Fii honɗun men noddiraa “ Seedeeɓe Yahuwah ” ?

Yimɓe buy no sikki Seedeeɓe Yahuwah ɓen ko innde diina heso. Kono, ko yahata duuɓi 2 700 feƴƴii ko Joomiraaɗo on noddi jiyaaɓe makko ɓen “ seedeeɓe ” makko (Isaaya 43:10-12, TMN). Ado 1931, ɓe noddirteno “ Janngooɓe Deftere Allah nden ”.

No holli ko hommbo woni Allah amen. Innde Allah nden Yahuwah no e nder ɗii bindi arani ko yahata guluuji e guluuji. Kono, ndee innde Allah no wattitaa e tiitooɗe buy wano Joomiraaɗo maa Allah. O feɲɲinani annabi Muusa innde makko nden, Yahuwah, o daali : “ Ko ɗun woni innde an nden haa poomaa. ” (Eggudu ndun 3:15). Ko ɗun sertindini mo e sanamuuji ɗin. Meɗen weltii noddeede Seedeeɓe Yahuwah.

No holli golle amen. Worɓe e rewɓe buy holluno gomɗinal maɓɓe ngal e Yahuwah, ɓe rewi mo wano Haabiila. E nder duuɓi heewuɗi ɓaawo ɗoo, annabi Nuuhu, annabi Ibraahiima, Saarata, annabi Muussa, annabi Daawuuda e gomɗinɓe Allah goo tawano e “ ngal dental mawngal seedeeɓe ”. (Yahuudiyankeeɓe 11:4–12:1.) Wano seedeejo seeditantoo goɗɗo e nder ɲaawoore, ko wano non men woni e seeditanaade goonga fii Allah.

Annbi Iisaa kadi ko seedeejo. Deftere Allah nden noddi mo “ seedeejo sella-findeejo goongaajo ”. (Feɲɲinannde 3:14.) Annabi Iisaa tigi inni o anndinno yimɓe ɓen innde Allah nden fii seeditanagol goonga on fee Allah (Yuuhanna 17:26 ; 18:37). Ko ɗun waɗi, taalibaaɓe annabi Iisaa ɓen no noddiraa Seedeeɓe Yahuwah e hiɓe anndinde yimɓe ɓen innde Allah nden.

• Fii honɗun Janngooɓe Deftere Allah nden noddiraa “ Seedeeɓe Yahuwah ” ?

• Gila honnde tuma Yahuwah heɓi seedeeɓe e hoore ndii leydi ?

• Hommbo woni Seedeejo Yahuwah mawɗo on ?