Ko honɗun yi’oton ka pottital amen ?

Buy accii rewugol Allah ɓayri ɓe alaa e ɗowireede no haaniron non e ɓe alaa yi’ude nafa mun. Ko fii honɗun haanuɗon yahugol ka pottital Seedeeɓe Yahuwah ɓen ? Honɗun tawoton ton ?

On weltoto wonugol hakkunde yimɓe yiɗuɓe on. Ka teeminannde aranere, almasiiyaaɓe ɓen mooɓondirayno fii no ɓe rewira Allah e ɓe jannga Deftere makko nden. Ɓe weltondirana fii no ɓe ɓeydira wakkilaare maɓɓe nden (Yahuudiyankeeɓe 10:24, 25). Ɓe mottondirayno e hoore giggol. Ko sabu ɗun ɓe woni musiɓɓe (2 Tesalonii 1:3 ; 3 Yuuhanna 14). Hannde, meɗen jokki ko ɓe waɗaynoo kon e meɗen weltii e hoore ɗun.

Jokkugol tugaale Allah ɗen no wondani men e nafa. Wano Deftere Allah nden holliri non, worɓe, rewɓe, mawɓe e paykoy fow mooɓondirayno fii janngugol. Ko wano non kadi hannde, ardotooɓe moftal ngal wallay men no men jokkira tugaale Allah ɗen (Yaɲɲannde sariyaaji ɗin 31:12, TMN ; Nehemiiya 8:8, TMN). Mo kala hollay gomɗinal mun ngal ɓayri men haalay ko men janngi kon ka nder Deftere Allah e men jaaray. — Yahuudiyankeeɓe 10:23.

Gomɗinal amen ngal ɓurtay kelɗude. Ɲannde goo, Puulusa yewtuno ɓee ka moftal, o wi’i : “ Ko fii miɗo faalaa yi’ude on fota, [...] fii no wakkilindiriren ka mon, mo kala e men wakkilora gomɗinal oya ngal. ” (Roomu 1:11, 12). Ka pottital amen, yiidugol e gomɗinɓe Allah ɓen saa’i woo saa’i wallay men fii no gomɗinal amen ngal kelɗira. Wallay men kadi no men ɓurtira ɗoftaade Allah.

Onon tigi hiɗon waawi yahude ka pottital amen. On yi’oyay ko woni e feƴƴude ton kon. Haray saɗi mon ko tooli mon. On yoɓataa hay huunde si on arii ka pottital amen.

• Ko homɓe men woni ɲemmbinde fii mottondiral amen ngal ?

• Ko honno pottital amen ngal nafirta men ?