Honno welo welo heɓorto ka ɓeynguure men ?

1. Fii honɗun dewgal no moƴƴani welo welo ɓeynguure ?

Oo Kibaaru moƴƴo ko ka Yahuwah o iwri. Himo faalaa yo fow heɓu welo welo ka ɓeynguure mun (1 Timotee 1:11). Ko kanko fuɗɗi humugol dewgal. Ko dewgal humaangal addata welo welo e nder ɓeynguure e hoolaare hakkunde gorko e debbo. Ɗoftiiɓe Allah ɓen no haani teddinde sariyaaji leydi ka ɓe woni ɗon fii humugol dewgal. — Janngee Luuka 2:1, 4, 5.

Honɗun Allah miiji fii dewgal ? Himo faalaa dewgal hakkunde gorko e debbo yo wonu haa poomaa. Yahuwah no faalaa yo laaɓal wonu hakkunde gorko e debbo (Yahuudiyankeeɓe 13:4). Himo aɲi ko gorko e debbo seedata (Malakii 2:16, TMN). Kono sariya Allah on fii seedigal, ko si gorko on maa debbo on waɗii jina, ɓe waaway seedude. — Janngee Matta 19:3-6, 9.

2. Honno gorko e debbo jogondirta ?

Ko Allah tagunoo gorko e debbo, o holluno ko ɓe haani waɗude (Fuɗɗooɗe nden 2:18). Jooma ɓeynguure no haani ɲamminde, holtina e janna ɓeynguure makko laawol Allah ngol. Himo haani yiɗugol ɓeyngu makko moƴƴa. Gorko e debbo no haani yiɗindirde e mo kala teddina ɗimmo mun. Ɓe accindirana hakkee, ɓayri alaa mo faljataa. Ko ɗun addata welo welo e nder ɓeynguure. — Janngee Efeesi 4:31, 32 ; 5:33 ; 1 Petruusu 3:7.

3. Hiɗon haani seedude ɓayri on nantondirtaa ?

Si tawi on alaa nantondirde, mo kala no haani jogoraade ɗimmo mun hoore giggol fii no fottiron (1 Korenti 13:4, 5). Daaluyee Allah on no holli hinaa seedugol woni feere moƴƴingol hakkunde gorko e ɓeyngu mun. — Janngee 1 Korenti 7:10-13.

4. Fayɓe, honɗun Allah faalanaa on ?

Yahuwah no faalaa yo on welto. Ko sabu ɗun o jonniri on waaju ko nafata on ka fewndaare mon. Himo faalaa yo on heɓu faamu mawɓe mon ɓen (Koloosi 3:20). Yahuwah no faalaa kadi, si hiɗon waɗude goɗɗun fii makko hara ko e hoore weltaare mon. — Janngee Waajotooɗo on 11:9—12:1, TMN ; Matta 19:13-15 ; 21:15, 16.

5. Mawɓe, honno ɓiɓɓe mon ɓen heɓirta weltaare ?

Hiɗon haani gollude fii no ɓe heɓira ko ɓe ɲaama, ko ɓe watto e ka ɓe hoɗa (1 Timotee 5:8). Hiɗon haani kadi jannude ɓe fii Allah, fii no ɓe heɓira weltaare (Efeesi 6:4). Wano yiɗirɗon Allah non, ko non paykoy mon koy kadi yiɗirta mo. Si hiɗon jokki sariyaaji Allah ɗin fii jannugol paykoy mon koy, ɓe wonay ɗoftiiɓe Allah. — Janngee Yaɲɲannde sariyaaji ɗin 6:4, TMN ; 2 Timotee 3:15.

Nafay ɓiɓɓe mon ɓen si on wallitike ɓe. Kono hiɗon haani okkude ɓe needi. Ko ɗun danndoyta ɓe, walloya ɓe, ɓe heɓa moƴƴere e weltaare (Tindi 22:15, TMN). Kono needi ndin wonaa yo sattu kadi haa tampina ɓe. — Janngee Koloosi 3:21.

Seedeeɓe Yahuwah ɓen no sennditude defte buy ko wallata jooma ɓeynguure e fayɓe. Ɗen defte no holli sariyaaji Allah ɗin. — Janngee Zabuura 19:7, 11, TMN.