Ko hommbo woni Alla ?

Gila ko neeɓi, yimɓe no rewude allaaji buy. Kono Deftere Alla nden no haali fii Alla « mawnuɗo ɓuri allaaji ɗin fow » (2 Fillande taariika 2:5). Ko hommbo woni on Alla ? Ko honɗun waɗi mo mawnuɗo ɓuri allaaji ɗin fow ɗi yimɓe rewata ? E nder ndee toɓɓere on annday ko Alla faalaa yo en anndu fii makko.

1. Ko honno Alla innetee e ko honɗun hollata himo faalaa yo en anndu innde makko nden ?

Ka nder Deftere Alla, Alla no haali fii hoore makko. O wi’i : « Yahuwah, ko ɗun woni innde an nden » (janngee Isaaya 42:5, 8). « Yahuwah » e nder haala aabirayanke no firi « o wonay ko o faalaa wonude ». Yahuwah no faalaa yo en anndu innde makko nden (Eggudu ndun 3:15, ndaaree maandineere VPFJ). Ko honno hoolorten ɗun ? Ka nder Deftere Alla, o waɗi fii yo innde makko nden winnde ko ɓuri laabi 7 000 !a Ko « Alla goongaajo on ka kammu e ka hoore leydi » mari ndee innde « Yahuwah » (Yaɲɲannde sariyaaji ɗin 4:39).

2. Ko honɗun Deftere Alla nden haalani en fii Yahuwah Alla ?

Deftere Alla nden wi’i allaaji ɗin fow ɗi yimɓe ɓen rewata, ko Yahuwah tun woni Alla goongaajo on. Fii honɗun ? Dalilji no woodi. Ko Yahuwah woni Allahu Lanɗo on e ko kanko tun « woni Jom Ɓural on e hoore leydi ndin fow » (janngee Zabuura 83:18). Ko kanko woni « Jom Bawgal on » ko ɗun firi himo waawi waɗude kala ko o suɓii waɗugol. Ko kanko « tagi kala huunde », tageefo ngon e kala ko wuuri ka hoore leydi (Feɲɲinannde 4:8, 11). Ko Yahuwah tun woni Alla poomayankeejo (Zabuura 90:2).

3. Alla no mari tiitooɗe buy kono innde makko nden ko wootere

Fii anndugol no tiitooɗe e innde goɗɗo sertiri, fijinee VIDIO on e yewton fii lanndal jokkitungal ngal.

VIDIO : Tiitooɗe buy, kono ko innde wootere (0:41)

• Ko honno tiitoonde wano « Joomiraaɗo » e innde sertiri ?

Deftere Alla nden no holli yimɓe no rewude allaaji e koohooɓe buy. Janngee Zabuura 136:1-3 (VPFJ) e yewton fii ngal lanndal :

• Ko hommbo woni « Alla allaaji ɗin » e « Joomiraaɗo koohooɓe ɓen » ?

4. Yahuwah Alla no faalaa yo on anndu e huutoron innde makko nden

VIDIO : Alla no mari innde ? (3:​11)

• Hiɗon miijii Yahuwah Alla no faalaa yo en anndu innde makko nden ? Fii honɗun ?

Yahuwah Alla no faalaa yo yimɓe noddir mo innde makko nden. Janngee Roomu 10:13 e yewton fii ɗee lanndaale :

• Ko honno huutorgol innde Alla « Yahuwah » hittiri ?

• Ko honno wa’irton si goɗɗo annditii innde mon nden e noddirii on nde ?

• E miijo mon, ko honno Yahuwah Alla wa’irta si on noddirii mo innde makko nden ?

5. Yahuwah Alla no faalaa yo on wonu giɗo makko

VIDIO : Ko mi ɗaɓɓata Alla goongaajo on (8:​18)

• E nder vidio on, honno Soten wa’irnoo ko o anndi innde Alla nden ?

Ado yo on wonu giɗo goɗɗo, hiɗon haani anndugol innde makko nden. Janngee Yaaquuba 4:8a e yewton fii ɗee lanndaale :

• Ko honɗun Yahuwah Alla faalaa yo on waɗu ?

• Ko honno anndugol e noddugol innde Alla nden wallirta on ɓadagol mo ?

RAWNOODE

Ko Yahuwah woni innde Alla goongaajo on. Himo faalaa yo on anndu e noddiron mo innde makko nden fii no woniron giɗo makko.

Ndartannde

• Ko honno Yahuwah Alla sertiri e allaaji ɗin fow ɗi yimɓe rewata ?

• Fii honɗun haanuɗen noddirgol Alla innde makko nden ?

• Honno anndirton Yahuwah Alla no faalaa yo on wonu giɗo makko ?

TASKEE

Lasindee dalilji jowi fellintinayɗi Alla no woodi.

« Alla no woodi ? » (Winndannde ka jw.org)

Ndaaree fii honɗun hoolantoɗen Alla alaa fuɗɗoode.

« Ko hommbo tagi Alla ? » (Suudu Aynirdu ndun, 1 ut 2014)

Janngee anndon fii honɗun haanuɗen noddirde Alla innde makko nden, hay si en anndaa no ɓe haaliraynoo innde nden ka fuɗɗoode.

« Ko honno Yahuwah Alla sifori ? » (Winndannde ka jw.org)

No noddirten Alla non no hitti ? Ndaaree fii honɗun innanten ko innde wootere tun o mari.

« Ko inɗe jelu Alla mari ? » (Winndannde ka jw.org)