Nǔ baɖabaɖa e ahwan nɔ ji lɛ́ é
Nǔ e nɔ wa nǔ dó gbɛtɔ́ lɛ́ wú sɔ ahwan kpó hunnyahunnya kpó é kpítí ǎ. Sɔ́ja lɛ́ kpó toví kpaa lɛ́ kpó wɛ nɔ se xɔxɔ tɔn hú gǎn.
SƆ́JA LƐ́
“È nɔ mɔ bɔ è nɔ ɖo mɛ hu wɛ alǒ ɖo wǔ gblé mɛ wɛ hwɛhwɛ. È nɔ ɖo ayijayǐ mɛ gbeɖé ǎ.”—Gary, Grande-Bretagne.
“Túkpɛ́n wá mɔ mì dó nɛgbé kpó nukúnmɛ kpó, bɔ un mɔ bɔ è hu mɛ gěgé, yɔkpɔ́vú kpó mɛxó kpó bǐ wɛ ɖ’é mɛ. Ahwan nɔ zɔ́n bɔ è sɔ́ nɔ ɖó gbɛtɔ́ hun lanmɛ ǎ.”—Wilmar, Colombie.
“Nú è da tú mɛɖé ɖo nukɔn mɛ tɔn ɔ, nǔ e jɛ é sín yɛ nɔ bú dó mɛ bléwún ǎ. Lěe mɛ ɔ ɖo wǔvɛ́ mɔ wɛ, bo ɖo alě ná wɛ gbɔn é nɔ kpo ɖo tamɛ wá nú mɛ wɛ gbɛmɛ. A sixú wɔn nǔ e a mɔ é gbeɖé ǎ.”—Zafirah, États-Unis.
TOVÍ KPAA LƐ́
“É cí nú mì ɖɔ un kún sɔ́ sixú wá nɔ awǎjijɛ mɛ kpɔ́n ó ɖɔhun. È nɔ ɖo xɛsi jí ɖó gbɛ mɛtɔn wú, loɔ, éé lɛ́ syɛ́n hú mɔ̌ é wɛ nyí ɖɔ è nɔ ɖo xɛsi jí ɖó gbɛ xwédo mɛtɔn tɔn kpó xɔ́ntɔn mɛtɔn lɛ́ kpó tɔn wú.”—Oleksandra, Ukraine.
“È nɔ slɛ́ dó sín gan 2:00 mɛ zǎnzǎn káká jɛ gan 11:00 mɛ gbadanu bá dó yí nǔɖuɖu; hwe énɛ́ lɛ́ nu ɔ, ado nɔ ɖo mɛ hu wɛ, ɖó è nɔ tuun nú túkpɛ́n maɖónukún ɖé ná wá mɔ mɛ ǎ wútu.”—Daler, Tadjikistan.
“Ahwan hu mɛjitɔ́ ce lɛ́. É zɔ́n bɔ un húzú tɔ́cyɔvǐ nɔcyɔvǐ, bɔ mɛɖé ɖe bo ná ɖ’alɔ akɔ́n jí nú mì, alǒ kpé nukún wǔ ye ǎ.”—Marie, Rwanda.
Nǔ baɖabaɖa e ahwan nɔ dɔn wá lɛ́ é ɖo fínɛ́ có, mɛ e xó mǐ ɖɔ wá yi lɛ́ é kpé wú bo mɔ fífá. Gɔ́ ná ɔ, yě lɛ́ kú d’é jí ɖɔ ahwan kpó dǎkaxixo kpó bǐ ná vɔ malínmálín mɛ. Atɔxwɛ élɔ́ ná zán Biblu dó tínmɛ lěe nǔ ná nyí mɔ̌ gbɔn é.