Vǐ lɛ́ kpó alǒkan e è nɔ zán dó yi Ɛntɛnɛ́ti jí lɛ́ é kpó: Akpáxwé 1: Vǐ ce ka ɖó ná ɖó alǒkan e è nɔ zán dó yi Ɛntɛnɛ́ti jí é ɖé wɛ a?

Vǐ e ɖó alǒkan e è nɔ zán dó yi Ɛntɛnɛ́ti jí lɛ́ é sín kɛ́n fɔ́n bó ɖo jijɛjí wɛ. Bɔ yě mɛ gěgé nɔ zán alǒkan yětɔn lɛ́, bó nɔ yi Ɛntɛnɛ́ti jí hwenu e yě ɖo yěɖokpó ɖo xɔnɔnɔ yětɔn lɛ́ mɛ é. Ényí a yí gbe bɔ vǐ towe ɖó alǒkan e è nɔ zán dó yi Ɛntɛnɛ́ti jí é ɖé ɔ, awǒvinú tɛ́ lɛ́ ka ɖ’é mɛ? Le tɛ́ lɛ́ ka ɖ’é mɛ? Táan nabí a ka ɖó ná yí gbe bɔ yě ná nɔ zán alǒkan yětɔn ná ɖo azǎn ɖokpó ɖokpó jí?

• Nǔ e a ɖó ná tuun é

• Nǔ e a ɖó ná kanbyɔ́ é

• Kanbyɔ́ hwiɖésúnɔ mɛtún ɔ ɖɔ émí ka ɖo gbesisɔmɛ a jí

Nǔ e a ɖó ná tuun é

Le lɛ́

• Ayijayǐ nú vǐ lɛ́, fífá ayi mɛ tɔn nú mɛjitɔ́ lɛ́. Bethany nyí vǐnɔ ɖé bó ɖó vǐ e ɖo wǐnnyáwínnyá mɛ é we. É ɖɔ: “Mǐ ɖo gbɛ nyanya ɖé mɛ. É ɖo tají ɖɔ mɛjitɔ́ lɛ́ ní kpé wú bó nɔ tuun fí e vǐ yětɔn lɛ́ ɖe é.”

  Catherine nyí vǐnɔ ɖé. É ɖɔ gɔ́ ná ɖɔ: “Tuto alǒkan jí tɔn ɖé lɛ́ nɔ zɔ́n bɔ a sixú tuun fí e vǐ towe ɖe é. Ényí é ɖo mɔ̌to kun wɛ ɔ, a tlɛ sixú tuun wezun e jí é ɖe é.”

• Alɔdó nú wěmaxɔmɛ sín azɔ̌ lɛ́. Marie nyí vǐnɔ ɖé. É ɖɔ: “È nɔ sɛ́ xwégbezɔ́ e mɛ̌si lɛ́ nɔ ná é dó vǐ lɛ́ gbɔn Ɛntɛnɛ́ti jí, alǒ wlán sɛ́ dó yě, bɔ yě sixú ɖɔ xó xá mɛ̌si yětɔn lɛ́ ɖo ali ɖokpó ɔ nu.”

Awǒvinú lɛ́

• Hwenu gěgé zínzán ɖo alǒkan jí. Ðo kpaa mɛ ɔ, mɛ wínnyáwínnyá lɛ́ nɔ zán hwenu gěgé ɖo alǒkan yětɔn lɛ́ jí. Mɛjitɔ́ lɛ́ ɔ, hwenu e yě nɔ zán ɖo alǒkan yětɔn lɛ́ jí é ka nɔ sukpɔ́ hú hwenu e yě nɔ zán dó ɖɔ xó xá vǐ yětɔn lɛ́ é. Lěe wěɖexámɛtɔ́ ɖé tínmɛ gbɔn é ɔ, ɖo xwedó ɖé lɛ́ mɛ ɔ, mɛ lɛ́ ko húzú “jǒnɔ e nɔ kplé ɖó kpɔ́ gbe bǐ gbe, bɔ ayi yětɔn bǐ ka ɖo macínu tɛnmɛ tɛnmɛ lɛ́ jí lɛ́ é.”a

• Fɔtóo nǔblíblíwiwa tɔn. Sɔgbe kpó nǔlínlɛ́n ɖé kpó ɔ, nú è xo mɛ wínnyáwínnyá lɛ́ bǐ kplé ɔ, yě mɛ vlɔ̌ɖówe jɛjí wɛ nɔ yi tɛn Ɛntɛnɛ́ti tɔn e jí è nɔ xwlé fɔtóo nǔblíblíwiwa tɔn mɛ ɖe é jí ɖo sunmɛ sunmɛ. Énɛ́ kpácá mɛ ǎ, ɖó é nɔ bɔwǔ nú yě tawun bónú yě ná yi Ɛntɛnɛ́ti jí ɖo alǒkan yětɔn lɛ́ jí. William nyí vǐtɔ́ ɖé, bó ɖó vǐ e ɖo wínnyáwínnyá mɛ é we. É ɖɔ: “Ényí mɛjitɔ́ lɛ́ yí gbe bónú vǐ yětɔn ɖó alǒkan e è nɔ zán dó yi Ɛntɛnɛ́ti jí é ɖé hǔn, ɖo manywɛ́ mɛ ɔ, yě hun ali fɔtóo nǔblíblíwiwa tɔn alɔkpa lɛ́ bǐ kpínkpɔ́n tɔn ɖé nú vǐ ɔ nɛ́, bɔ é sixú kpɔ́n ɖo fí ɖěbǔ e é yi é.”

• Kannumɔ nyínyí. Mɛ gěgé nɔ tɛ́ dó alǒkan yětɔn wú zɛ xwé wú. Ényí yě ma mɔ alǒkan yětɔn ǎ ɔ, yě nɔ ɖɔ ɖɔ ado nɔ hu émí, émí kún nɔ tuun nǔ e émí ná wa é ó, bó tlɛ nɔ mɔ ɖɔ lanmɛ émítɔn kún ɖ’é jí ó. Mɛjitɔ́ ɖé lɛ́ ɖ’ayi wú ɖɔ ényí vǐ yětɔn lɛ́ ɖo alǒkan yětɔn lɛ́ jí ɔ, yě kún sɔ́ nɔ sí mɛ ó. Carmen ɖɔ: “Hweɖélɛ́nu ɔ, ényí un jló ná ɖɔ xó nú vǐ súnnu ce ɔ, é nɔ lílɛ́ nukún bó nɔ kpɔ́n mì laan, alǒ é nɔ ɖɔ mɛmasíxó ɖé, ɖó é ba ɖɔ è ní ɖó nǔ e wa wɛ émí ɖe é te ǎ wútu.”

• Awǒvinú ɖěvo lɛ́. Alǒkan zínzán sixú zɔ́n nǔɖɔbamɛ gbɔn Ɛntɛnɛ́ti jí kpó nǔwlánwlán, fɔtóo kpó video kpó ɖěɖěe nɔ ɖɔ xóɖóxámɛ sín xó vaan lɛ́ é sísɛ́ dó mɛ gbɔn alǒkan jí kpó. É sixú dɔn azɔn wá, ɖó lěe è nɔ cí dó zán alǒkan ɔ é, alǒ amlɔmadɔ́ wú. Mɛ wínnyáwínnyá ɖé lɛ́ nɔ zán tuto alǒkan jí tɔn e mɛ è nɔ hwlá nǔ dó, bɔ ényí è mɔ tlóló ɔ è ma nɔ vɛ nǔ dó ǎ é ɖé (application fantôme), ɖi azɔ̌wanú nǔlínlɛ́n tɔn ɖé mɔ̌, dó hwlá nǔ e yě ma ba ɖɔ mɛjitɔ́ yětɔn lɛ́ ní mɔ ǎ lɛ́ é.

  Daniel nyí vǐtɔ́ ɖé, bó ɖó ɖyɔ̌vǐ ɖokpó. É sɛ sin xwe nú nǔ ɔ gbɔn lě: “Alǒkan e è nɔ zán dó yi Ɛntɛnɛ́ti jí é ɖé nɔ zɔ́n bɔ é nɔ nyɔ́ bló bɔ vǐ towe ná mɔ nǔ e ɖo Ɛntɛnɛ́ti jí lɛ́ é bǐ, é sixú nyí nǔ ɖagbe alǒ nǔ nyanya.”

Nǔ e a ɖó ná kanbyɔ́ é

• ‘Vǐ ce ɖó hudó alǒkan e è nɔ zán dó yi Ɛntɛnɛ́ti jí é ɖé tɔn wɛ a?’

  Biblu ɖɔ: “Mɛ e ayi tɔn . . . ɖo te ɔ nɔ lin tamɛ cóbó nɔ wa nǔ.” (Nǔnywɛ́xó 14:15) Hɛn énɛ́ dó ayi mɛ, bó kanbyɔ́ hwiɖée ɖɔ:

  ‘É ka ná nyí nǔnywɛ́nú ɖɔ vǐ ce ní ɖó alǒkan e è nɔ zán dó yi Ɛntɛnɛ́ti jí é ɖé ɖó ayijayǐ alǒ ɖó hwɛjijɔ ɖěvo lɛ́ wú a? Un ka ko lin tamɛ kpɔ́n kpó sɔxwixwe kpó dó le lɛ́ kpó awǒvinú lɛ́ kpó jí a? È ka sixú zán nǔ ɖěvo dó alǒkan e è nɔ zán dó yi Ɛntɛnɛ́ti jí é sín tɛnmɛ a?’

  Todd nyí vǐtɔ́ ɖé. É ɖɔ: “Alǒkan e ma nɔ zán Ɛntɛnɛ́ti ǎ lɛ́ é tíin, bɔ yě nɔ hun ali nú mɛ bɔ è nɔ ɖɔ xó xá vǐ mɛtɔn, alǒ wlán nǔ sɛ́ dó è. É nɔ lɛ́ zɔ́n bɔ è nɔ sɛ akwɛ́ gěgé xwe.”

• ‘Vǐ ce ka ɖo gbesisɔmɛ bó ná dó kɔ azɔ̌ énɛ́ mɛ a?’

  Biblu ɖɔ: “Nǔnywɛ́tɔ́ sín ayixa nɔ zɔ́n bɔ é nɔ wa nǔ ɖagbe.” (Nǔnywɛ́tɔ́xó 10:2) Hɛn énɛ́ d’ayi mɛ, bó kanbyɔ́ hwiɖée ɖɔ:

  ‘Étɛ́ ka zɔ́n bɔ un kú d’é jí ɖɔ un sixú ɖeji dó vǐ ce wú? É ka nɔ vo bó nɔ ɖɔ xó nú mì a? Vǐ ce ka nɔ ɖɔ nǔgbó nú mì hwebǐnu a? Ði kpɔ́ndéwú ɔ, é ka nɔ ɖɔ nǔgbó nú mì dó xɔ́ntɔn tɔn lɛ́ wú a? É ka ko nɔ ɖu ɖo éɖée jí hwenu e é ɖo azɔ̌wanú ɖěvo lɛ́ zán wɛ é káká jɛ telée, tablɛ́ti alǒ ɔdinatɛ́ɛ jí a?’ Serena nyí vǐnɔ ɖé; é ɖɔ: “Alǒkan e è nɔ zán dó yi Ɛntɛnɛ́ti jí é ɖé nɔ nyɔ́ zán tawun, amɔ̌, é sixú lɛ́ nyí awǒvinú ɖaxó ɖé. Lin tamɛ dó azɔ̌ énɛ́ e a sixú sɔ́ dó kɔ jí nú vǐ towe, éé kpo ɖo wǐnnyáwínnyá mɛ tawun é jí é.”

• ‘Un ka ɖo gbesisɔmɛ bó ná wa azɔ̌ énɛ́ a?’

  Biblu ɖɔ: “Vǐ e ɖo kpɛví ɔ, sɔ́ ɛ ɖó ali e jí é ɖó ná nɔ é.” (Nǔnywɛ́xó 22:6) Hɛn énɛ́ dó ayi mɛ, bó kanbyɔ́ hwiɖée ɖɔ:

  ‘Un ka ko tuun nǔ gěgé dó alǒkan jí, bó ná d’alɔ vǐ ce bɔ é ná mɔ nukúnnú jɛ awǒvinú ɖěɖěe é ná nyi alɔ ná lɛ́ é wú a? Un ka tuun lěe è nɔ wa gbɔn bó nɔ sɔ́ dó alɔ e jí é nɔ nɔ, bɔ mɛjitɔ́ lɛ́ nɔ tuun nǔ e wa wɛ vǐ yětɔn lɛ́ ɖe é jí é a? Nɛ̌ un ka sixú d’alɔ vǐ ce gbɔn, bɔ é ná wá gbeta ɖagbe lɛ́ kɔn dó alǒkan zínzán wú?’ Daniel e xó mǐ ɖɔ wá yi é ɖɔ: “Un ko mɔ mɛjitɔ́ gěgé bɔ yě ná alǒkan e è nɔ zán dó yi Ɛntɛnɛ́ti jí é ɖé vǐ yětɔn, bɔ énɛ́ gúdo ɔ, yě sɔ́ nɔ gbéjé lěe vǐ ɔ ɖo zínzán gbɔn wɛ é kpɔ́n ǎ.”

Nǔ tají ɔ: È ɖó ná kplɔ́n azɔ̌ vǐ lɛ́ bónú yě ná zán alǒkan e è nɔ zán dó yi Ɛntɛnɛ́ti jí é ɖé ɖo ali e sɔgbe é nú. Wěma Indistractable ɖɔ: “Jlǒ e è nɔ ɖó bó ná zán azɔ̌wanú énɛ́ lɛ́ zɛ xwé wú é nɔ syɛ́n dín, bónú mǐ ná ɖó nukún ɖɔ vǐ mǐtɔn lɛ́ ná ɖu ɖ’é jí, tají ɔ, alixlɛ́mɛ mɛjitɔ́ lɛ́ tɔn mɛvo.”