Ko honno Allah sifori ?

1. Fii honɗun haanuɗen rewude Allah ?

Ko Allah tagi piiji ɗin fow. O alaa fuɗɗoode e o alaa hattudi (Zabuura 90:2, TMN). Kibaaru moƴƴo wonɗo ka nder Deftere, ko ka makko iwri (1 Timotee 1:11). Ko Allah tun haanuɗen rewude ɓayri ko kanko okki en ngurndan. — Janngee Feɲɲinannde 4:11.

2. Honno Allah wa’i ?

Hay gooto yi’aali Allah ɓayri ko o Ruuhu. Ko ɗun waɗi, ngurndan makko ɗan no toowi ɓuri ko o tagi kon fow (Yuuhanna 1:18 ; 4:24). Kono en waaway anndude fii makko e piiji ko o tagi kon. Wano kala noone ɓiɓɓe leɗɗe e piindiiji no holli giggol makko e mokobaaku makko. Tageefo makko ngon no holli mbawdi makko. — Janngee Roomu 1:20.

Hiɗen waawi kadi ɓeydude anndugol Allah si en janngii Deftere makko nden. Hinde yewti en fii ko Allah yiɗi e ko o yiɗaa, e no o jogorii non banii-Aadama e alhaaliiji mun. — Janngee Zabuura 103:7-10, TMN.

3. Allah no mari innde ?

Annabi Iisaa wi’i : “ Baaba amen Wonɗo ka kammu, yo innde maa nden hormore. ” (Matta 6:9.) Fii kala himo jogi tiitooɗe buy, kono ko innde wootere o mari. Nden innde makko no noddire e haalaaji buy. Ka haala pular ko Yahuwah. Kono woɓɓe no nodda mo Yahweh. — Janngee Zabuura 83:18, TMN.

E nder defte buy innde makko nden no wattitaa e tiitooɗe wano Joomiraaɗo maa Allah. Kono ka fuɗɗoode, innde makko nden hari no ka nder Deftere makko ko ɓuri 7 000. Annabi Iisaa holluno innde Allah nden fewndo o jannaynoo jamaa on. — Janngee Yuuhanna 17:26.

Ndaaree vidio on Allah no mari innde ?

4. Yahuwah no dankii en ?

Fii tampere ɗuuɗi, en wi’ay Yahuwah Allaahu on haajaaka fii men ? Woɓɓe no wi’i ko kanko woni sabu tampere men nden fii ndaarugol en, kono hinaa goonga. — Janngee Yaaquuba 1:13.

Allah no okki aaden hettaare e teddungal suɓagol faale mun. Hiɗen haani annditude, Allah no acci mo kala yo suɓo rewugol mo (Yaasuwa 24:15, TMN). Kono buy no suɓii waɗugol ko boni. Ko ɗun waɗi tampere no ɗuuɗi. No mettude Yahuwah ko o yi’ata ɗii boneeji. — Janngee Fuɗɗooɗe nden 6:5, 6.

Yahuwah ko Allah dankiiɗo en. Himo faalaa yo en wuuru ngurndan weluɗan. Neeɓataa o muloyay tampere e ɓee wonuɓe sabu mun. Kono, himo anndi fii honɗun o accani tampere oo saa’i ɗoo. Ka toɓere 8, en janngoyay, annden ko fii honɗun o accani tampere. — Janngee 2 Petruusu 2:9 ; 3:13.

5. Ko honno ɓadortoɗen Allah ?

En ɓadorto Yahuwah si en juuli, toroɗen mo, yewten mo ko woni ka ɓerɗe mem. Himo wattani yila e mo kala (1 Yuuhanna 5:14). Himo hebili fii yaafagol en. Himo anndi ko wonuɗen waɗude fii weltingol mo, hay si en gaynataa wonnde. Fii kala hiɗen wondi e junuubu, hiɗen waawi golludude e Allah. — Janngee Zabuura 103:12-14, TMN ; Yaaquuba 4:8.

Ɓayri Allah okkii en ngurndan, hiɗen haani yiɗugol mo ɓuri fow (Markuusa 12:30). Hiɗen waawi hollude hiɗen yiɗi Allah, si en janngii Deftere makko nden, waɗen ko o yamiri en kon, en waaway ɓadaade mo. — Janngee 1 Timotee 2:4 ; 1 Yuuhanna 5:3.