TOƁERE 10
Honno anndirten laawol Allah ngol ?
1. Laawol Allah ngol ko gootol ?
“ Reenee e waɗitiiɓe annaba ɓen. ” — MATTA 7:15.
Annabi Iisaa jannuno taalibaaɓe makko ɓen fii laawol Allah ngol. Laawol ngurndan poomayankejan. Annabi Iisaa innuno : “ Ko seeɗaaɓe heɓata ” ngol laawol (Matta 7:14). Ko rewooɓe Allah no haaniri non Allah jaɓanta. Ɗoftiiɓe Allah ɓen fow no gomɗini e huunde wootere. — Janngee Yuuhanna 4:23, 24 ; 14:6 ; Efeesi 4:4, 5.
2. Honɗun annabi Iisaa wi’i fii waɗitiiɓe almasiiyaaɓe ?
“ Hiɓe wi’i ko ɓe annduɓe Allah, kono kuuɗe maɓɓe ɗen no yeddi ɗun. ” — TIITUUSA 1:16.
Annabi Iisaa wi’uno yo en wattan yila fii waɗitiiɓe annabaaɓe, ɓayri ɓe jannataa fii laawol Allah ngol. Ɓe waɗa hoore maɓɓe wa rewooɓe Allah. Kono jikku maɓɓe ngun no holli hinaa ɓe rewooɓe Allah. Honno jikku maɓɓe holliri hinaa ɓe rewooɓe Allah ? Ɓayri ko rewooɓe Allah no haaniri tun anndira jikku moƴƴungu. — Janngee Matta 7:13-23.
3. Honno anndirten rewooɓe Allah ɓen ?
Ɗii piiji jowi ɗoo no holli rewooɓe Allah e ɓee ɓe rewataa Allah.
Hiɓe teddini Deftere Allah nden. Hiɓe jokki sariyaaji Allah ɗin. Hiɓe serti e ɓee jokkuɓe aduna (Matta 15:7-9). Ɓe waajotaako huunde, ɓe waɗa goɗɗun goo. — Janngee Yuuhanna 17:17 ; 2 Timotee 3:16, 17.
Hiɓe teddini innde Allah nden, Yahuwah. Annabi Iisaa teddinno innde Allah nden. O walluno jamaa on no ɓe anndira innde Allah nden. O jannuno ɓe no ɓe torora fii no innde Allah nden hormore (Matta 6:9). Ko homɓe woni wallude yimɓe ɓen fii no ɓe anndira innde Allah nden ? — Janngee Yuuhanna 17:26 ; Roomu 10:13, 14.
Hiɓe waajaade fii Laamu Allah ngun. Allah yamirno annabi Iisaa yo o waajo fii laamu makko ngun e oo aduna. Ko ngun laamu makko tun waawata en wallude no heɓiren ngurndan moƴƴan (Luuka 4:43 ; 8:1 ; 23:42, 43). Annabi Iisaa wi’ino, taalibaaɓe makko ɓen waajoto fii oo kibaaru moƴƴo. Si goɗɗo yewtii on fii Laamu Allah ngun, ko laawol honngol sikkuɗon himo jokki ? — Janngee Matta 24:14.
Ɓe jeyaaka e oo aduna bonɗo. Hiɓe anndira jikku maɓɓe ngun ɓayri ɓe tawaaka e fii politiki maa gere hakkunde leƴƴi (Yuuhanna 17:16 ; 18:36). Ɓe jokkataa jikku yimɓe bonɓe e oo aduna. — Janngee Yaaquuba 4:4.
Hiɓe yiɗindiri. Daaluyee Allah on no janni ɓe, yo ɓe teddin leƴƴi ɗin fow. Ɓe bammbantaa hay gooto fii waɗugol gere maa aɲugol ɗimmo mun. Ɗoftiiɓe Allah ɓen tawaaka fii gere (Mikaa 4:1-3, TMN). Hiɓe huutorde saa’i maɓɓe e jawdi maɓɓe no ɓe wallira ɗimmooɓe maɓɓe. — Janngee Yuuhanna 13:34, 35 ; 1 Yuuhanna 4:20.
4. On waaway annditude rewooɓe Allah ɓen ?
Ko homɓe jannata daaluyee Allah on, teddina innde Allah nden, e waajo jamaa on fii ko Laamu Allah ngun waɗoyta fii tagaaɗo ? Mojobere honnde jokki enɗan aɲi gere ? Ko honɗun wi’uɗon ? — Janngee 1 Yuuhanna 3:10-12.