TOƁƁERE 30
Ɓe yiɗuɗon ɓen wuuritay !
Mayde adday mettu-ɓernde ko tiiɗi. Ko sabu ɗun Deftere Alla nden noddi mayde gaɲo (1 Korenti 15:26). Ka toɓɓere 27, on jannguno wonndema Yahuwah Alla muloyay on gaɲo. Kono ko honɗun o waɗoyta fii maayuɓe ɓen ? E nder ndee toɓɓere, on ɓeyday janngugol fii fodoore Yahuwah Alla fotunde fii immintingol miliyaarji yimɓe fii no ɓe heɓira ngurndan welɗan haa poomaa. Ko fii Yahuwah Alla immintinoyay ɓe ! Dun no waawi waɗude tigi tigi ? Mayɓe ɓen immintinoyte ka kammu kaa ka hoore leydi ?
1. Ko honɗun Yahuwah Alla faalaa waɗande yimɓe mayɓe ɓe yiɗuɗen ɓen ?
Yahuwah Alla no faalaa moƴƴa immintingol mayɓe ɓen. Gorko gomɗinooɗo ko tiiɗi, noddaaɗo Ayyuuba, no hoolinoo Alla yejjitoytaa mo si o maayii. O wi’i Alla : « A nodday lan, e min mi noototo ma [gila ka gaburu] » (janngee Ayyuuba 14:13-15).
2. Ko honno anndirɗen mayɓe ɓen immintinoyte ?
Fewndo annabi Iisaa wonunoo ka hoore leydi, Alla okkuno mo bawgal immintingol mayɓe. Annabi Iisaa immintinno jiwun kun duuɓi 12 e ɓiɗɗo keynguujo (Markuusa 5:41, 42 ; Luuka 7:12-15). Ɓawto ɗun, giɗo annabi Iisaa on Laazaru maayi. Fii kala Laazaru hari maayii e surraama ko yahata balɗe nay, annabi Iisaa immintinno mo. Annabi Iisaa torii Alla, o fewti gaburu ndun e o ewnii : « Laazaru, yaltu ! » Onsay « mayɗo on yalti », himo wuuri ! (Yuuhanna 11:43, 44). Miijitee weltaare nde ɓeynguure Laazaru nden e yiɓɓe makko ɓen heɓunoo !
3. Ko tanƴinaare honnde maruɗon fii mayɓe ɓe yiɗuɗon ɓen ?
Deftere Alla nden no fodi : « Ummutal feewuɓe ɓen e ɓoyliiɓe ɓen » (Kuuɗe sahaabaaɓe ɓen 24:15). Ɓee ɓe annabi Iisaa immintinnoo ɓen yahaano ka kammu ɓawto ko ɓe maayi (Yuuhanna 3:13). Hari hiɓe weltii fii ko ɓe immintinaa kon e hoore ndii leydi. Ko wano non, neeɓataa annabi Iisaa immintina miliyaarji yimɓe ka aljanna e hoore ndii leydi. O wi’uno « wonɓe ka genaale ɓen fow » immintinoyte—hay ɓee ɓe yejjituɗen fii mun, ɓayri fii maɓɓe no ka miijo Alla (Yuuhanna 5:28, 29).
LUGGINEE
Ndaaree piiji ka nder Deftere Alla holluɗi mayɓe ɓen immintinoyte. Anndee no ummutal ngal okkirta on ɓuttu-ɓernde e tanƴinaare.
4. Annabi Iisaa holluno himo waawi immintinde mayɓe
Ɓeydee anndugol fii ko annabi Iisaa waɗani Laazaru giɗo makko on. Janngee Yuuhanna 11:14, 38-44 e yewton fii ɗee lanndaale :
Ko honno anndirɗen Laazaru maayuno tigi tigi ? (Ndaaree aaya 39).
Si tawii ɓawto ko Laazaru maayi o yahuno ka kammu, hiɗon miijii haray annabi Iisaa forsuno mo artugol ka hoore leydi ?
5. Miliyaarji yimɓe immintinoyte !
Janngee Zabuura 37:29 (VPFJ) e yewton fii ngal lanndal :
Ko honto immintinoyteeɓe ɓen wuuroyta ?
Annabi Iisaa immintinoytaa tun rewooɓe Yahuwah Alla ɓen. Janngee Kuuɗe sahaabaaɓe ɓen 24:15 e yewton fii ngal lanndal :
Ko hommbo faaleteɗon yi’ude no immintinaa ?
Annabi Iisaa no waawi immintinde goɗɗo wa baabaajo finndinirta ɓiɗɗo mun ɗaaniiɗo.
6. Ummutal ngal waaway on okkude tanƴinaare e ɓuttu-ɓernde
Taariika jiwo Yaayirusu on ɓuttinno ɓernde e wakkilinno yimɓe buy heɓuɓe faatunnde. Janngee on taariika goongaajo e nder Luuka 8:40-42, 49-56.
Ado yo annabi Iisaa immintinde jiwo Yaayirusu on, o wi’uno ben jiwo on : « Wota a hulu, gomɗin tun, jiwo maa on hisay » (ndaaree aaya 50). Ko honno tanƴinaare ummutal ngal waawirta on wallude...
si aaden mo yiɗuɗon maayii ?
si hiɗon hulani wonkii mon kin ?
Fijinee VIDIO on e yewton fii lanndal jokkitungal ngal.
Ko honno tanƴinaare ummutal ngal ɓuttiniri ɓernde mawɓe Phelicity ɓen e okkiri ɓe wakkilaare ?
WOƁƁE GOO NO WI’A : « No satti hoolagol mayɓe ɓen wuuray kadi tigi tigi. »
Ko honɗun onon miijiɗon ?
Ko aaya hommbo huutorton fii hollugol ummutal waɗoyay ?
RAWNOODE
Deftere Alla nden no fodi wonndema miliyaarji yimɓe maayuɓe immintinoyte. Yahuwah Alla no faalaa yo ɓe wuuritu e o okki annabi Iisaa bawgal immintingol ɓe.
Ndartannde
Ko honno Yahuwah Alla e annabi Iisaa miijori fii immintingol mayɓe ɓen ?
Ko honto miliyaarji yimɓe immintinaaɓe wuuroyta ? Ka kammu kaa ka hoore leydi ? Fii honɗun innanton ɗun ?
Ko honɗun fellintini on yimɓe ɓe yiɗuɗon ɓen wuuritay ?
TASKEE
Janngee fii piiji wallinayɗi on ɓernde si on heɓii faatunnde.
Tugaale Deftere Alla nden no waawi wallude tigi tigi goɗɗo heɓuɗo faatunnde ?
Si goɗɗo mo yiɗuɗon maayii (5:06)
Ko honno paykoy koy gerdirta si goɗɗo mo ɓe yiɗi maayii ?
No woodi immintinoyteeɓe ka kammu ? Ko hommbo woni immintinoytaake ?