Taispeánann Íosa é Féin do na hIascairí

Tamall tar éis d’Íosa é féin a thaispeáint do na haspail, chuaigh Peadar go dtí Muir na Gailíle le dul ag iascach. Chuaigh Tomás, Séamas, Eoin, agus cuid eile de na haspail in éineacht leis. Bhí siad ag iascach ar feadh na hoíche ach ní bhfuair siad aon iasc.

Go luath ar maidin, chonaic siad fear ina sheasamh ar an gcladach. Ghlaoigh sé orthu agus dúirt: ‘An bhfuair sibh aon iasc?’ Dúirt siad leis: ‘Ní bhfuair!’ Dúirt an fear leo: “Cuirigí amach an eangach ar dheis na loinge.” Nuair a rinne siad é sin, líon an eangach agus bhí an oiread sin éisc inti nach raibh siad in ann í a tharraingt isteach sa mbád. Thuig Eoin ansin gurbh é Íosa a bhí ann agus dúirt sé: “Is é an Tiarna é.” Nuair a chuala Peadar é sin, chaith sé amach as an mbád é féin agus shnámh sé go cladach. Lean na deisceabail eile sa mbád é.

Nuair a tháinig siad i dtír chonaic siad go raibh tine lasta agus iasc agus arán á réiteach air. D’iarr Íosa orthu cuid dá gcuid éisc a thabhairt leo le cur leis an mbéile. Ansin dúirt sé: ‘Tar agus bíodh bricfeasta agaibh.’

Tar éis dóibh an bricfeasta a chríochnú, chuir Íosa ceist ar Pheadar: ‘An bhfuil níos mó cion agat ormsa ná mar atá agat ar an iascaireacht?’ Dúirt Peadar: ‘Tá, a Thiarna, tá a fhios agat go bhfuil.’ Dúirt Íosa: ‘Má tá, beathaigh mo chuid uan.’ D’fhiafraigh Íosa arís: ‘A Pheadair, an bhfuil cion agat orm?’ D’fhreagair Peadar: ‘A Thiarna, tá a fhios agat go bhfuil.’ Dúirt Íosa: “Déan aoireacht ar mo chaoirigh.” Chuir Íosa an cheist chéanna arís den tríú huair. Tháinig brón ar Pheadar agus dúirt sé: ‘A Thiarna, tá a fhios agatsa gach ní. Tá a fhios agat go bhfuil cion agam ort.’ Dúirt Íosa: “Cothaigh mo chaoirigh.” Ansin dúirt sé le Peadar: “Lean mise.”