TOƁƁERE 29
Ko honɗun feƴƴata si en maayii ?
Goɗɗo mo yiɗuɗon feƴƴinii ? Si ɗun waɗii, no gasa hiɗon lanndoo : « Ko honɗun feƴƴata si en maayii ? Tanƴinaare no woodi fii yiitugol ɓe yiɗuɗen ? » E nder ndee toɓɓere e toɓɓere jokkitunde nden, ndaaree jaabaaji Deftere Alla nden ɓuttinayɗi en ɓernde.
1. Ko honɗun feƴƴata si en maayii ?
Annabi Iisaa eɓɓindirno mayde e ɗoyngol luggungol. Goɗɗo ɗaaniiɗo ko luggi anndaa ko woni e feƴƴude takko makko. Ko honno mayde nanndiri e ɗoyngol ? Si goɗɗo maayii, haray o anndaa hay huunde e o aldaa e tampere. Deftere Alla nden wi’i : « Mayɓe ɓen anndaa hay huunde » (janngee Waajotooɗo on 9:5).
2. Ko honno anndugol goonga on fii mayde nafirta en ?
Yimɓe buy no huli mayde e woɓɓe kadi no hula hay mayɓe ɓen ! Kono ko Deftere Alla nden wowli kon fii mayde ɓuttinay on ɓernde. Annabi Iisaa wi’i : « Onsay on anday goonga on, goonga on watta on rinɗinaaɓe » (Yuuhanna 8:32). Diinaaji buy no wi’a si goɗɗo maayii, wonkii makko kin luttay wuurude, kono wonaa ɗun Deftere Alla nden janni. Ko ɗun waɗi hay gooto tampataa si o maayii. E hoore ɗun, sabu ko mayɓe ɓen anndaa hay huunde kon, ɓe tampataa e ɓe waawataa en waɗude ko boni. Ko ɗun waɗi, en haanaa rewugol mayɓe ɓen maa waɗugol piijii fii ɓuttingol ɓe ɓernde.
Woɓɓe goo no wi’a hiɓe waawi yewtidude e mayɓe. Kono ɗun gasataa. Wano janngirɗen non, « mayɓe ɓen anndaa hay huunde. » Ɓee miijiiɓe no yewtidude e mayɓe, tigi tigi on, hiɓe yewtidude e jinnaaji waɗitiiɗi wa si ko maayuɓe. Anndugol goonga on fii mayde dannday en e juuɗe jinnaaji ɗin. Yahuwah Alla no haɗi en yewtidugol e mayɓe ɓen ɓayri himo anndi haalidugol e jinnaaji ɗin moƴƴanaa en (janngee Yaɲɲannde sariyaaji ɗin 18:10-12).
LUGGINEE
Ɓeyɗee anndugol ko Deftere Alla nden janni kon fii mayde e tiiɗinon gomɗinal mon ngal e Alla yiɗuɗo en on mo lorrataa mayɓe ɓen.
3. Anndee ko feƴƴata si goɗɗo maayii
E nder aduna on yimɓe no hoolii ko serti fii ko feƴƴata si en maayii. Tigi tigi on, wonaa ko ɓe hoolii kon fow woni goonga.
Ko honɗun yimɓe hoolii fii mayde ka wonuɗon ɗon ?
Fii anndugol ko Deftere Alla nden janni kon, fijinee VIDIO on.
Janngee Waajotooɗo 3:20 e yewton fii ɗee lanndaale :
Wano oo aaya wi’iri non, ko honɗun feƴƴata si goɗɗo maayii ?
No woodi ko wuurata e goɗɗo si o maayii ?
Deftere Alla nden no haali fii mayde Laazaru giɗo annabi Iisaa hiɓɓuɗo. E nder ko janngoton kon Yuuhanna 11:11-14, ndaaree no annabi Iisaa haaliri fii mayde Laazaru nden. Ɓawto ɗun, yewton fii ɗee lanndaale :
Ko honɗun annabi Iisaa eɓɓindiri e mayde ?
Ko honɗun ngal eɓɓindiral janni en fii mayɓe ɓen ?
Ko honɗun miijiɗon fii ko Deftere Alla nden janni fii mayɓe ɓen ?
4. Anndugol goonga on fii mayde no nafa en
Anndugol goonga on fii mayde hettinay en e kulol mayɓe ɓen. Janngee Waajotooɗo on 9:10 e yewton fii ngal lanndal :
Mayɓe ɓen no waawi en waɗude ko boni ?
Goonga Deftere Alla nden no dannda en kadi miijagol mayɓe ɓen no haani multeede maa reweede. Janngee Isaaya 8:19 e Feɲɲinannde 4:11 e yewton fii ngal lanndal :
E miijo mon, ko honno Yahuwah Alla miijorta fii goɗɗo rewoowo mayɓe ɓen maa daɓɓoowo ballal maɓɓe ?
Goonga on fii mayde no hettina en e naamuuji ɗi welataa Yahuwah Alla.
5. Anndugol goonga on fii mayde ɓuttinay en ɓernde
Yimɓe buy jannaama wonndema si ɓe maayii, ɓe tampinoyte sabu kuuɗe maɓɓe ɓonɗe ɗen. Kono no ɓuttina en ɓernde anndugol hay gooto tampintaake si o maayii, hay goɗɗo waɗunooɗo bonneeji buy. Janngee Roomu 6:7 e yewton fii ngal lanndal :
Wano Deftere Alla nden janniri non, si mayde hettinay goɗɗo e junuubu, hiɗon miijii mayɓe ɓen tampinte sabu kuuɗe maɓɓe bonɗe feƴƴuɗe ɗen ?
Ko no anndirɗen Yahuwah Alla woo, ko non ɓurtirten fellitude o jaɓataa muk tampingol mayɓe ɓen. Janngee Yaɲɲannde sariyaaji ɗin 32:4 e 1 Yuuhanna 4:8 e yewton fii ɗee lanndaale :
Si en miijitike fii sifaaji Alla winndaaɗi ɗin e nder ɗee aayeeje ɗoo, haray Alla jaɓay tampingol mayɓe ɓen ?
Hiɗon miijii goonga on fii mayde ɓuttinay en ɓernde ? Fii honɗun ?
WOƁƁE GOO NO WI’A : « Miɗo huli ko heɓatammi si mi maayii. »
Si goɗɗo haalanii on ɗun, ko aayeeje honɗe holloton mo fii ɓuttingol mo ɓernde ?
RAWNOODE
Si goɗɗo maayii, haray ngurndan makko ɗan hattii. Mayɓe ɓen tampataa e ɓe waawataa waɗude wuuruɓe ɓen ko boni.
Ndartannde
Ko honɗun feƴƴata si en maayii ?
Ko honno goonga on fii mayde nafirta en ?
Ko honno goonga on fii mayde ɓuttinirta en ɓernde ?
TASKEE
Ndaaree ko « wonkii » firi tigi tigi ka nder Deftere Alla.
Anndee si Alla no huutorde yiite poomayankeewe fii lettugol bonɓe ɓen.
Haray yiite poomayankeewe no woodi tigi tigi ? (3:07)
No haani ka hulen mayɓe ɓen ?
Anndee no gorko heɓiri ɓuttu-ɓernde ko o anndi goonga on fii ko feƴƴata si en maayii.