Ko honno heɓirton nafa timmuɗo e nder janngugol Deftere Alla nden ?

Hari on heɓii golle njane ɗe miijiɗon on wawaataa waɗude ? No gasa fii ɗuytugol golle ɗen on senndituno ɗe e golleeji toosooki. Ko wano non kadi, si hiɗon janngude Deftere Alla nden. No gasa hiɗon miijoo : « Ko honno mi fuɗɗorta ? » E nder ndee toɓɓere en yi’ay piiji weluɗi fii ko wallata on yiɗugol janngugol Deftere Alla nden, luggina.

1. Fii honɗun haanuɗen janngude Deftere Alla nden soono woo ?

Mo janngi Deftere Alla nden soono woo, ɗun ko « sariya Joomiraaɗo on », weltoto e o wonay gaynuɗo (janngee Zabuura 1:1-3, VPFJ). Fii fuɗɗagol, etee janngugol Deftere Alla nden e nder minitaaji seeɗa ɲannde woo. No anndirton Daaluyee Alla on non, ko non ɓurtirton yiɗude janngugol Deftere Alla nden.

2. Ko honno janngugol Deftere Alla nden nafirta on fota ?

Si hiɗon faalaa nafa timmuɗo e nder janngugol Deftere Alla nden, hiɗon haani ƴettude saa’ihun miijitagol fii ko jannguɗon kon (Zabuura 119:97, VPFJ). E nder janngugol Deftere Alla nden, hiɗon waawi lanndaade : « Ko honɗun ɗee aayeeje jannimmi fii Yahuwah Alla ? Ko honno mi huutorta ɗun e nder ngurndan an ɗan ? Ko honno mi huutorta ɗun fii wallugol woɓɓe goo ? »

3. Ko honno waɗirton saa’i janngugol Deftere Alla nden ?

No sattani on heɓugol saa’i fii janngugol Deftere Alla nden ? Wonaa onon tun. Etee hara on accaali « fajuhun woo feƴƴira on » (Efeesi 5:16). E piide misal, ɲannde woo hiɗon waawi suɓaade saa’i haanuɗo fii janngugol Deftere Alla nden. Woɓɓe janngay nde bimmbi law. Woɓɓe goo janngay saa’i ɓe soƴƴata. Woɓɓe goo kadi janngay nde jemma ado ɓe waalaade. Onon-le, ko saa’i hommbo ɓuri on moƴƴande ?

LUGGINEE

4. Anndee no heɓirton weltaare e nder janngugol Deftere Alla nden

No gasa ka fuɗɗoode, janngugol Deftere Alla nden welaa fii. Kono on waaway ‘yiɗirde ɗun’ wano goɗɗo yiɗirta ɲaametee keso. Janngee 1 Petruusu 2:2 e yewton fii ngal lanndal :

• E miijo mon, si on janngii Deftere Alla nden ɲannde woo, haray on weltoray ɗun e on yiɗay janngugol nde ko ɓuri nii ?

Fijinee VIDIO on e anndon honno woɓɓe goo fuɗɗori yiɗugol janngugol Deftere Alla nden. Ɓawto ɗun, yewton fii lanndaale jokkituɗe ɗen.

VIDIO : Sukaaɓe e jiwɓe no janngude fii no ɓe yiɗira Daaluyee Alla on (5:​33)

• E nder vidio on, ko satteendeeji honɗi sukaaɓe e jiwɓe jittunoo ?

• Ko honɗun wallunoo ɓe fii no ɓe jokkira janngugol Deftere Alla nden soono woo ?

• Ko honɗun ɓe waɗunoo fii no ɓe yiɗira janngugol Deftere Alla nden ko ɓuri nii ?

Piiji wallayɗi on fii fuɗɗagol :

• Suɓee firoore sellunde e haala weluka faamude. Ndaaree si Traduction du monde nouveau no woodi ka haala mon.

• Fuɗɗoree janngugol cenɗe ɗe ɓuruɗon yiɗude ɗen. Fii heɓugol miijooji ndaaree alluwal ngal « Fuɗɗee janngugol Deftere Alla nden ».

• Maandinee ko jannguɗon kon. Huutoree senngo-ɗerol alluwal ngal « Maandinee janngugol mon Deftere Alla nden » e nder ndee deftere.

• Huutoree JW Library^® app. Hiɗon waawi janngude maa jentaade Deftere Alla nden kala ka wonuɗon e hoore huutorgol telefon maa taablet.

• Ndaaree cenɗe ɓeydaaɗe ka Traduction du monde nouveau. On yi’ay ton karte-leyɗe, alluuje e saggitorde ko wallata on no yiɗiron janngugol Deftere Alla nden ko ɓuri nii.

5. Hebilanee fii jannde mon Deftere Alla nden

Janngee Zabuura 119:34 (VPFJ) e yewton fii ngal lanndal :

• Fii honɗun hino moƴƴi toragol Alla ado on fuɗɗaade janngugol Deftere Alla nden maa hebilanaade fii jannde mon nden ?

Ko honno heɓirton nafa timmuɗo fii jannde kala ? Nde hiɗon hebilanaade fii toɓɓere e nder ndee deftere, etee ɗii piiji ɗoo :

1. Janngee lowreeji huniiɗi toɓɓere nden.

2. Janngee aayeeje ɗen e eɓɓindiron ɗe e miijo ngon ka nder toɓɓere.

3. Tentinee konnguɗi hittuɗi jaabiiɗi kala lanndal ; ɗun wallay on no yewtidon e jannoowo mon on.

Hari hiɗon anndi ?

Seedeeɓe Yahuwah ɓen huutorno Deftere Alla nden ko firaa no sertiri. Kono meɗen ɓuri yiɗude La Bible. Traduction du monde nouveau ko fii hinde selli, hinde weli faamude e hinde mari innde Alla nden (ndaaree winndannde « Seedeeɓe Yahuwah ɓen no marani hoore maɓɓe Deftere Alla sertunde ? » ka jw.org).

RAWNOODE

Fii heɓugol nafa timmuɗo e nder janngugol Deftere Alla nden, waɗee saa’i fii janngugol nde, toroɗon Alla fii faamugol ko janngoton kon e hebilanoɗon fii jannde mon Deftere Alla nden.

Ndartannde

• Ko honno heɓirton nafa timmuɗo e nder janngugol Deftere Alla nden ?

• Ko saa’i hommbo waɗoton fii janngugol Deftere Alla nden e waɗugol jannde mon nden ?

• Ko nafa honɗun heɓoton si on hebilanike fii jannde mon Deftere Alla nden ?

TASKEE

Ndaartee miijooji ko wallata on heɓugol nafa timmuɗo e nder janngugol mon Deftere Alla nden.

« Heɓee nafa timmuɗo e nder janngugol Deftere Alla nden » (Suudu Aynirdu ndun n° 1 2017)

Sifaaji tati fii janngugol Deftere Alla nden.

« Ko honno Deftere Alla nden wallirta lan ? (Senngo 1) : Lugginee janngugol mon Deftere Alla nden » (Winndannde ka jw.org)

Ko honno heɓirton weltaare janngugol Deftere Alla nden ?

« Ko honno Deftere Alla nden wallirta lan ? (Senngo 2) : Heɓee weltaare e nder janngugol Deftere Alla nden » (Winndannde ka jw.org)

Jannguɓe Deftere Alla nden gila ko neeɓi no haalude fii piiji walluɗi ɓe.

Jannde moƴƴunde aaden gooto (2:​06)