Chaîne JW Tɔn E Ðò Satellite Jí É Kpé Fí E Ɛntɛnɛti Ma Ðè Ǎ lɛ É

Ðò sun ɖokpo ɖokpo mɛ ɔ, akpakpa nɔ sɔ́ mǐ dó xóɖiɖɔ kpo video kpo wusyɛn dó lanmɛ nú mɛ tɔn, ee è nɔ ɖetɔ́n ɖò Televiziɔn JW tɔn jí lɛ é kpinkpɔn wu. É ɖò mɔ̌ có, nɔví mǐtɔn e ɖò Aflika lɛ é gegě nɔ sixu kpɔ́n tuto enɛ lɛ ɖò Ɛntɛnɛti jí ǎ. Etɛwu?

Fí gegě ɖò Aflika bo ɖó Ɛntɛnɛti kaka ɖé ǎ. Fí ɖěɖee é ka lɛ́ tíìn ɖè lɛ é ɔ, hwɛhwɛ wɛ é nɔ ɖò dɛ̌dɛ̌ dɛ̌dɛ̌ bló wɛ, alǒ nɔ v’axi tawun. Ði kpɔ́ndéwú ɔ, nukúnkpénuwutɔ́ lɛdo tɔn ɖé ɖò Madagascar bɔ cybercafé ɖé wɛ é wá yí tuto sunmɛ sunmɛ tɔn Televiziɔn JW tɔn ɖé ɖè. Ðɔ̌la 16 wɛ é sú; enɛ hugǎn akwɛ e mɛɖé lɛ nɔ mɔ ɖò aklunɔzán gbla ɖokpo mɛ é!a

Wuvɛ̌ enɛ lɛ bǐ ɖò finɛ có, gbɛtɔ́ livi mɔ̌kpan ɖò Aflika bo sixu ɖu Televiziɔn JW tɔn sín vivǐ dìn, ma zán Ɛntɛnɛti. Gbɔn é?

Sín 2017 ɔ, è ko bló bɔ mɛ ɖěɖee nɔ nɔ Aflika sín tò e ɖò afɔligbé nú Sahara lɛ é mɛ lɛ é na nɔ mɔ Televiziɔn JW tɔn ɔ ɖò satellite jí. È nɔ mɔ nǔ lɛ kpɔ́n ɖ’eji fatáa, b’ɛ ka nɔ lɛ́ wà azɔ̌ ganxixo 24 ɖò 24 jí, azǎn 7 ɖò 7 jí, bo ɖò gbè 16 mɛ.

Bo na dó kpé enɛ wu ɔ, Kúnnuɖetɔ́ Jehovah tɔn lɛ s’axɔ́ bo na dó sixu nɔ xlɛ́ nǔ lɛ gbɔn satellite jí, bɔ è na nɔ mɔ ɖò telée. Satellite e è zán é nɔ w’azɔ̌ gbɔn Aflika sín tò e ɖò afɔligbé nú Sahara lɛ é 35 mɔ̌ mɛ. Ðɔ̌la 12 000 jɛji wɛ mǐ nɔ sú sunmɛ sunmɛ. Sín hweɖenu jɛ hweɖenu ɔ, è nɔ lɛ́ sú akwɛ ɖevo gɔ́ na, bo na dó xlɛ́ nǔwiwa ɖé lɛ tlɔlɔ ɖò chaîne ɖevo sésé jí. Enɛ nɔ zɔ́n bɔ mɛ afatɔ́n mɔ̌kpan nɔ ɖu kpléɖókpɔ́ ɖaxó lɛ, alǒ tuto bǔnɔ ɖěɖee nɔ kúnkplá mɛbakpɔ́n e afɔsɔ́ɖótetɔ́ hɔ̌nkan gbɛ̀ ɔ tɔn mǐtɔn tɔn ɖé nɔ bló nú alaxɔ é sín vivǐ.

Gbɛtɔ́ gegě, kaka jɛ mɛ e ma nyí Kúnnuɖetɔ́ ǎ lɛ é jí nɔ kpɔ́n chaîne JW tɔn ɔ ɖò televiziɔn ɖé jí ɖò xwégbe. É ɖò mɔ̌ có, nɔví mǐtɔn lɛ gegě tíìn bo ɖó akwɛ kaka ɖé, lobo na xɔ nǔ e sín hudo è ɖó, bo na kpɔ́n chaîne enɛ é ǎ. Bo na dó d’alɔ ye ɔ, è sɔnǔ nú nǔ e sín hudo è ɖó bo na mɔ chaîne ɔ lɛ é nú Kpléxɔ Axɔ́suɖuto ɔ tɔn 3 670 jɛji, bonu nɔví sunnu lɛ kpo nɔví nyɔnu lɛ kpo na nɔ kpɔ́n Televiziɔn JW tɔn ɖò finɛ. Akwɛ nabi e nǔ lɛ xixɔ kpo ye sísɛ́dó kpo ɖu é bló ɖɔ̌la 70 mɔ̌, enyi Kpléxɔ Axɔ́suɖuto ɔ tɔn ko ɖó televiziɔn, alǒ yɛwunkɔnnyidǒwu sín mɔ ɖé ɔ nɛ. É ma nyí mɔ̌ ǎ ɔ, azɔ̌wanú e é nɔ byɔ dandan lɛ é blebu sixu v’axi kaka yì ɖɔ̌la 530.

Chaîne enɛ e è sɔnǔ na é sù nɔví sunnu mǐtɔn lɛ kpo nɔví nyɔnu mǐtɔn lɛ kpo nukúnmɛ tawun. Mɛxo agun tɔn ɖé ɖò Cameroun bo ɖɔ: “É cí mana ɖò gbětotló tɛntin ɖɔhun nú xwédo mǐtɔn. ” Odebode, ee nɔví sunnu ɖé ɖò Nigéria é ɖɔ: “Mǐ nɔ kpɔ́n chaîne ɔ azɔn atɔn ɖò aklunɔzán gbla ɖokpo mɛ ɖò xwédo mɛ. Vǐ ce lɛ nɔ ɖò nukún ɖó hwenu enɛ lɛ wɛ hwebǐnu. Ye tlɛ nɔ byɔ ɖɔ mǐ na kpɔ́n chaîne JW tɔn ɔ ɖò hwe ɖevo lɛ nu.” Rose lɔmɔ̌ nɔ nɔ Nigéria, é ɖɔ: “É víví nú mì tawun ɖɔ chaîne JW tɔn e ɖò satellite jí é wá jɛ chaîne e jí un nɔ ko kpɔ́n nǔ e jɛ ɖò tò lɛ é ɖè hwebǐnu ɖ’ayǐ é domɛ. Nú un ɖò nǔ e jɛ ɖò tò lɛ é kpɔ́n wɛ ɔ, nǔ e mɔ wɛ un ɖè lɛ é nɔ zɔ́n bɔ xomɛ nɔ yawǔ sín mì, bɔ hun ce nɔ yì jǐ. Amɔ̌, Televiziɔn JW tɔn nɔ dó wusyɛn lanmɛ nú mì bo nɔ lɛ́ xò hwihwɛ́ ayi ce tawun! É wɛ nyí chaîne e un yí wǎn na hugǎn é. Nyɔna ɖaxó ɖé wɛ bo gosin Jehovah gɔ́n.”

Nukúnkpénuwutɔ́ lɛdo tɔn e nɔ nɔ Mozambique é ɖé ɖɔ ɖɔ ɖò lɛdo e wu emi nɔ kpé nukún dó é mɛ ɔ, è sɔnǔ nú nǔ e na zɔ́n bɔ è na mɔ chaîne ɔ lɛ é dó Kpléxɔ Axɔ́suɖuto ɔ tɔn lɛ mɛ. Nɔví e ɖò agun enɛ lɛ mɛ lɛ é nɔ yawǔ wá, ganxixo ɖokpo, alǒ hú mɔ̌, jɛ nukɔn nú kplé, bo na dó kpɔ́n Televiziɔn JW tɔn gbɔn satellite jí.

Ðò kpléɖókpɔ́ akɔjɔkplé tɔn 2019 tɔn e è bló ɖò Johannesburg, ɖò Afrique du Sud é hwenu ɔ, è zán chaîne ɔ dó bló bɔ mɛ e ɖò xá vovo tɛnnɛ ɖevo lɛ mɛ lɛ é ɖu xóɖiɖɔ taji lɛ, kaka jɛ ɖěɖee nɔví e ɖò Hagbɛ̌ Alixlɛ́mɛtɔ́ ɔ mɛ é ɖé xwlé mɛ lɛ é jí sín vivǐ. Sphumelele, ee nɔ w’azɔ̌ ɖò Azɔ̌xɔsa Televiziɔn tɔn ɖò alaxɔ Afrique du Sud tɔn mɛ é ɖɔ: “Ð’ayǐ ɔ, Ɛntɛnɛti jí wɛ mǐ nɔ xlɛ́ xóɖiɖɔ lɛ gbɔn. Amɔ̌, enɛ nɔ byɔ ɖɔ Ɛntɛnɛti sín jɔhɔn ɔ kún ɖó na nɔ xò ó, bɔ è na lɛ́ xɔ fɔfɛ́ɛ Ɛntɛnɛti tɔn. Chaîne JW tɔn e ɖò satellite jí é ka byɔ akwɛzinzan ɖaxó gboo ǎ, bo lɛ́ ɖó jiɖe.”

Nǔ e mi nɔ hun alɔ dó na dó azɔ̌ e wà wɛ mǐ ɖè gbɔn gbɛ̀ ɔ bǐ mɛ lɛ é takúnmɛ é, wɛ nyí tɔn bɔ nɔví sunnu kpo nɔví nyɔnu kpo mǐtɔn e ɖò Aflika lɛ é gegě sixu kpɔ́n Televiziɔn JW tɔn gbɔn satellite jí. Nǔ e mi zán wlɛnwín vovo e ɖò donate.jw.org jí dó na lɛ é sù nukún mǐtɔn mɛ tawun.