Nǔ E Nǔxatɔ́ lɛ Kanbyɔ lɛ É

Ðiɖɔ wɛ xó Mɛsɛ́dó Pɔlu tɔn e ɖò 1 Kɔlɛntinu lɛ 15:29 mɛ é ɖè ɖɔ Klisanwun ɖé lɛ nɔ bló baptɛm dó mɛkúkú lɛ tamɛ hwenɛnu à?

Eǒ, è xà ɖò Biblu, alǒ hwenuxó-wema ɖebǔ mɛ ɖɔ Klisanwun lɛ nɔ bló baptɛm dó mɛkúkú lɛ takúnmɛ ǎ.

Lee è lilɛ wemafɔ enɛ gbɔn ɖò Biblu ɖé lɛ mɛ é zɔ́n bɔ mɛɖé lɛ lin ɖɔ ɖò Klisanwun bǐbɛ̌mɛ tɔn lɛ sín hwenu ɔ, è nɔ bló baptɛm dó mɛkúkú lɛ tamɛ. Ði kpɔ́ndéwú ɔ, Mawuxówema ɔ ɖɔ: “Enyi mɛkúkú lɛ ma nɔ fɔ́n nǔgbo ǎ ɔ, . . . Aniwu ye ka nɔ [bló baptɛm] ɖó ta yetɔn mɛ?”

É ɖò mɔ̌ có, ɖ’ayi nǔ e akɔwé Biblu tɔn we elɔ lɛ ɖɔ é wu. Gregory Lockwood ɖɔ ɖɔ nǔɖe kún ɖò Biblu, alǒ hwenuxó-wema ɖě mɛ, bo xlɛ́ ɖɔ mɛɖé bló baptɛm dó mɛkúkú ɖé takúnmɛ ó. Mɔ̌ ɖokpo ɔ, Gordon D. Fee lɔ wlán ɖɔ: “Tan hwexónu tɔn, alǒ Biblu tɔn ɖě ɖɔ xó dó baptɛm mɔ̌hun wu ǎ. Fí ɖě ɖò Alɛnuwema Yɔyɔ̌ ɔ mɛ bo kɛnu d’ewu ǎ, mɔ̌ jɛn Klisanwun bǐbɛ̌mɛ tɔn lɛ ɖě, alǒ sinsɛn e è wá ɖó ayǐ ɖò kú mɛsɛ́dó lɛ tɔn gudo tlolo é ɖě ma bló ǎ é nɛ.”

Biblu ɖɔ gbè e Jezu ɖè nú ahwanvu tɔn lɛ é, bo ɖɔ: “Mi yì bo kplɔ́n nǔ akɔta lɛ bǐ, bonu ye ni huzu ahwanvu ce. Mi . . . [bló baptɛm] nú ye. Mi kplɔ́n nǔ ye, bonu ye ni setónú nú nǔ e un kplɔ́n mi lɛ bǐ.” (Mat. 28:19, 20) Cobonu mɛɖé na bló baptɛm, bo na huzu ahwanvu ɖé ɔ, é ɖó na kplɔ́n nǔ dó Jehovah kpo Vǐ Tɔn kpo wu, ɖi nǔ nú ye, bo nɔ lɛ́ setónú nú ye. Mɛ e ko kú é sixu wà mɔ̌ ǎ; mɔ̌ jɛn Klisanwun e ɖò gbɛ̀ é ɖé ma ka sixu lɛ́ wà mɔ̌ dó tɛn tɔn mɛ ǎ é nɛ.—Nǔt. 9:5, 10; Jaan 4:1; 1 Kɔ. 1:14-16.

Etɛ ɖɔ wɛ Pɔlu ka ɖè lo?

Mɛ e ɖò Kɔlɛnti é ɖé lɛ gbɛ́ ɖɔ mɛkúkú lɛ kún na fɔ́n sín kú ó. (1 Kɔ. 15:12) Pɔlu yí gbè nú linlin enɛ ǎ. É ɖɔ ɖɔ ‘ayihɔngbe ayihɔngbe ɔ, emi nɔ ɖibla kú.’ Amɔ̌, é nɔ ɖò wuvɛ̌ syɛnsyɛn lɛ mɔ wɛ có, é kánɖeji ɖɔ enyi emi kú gudo ɔ, è na fɔ́n emi dó jixwé, Jezu ɖɔhun.—1 Kɔ. 15:30-32, 42-44.

Mɛ e ɖò Kɔlɛnti lɛ é ɖó na mɔ nǔ jɛ wu ɖɔ Klisanwun yí ami dó ɖè nyínyí nɔ byɔ ɖɔ è ni mɔ wuvɛ̌ ayihɔngbe ayihɔngbe, bo kú cobɔ è na fɔ́n mɛ. Enɛ wu ɔ, hwenu e ye ‘bló baptɛm, bo ɖò bǔ xá Klisu Jezu é ɔ’, ye nɔ lɛ́ “kú kú e Klisu kú” é. (Hlɔ. 6:3) Enɛ wɛ nyí ɖɔ Jezu ɖɔhun ɔ, ye na mɔ wuvɛ̌ lɛ, bo na kú, cobɔ è na fɔ́n ye dó jixwé.

Hwenu e Jezu bló baptɛm, bɔ é ɖó xwè we jɛji gudo é ɔ, é ɖɔ xó elɔ nú mɛsɛ́dó tɔn we: ‘Mi na bló baptɛm wuvɛ̌ tɔn e bló gbé un ja é.’ (Mak. 10:38, 39) Jezu ɖò xó ɖɔ dó baptɛm blobló ɖò sinmɛ wu wɛ ǎ. Ðiɖɔ wɛ é ɖè ɖɔ gbejininɔ tɔn nú Mawu na tɔ́n kɔ dó kú mɛ. Pɔlu wlán ɖɔ mɛ yí ami dó ɖè lɛ na ‘jiya xá Klisu, enɛ ɔ, ye lɔ sixu ɖó mimǎ ɖò susu tɔn mɛ.’ (Hlɔ. 8:16, 17; 2 Kɔ. 4:17) Enɛ wu ɔ, ye lɔ ɖó na kú, bonu è na dó fɔ́n ye dó jixwé.

Hǔn, è sixu lilɛ xó e Pɔlu ɖɔ é gbɔn lě, b’ɛ na sɔgbe: “É ma nyí mɔ̌ ǎ ɔ, etɛ mɛ e ɖò baptɛm bló wɛ, bo na wá kú lɛ é ka na wá wà? Enyi mɛkúkú lɛ ma na fɔ́n nǔgbo ǎ ɔ, etɛwu yeɖesu ka ɖò baptɛm bló wɛ, bo na huzu mɛkúkú?”