TOƁƁERE 38
Hollee weltaare fii dokkal ngurndan
No woodi piiji moƴƴi buy ɗi waaweten anndude e waɗude ɓayri hiɗen wuuri. Hay si en heɓii satteendeeji wonnde, no woodi piiji weltinayɗi en e nder ngurndan men. Ko honno hollirten weltaare fii dokkal ngurndan ? E ko fii dalil hommbo hittuɗo moƴƴa waɗanten ɗun ?
1. Fii honɗun hiɗen haani weltorde ngurndan ?
Hiɗen haani weltorde ngurndan ɓayri ko dokkal Yahuwah Alla, Ben men yiɗuɗo en on. Ko kanko woni « ɓundu ngurndan », taguɗo piiji ɗin fow (Zabuura 36:9 [36:10, VPFJ]). « Ko on woni Yeɗoowo mo kala ngurndan e poopaali e kala huunde » (Kuuɗe sahaabaaɓe ɓen 17:25, 28). Yahuwah Alla no okka en kala ko hatonjiniɗen fii wuurugol. Kono wonaa ɗun tun o waɗata. O waɗay kadi fii no heɓiren weltaare ka ngurndan men (janngee Kuuɗe sahaabaaɓe ɓen 14:17).
2. Ko honno hollirten Yahuwah Alla weltaare men fii dokkal ngurndan ?
Gila ko wonuɗen ka nder reedu neene men, Yahuwah Alla no kippi fii men. Ka nder Deftere Alla, rewoowo Alla inneteeɗo Daawuuda, wi’uno : « Fewndo mi wonnoo huunde meerenteere, tawi gite maa ɗen no rentimmi. » (Zabuura 139:16, VPFJ). Ngurndan men ɗan no hittani Yahuwah Alla fota (janngee Matta 10:29-31). No metta Yahuwah Alla moƴƴa si ontigi tewike pas ittugol hoore maa wartagola (Eggudu ndun 20:13, VPFJ). No metta Yahuwah Alla moƴƴa kadi si en weeɓitii ngurndan men ɗan e hoore meere maa ronka wattande yila fii danndugol ngurndan woɓɓe goo. Si en kippii fii ngurndan men ɗan e si en teddinii ngurndan woɓɓe goo, en hollay hiɗen weltori ngal dokkal ngurndan moƴƴal.
LUGGINEE
Ndaaree pehe goo ɗe waawoton hollude weltaare fii dokkal ngurndan.
3. Kippee fii cellal mon ngal
Sabu ko okkuɗen Yahuwah Alla ngurndan men ɗan, en waɗay faale makko on saa’iiji ɗin fow. Ɗun no wa’i wa okkitirgol Alla ɓalli men ɗin wa sadaka. Janngee Roomu 12:1, 2 e yewton fii ɗee lanndaale :
Ko honɗun wakkilinta on kippugol fii cellal mon ngal ?
Ko honno kippirton fii cellal mon ngal ?
4. Wattanee yila fii danndugol hoore mon e danndugol woɓɓe goo
Deftere Alla nden no waajii en selugol piiji barminayɗi en maa warayɗi en. Fijinee VIDIO on fii anndugol piiji ɗi haanuɗen waɗude fii danndugol hoore men.
Janngee Tindi 22:3 (VPFJ) e yewton fii no wattirton yila fii hiwugol ngurndan mon ɗan e ngurndan woɓɓe goo si hiɗon...
ka suudu mon,
ka golle mon,
waɗude spor,
ka oto, ka motoo maa e nder kaaruwal.
5. Teddinee ngurndan boobo mo heɓaaka taho
E nder konnguɗi wallifaaku, annabi Daawuuda haaluno honno Yahuwah Alla kippiri fii ngurndan e no boobo njanɗirta ka nder reedu. Janngee Zabuura 139:13-17 (VPFJ) e yewton fii ngal lanndal :
Fii Yahuwah Alla, ko saa’i hommbo ngurndan tagaaɗo fuɗɗotoo : ko ka debbo ƴetti reedu kaa ko ka boobo on heɓaa ?
Sariyaaji ɗi Yahuwah Alla jonnunoo Banii-Isra’iila’en danndayno neene on e boobo mo heɓaaka on taho. Janngee Eggudu ndun 21:22, 23 (VPFJ) e yewton fii ɗee lanndaale :
Ko honɗun Yahuwah Alla miijii fii mo tewaaki warugol boobo mo heɓaaka taho ?
Ko honɗun o miijii fii tewiiɗo warugol boobo mo heɓaaka tahob ?
Ko honno yiiruɗon miijo Alla ngon ?
Hay debbo teddinɗo ngurndan miijoto wonnde feere goo alaa sinaa bonnugol reedu. Janngee Isaaya 41:10 e yewton fii ɗee lanndaale :
Si tawii debbo no sonnjeede fii bonnugol reedu, ko hommbo o lanndotoo ballal. Fii honɗun ?
WOƁƁE GOO NO WI’A : « Wonnde piiji no waɗa debbo bonnugol reedu. »
Ko honɗun fellintinta on wonndema Yahuwah Alla no teddini ngurndan boobo mo heɓaaka taho e ngurndan neene makko ?
RAWNOODE
Deftere Alla nden no janni en ngurndan ko dokkal Alla. Hiɗen haani yiɗude, teddinde e danndude ngurndan men ɗan e ngurndan woɓɓe goo.
Ndartannde
Fii honɗun ngurndan tagaaɗo no hittani Yahuwah Alla ?
Ko honno Yahuwah Alla wa’irta si goɗɗo tewike warugol goɗɗo goo ?
Fii honɗun weltantoɗon Yahuwah Alla fii dokkal ngurndan ?
TASKEE
Ko honno jarnirten Yahuwah Alla fii dokkal ngurndan ?
Heɓee jaabawol ngal lanndal : Alla no yaafoo debbo bonnuɗo reedu ?
« Ko honɗun Deftere Alla nden wi’i fii bonnugol reedu ? » (Winndannde ka jw.org)
Anndee no Alla miijori fii ngurndan wallirta on suɓagol moƴƴa fijindaaru.
« ʼSpor hulɓiniiɗo’ : no haani ka waɗen ɗun ? » (Finee !, 8 ottoombur 2000)
Ko honno Deftere Alla nden wallirta goɗɗo maruɗo miijo fii wartagol ?
a Yahuwah Alla no kippi moƴƴa fii maaya-ɓerɗeeɓe (Zabuura 34:18 [34:19, VPFJ]). Himo faama miijooji sattuɗi waɗayɗi haa goɗɗo faale wartagol e himo faalaa wallude ontigi. Fii anndugol no Yahuwah Alla wallirta ontigi, janngee winndannde nden : « Miɗo faalaa maayude—Deftere Alla nden no waawi lan wallude si mi heɓii miijooji fii wartagol ? » ka senngo Taskee e nder ndee toɓɓere.
b Ɓee bonnuɓe reedu haanaa lettude hoore mun ko feƴƴiti sabu ko ɓe waɗi kon, ko fii Yahuwah Alla no waawi yaafaade ɓe. Fii anndugol ko ɓuri nii, ndaaree winndannde nden « Ko honɗun Deftere Alla nden haali fii bonnugol reedu ? » lintaande ka senngo Taskee e nder ndee toɓɓere.