TOƁƁERE 26

Fii honɗun bone e tampere no woodi ?

Édition imprimée

« Fii honɗun ? » ko lanndal ngal yimɓe lanndotoo soono woo si bone waɗii. Hiɗen weltii Deftere Alla nden no jaabii ngal lanndal ko laaɓi pos !

1. Ko honno Seytaane addiri bone e nder aduna on ?

Seytaane maa Ibuliisa murtanno Alla. Seytaane no faalanoo laamaade, ko ɗun waɗi o battinno baaba Aadama e neene Hawaa tawtugol mo e murtaldu makko ndun. Seytaane waawuno waɗude ɗun e hoore fenangol neene Hawaa (Fuɗɗoode nden 3:1-5, VPFJ). O waɗi neene Hawaa miijii no woodi huunde moƴƴunde nde Yahuwah Alla faalanooka okkude mo. Ɗun no wa’i wa si himo inna tagaaɗo ɓuray weltaade si o ɗoftaaki Alla. Fenaande Seytaane aranere nden ko wi’ugol neene Hawaa wonnde o maayataa. Ko ɗun waɗi Deftere Alla nden noddi Seytaane « fenoowo » e « baaba penaale » (Yuuhanna 8:44).

2. Ko honɗun baaba Aadama e neene Hawaa suɓii waɗugol ?

Yahuwah Alla hari no moƴƴunoo e baaba Aadama e neene Hawaa. O daalani ɓe hiɓe waawunoo ɲaamude ɓiɓɓe kala leggal ka nder tutateeri Adni sinaa gootal (Fuɗɗoode nden 2:15-17, VPFJ). Kono ɓe suɓino ɲaamugol ɓiɓɓe ngal leggal. Neene Hawaa « tetti, o ɲaami ». Ɓawto ɗun, baaba Aadama kadi « ɲaami » (Fuɗɗoode nden 3:6, VPFJ). Ɓe ɗiɗɗoo non ɓe yedduno Alla. Sabu ko baaba Aadama e neene Hawaa timmunoo kon, hiɓe haanunoo waɗude ko moƴƴi. Kono e hoore tewagol fii yeddugol Alla, ɓe waɗi junuubu e ɓe wikkii ardannde makko nden. Ndee fewjoore addani ɓe tampereeji buy (Fuɗɗoode nden 3:16-19, VPFJ).

3. Ko honno fewjoore baaba Aadama e neene Hawaa nden battiniri en ?

Sabu ko baaba Aadama e neene Hawaa waɗi junuubu kon, ɓe wonti junuubankeeɓe e ɓe raaɓini jurriya maɓɓe on fow. Ko sabu baaba Aadama Deftere Alla nden wi’i : « sabu aaden gooto, junuubu naatiri e aduna on, e sabu on junuubu kadi mayde nden ari, ko wano non kadi mayde nden rewiri e hoore yimɓe ɓen fow » (Roomu 5:12).

Hiɗen tampude sabu piiji sertuɗi. Wonnde hiɗen tampa sabu pewjooje men bonɗe maa pewjooje bonɗe woɓɓe goo. Wonnde hiɗen tampa kadi sabu wonugol nokkuure e saa’i mo haanaa (janngee Waajotooɗo on 9:11).

LUGGINEE

Ndaaree fii honɗun Alla wonaa sabu bone e tampere e nder aduna on hannde e no o wa’irta si hiɗen tampude.

4. Wonɗo sabu tampere men nden

Yimɓe buy no hoolii ko Alla laamii aduna on. Hara ɗun ko goonga ? Fijinee VIDIO on.

VIDIO : Ko hommbo laamii aduna on ? (1:24)

Janngee Yaaquuba 1:13 e 1 Yuuhanna 5:19 e yewton fii ngal lanndal :

Ko Alla woni sabu tampere e bone ?

5. Ndaaree battane laamagol Seytaane

Fijinee VIDIO on.

VIDIO : Fii honɗun Alla accani tampere ? (Suutannde) (3:07)

Janngee Fuɗɗoode nden 3:1-6 (VPFJ) e yewton fii ɗee lanndaale :

Ko fenaande honnde Seytaane haali ? (Ndaaree aayeeje 4 e 5).
Honno Seytaane waɗiri wa si Yahuwah Alla faalanooka okkude tagaaɗo huunde moƴƴunde ?
E miijo Seytaane, tagaaɗo no hatonjini e ardannde Yahuwah Alla nden fii heɓugol weltaare ?

Janngee Waajotooɗo on 8:9 e yewton fii ngal lanndal :

Gila ko tagaaɗo wikkii ardannde Yahuwah Alla nden, ko honɗun woni e feƴƴude e nder aduna on ?

Ko notaa : pirintiiji holluɗi no leydi ndin wa’iri gila ka fuɗɗoode haa ko aroyta ka aljanna. A. Aljanna ka hoore leydi wonduɗo e tutateeri labaandi. B. Ardannde tagaaɗo e nder teeminanɗe hebbinii aduna on diina fenaande, anngal pottal, gere e mulugol leydi ndin. Laamateeriji dolnuɗi wa Misira, Siin, Gerees, Rom, Angleteer e Etas-ini. C. Yimɓe ka nder aljanna wattaaɗo ka hoore leydi.

Baaba Aadama e neene Hawaa hari no timmi e hari hiɓe ka aljanna. Kono ɓe heɗino Seytaane e ɓe yeddi Yahuwah Alla.
Gila murtaldu ndun, aduna on no heewi junuubu, tampere e mayde.
Yahuwah Alla ittay junuubu, tampere e mayde. On saa’i tagaaɗo wonay timmuɗo e o wuura ka aljanna.

6. Yahuwah Alla no kippi fii tampere men nden

Alla no haajaa si hiɗen tampude ? Ndaaree ko annabi Daawuuda e Petruusu sahaabaajo on winndunoo. Janngee Zabuura 31:7 (31:8, VPFJ) e 1 Petruusu 5:7 e yewton fii ngal lanndal :

Ko honno wa’irton anndugol Yahuwah Alla no yi’ude e no kippude fii tampere men nden ?

7. Alla ittay kala tampere tagaaɗo

Janngee Isaaya 65:17 e Feɲɲinannde 21:3, 4 e yewton fii ngal lanndal :

Yahuwah Alla no fodi o ittoyay kala ko sonnjata en. Fii honɗun ɗun no ɓuttina en ɓernde ?

Hari hiɗon anndi ?

Fewndo ko Seytaane haali fenaande aranere nden, o tooɲuno Yahuwah Alla. O bonuno innde Yahuwah Alla nden wa ardotooɗo mo aldaa e peewal e giggol. Yahuwah Alla wajimmbinay hoore makko saa’i o ittoyi kala tampere tagaaɗo ko aroyta. Ɗun no firi, o hollay ko ardannde makko nden tun ɓuri moƴƴude. Wajimmbingol innde Yahuwah nden ko huunde ɓurnde hittude e nder tageefo ngon fow (Matta 6:9, 10).

WOƁƁE GOO NO WI’A : « Alla tagii en fii jarribagol en. »

Ko honɗun wi’oton ?

RAWNOODE

Seytaane Ibuliisa, baaba Aadama e neene Hawaa woni sabu bone e nder aduna on. Yahuwah Alla no haajaa moƴƴa fii tampere men nden e neeɓataa o itta ɗun.