Luki 2:14—“Fífá ní tíin ɖo ayǐkúngban jí nú gbɛtɔ́ e sín nǔ nyɔ́ Mawu nukúnmɛ lɛ́”

“Susu nú Mawu ɖo jǐ aga, fífá ní nɔ kpɔ́ xá mɛ ɖěɖěe sín nǔ nyɔ́ Mawu nukúnmɛ lɛ́ é ɖo ayǐkúngban jí.”—Luki 2:14, Biblu gbɛ yɔ̌yɔ́ ɔ tɔn.

“Susu nú Mawu ɖo jǐxwé, fífá ní tíin ɖo ayǐkúngban jí nú gbɛtɔ́ e sín nǔ nyɔ́ Mawu nukúnmɛ lɛ́!”—Luki 2:14, MAWUXÓWÉMA.

Tínmɛ Luki 2:14 tɔn

Susu kpikpa sín xó énɛ́ lɛ́ e wɛnsagun lɛ́ ɖɔ hwenu e è ji Jezu é xlɛ́ ɖɔ mɛ ɖěɖěe ɖi nǔ nú Jezu lɛ́ é sín nǔ sixú nyɔ́ Mawu nukúnmɛ bɔ yě ná ɖó fífá.

“Susu nú Mawu ɖo jǐ aga.” Gbɔn nukɛgbe énɛ́ gblamɛ ɔ, wɛnsagun lɛ́ tɛ ɖɛ̌ jí ɖɔ Mawu wɛ susu lɛ́ bǐ jɛxá. Nukɛgbe ɔ lɛ́ xlɛ́ ɖɔ jiji Jezu tɔn kpó sinsɛnzɔ́ tɔn ayǐkúngban jí tɔn kpó ná kpa susu nú Jexóvaa Mawu. Ði kpɔ́ndéwú ɔ, hwebǐnu wɛ Jezu nɔ sɔ́ Mawu su ɖo hwenu e é ɖo nǔ kplɔ́n mɛ lɛ́ wɛ é, ɖi hwenu e é ɖɔ xó élɔ́ é: “Nǔ e un nɔ kplɔ́n mɛ lɛ́ é nyí nyiɖésúnɔ tɔn ǎ, loɔ, mɛ e sɛ́ mì dó é tɔn wɛ.” (Jaan 7:16-18) Ényí Jezu bló nǔjíwǔ lɛ́ ɔ, hwɛhwɛ ɔ, mɛ e ɖo tɛn tɔn mɛ lɛ́ é nɔ “jɛ susu kpa nú Mawu jí.” (Luki 5:18, 24-26; Jaan 5:19) Kú Jezu tɔn tlɛ kpa susu nú Mawu. É hun ali nú Mawu bónú é ná bló bɔ linlin ɖaxó e é ɖó ɖɔ nǔjlɔ́jlɔ́watɔ́ e yí wǎn nú fífá lɛ́ é ná gɔ́ ayǐkúngban ɔ jí é ná jɛnu.—Bǐbɛ́mɛ 1:28.

“Fífá ní nɔ . . . ayǐkúngban jí.” Fífá énɛ́ byɔ́ nǔ tawun hú ahwan ní ma tíin ó kpowun. Fífá alǒ vivo ɖo ayi mɛ e mɛɖé sixú ɖó é ɖ’é mɛ, ényí nǔ mɛ ɔ tɔn nyɔ́ Jexóva nukúnmɛ ɔ kɛ́ɖɛ́ jɛ́n é ka sixú ɖó fífá alǒ vivo énɛ́. Gbɔn Jezu gblamɛ ɔ, gbɛtɔ́ lɛ́ sixú zun xɔ́ntɔn énɛ́ xá Mawu ɖo fífá mɛ. (Jaki 4:8) Gɔ́ ná ɔ, ɖó Jezu wɛ nyí Axɔ́sú nú Axɔ́súɖuto Mawu tɔn wútu ɔ, é ná hɛn fífá blěbú e ná nɔ ayǐ sɔ́ yi é wá ayǐkúngban ɔ bǐ jí.—Ðɛhan 37:11; Luki 1:32, 33.

“Mɛ ɖěɖěe sín nǔ nyɔ́ Mawu nukúnmɛ lɛ́ é.” Nukɛgbe énɛ́ nɔ dó gesí gbɛtɔ́ ɖěɖěe mɔ fɛ́nú Mawu tɔn, ɖó yě ɖó nǔɖiɖi adodwé ɔ n’i bo lɛ́ ɖó nú Jezu e é sɛ́ dó é wútu lɛ́ é. É nɔ dó gesí xomɛ e Mawu nɔ nyɔ́ dó gbɛtɔ́ lɛ́ bǐ wú ma kan kwín nú walɔ yětɔn kpó lěe yě nɔ lin nǔ gbɔn é kpó é ǎ, mɔ̌ jɛ́n é ma ka nɔ lɛ́ dó gesí xomɛ e gbɛtɔ́ lɛ́ sixú nyɔ́ é ǎ é nɛ́. Biblu ɖé lɛ́, ɖi Bible du Roi Jacques, tínmɛ nukɛgbe énɛ́ bɔ é nyí “xomɛnyínyɔ́ dó gbɛtɔ́ lɛ́ wú.” É ɖo mɔ̌ có, nǔwlánwlán dodó Glɛ̌kigbe tɔn xóxó e wú è ɖeji dó hú gǎn lɛ́ é nɔ gǔdo nú lěe Biblu gbɛ yɔ̌yɔ́ ɔ tɔn kpó Biblu égbé tɔn ɖěvo lɛ́ kpó tínmɛ nukɛgbe ɔ gbɔn é, é wɛ nyí fífá ní tíin ɖo mɛ ɖěɖěe sín nǔ nyɔ́ Mawu nukúnmɛ lɛ́ é tɛ́ntin.

Nǔ e lɛ́ lɛ̌ dó Luki 2:14 lɛ́ é

Luki wěmata 2 ɖɔ xó dó xwe nukɔn nukɔntɔn e Jezu zán ɖo ayǐkúngban jí lɛ́ é wú. Ée è ji Jezu tlóló é ɔ, wɛnsagun ɖé tɔ́n dó lɛ̌ngbɔ́nyitɔ́ ɖěɖěe “nɔ nɔ gle lɛ́ mɛ bo nɔ ɖo lɛ̌ngbɔ́hwan yětɔn lɛ́ cɔ́ wɛ ɖo zǎnmɛ”b lɛ́ é jí. (Luki 2:4-8) Wɛnsagun ɔ dó “wɛn ɖagbe e ná dó awǎjijɛ ɖaxó nú mɛ” é lɛ̌ngbɔ́nyitɔ́ lɛ́ bo ɖɔ: “Égbé ɔ, è ji mɛhwlɛ́ngántɔ́ ɖé nú mi ɖo toxo Davídi tɔn mɛ, é wɛ nyí Klísu Aklúnɔ ɔ.” (Luki 2:9-11) È ɖɔ fí e lɛ̌ngbɔ́nyitɔ́ lɛ́ sixú mɔ vǐ yɛ̌yɛ́ ɔ ɖe é yě, bɔ énɛ́ gúdo ɔ, yě mɔ wɛnsagun wɔ̌búwɔ́bú ɖé ɖo susu kpa nú Mawu wɛ. Ée lɛ̌ngbɔ́nyitɔ́ lɛ́ wá Bɛteleyɛ́mu é ɔ, yě mɔ Mali, Jozɛ́fu, kpó Jezu vǐ yɛ̌yɛ́ ɔ kpó. (Luki 2:12-16) Ée lɛ̌ngbɔ́nyitɔ́ lɛ́ wlí nǔjíwǔ e yě mɔ é ɖɔ gúdo é ɔ, yě lɛ́ kɔ yi lɛ̌ngbɔ́kpó yětɔn lɛ́ kɔn “bo ɖo susu kpa nú Mawu wɛ, lobo ɖo mlǎmlá ɛ wɛ, ɖó nǔ e yě se lɛ́ é kpó nǔ e yě mɔ lɛ́ é kpó” wútu.—Luki 2:17-20.

Kpɔ́n video kléwún élɔ́ bo ná dó mɔ nǔ tawun tawun e jí wěma Luki tɔn ɖɔ xó dó lɛ́ é.