TOƁƁERE 10
Ko honno pottite Seedeeɓe Yahuwah ɓen nafirta on ?
Hari on tawaama e pottital Seedeeɓe Yahuwah ɓen ? Si tawii wonaa non woniri, no gasa hino sonnja on seeɗa fii tawegol aranun ɗun. No gasa hiɗon miijoo : « Ko honɗun feƴƴata ka pottite ? Fii honɗun hiɗe hitti ? E fii honɗun miɗo haani taweede ? » E nder ndee toɓɓere, on faamay honno mottondirgol e woɓɓe goo tiiɗinirta weldigal mon ngal e Alla e honno ɗun wallirta on e ngurndan mon ɗan.
1. Ko fii honɗun Seedeeɓe Yahuwah ɓen mottondirta ?
Tawanooɗo goo e winndunooɓe Deftere Alla nden holluno fii honɗun mottondirgol no hitti. O wi’i : « mi mantoyte ka hakkunde moftal » (Zabuura 22:22 [22:23, VPFJ]). Ko wano non kadi, Seedeeɓe Yahuwah ɓen weltoto moƴƴa mottondirgol. E nder aduna on fow hiɓe mottondira yontere kala fii rewugol Alla, jaarugol e toragol mo. Hitaande kala hiɓe waɗa mottondire njane.
2. Ko honɗun janngoton ka pottite amen ?
Ka pottite, Seedeeɓe Yahuwah ɓen jannay Deftere Alla nden, ‘ɓe sifoo no laaɓiri e ɓe holla no ɗun huutorte’ (janngee Nehemiiya 8:8). Si on tawaama ka pottite, on janngay fii Yahuwah Alla ko ɓuri nii e fii sifaaji makko labaaɗi ɗin. No janngirton non fii giggol makko ngol fii mon, ko non ɓurtirton mo ɓadaade. On janngay kadi honno o wallirta on heɓugol ngurndan kelɗuɗan (Isaaya 48:17, 18).
3. Ko honno mottondirgol e woɓɓe goo ka pottite amen nafirta on ?
Yahuwah Alla yamirii en : « Miijondiranen ko honno waaweten wakkilindirde ka giggol e ka kuuɗe moƴƴe. Wota en terto mottondiral men ngal » (Yahuudiyankeeɓe 10:24, 25). Ka pottite, on yiiday e yimɓe yiɗuɓe on tigi tigi e faalaaɓe anndude Alla ko ɓuri nii wano mon. On nannay hiɓe haalaa fii piiji okkuɗi ɓe wakkilaare iwruɗi ka Deftere Alla (janngee Roomu 1:11, 12). On anndindiray e worɓe, rewɓe, mawɓe, sukaaɓe e jiwɓe weltiiɓe, hay si hiɓe mari ko sonnjata ɓe wano fow. Ko sabu ɗun, Yahuwah Alla no faalaa yo en mottondir soono woo !
LUGGINEE
Yewten fii ko feƴƴata ka pottite Seedeeɓe Yahuwah ɓen e ndaaren honno tawegol e majje nafirta en.
4. Pottite Seedeeɓe Yahuwah ɓen
Ka teeminannde aranere, almasiiyaaɓe ɓen mottondirayno soono woo fii rewugol Yahuwah Alla (Roomu 16:3-5). Janngee Koloosi 3:16 e yewton fii ngal lanndal :
Ko honno almasiiyaaɓe ɓen ka fuɗɗoode rewiraynoo Yahuwah Alla ?
Hannde, ko wano non kadi, Seedeeɓe Yahuwah ɓen mottondirta ka fottirɗe maɓɓe soono woo fii rewugol Yahuwah Alla. Fii yi’ugol no pottite maɓɓe ɗen wa’iri, fijinee VIDIO on, ɓawto ɗun, ndaaron pirinti on fii pottital e yewton fii lanndaale jokkituɗe ɗen.
Ko honno ko feƴƴata ka fottirde Seedeeɓe Yahuwah ɓen yaadiri e ko jannguɗon kon e nder Koloosi 3:16 ?
E nder vidio on maa pirinti on, on yi’ii huunde ko wakkilinta on fii tawegol ka pottite ?
Janngee 2 Korenti 9:7 e yewton fii ngal lanndal :
Fii honɗun on yoɓataa huunde fii tawegol e pottite Seedeeɓe Yahuwah ɓen ?
Ndaaree ko janngoyton kon ka pottital arooyoowal.
Ko honɗun e nder pottital ngal ɓurani on hittande maa ko wondani on e nafa ?
Hari hiɗon anndi ?
Ka jw.org, on annday nokkeeli ka pottite waɗata e saa’iiji ɗin e nder aduna on fow.
Ka pottite amen no woodi yewtereeji, vidiooji, ekkitagol fii waajagol e jannugol. Pottite ɗen no fuɗɗora e sakkitora jaaroore e toraare.
E cenɗe goo e porogaraam on, tawaaɓe ɓen no waawi jaabaade lanndaale.
Fow no waawi taweede : ɓeynguureeji, worɓe, rewɓe, mawɓe, sukaaɓe e jiwɓe.
Pottite amen ɗen yoɓantaake. Seedeeɓe Yahuwah ɓen yoɓintaa on fii naatugol e ɓe lanndotaako on hay huunde.
5. Hiɗen haani wakkilaade fii tawegol ka pottite
Ndaaren misal ɓeynguure annabi Iisaa nden. Hitaande kala hiɓe haanunoo seppude ko yahata kilomeeteraaji 100 e nokkuure wondude e pelle fii yahugol ka juulirde mawnde Yerusalaam. Janngee Luuka 2:39-42 e yewton fii ɗee lanndaale :
E miijo mon, hari nduu yaadu Yerusalaam no weli fii ?
Ko honno wakkilortoɗon fii tawegol ka pottite ?
Hiɗon miijii ɗun no wondi e nafa ? Fii honɗun ?
Deftere Alla nden wi’i no hitti fota mottondirgol fii rewugol Alla. Janngee Yahuudiyankeeɓe 10:24, 25 e yewton fii ngal lanndal :
Ko fii honɗun haanuɗen taweede ka pottite soono woo ?
WOƁƁE GOO NO WI’A : « Mi haanaa mottondirde e yimɓe. Janngugol Deftere Alla nden ka suudu yonanii lan. »
Ko aaya hommbo maa misal honngal huutorton fii hollugol ko Yahuwah Alla faalaa ?
RAWNOODE
Tawegol ka pottite wallay on anndugol Alla ko ɓuri nii, tiiɗina weldigal mon ngal e makko, rewa mo hakkunde sella-finndeeɓe.
Ndartannde
Fii honɗun Yahuwah Alla wakkilinta en mooɓondirgol ?
Ko honɗun janngoton ka pottite Seedeeɓe Yahuwah ɓen ?
Ko honno tawegol ka pottite kadi nafirta on ?
TASKEE
Hino sonnja on tawegol e pottital ? Ndaaree no gorko miijinooɗo wano nii sakkitori yiɗugol pottite ɗen.
Ndaaree no suka yiɗirnoo pottite ɗen e no o wakkilorinoo non fii tawegol.
Yimɓe no haalaa ko ɓe miijii fii pottite ɗen.
« Fii honɗun tawanteɗen ka pottite Seedeeɓe Yahuwah ɓen ? » (Winndannde ka jw.org)
Ndaaree no ngurndan banndiijo waylori ɓawto ko o tawa ka pottital Seedeeɓe Yahuwah ɓen.
« Mi yaltataano muk ɓaawo finkaari an ndin » (Suudu Aynirdu ndun, 1 suwiye 2014)