Nǔ E Nǔxatɔ́ lɛ Kanbyɔ lɛ É

Etɛ ɖɔ wɛ mɛsɛ́dó Pɔlu ka ɖè bo ɖɔ: “Ðò sɛ́n ɔ lixo ɔ, un ko kú”?—Ga. 2:19.

▪ Pɔlu wlán ɖɔ: “Ðò Sɛ́n ɔ lixo ɔ, un ko kú. Sɛ́n ɔ ɖesu wɛ ka hu mì, bonu má sixu nɔ gbɛ̀ bo sɛn Mawu.”—Ga. 2:19.

Nǔ e Pɔlu ɖɔ é cá kan xá nǔ taji e xó é ɖɔ nú agun ɖěɖee ɖò tokpɔn Hlɔma tɔn e nɔ nyí Galati é mɛ lɛ é. Adingban-núkplɔnmɛtɔ́ ɖé lɛ ɖò nǔ wà dó Klisanwun ɖé lɛ wu wɛ ɖò finɛ. Adingban-núkplɔnmɛtɔ́ enɛ lɛ nɔ kplɔ́n mɛ ɖɔ, cobonu è na mɔ hwlɛngán ɔ, è ɖó na setónú nú Mɔyizisɛ́n ɔ, ɖò taji ɔ, ee kúnkplá adagbigbo é. Amɔ̌, Pɔlu tuùn ɖɔ Mawu kún sɔ́ ɖɔ ɖɔ nǔɖitɔ́ lɛ ni gbò ada dandan ó. Pɔlu jlɛ́ xó dó xó wu, bo tinmɛ nyi wɛn ɖɔ adingban wɛ nyí nǔkplɔnmɛ enɛ, bo na hlɔnhlɔn nǔɖiɖi e nɔví lɛ ɖó nú vɔsisa gbɛxɔnúmɛ tɔn Jezu Klisu tɔn é.—Ga. 2:4; 5:2.

Biblu ɖɔ nyi wɛn ɖɔ enyi mɛɖé kú ɔ, é kún sɔ́ nɔ tuùn nǔ e ɖò jijɛ wɛ lɛlɛ̌ dó è lɛ é ɖě ó; nǔ enɛ lɛ sɔ́ nɔ ɖɔ nǔ ɖě n’i ǎ. (Nǔt. 9:5) Hwenu e Pɔlu ɖɔ “ɖò Sɛ́n ɔ lixo ɔ, un ko kú” é ɔ, ɖi ɖɔ wɛ é ɖè ɖɔ Mɔyizisɛ́n ɔ kún sɔ́ ɖó acɛ ɖě dó emi jí ó. Pɔlu tuùn ɖɔ gbɔn nǔ e emi ɖi nú vɔsisa gbɛxɔnúmɛ tɔn ɔ é gblamɛ ɔ, emi wá “gbɛ̀ bo [na] sɛn Mawu.”

“Sɛ́n ɔ” zɔ́n bɔ ninɔmɛ Pɔlu tɔn huzu. Gbɔn nɛ̌ é? É tinmɛ ɖò wemafɔ e jɛ nukɔn na lɛ é mɛ ɖɔ, ‘É kún nyí Mɔyizisɛ́n lɛ nyinyi wɛ nɔ zɔ́n, bɔ Mawu nɔ mɔ mɛ dó mɔ hwɛjijɔnɔ na ó. Loɔ, nǔ ɖi nú Klisu Jezu wɛ nɔ zɔ́n, bɔ Mawu nɔ mɔ mɛ dó mɔ hwɛjijɔnɔ na.’ (Ga. 2:16) È na ɖɔ ɔ, Sɛ́n ɔ zɔ́n bɔ è wà nǔ taji ɖé. Pɔlu tinmɛ nú Galatinu lɛ ɖɔ: “È dó Sɛ́n ɔ bonu é na ɖè zinzán e gbɔn vo nú jlǒ Mawu tɔn ɔ xlɛ́; é na nɔ te kaka jɛ hwenu e Ablaxamu-ví e è dó akpá ɔ na ɔ na wá dó é.” (Ga. 3:19) Sɛ́n ɔ xlɛ́ nyi wɛn ɖɔ gbɛtɔ́ hwɛhutɔ́ ɖěɖee ɖó blɔ̌ ɖò wǔ lɛ é kún sixu nyi Sɛ́n ɔ bonu nǔ bǐ vɔ ɖ’ewu ó, bɔ ye lɛ́ ɖó hudo vɔsisa gudogudo tɔn e ma ɖó blɔ̌ ǎ é ɖé tɔn. Enɛ wu ɔ, Sɛ́n ɔ d’alɔ gbɛtɔ́ lɛ bɔ ye tuùn ɖɔ Klisu wɛ nyí “Ablaxamu-ví” e è dó akpá ɔ na é. Enyi mɛɖé ɖi nǔ nú Jezu Klisu ɔ, Mawu sixu mɔ ɛ dó mɔ hwɛjijɔnɔ. (Ga. 3:24) È ylɔ́ Pɔlu ɖɔ hwɛjijɔnɔ, ɖó gbɔn Sɛ́n ɔ gblamɛ ɔ, é wá tuùn Jezu, bo ɖi nǔ n’i. Mɔ̌ mɛ ɔ, “ɖò Sɛ́n ɔ lixo ɔ, [Pɔlu] ko kú,” bo na dó “sixu nɔ gbɛ̀ bo sɛn Mawu.” Sɛ́n ɔ sɔ́ ɖó acɛ ɖě dó jǐ tɔn ǎ, é nyɔ́ wà ɔ, Jehovah wɛ ɖó acɛ dó jǐ tɔn.

Pɔlu ɖè linlin mɔ̌hun ɖé xlɛ́ ɖò wema e é sɛ́dó Hlɔmanu lɛ é mɛ. “Nɔví ce lɛ mi, ɖò Sɛ́n ɔ sín alixo ɔ, mi lɔmɔ̌ ɔ, mi ko kú. Ee mi cá miɖée xá Klisu ɔ, mi ko kú ɖò Sɛ́n ɔ sín alixo. . . . È ko ɖè mǐ sín Sɛ́n ɔ sín acɛ mɛ; mǐ ko kú ɖò sɛ́n enɛ e hɛn mǐ dó hɛn gantɔ́ é sín alixo.” (Hlɔ. 7:4, 6) Ðò wemafɔ enɛ lɛ kpo Galatinu lɛ 2:19 kpo mɛ ɔ, Pɔlu ɖò ɖiɖɔ wɛ ɖɔ è ni kú hwɛhutɔ́ e è ɖó hwɛ na ɖò Sɛ́n ɔ glɔ́ é ɖé ɖɔhun ǎ. É nyɔ́ wà ɔ, lee è na jɛ mɛɖée sí gbɔn é jí ɖɔ xó dó wɛ é ɖè. Sɛ́n ɔ sɔ́ ɖó acɛ ɖě dó é kpo mɛ ɖevo e cí éɖɔhun lɛ é kpo jí ǎ. Nǔɖiɖi e ye ɖó nú vɔsisa gbɛxɔnúmɛ tɔn Klisu tɔn é zɔ́n bɔ ye jɛ yeɖée sí.