Etɛ ka Nyí Nǔɖɔɖ’ayǐ?

Xósin e Biblu na é

Xó e Mawu sɔ́ d’ayi mɛ nú mɛ é ɖé, alǒ, nǔɖexlɛ́mɛ Mawu tɔn ɖé wɛ è nɔ ylɔ́ ɖɔ nǔɖɔɖ’ayǐ. Biblu ɖɔ ɖɔ “[gbigbɔ mímɛ́] wɛ nɔ sɔ́” xó d’ayi mɛ nú gbeyiɖɔ lɛ, “bɔ ye nɔ ɖɔ xó e Mawu ɖɔ ye ni ɖɔ é.” (2 Piyɛ́ɛ 1:20, 21) Enyi mɔ̌ hǔn, mɛ e Mawu ɖɔ xó na b’ɛ nɔ yì ɖɔ nú mɛ ɖevo lɛ é wɛ è nɔ ylɔ́ ɖɔ gbeyiɖɔ.—Mɛsɛ́dó 3:18.

Nɛ̌ Mawu ka nɔ ɖɔ xó nú gbeyiɖɔ lɛ gbɔn?

Wlɛnwín vovo lɛ wɛ Mawu nɔ zán dó ɖɔ linlin tɔn lɛ nú gbeyiɖɔ lɛ:

• Nǔwlanwlán. Ðò ninɔmɛ ɖé mɛ ɔ, Mawu zán wlɛnwín enɛ dó sɔ́ Sɛ́n Wǒ e é ko wlán lɛ é jó nú Mɔyizi tlɔlɔ.—Tíntɔ́n 31:18.

• Xó ɖiɖɔ nú mɛ gbɔn wɛnsagun lɛ jí. Ði kpɔ́ndéwú ɔ, Mawu zán wɛnsagun ɖé bonu é na kplɔ́n Mɔyizi nǔ e é ɖó na ɖɔ nú Falawɔ́ɔn e nyí Ejipu xɔ́su ɔ é. (Tíntɔ́n 3:2-4, 10) Enyi xógbe e è na zán lɛ é ɖò taji tawun ɔ, Mawu nɔ byɔ wɛnsagun lɛ ɖɔ ye ni ɖɔ xó e emi ɖɔ nú ye é tlɔlɔ; ɖi kpɔ́ndéwú ɔ, é ɖɔ nú Mɔyizi ɖɔ: “Wlǎn xó enɛ lɛ, ɖó xó enɛ lɛ wɛ un na xwedó bo na jɛ akɔ xá hwi kpodo Izlayɛli togun ɔ kpo.”—Tíntɔ́n 34:27.a

• Nǔmimɔ lɛ. Hweɖelɛnu ɔ, Jehovah nɔ bló bɔ gbeyiɖɔ lɛ nɔ mɔ nǔ hwenu e ye ɖò wunzɛn, bɔ ayi yetɔn ɖò te ganji é. (Ezayíi 1:1; Xabakuku 1:1) Ðé lɛ nɔ ɖò gannaganna kaka bɔ mɛ e ɖò nǔ ɔ mɔ wɛ é nɔ ɖ’alɔ ɖ’emɛ. (Luki 9:28-36; Nǔɖexlɛ́mɛ 1:10-17) Ðevo lɛ tíìn bɔ hwenu e è ba mɛɖée kpò é wɛ è nɔ mɔ. (Mɛsɛ́dó 10:10, 11; 22:17-21) Mawu nɔ lɛ́ ɖɔ xó nú gbeyiɖɔ lɛ gbɔn dlɔ̌ mɛ, hwenu e ye ɖò amlɔ dɔ́ wɛ é.—Daniyɛli 7:1; Mɛsɛ́dó 16:9, 10.

• Nǔ sísɔ́ d’ayi mɛ nú mɛ. Mawu nɔ xlɛ́ ali gbeyiɖɔ lɛ sín linlin bo na dó dó wɛn tɔn ye. Linlin enɛ sɔgbe xá xó elɔ é Biblu ɖɔ é: “Nǔ e è wlán dó Mawuxówema ɔ mɛ ɔ, Mawu wɛ sɔ́ bǐ dó ayi mɛ nú mɛ lɛ.” È sixu lɛ́ lilɛ xógbe ‘Mawu sɔ́ d’ayi mɛ nú mɛ’ ɔ dó “Mawu ɖɔ nú mɛ.” (2 Timɔtée 3:16) Mawu nɔ zán gbigbɔ mímɛ́ tɔn, alǒ hlɔnhlɔn e é nɔ sɔ́ dó wà azɔ̌ na é dó ɖɔ linlin tɔn lɛ d’ayi mɛ nú mɛsɛntɔ́ tɔn lɛ. Mawu sín wɛn wɛ, amɔ̌, gbeyiɖɔ lɛ wɛ nɔ cyan xókwín lɛ.—2 Samuwɛli 23:1, 2.

Nǔ e na jɛ ɖò sɔgudo lɛ é kɛɖɛ xó jɛn nǔɖɔɖ’ayi lɛ nɔ ɖɔ hwebǐnu à?

Eǒ, nǔ e na jɛ ɖò sɔgudo lɛ é kɛɖɛ xó wɛ nǔɖɔɖ’ayi Biblu tɔn lɛ nɔ ɖɔ ǎ. Amɔ̌, xó e nɔ gosin Mawu gɔ́n lɛ é gegě nɔ kúnkplá sɔgudo, é na bo ma tlɛ ɖò wɛn ǎ ɔ nɛ. Ði kpɔ́ndéwú ɔ, azɔn mɔ̌kpan wɛ gbeyiɖɔ Mawu tɔn lɛ gb’akpá nú Izlayɛli-ví hwexónu tɔn lɛ dó nǔwalɔ nyanya yetɔn lɛ wu. Akpágbánúmɛ enɛ lɛ kúnkplá nyɔna sɔgudo tɔn lɛ, enyi togun ɔ setónú nú ye ɔ nɛ. Enyi ye ma ka setónú na ǎ ɔ, ye na lɛ́ wá sè xɔxɔ tɔn. (Jelemíi 25:4-6) Sɔgudo Izlayɛli-ví lɛ tɔn na sín ali e ye mlɛ́ é wu.—Sɛ́nflínmɛ 30:19, 20.

Nǔɖɔɖ’ayi Biblu tɔn e ma ɖɔ xó dó sɔgudo wu ǎ lɛ é

• É wá sù hweɖenu bɔ Izlayɛli-ví lɛ byɔ Mawu ɖɔ é ni d’alɔ emi, bɔ Mawu sɛ́ gbeyiɖɔ ɖé dó ye ɖɔ é ni tinmɛ nú ye ɖɔ, ɖó ye gbɛ́ gbè nú emi wutu ɔ, emi kún na d’alɔ ye ó.—Hwɛɖɔtɔ́ lɛ 6:6-10.

• Hwenu e Jezu ɖò xó ɖɔ nú nawe Samalíinu ɖé wɛ é ɔ, é ɖɔ nǔ e é wà wá yì lɛ é n’i. Enyi Mawu ma ka ɖè nǔ enɛ lɛ xlɛ́ ǎ ɔ, é sixu ɖɔ ǎ. Jezu ɖɔ nǔ ɖě dó sɔgudo nawe ɔ tɔn wu ǎ có, nawe ɔ kpɔ́n ɛ dó mɔ gbeyiɖɔ ɖé.—Jaan 4:17-19.

• Hwenu e è ɖò Jezu sín hwɛ ɖɔ wɛ é ɔ, kɛntɔ́ tɔn lɛ sɔ́ avɔ dó blá nukúnmɛ n’i, bo xò é, enɛ gudo ɔ, ye ɖɔ: “Ðɔ mɛ e dó nǔ we dìn ɔ nú mǐ.” Ðiɖɔ wɛ ye ɖè ɖɔ Jezu ni ɖɔ nǔ e na jɛ ɖò sɔgudo é ǎ, loɔ, ɖiɖɔ wɛ ye ɖè ɖɔ é ni zán hlɔnhlɔn e Mawu na ɛ é dó ɖɔ mɛ é dó nǔ i é.—Luki 22:63, 64.