn nukún myamya, nɔ nya gbě mǐ mɛ ɖokpo ɖokpo tɔn, bo nɔ lɛ́ ɖó mɔ nú mǐ. Mǐ ni ɖɔ xó dó wlɛnwín tɔn taji enɛ lɛ jí.

7. Etɛwu Satáan ka ɖò togun Jehovah tɔn gbé nya wɛ nukún myamya?

⁷ Gbě mɛtɔn nyinya nukún myamya. Mɛsɛ́dó Jaan ɖɔ: “Gbɛ̀ ɔ bǐ . . . ɖò Mɛnyanya ɔ sín acɛ mɛ.” (1 Jaan 5:19) Akpágbánúmɛ ɖé ɖò xó enɛ mɛ nú Klisanwun nugbǒ lɛ bǐ. Ðó Satáan sín alɔ ko jɛ gbɛtɔ́ nyanya gbɛ̀ elɔ tɔn lɛ bǐ wu wutu ɔ, é hɛn dìn ɔ, é na sɔ́ ayi tɔn bǐ ɖó mɛ ɖěɖee sún gló é lɛ é jí bo na nya gbě yetɔn ɖò alɔ bǐ mɛ, mɛ enɛ lɛ wɛ nyí togun Jehovah tɔn. (Micée 4:1; Jaan 15:19; Nǔɖexlɛ́mɛ 12:12, 17) É ɖò xomɛsin jí ɖesu, ɖó é tuùn ɖɔ hwenu kpɛɖé jɛn kpò nú emi. Enɛ wu ɔ, é gbló ada nú kɔgbidinúmɛ tɔn lɛ. Gǎn tɔn gudogudo tɔn lɛ dó wɛ é ɖè ɖò égbé bo na hɛn kancica e ɖò mǐ kpo Jehovah kpo tɛntin é gblé.

8. Etɛ ɖɔ wɛ mɛsɛ́dó Pɔlu ka ɖè hwenu e é ɖɔ ɖɔ mǐ ɖó na “fun ahwan” xá nǔɖoyɛswímɛ nyanya lɛ é?

⁸ Gbě mɛ ɖokpo ɖokpo tɔn nyinya. Mɛsɛ́dó Pɔlu gb’akpá nú Klisanwun hàtɔ́ tɔn lɛ ɖɔ: “Nǔɖoyɛswímɛ nyanya e ɖò jinukúnsin kpo ayikúngban kpo tɛntin [lɛ é] . . . wɛ mi ɖó na fun ahwan xá.” (Efɛzinu lɛ 6:12) Xókwin Glɛkigbe tɔn e è lilɛ dó “fun ahwan” é sín tinmɛ wɛ nyí “ɖí xwi,” é wɛ nyí ɖɔ è ni sɛkpɔ mɛɖée bo dó alɔ. Enɛ wu ɔ, Pɔlu zán xógbe enɛ bo dó tɛɖɛ̌ jí ɖɔ mǐ mɛ ɖokpo ɖokpo wɛ na ɖí xwi xá nǔɖoyɛswímɛ nyanya lɛ. Enyi mǐ ɖò tò e mɛ nùɖiɖi ɖiɖó nú yɛ nyanya lɛ gbakpé ɖè é alǒ gbɔ ɔ, mǐ ɖó na flín hwebǐnu ɖɔ hwenu e mǐ zé mǐɖée jó nú Jehovah é ɔ, mǐ bɛ́ ahwanfunfun ɖé nɛ. É hwe bǐ ɔ, bɛ́sín hwenu e Klisanwun ɖokpo ɖokpo zé éɖée jó nú Jehovah é ɖido ɔ, é sɔ́ sixu xò gló ahwan enɛ ǎ. Enɛ wu wɛ Pɔlu mɔ ɖɔ é ɖò dandan ɖɔ emi ni ɖɔ nú Klisanwun Efɛzi tɔn lɛ azɔn gègě ɖɔ ye ni nɔ acéjí.​—Efɛzinu lɛ 6:11, 13, 14.

9. (a) Etɛwu Satáan kpo awovi lɛ kpo ka nɔ zán “mɔ” vovo? (b) Etɛwu Satáan ka nɔ tɛnkpɔn bo na lilɛ jɔ nú linlin mǐtɔn? Nɛ̌ mǐ ka sixu ɖí xwi xá gǎndido tɔn lɛ gbɔn? (Kpɔ́n gbàví ɔ, “Nɔ Acéjí Dó Mɔ Satáan Tɔn lɛ Wu!.”) (c) Mɔ Satáan tɔn tɛ jí mǐ ka na ɖɔ xó dó dìn?

⁹ Mɔɖónúmɛ lɛ. Pɔlu byɔ Klisanwun lɛ ɖɔ ye ni nɔ acéjí dó “mɔ” Satáan tɔn lɛ wu. (Efɛzinu lɛ 6:11) Ðǒ ayi wu ɖɔ é kún nyí mɔ ɖokpo xó wɛ Pɔlu ɖɔ ó. Mɔ vovo wɛ nǔɖoyɛswímɛ nyanya lɛ nɔ zán, lobɔ hwɛ yetɔn ka jɔ. Nùɖitɔ́ e ko ɖu ɖò mɛtɛnkpɔn alɔkpa ɖé jí kpɔ́n é ɖé lɛ ko j’ayǐ ɖò ɖevo nukɔn. Enɛ wu ɔ, Satáan kpo awovi lɛ kpo nɔ ɖ’ayi nùwalɔ mǐ mɛ ɖokpo ɖokpo tɔn wu ganji bo na dó tuùn fí e mǐ vɔ́da ɖè é. Enɛ gudo ɔ, ye nɔ zán gǎnmaɖó gbigbɔ mɛ tɔn ɖebǔ e mǐ sixu ɖó é dó ɖó mɔ nú mǐ. Amɔ̌, xomɛ hun mǐ ɖɔ mǐ hɛn ɔ mǐ na tuùn wlɛnwín Satáan tɔn lɛ gègě, ɖó Biblu kɔ́n sɛ̀ sín ye jí nú mǐ. (2 Kɔlɛntinu lɛ 2:11) Mǐ ko ɖɔ xó dó wlɛnwín Satáan tɔn ɖé lɛ jí ɖò wema elɔ mɛ, ɖi wezun kínkán ɖò agbaza sín nǔ lɛ gudo, gbɛ̌ nyanya dido, kpo agalilɛ kpo. Mǐ ni ɖɔ xó dó ɖevo jí lo, é wɛ nyí awovinúwiwa lɛ.

GBEJIMANƆ WƐ AWOVINÚWIWA NYÍ

10. (a) Etɛ ka nyí awovinúwiwa? (b) Etɛ Jehovah ka nɔ lin dó awovinúwiwa wu? Etɛ hwɛ ka nɔ lin d’ewu?

¹⁰ Enyi mɛɖé nɔ ɖ’alɔ ɖò awovinúwiwa lɛ mɛ ɔ, nǔwaɖókpɔ́ wɛ é ɖè tlɔlɔ xá yɛ nyanya lɛ. Awovinúwiwa ɖé lɛ wɛ nyí, amɔɛkinkan, azě, bǒgbesisa, kpo bònu yiyi nú mɛkúkú lɛ kpo. Mǐ mɔ nǔ jɛ wu ganji ɖɔ awovinúwiwa lɛ nɔ “vɛ́ mɔ” nú Jehovah. (Sɛ́nflínmɛ 18:10-12; Nǔɖexlɛ́mɛ 21:8) Ðó mǐ lɔ ɖó na “gbɛ́ wǎn nú nǔnyanyawiwa” wutu ɔ, é na sɔgbe ɖebǔ ɖɔ mǐ ni ba na dó gbɛ̌ xá nǔɖoyɛswímɛ nyanya lɛ ǎ. (Hlɔmanu lɛ 12:9) Kpɔ́n lee nǔwiwa mɔhun na xlɛ́ ɖɔ mǐ kún nɔ gbeji nú Tɔ́ mǐtɔn jixwé tɔn ɔ Jehovah ó sɔ́ é!

11. Enyi Satáan kpéwú bo dɔn mǐ dó awovinúwiwa lɛ mɛ ɔ, etɛwu é ka na nyí ɖuɖeji ɖaxó ɖé n’i? Jlɛ̌ dó nùɖé wu.

¹¹ É ɖò mɔ̌ có, ɖó alɔɖiɖo ɖò awovinúwiwa lɛ mɛ nyí gbejimanɔ ɖaxó nú Jehovah wutu ɔ, Satáan kudeji bo na dɔn mǐ mɛ habǔ d’emɛ. Hweɖebǔnu e Klisanwun ɖé jɛ mɔ awovinúwiwa tɔn mɛ é ɔ, ɖuɖeji ɖaxó ɖokpo wɛ é nɔ nyí nú Satáan. Etɛwu? Lin tamɛ dó kpɔ́ndéwú elɔ wu: Enyi è kpéwú bo klɔ́ tamɛ nú ahwanfuntɔ́ ɖé bɔ é jó ahwankpá tɔn dó bo jɛ kɛntɔ́ lɛ jí ɔ, xomɛ na hun ahwankpá kɛntɔ́ lɛ tɔn sín ahwangán tawun. É tlɛ sixu ɖi ahwanzɔnlin bo jla blaɖutɔ́ enɛ gbɔn mɛ lɛ bǐ nukɔn ɖi ahwanjiɖuɖe sín lè ɖɔhun, bo na dó cá nú ahwangán ahwankpá e mɛ ahwanfuntɔ́ enɛ ɖè ɖ’ayǐ é tɔn. Mɔ̌ ɖokpo ɔ, enyi Klisanwun ɖé jɛ alɔ ɖó ɖò awovinúwiwa lɛ mɛ jí ɔ, é xlɛ́ ɖɔ éɖesunɔ tuùn gaàn bo gbɛ́ Jehovah lobo zé éɖée ɖó Satáan sín acɛ glɔ nɛ. Lin tamɛ kpɔ́n dó lee xomɛ Satáan tɔn na hun ɖɔ é ni ɖi ahwanzɔnlin bo jla blaɖutɔ́ enɛ ɖi ahwanjiɖuɖe sín lè sɔ é jí! Mɛɖé ka ɖò mǐ mɛ bo jló na na ɖuɖeji mɔhun Satáan wɛ à? Gbeɖé kpɔ́n! Mǐdɛɛ lɛ nyí blaɖutɔ́ ǎ.

NÙKANBYƆ E NƆ ZƆ́N BƆ È NƆ XÒ NǓ KPƆ́N LƐ É ZINZAN

12. Wlɛnwín tɛ Satáan ka nɔ zán bo na dó ɖyɔ linlin e mǐ nɔ ɖó dó awovinúwiwa lɛ wu é?

¹² Enyi mǐ gbɛ́ wǎn nú awovinúwiwa lɛ ɔ, Satáan sixu zán ye bo ɖu ɖò mǐ jí gbeɖé kpɔ́n ǎ. Enɛ wu ɔ, é mɔ ɖɔ emi ɖó na ɖyɔ lee mǐ nɔ lin nǔ kpɔ́n gbɔn é. Gbɔn nɛ̌ é? É nɔ ba wlɛnwín lɛ bo na wlú tamɛ nú Klisanwun lɛ bonu ye mɛ ɖé lɛ na “ylɔ nǔ nyanya ɖɔ nǔ ɖagbe, bo . . . ylɔ nǔ ɖagbe ɖɔ nǔ nyanya.” (Ezayíi 5:20) Bo na dó sixu kpé enɛ wu ɔ, Satáan nɔ zán wlɛnwín e nɔ w’azɔ̌ n’i tawun sín hwexónu lɛ é ɖokpo, é wɛ nyí nùkanbyɔ e na zɔ́n bɔ è na xò nǔ kpɔ́n lɛ é.

13. Nɛ̌ Satáan ka zán nùkanbyɔ e na zɔ́n bɔ è na xò nǔ kpɔ́n lɛ é wá yì gbɔn?

¹³ Ðǒ ayi lee Satáan zán wlɛnwín enɛ gbɔn ɖò hwexónu é wu. É kanbyɔ Ɛvu ɖò jikpá Edɛni tɔn mɛ ɖɔ: “Mawu ɖɔ mi kún ɖó na ɖu atín sínsɛ́n e ɖò jikpá ɔ mɛ lɛ ɖebǔ ó nugbǒ à?” Ðò Jɔbu hwenu ɔ, Satáan kanbyɔ Mawu ɖò kplé wɛnsagun lɛ tɔn ɖé hwenu ɖò jixwé bo ɖɔ: “Yayǎ wɛ Jɔbu ɖò gbeji nú we à?” Gɔ́ na ɔ, hwenu e Jezu Klisu bɛ́ sinsɛnzɔ́ tɔn ayikúngban jí tɔn tlolo é ɔ, Satáan ba nǔɖɔ ɛ bo ɖɔ: “Nú Mawu ví jɛn wɛ a nyí nugbǒ hǔn, ɖegbe nú awinnya elɔ lɛ, nú ye ni huzu nùɖuɖu.” Kpɔ́n bo! Aklunɔzán gblamɛ ayizɛ́n jɛ nukɔn nú xó enɛ ɔ, Jehovah ɖesu ko zán xógbe elɔ nú Jezu: “Vǐ ce vívɛ́ná wɛ mɛ elɔ nyí; xomɛ nɔ hun mì dó wutu tɔn tlala.” Satáan syɛn ta kaka bo zán xógbe ɖokpo enɛ lɛ dó cá Jehovah ko na.​—Bǐbɛ̌mɛ 3:1; Jɔbu 1:9; Matie 3:17; 4:3.

14. (a) Nɛ̌ Satáan ka nɔ zán nùkanbyɔ e na zɔ́n bɔ è na xò nǔ kpɔ́n lɛ é gbɔn ɖò égbé? (b) Etɛ jí mǐ ka na ɖɔ xó dó dìn?

¹⁴ Awovi nɔ zán ayi winniwinni ɖokpo ɔ lɛ ɖò égbé. É nɔ tɛnkpɔn bɔ mɛ lɛ nɔ jɛ nǔ xò kpɔ́n jí bo nɔ mɔ ɖɔ awovinúwiwa kún nyla sɔmɔ̌ ó. É blawu ɖɔ é ko kpéwú bo dɔn nùɖitɔ́ ɖé lɛ bɔ ye jɛ nǔ xò kpɔ́n jí, bo nɔ kanbyɔ yeɖée ɖɔ awovinúwiwa alɔkpa lɛ bǐ jɛn ka nyla dóó à jí. Nǔ e lin wɛ ye ɖè tawun é wɛ nyí ɖɔ: ‘Nugbǒ jɛn ka wɛ à?’ (2 Kɔlɛntinu lɛ 11:3) Nɛ̌ mǐ ka sixu d’alɔ mɛ mɔhun lɛ bonu ye na jla linlin yetɔn ɖó gbɔn? Etɛ mǐ ka sixu wà bo ma na jɛ mɔ Satáan tɔn mɛ ǎ? Bo na dó mɔ xósin nú nùkanbyɔ enɛ lɛ ɔ, akpáxwé gbɛzinzan tɔn wè tíìn bɔ Satáan ko zán ayi winniwinni dó hɛn blí kpo awovinúwiwa lɛ kpo bɔ mǐ na ba dò na. Ye wɛ nyí ayiɖeɖayi kpo lanmɛ na nɔ ganji kpo.

SATÁAN NƆ GBƆN JLǑ MǏTƆN LƐ KPO HUDO MǏTƆN LƐ KPO SÍN YƐKAN MƐ

15. (a) Linlin tɛ mɛ lɛ ka ɖó dó awovinúwiwa lɛ wu ɖò tò ɖěɖee ɖò Elɔpu kpo Taligbé Amɛlika Tɔn kpo lɛ é mɛ? (b) Nɛ̌ linlin e gbɛ̀ ɔ nɔ ɖó dó awovinúwiwa lɛ wu é ka ko wà nǔ dó Klisanwun ɖé lɛ wu gbɔn?

¹⁵ Ya ma ké nú bǒgbesisa, azě, kpo awovinúwiwa alɔkpa ɖevo lɛ kpo fɔ́n bo ɖò jijɛji wɛ ɖò tò ɖěɖee ɖò Elɔpu kpo Taligbé Amɛlika Tɔn kpo lɛ é mɛ. Sinimáa lɛ, wema lɛ, tuto televiziɔn jí tɔn lɛ, kpo ayihun e è nɔ da ɖò ɔdinatɛ́ɛ jí lɛ é kpo nɔ fɔ́n bo nɔ ɖò awovinúwiwa lɛ sɔ́ dó ɖó ayiɖeɖayi sín nǔ na wɛ, ɖɔ ye nyí bíbí sín nǔ, bo kún nɔ lɛ́ hɛn nǔ gblé dó mɛ wu ó. Sinimáa kpo wema e nɔ ɖɔ xó dó awovinúwiwa lɛ jí é ɖé lɛ kpo ko gbakpé kaka bɔ mɛ e sɔ́ yeɖée bǐ jó na lɛ é ko ɖó gbɛ̌ta e nɔ nɔ gudo nú ye lɛ é ayǐ. É ɖò wɛn ɖɔ awovi lɛ ko kpéwú bo bló bɔ mɛ lɛ sɔ́ nɔ sɔ́ nùwalɔ mɔhun lɛ dó mɔ nǔ e na hɛn nǔ gblé dó mɛ wu lɛ é ǎ. Nǔ enɛ ka ko wà nǔ dó Klisanwun lɛ wu wɛ à? É ko hɛn linlin ye mɛ ɖé lɛ tɔn gblé. Ðò ali tɛ nu? Kpɔ́ndéwú tɔn ɖokpo ɖíe: Ee Klisanwun ɖé kpɔ́n sinimáa e ɖɔ xó dó awovinúwiwa lɛ jí é ɖé gudo é ɔ, é ɖɔ: “Un kpɔ́n sinimáa ɔ, amɔ̌, un ka ɖ’alɔ ɖò awovinúwiwa mɛ ǎ.” Etɛwu linlin mɔhun ka nyla?

16. Etɛwu é ka nyla ɖɔ è ni cyan ayiɖeɖayi e ɖɔ xó dó awovinúwiwa wu lɛ é?

¹⁶ Nugbǒ wɛ ɖɔ vogbingbɔn ɖò alɔɖiɖo ɖò awovinúwiwa mɛ kpo awovinúwiwa kpinkpɔn kpo tɛntin, amɔ̌, enɛ ko xlɛ́ ɖɔ awovinúwiwa kpinkpɔn kún nyla ó ǎ. Aniwu? Ð’ayi nǔ elɔ wu: Xó Mawu Tɔn xlɛ́ ɖɔ Satáan kpo awovi tɔn lɛ kpo ɖě kún kpéwú bo na tuùn linlin mǐtɔn lɛ ó.a Enɛ wu ɔ, lee mǐ ko ɖɔ gbɔn wá yì é ɔ, bo na dó tuùn nǔ e lin wɛ mǐ ɖè lɛ é bo ɖ’ayi gǎnmaɖó gbigbɔ mɛ tɔn ɖebǔ e mǐ ɖó é wu ɔ, nǔɖoyɛswímɛ nyanya lɛ nɔ kpɔ́n nǔwiwa mǐtɔn lɛ tlítlí, kaka jɛ ayiɖeɖayi e mǐ nɔ cyan lɛ é jí. Enyi nǔwiwa Klisanwun ɖé tɔn nɔ xlɛ́ ɖɔ é yí wǎn nú sinimáa alǒ wema e ɖɔ xó dó kɛnnɛsi, bǒgbesisa, alǒ awovinúwiwa sín nǔ ɖevo lɛ wu é hǔn, wɛn sɛ́dó awovi lɛ wɛ é ɖè nɛ. Gǎnmaɖó tɔn dó gesí nú ye wɛ é ɖè! Bɔ awovi lɛ sixu gbló ada nú ahwan e fun xá Klisanwun enɛ wɛ ye ɖè é, bo na mɔ tɛn dó zán gǎnmaɖó e éɖesu dó gesí nú ye é dó zin i dɛ́. Klisanwun e yí wǎn nú ayiɖeɖayi e nɔ xlɛ́ bǒgbesisa vaàn lɛ é ɖé lɛ ko ɖó alɔ ɖò awovinúwiwa lɛ mɛ.​—Xà Galatinu lɛ 6:7.

17. Mɔ tɛ Satáan ka sixu zán bo wlí mɛ e ɖò azɔn jɛ wɛ lɛ é?

¹⁷ Enyi nǔ e nɔ jló mǐ ɖò ayiɖeɖayi linu é kɛɖɛ sín yɛkan mɛ wɛ Satáan nɔ gbɔn ǎ, é nɔ lɛ́ gbɔn nǔ e sín hudo mǐ ɖó bɔ lanmɛ mǐtɔn na nɔ ganji é sín yɛkan mɛ. Gbɔn nɛ̌ é? Enyi Klisanwun ɖé ɖò azɔn jɛ wɛ bo ɖò gǎn e wu é kpé é bǐ dó wɛ, bɔ é ma ka ɖò nu ɖebǔ na wɛ ǎ ɔ, é sixu flú bǐ. (Maki 5:25, 26) Satáan kpo awovi lɛ kpo sixu gbɔn yɛkan enɛ mɛ bo ɖó mɔ n’i. Awovi lɛ sixu tɛ́n azinzɔnnɔ ɖé kpɔ́n bɔ ninɔmɛ tɔn na ɖó adohu adohu n’i, lobɔ é na ba nukúnkpédómɛwu e na byɔ ɖɔ è ni zán “awovinúwiwa” lɛ é. (Ezayíi 1:13, NW) Enyi mɔ enɛ w’azɔ̌ ɔ, é sixu vɔ́da nú kancica e ɖò azinzɔnnɔ ɔ kpo Mawu kpo tɛntin é. Ðò ali tɛ nu?

18. Nukúnkpédómɛwu alɔkpa tɛ lɛ Klisanwun ɖé ka ɖó na gbɛ́? Aniwu?

¹⁸ Jehovah gb’akpá nú Izlayɛli-ví ɖěɖee nɔ zán awovinúwiwa lɛ é bo ɖɔ: “Mi sɔ́ alɔ dó jǐ bo ɖò ɖɛ na xò wɛ ɔ, un nɔ ɖó kɔ mi wu ǎ, mi ɖò ɖɛ ɖě ɖò ɖě jí lɛ xò wɛ ɔ, un nɔ ɖótó mi ǎ.” (Ezayíi 1:15) É ɖò wɛn ɖɔ mǐ jló na nyì alɔ nú nǔ ɖebǔ e sixu sú ali dó ɖɛ mǐtɔn lɛ bɔ Jehovah ma sɔ́ na nɔ gudo nú mǐ mɔ̌ ǎ lɛ é hwebǐnu, ɖò taji ɔ, hwenu e mǐ ɖò azɔn jɛ wɛ é. (Ðɛhan 41:4) Enɛ wu ɔ, enyi wlɛnwín e è na zán dó tuùn azɔn e jɛ wɛ Klisanwun nugbǒ ɖé ɖè é alǒ dó gblé azɔn n’i é na byɔ ɖɔ è ni zán awovinúwiwa sín nǔ ɖebǔ ɔ, é ɖó na gbɛ́.b (Matie 6:13) Mɔ̌ mɛ ɔ, é na ganjɛwu ɖɔ Jehovah na kpó ɖò gudo nɔ nú emi wɛ.​—Kpɔ́n gbàví “Awovinúwiwa Jɛn ka Wɛ Dóó À?”

HWENU E TAN ÐĚÐEE KÚNKPLÁ AWOVI LƐ É TÚNFLÁ É

19. (a) Etɛ Awovi ka ko flú mɛ gègě bɔ ye ɖi nǔ na dó hlɔnhlɔn tɔn wu? (b) Tan tɛ lɛ Klisanwun nugbǒ lɛ ka ɖó na nyì alɔ na?

¹⁹ Hwenu e mɛ gègě ma nɔ ɖi xɛsi nú nǔ e hlɔnhlɔn Satáan tɔn sixu wà dó mɛ wu é ǎ ɖò tò ɖěɖee ɖò Elɔpu kpo Taligbé Amɛlika Tɔn kpo lɛ é mɛ é ɔ, nǔ vo sésé wɛ ɖò jijɛ wɛ ɖò akpá gbɛ̀ ɔ tɔn ɖevo lɛ xwé. Ðò fí enɛ lɛ ɔ, Awovi ko flú mɛ gègě bɔ ye nɔ ɖi nǔ ɖɔ é ɖó hlɔnhlɔn zɛ ee é ɖó nugbǒ nugbǒ é wu. Mɛɖé lɛ ɖò ye mɛ bɔ ye ɖò nǔ ɖu wɛ oo, azɔ̌ wà wɛ oo, amlɔ mɛ oo, alǒ nǔ ɖebǔ wà wɛ ye ɖè ɔ, ye nɔ ɖò adohu adohu jí dó nǔɖoyɛswímɛ nyanya lɛ wu. Tan ɖěɖee kúnkplá nǔdabaɖa e awovi lɛ nɔ wà é ko túnflá. Tan mɔhun lɛ kpikpi nɔ víví nú gbɛtɔ́ lɛ hwɛhwɛ, bɔ sise tɔn nɔ jɛji nú mɛ gègě. Mǐ lɔ ka ɖó na ɖ’alɔ ɖò tan mɔhun lɛ jijla mɛ wɛ à? Eǒ, Mawu sɛntɔ́ nugbǒ lɛ nɔ nyì alɔ na, ɖó hwɛjijɔ taji wè wu.

20. Nɛ̌ mɛɖé ka sixu jla linlin Satáan tɔn lɛ vlafo ɖò manywɛ mɛ gbɔn?

²⁰ Nukɔntɔn ɔ, enyi mǐ nɔ jla tan e kúnkplá nǔ e awovi lɛ nɔ wà lɛ é hǔn, gudo nɔ nú Satáan sín nǔ lɛ wɛ mǐ ɖè nɛ. Gbɔn nɛ̌ é? Xó Mawu Tɔn xlɛ́ ɖɔ Satáan kpé nǔ wu bo na jlɛ́ nǔdabaɖa lɛ, amɔ̌, é lɛ́ gb’akpá nú mǐ ɖɔ é nɔ zán “wuntun tɛnmɛ tɛnmɛ” e ma “nyí nugbǒ ǎ” lɛ é bo nɔ lɛ́ “blɛ́ mɛ.” (2 Tɛsalonikinu lɛ 2:9, 10) Ðó Satáan wɛ nyí mɛblɛtɔ́ ɖaxó bǐ ɔ wutu ɔ, é tuùn lee é na lilɛ jɔ nú linlin mɛ ɖěɖee awovinúwiwa nɔ jɛji na lɛ é tɔn gbɔn é, kpo lee é na bló gbɔn bɔ ye na ɖi nǔ nú nǔ e ma nyí nugbǒ ǎ lɛ é gbɔn é kpo. Mɛ mɔhun lɛ sixu ɖi nǔ ɖɔ emi mɔ nùɖé lɛ bo sè nùɖé lɛ, lobo sixu ɖɔ ɖɔ ye nyí nugbǒ. Azǎn ɖò jijɛ wɛ ɔ, tan enɛ lɛ nɔ wá huzu sìn dó nǔ jí, ɖó è nɔ ɖò vìvɔ́ ɖɔ wɛ wutu. Enyi Klisanwun ɖé ɖò tan mɔhun lɛ jla kpé wɛ ɔ, jlǒ Awovi e nyí “adingbannɔ lɛ sín tɔ́” é tɔn wà wɛ é ɖè nɛ. Linlin Satáan tɔn lɛ jla wɛ é ɖè mɔ̌.​—Jaan 8:44; 2 Timɔtée 2:16.

21. Etɛ jí mǐ ka jló na sɔ́ xóɖɔɖókpɔ́ mǐtɔn lɛ junjɔn?

²¹ Wegɔ ɔ, enyi Klisanwun ɖé na bo tlɛ ko wà nùɖé lɛ ɖó kpɔ́ xá nǔɖoyɛswímɛ nyanya lɛ wá yì ɔ, é ɖó na ɖó tan e kúnkplá nǔ mɔhun lɛ é kpikpi nú nùɖitɔ́ hàtɔ́ lɛ dó ɖè ayi ɖ’ayǐ nú ye te. Etɛwu? È byɔ mǐ ɖɔ: “Mǐ ni sɔ́ nukún mǐtɔn ɖó Jezu jí; é wɛ jɛ nùɖiɖi mǐtɔn jí; é wɛ na lɛ́ fó.” (Eblée lɛ 12:2) Nugbǒ ɔ, Klisu jí wɛ mǐ ɖó na sɔ́ ayi mǐtɔn ɖó, é nyí ɖó Satáan jí ǎ. É jɛ ɖɔ mǐ ni ɖ’ayi wu ɖɔ hwenu e Jezu ɖò ayikúngban jí é ɔ, é hɛn ɔ é na ɖɔ nǔ gègě nú ahwanvu tɔn lɛ dó nǔ e wu Satáan kpé lɛ é kpo nǔ e wu é ma kpé ǎ lɛ é kpo wu có, é ka kpi tan e kúnkplá nǔɖoyɛswímɛ nyanya lɛ é dó ɖè ayi ɖ’ayǐ nú ye ǎ. É nyɔ́ wà ɔ, Jezu sɔ́ ayi tɔn bǐ ɖó wɛn Axɔsuɖuto ɔ tɔn jí. Enɛ wu ɔ, ɖó mǐ ɖò kpɔ́ndéwú Jezu kpo mɛsɛ́dó lɛ kpo tɔn xwedó wɛ wutu ɔ, mǐ jló na sɔ́ xóɖɔɖókpɔ́ mǐtɔn lɛ junjɔn “azɔ̌ ɖagbeɖagbe e Mawu wà lɛ” é jí.​—Mɛsɛ́dó 2:11; Luki 8:1; Hlɔmanu lɛ 1:11, 12.

22. Etɛ mǐ ka sixu wà bɔ ‘awǎ e è nɔ jɛ dó ta mǐtɔn mɛ ɖò jixwé é’ na syɛn?

²² Nugbǒ wɛ ɖɔ Satáan nɔ zán mɔ vovo, kaka jɛ awovinúwiwa jí, bo na dó hɛn kancica e ɖò mǐ kpo Jehovah kpo tɛntin é gblé. É ɖò mɔ̌ có, enyi mǐ gbɛ́ wǎn nú nǔ e nyí nǔ nyanya é bo zunfan nǔ e nyí nǔ ɖagbe é ɔ, mǐ na na ali ɖebǔ Awovi bonu é na vɔ́da nú kán e mǐ kanɖeji bo na gbɛ́ awovinúwiwa alɔkpa lɛ bǐ é ǎ. (Xà Efɛzinu lɛ 4:27.) Enyi mǐ “nɔte ɖò mɔ e awovi nɔ ɖó nú mɛ lɛ nukɔn” kaka jɛ hwenu e é ma sɔ́ na tíìn ǎ é ɔ, kpɔ́n lee ‘awǎ e è nɔ jɛ dó ta mǐtɔn mɛ ɖò jixwé é’ na syɛn sɔ́ é!​—Efɛzinu lɛ 6:11; Luki 15:7.