TOƁƁERE 58
Luttee wonangol Yahuwah Alla sella-finndeeɓe
Almasiiyaaɓe goongaaɓe ɓen accataa hay gooto maa hay huunde haɗa ɓe rewugol Yahuwah Alla. Meɗen felliti ko ɗun miijiɗon. Sella-finndeyaagal mon ngal no hittani Yahuwah Alla fota (janngee 1 Fillande taariika 28:9). Ko piiji honɗi waɗata haa ronkon wonande Alla sella-finndeejo e ko honɗun wallata on wonugol sella-finndeejo ?
1. Ko honno woɓɓe etorta bonnugol sella-finndeyaagal men ngal e Yahuwah Alla ?
Woɓɓe goo faalete haɗugol en rewugol Yahuwah Alla. Ko homɓe waɗata sifa ɗun ? Woɓɓe e maɓɓe selii goonga on e hiɓe haala penaale fii fedde Alla nden fii bonnugol gomɗinal men ngal. Hiɓe noddaa « yedduɓe ». Hooreeɓe diina goo kadi no haala fenaande fii murtingol ɓee ɓe wattanta yila e goonga on. No hulɓinii yewtidugol e dartiiɓe, janngugol defte maɓɓe maa blogji maɓɓe, yahugol ka jokkorɗe enternet maɓɓe e ndaarugol vidiooji maɓɓe. Fii ɓee etotooɓe haɗugol woɓɓe goo rewugol Yahuwah Alla e hoore sella-finndeyaagal, annabi Iisaa wi’i : « Tertee ɓe, ko bumɓe woni ɗowude bumɓe. Si bunɗo non ɗowii bunɗo, ɓe ɗiɗoo non ɓe yanay e nder ngayka » (Matta 15:14).
2. Ko honno pewjooje men ɗen hollirta hiɗen wonani Yahuwah Alla sella-finndeeɓe ?
Ɓay hiɗen yiɗi Yahuwah Alla, en waɗataa hay huunde ko tawaa e diina fenaande. Golle men ɗen, feddeeji ɗi tawaɗen e mun ɗin maa kala ko waɗeten haanaa humondirde e diina fenaande. Yahuwah Alla no waajii en : « Yaltee e mayre [Baabiila Mawnde nden], yo jamaa an » (Feɲɲinannde 18:2, 4).
LUGGINEE
Anndee honno waawirton wikkorde kala ko lo’inta sella-finndeyaagal mon ngal e Yahuwah Alla. Anndee kadi no hollirton sella-finndeyaagal e hoore yaltugol Baabiila Mawnde nden.
3. Renee e ɓee jannooɓe fenaande
Ko honno waɗirten si en nanii goɗɗo no aybina fedde Yahuwah nden ? Janngee Tindi 14:15 (VPFJ) e yewton fii ngal lanndal :
Fii honɗun en haanaa hoolaade kala ko naneten ?
Janngee 2 Yuuhanna 9-11 e yewton fii ɗee lanndaale :
Ko honno jogorten yedduɓe ɓen ?
Hay si en alaa humpondirde e yedduɓe ɓen, ko honno janndeeji maɓɓe ɗin hewtirta en ?
E miijo mon, ko honno Yahuwah Alla wa’irta si en jentike ɓee aybinooɓe mo e fedde makko nden ?
4. Wonanen Alla sella-finndeeɓe si musiɗɗo ka dewal waɗii junuubu
Si en nanii musiɗɗo men ka moftal waɗii junuubu tiiɗuɗo, ko honɗun haanuɗen waɗude ? Ndaaree tugalal iwrungal e Sariya mo Alla jonnunoo jamaa Isra’iila ɓaawo ɗoo. Janngee Sariyaaji lewiyankeeɓe ɓen 5:1.
Wano holliraa non e nder oo aaya, si en anndii goɗɗo waɗii junuubu tiiɗuɗo, hiɗen haani haalande ardotooɓe moftal ngal ko annduɗen kon. Ko adii kon, en hollay hiɗen moƴƴi e waɗuɗo bone on si en wakkilinii mo haalangol ardotooɓe ɓen fii junuubu makko on. Si o waɗaali ɗun, sella-finndeyaagal men ngal waɗay enen haalanen ardotooɓe ɓen. Ko honno waɗugol ɗun hollirta giggol men sella-finndewol fii…
Yahuwah Alla ?
waɗuɗo junuubu on ?
woɓɓe goo ka moftal ?
Si musiɗɗo ka dewal no heɓi satteendeeji, wallee mo !
5. Woɗɗitee Baabiila Mawnde nden
Janngee Luuka 4:8 e Feɲɲinannde 18:4, 5 e jaaboɗon ɗee lanndaale :
Haa jooni haray miɗo humondiri e diina fenaande ?
Miɗo tawaa e fedde humondirnde e diina goo ?
Haray golle an ɗen no tammbitii diina fenaande e baŋŋe goo ?
No woodi huunde goo e nder ngurndan an ɗan ko holli miɗo haani seedude e diina fenaande ?
Si mi jaabike « hiihi » lanndal e ɗee lanndaale, ko honɗun mi haani waylude ?
No woniri woo, fewjiree ɓernde laaɓunde e hollon Yahuwah Alla sella-finndeyaagal.
Ko honɗun waɗoton si on lanndaama waɗugol dokkal fii golle diina fenaande ?
WOƁƁE GOO NO WI’A : « Miɗo haani anndude ko yedduɓe haalata e hoore Seedeeɓe Yahuwah ɓen fii daranagol goonga on. »
Hiɗon miijii ɗun ko ko moƴƴi ? Fii honɗun ?
RAWNOODE
Fii wonangol Yahuwah Alla sella-finndeeɓe, wonaa yo en jokkondir e yedduɓe mo ɓen.
Ndartannde
Fii honɗun en haanaa heɗaade janndeeji yedduɓe ?
Ko honno jokkirten waaju ngun fii yaltugol e diina fenaande ?
TASKEE
Anndee ko waɗoton si woɓɓe no haalude fenaande e hoore Seedeeɓe Yahuwah ɓen.
« Hara hiɗon anndi ko feƴƴi kon fow ? » (Suudu Aynirdu ndun, ut 2018)
Ko honno anndirton si golle maa fedde no tammbitii Baabiila Mawnde nden ?
Ko honɗun dartiiɓe goo waɗi fii bonnugol gomɗinal men ngal ?
E nder taariika on « Hari miɗo ɗaɓɓude Alla gila paykunyaagal », janngee fii hooreejo diina shinto seedunooɗo e diina fenaande fes.
« Deftere Alla nden no wayla ngurndan » (Suudu Aynirdu ndun, 1 suwiye 2011)