Toɓere 3
Ko honno goonga Deftere Allah nden anndiraa ?
Janngooɓe Deftere Allah nden, 1870.
La Tour de Garde ko adaa winndeede kon, 1879 e haala angele.
La Tour de Garde hannde (e haala gerek).
Deftere Allah nden wi’uno si annabi Iisaa feƴƴini, woɓɓe aroyay e hakkunde taalibaaɓe ɓen, hara hiɓe wowla haalaaji ɓoyliiɗi fii majjingol ɓe (Kuuɗe sahaabaaɓe ɓen 20:29, 30). Ko ɗun tigiri feƴƴuno. Ɓe jillindiri jannde Iisaa nden e jannde ɓoyliinde (2 Timotee 4:3, 4). Ko honno anndirten ko wonuɗen e janngude kon si ko ka Deftere Allah iwri tigi tigi ?
Saa’i on hewtuno ka Yahuwah feɲɲina goonga on. Yahuwah daaluno, “ ɓee wonduɓe e mokobayaagal faamoyay ” daaluyee makko on ka sakkitoode (Danu’iila 12:9, 10, TMN). E ndee hitaande 1870, mojobere’hun yimɓe faalanooɓe anndude goonga on, faamuno ko wonanoo e janneede kon hari hinaa goonga. Ko ɗun waɗi, ɓe etino faamugol Deftere Allah nden. Yahuwah walluno ɓe no ɓe faamira nde.
Jannde Deftere Allah timmunde. Janngunooɓe Deftere Allah nden ɓawto ɗoo, jannguno no ɓe faamira nde. Ɓe janngirayno toɓere e toɓere. Si ɓe yi’i aaya mo welaa faamude, ɓe ɓaagitorayno aayeeje goo, ɓe sifo. Si tawii no yiitidi e ko Deftere Allah nden janni kon, ɓe winnda. Ko ɓe acci Deftere Allah nden tigi sifii kon, ɓe annduno goonga on fii innde Allah nden, fii Laamu Allah ngun, ko o faalanoo kon fii tagaaɗo, fii ndii leydi, fii mayɓe e tanƴinaare fii mayɓe. Ko ɓe faami kon walluno ɓe no ɓe accitira piiji buy ɗi wonaa goonga. — Yuuhanna 8:31, 32.
E ndee hitaande 1879, Janngooɓe Deftere Allah nden faamuno, saa’i on hewtii ka ɓe walla yimɓe ɓen no anndira goonga on. Ko onsay ɓe fuɗɗi winndude deftere inneteende La Tour de Garde annonce le Royaume de Jéhovah (Suudu Aynirdu no haalude fii Laamu Yahuwah ngun). Nden deftere no sennditeede haa jooni. Hannde Deftere Allah nden no janneede e nder leyɗe 240 e ɗenɗe ɓuruɗe 750. Hari haa hannde ganndal Allah ngal ɗuuɗiraali wano nii.
Ko annabi Iisaa maayi, ko honno Deftere Allah nden janniranoo ?
Honɗun walli men anndugol goonga ko Deftere Allah nden janni kon ?