Honno Deftere Alla nden wallirta en ?

Fayda mo kala e men no mari lanndaale fii ngurndan, sonnjaa, mayde e fii ko aroyta. Hiɗen aana kadi no feƴƴinirten, wano fii wuurugol no haaniri maa heɓugol ɓeynguure weltiinde. Yimɓe buy, e hoore heɓugol jaabaaji Deftere Alla nden fii lanndaale hittuɗe fii ngurndan, no heɓude kadi waajuuji haanuɗi fii no ɓe wuurirta non. Hiɗon miijii Deftere Alla nden no waawi wallude goɗɗo mo annduɗon ?

1. Ko lanndaale honɗe Deftere Alla nden jaabii ?

Deftere Alla nden no jaabii ɗee lanndaale hittuɗe : ko honno ngurndan fuɗɗori ? Ko honɗun ngurndan firi ? Fii honɗun feewuɓe tampanta ? Ko honɗun feƴƴata si goɗɗo maayii ? Si tawii mo kala no faalaa ɓuttu, fii honɗun gere no hen fow ? Ko honɗun feƴƴoyta ka hoore leydi ko aroyta ? Deftere Alla nden no wakkilinde en ɗaɓɓugol jaabaaji fii ɗee lanndaale e yimɓe miliyonji heɓii jaabaaji wallinɗi ɓe ɓernde.

2. Honno Deftere Alla nden wallirta en no feƴƴiniren ngurndan welɗan ?

Deftere Alla nden no okka en waajuuji moƴƴi. E piide misal, hinde janna ɓeynguureeji fii heɓugol weltaare timmunde. Hinde mari waajuuji ko wallata en fii ɓitteende e no heɓiren weltaare ka golle men. On annday ko Deftere Alla nden janni kon fii mun e ko ɓuri ɗun e nder ko yewteten kon. On jaɓoyay wonndema « kala daalol windiingol [kala ko woni ka nder Deftere Alla] [...], hingol wondi e nafa » (2 Timotee 3:16).

LUGGINEE

Ndaaree honno Deftere Alla nden walliri yimɓe, honno heɓirton weltaare e nder janngugol nde, e fii honɗun no moƴƴi fii yo goɗɗo wallu on faamugol nde.

3. Deftere Alla nden no waawi en ɗowude

Deftere Alla nden no wa’i wa ndaygu jalɓungu. En waaway huutorde Deftere Alla nden fii fewjugol no moƴƴiri e wallugol en no anndiren fii ko aroyta.

Janngee Zabuura 119:105 (VPFJ) e yewton fii ɗee lanndaale :

• Ko honɗun winnduɗo oo Zabuura miijii fii Deftere Alla nden ?

• Ko honɗun miijiɗon fii Deftere Alla nden ?

4. Deftere Alla nden no waawi jaabaade lanndaale men ɗen

VIDIO : Wota en taƴo few ! (1:​48)

• E nder vidio on, ko lanndaale honɗe debbo on marunoo ?

• Ko honno jannde Deftere Alla nden wallirnoo mo ?

Deftere Alla nden no wakkilini en lanndagol. Janngee Matta 7:7 e yewton fii ko jokkiti kon :

• Ko lanndaale honɗe maruɗon ɗe Deftere Alla nden waawata jaabaade ?

5. En heɓay weltaare e nder janngugol Deftere Alla nden

VIDIO : Janngugol Deftere Alla nden (2:​05)

• E nder vidio on, honɗun sukaaɓe ɓen e jiwɓe ɓen miijii fii janngugol ?

• Fii kala ɓe yiɗaa janngugol, ko fii honɗun ɓe yiɗani jooni janngugol Deftere Alla nden ?

Deftere Alla nden wi’i nde jannay en fii piiji ɓuttinayɗi en ɓernde e okkorayɗi en tanƴinaare. Janngee Roomu 15:4 e yewton fii ngal lanndal ɗoo :

• Ko Deftere Alla nden fodi kon fii ɓuttu-ɓernde e tanƴinaare no hittani on ?

6. Woɓɓe goo waaway on wallude faamugol Deftere Alla nden

E hoore janngugol Deftere Alla nden, buy tawii yewtidugol e woɓɓe goo fii mun no walla ɓe. Janngee Kuuɗe sahaabaaɓe ɓen 8:26-31 e yewton fii ngal lanndal ɗoo :

• Ko honno waawirton faamude Deftere Alla nden ? (Ndaaree aayeeje 30 e 31).

RAWNOODE

Deftere Alla nden no okka waajuuji fii ngurndan, jaabaaji fii lanndaale hittuɗe, e okka yimbe ɓuttu-ɓernde e tanƴinaare.

Ndartannde

• Ko waajuuji honɗi heɓeten ka nder Deftere Alla ?

• Ko lanndaale honɗe Deftere Alla nden jaabii ?

• Ko honɗun faaleteɗon anndugol fii Deftere Alla nden ?

TASKEE

Ndaaree honno waajuuji Deftere Alla nden nafirta en hannde.

« Faamu saa’iiji ɗin fow » (Suudu Aynirdu ndun n° 1 2018)

Ndaaree no Deftere Alla nden walliri gorko sonnjinooɗo gila ko o woni paykun.

Honno ngurndan weluɗan kesan an ɗan fuɗɗori (2:​53)

Taskee waajuuji moƴƴi Deftere Alla nden fii ɓeynguure.

« Toɓɓe 12 fii heɓugol weltaare ka ɓeynguure » (Finee ! n° 2 2018)

Janngee no Deftere Alla nden sifori ko laaɓi pos fii laamiiɗo aduna on tigi tigi.

Fii honɗun jannganten Deftere Alla nden ? (Junndi timmundi) (3:​14)