Baraaji fii ɗoftiiɓe Alla ɓen

Annabi Muusa wi’uno si en ɗoftike yamirooje Alla ɗen, o barkinay en (Yaɲɲannde sariyaaji ɗin 10:13 ; 11:27). Wonaa sabu ko Alla donkinta en kon ɗoftortoɗen mo. Sifaaji Alla labaaɗi ɗin waɗay ɗoftoɗen mo ɓayri hiɗen yiɗi mo e hiɗen faalaa wikkagol kala huunde nde welataa mo. « Ko woni yiɗugol Alla : ko ɗoftagol yamirooje makko ɗen. Yamirooje makko ɗen-le hinaa sattuɗe » (1 Yuuhanna 5:3).

Kono ko honno Alla barkinirta en si en ɗoftike mo ? Ndaaren sifaaji ɗiɗi.

1. ƊOFTAGOL ALLA WAƊAY EN FAAMUƁE

« Min Yahuwah, ko min woni Alla maa on, wonɗo ma e jannude on fii no nafira hoore maa, holloowo ma laawol ngol haanuɗaa rewude » (ISAAYA 48:17).

Yahuwah Alla, Taguɗo en on, no anndi en e himo ɗowude en no haaniri. Si hiɗen faalaa yo Alla wallu en fewjugol no haaniri non, hiɗen haani janngude ka nder Binndi seniiɗi ɗin ko o faalaa yo en waɗu e huutoren ko jannguɗen kon.

2. ƊOFTAGOL ALLA OKKAY EN WELTAARE

« Maloore wonanii [...] ɓen heɗotooɓe daaluyee Alla on, ɗoftoo mo! » (LUUKA 11:28).

Hannde, miliyonji yimɓe ɗoftiiɓe Daaluyee Alla on no heɓude weltaare timmunde. E piide misal, ndaaren gorko espaɲoljo monotonooɗo ko tiiɗi e hunƴanaynooɗo woɓɓe goo, hay ɓeyngu makko. Ɲannde goo, o janngi ko annabi Muusa winndunoo fii newaare annabi Yuusufu nden, ɓiɗɗo annabi Yaaquuba on. Annabi Yuusufu yeeyirano wa maccuɗo e o sokirano e hoore tooɲe. Kono, o luttuno wonugol newiiɗo e deƴƴuɗo, e hari himo hebilinoo yaafagol (Fuɗɗoode nden, simooje 37-45). Gorko on wi’i : « Misal annabi Yuusuufu ngal wakkilinno lan wonugol newiiɗo, moƴƴuɗo e waawugol hoore an. Jooni miɗo weltii. »

Binndi seniiɗi ɗin okkay en waajuuji goo honno huuwondirten e woɓɓe goo. Ndaaren ɗun e winndannde jokkitunde nden.