Ríocht a Sheasfaidh go Deo

Oíche amháin bhí brionglóid aisteach ag Rí Nabúcadnazar. Bhí sé chomh trína chéile is nach raibh sé in ann codladh. Chuir sé fios ar a chuid draíodóirí agus dúirt sé leo: ‘Mínígí mo bhrionglóid dom.’ Dúirt siad leis: ‘Inis an bhrionglóid dúinn, a rí.’ Ach dúirt Nabúcadnazar leo: ‘Ní inseoidh! Insígí-se mo bhrionglóid domsa, nó maróidh mé sibh.’ Dúirt siad leis arís: ‘Má insíonn tú do bhrionglóid dúinn míneoidh muid duit í.’ Dúirt sé leo: ‘Tá sibh ag iarraidh an dallamullóg a chur orm. Insígí mo bhrionglóid dom!’ Dúirt siad leis an rí: ‘Níl aon fhear beo atá in ann é sin a dhéanamh. Tá an rud atá tú a iarraidh dodhéanta.’

Bhí an oiread sin oilc ar Nabúcadnazar gur ordaigh sé na fir feasa ar fad a bhí sa tír a mharú. Ina measc sin bhí Dainéil, Seadrac, Méiseac, agus Aibéid Neagó. D’iarr Dainéil ar an rí roinnt ama a thabhairt dó. Ansin thosaigh sé féin agus a chairde ag guí chuig Iehova. Céard a rinne Iehova?

Thaispeáin Iehova brionglóid Nabúcadnazar do Dhainéil i bhfís, agus d’inis sé dó céard a chiallaigh sí. An lá dar gcionn chuaigh Dainéil go dtí searbhónta an rí agus dúirt sé: ‘Ná maraigh na fir feasa. Tá mise in ann brionglóid an rí a mhíniú.’ Thug an searbhónta Dainéil go dtí Nabúcadnazar. Dúirt Dainéil leis an rí: ‘Tá Dia ag insint duit an rud atá chun tarlú amach anseo. Seo í do bhrionglóid: Chonaic tú dealbh ollmhór a raibh cloigeann óir air, brollach agus lámha airgid, bolg agus ceathrúna copair, cosa iarrainn, agus troithe déanta as iarrann measctha le cré. Ansin gearradh cloch amach as sliabh agus bhuail sé an dealbh sna troithe. Rinneadh púdar den dealbh agus d’imigh sé le gaoth. Rinneadh sliabh mór den chloch agus líon sí an domhan go léir.’

Dúirt Dainéil ansin: ‘Is é seo brí do bhrionglóide: Is í do ríochtsa an cloigeann óir. Seasann an t-airgead don ríocht a thiocfaidh i do dhiaidh-sa. Ansin beidh ríocht ann a bheidh cosúil le copar, agus rialóidh sí an domhan go léir. Beidh an chéad ríocht eile láidir cosúil le hiarann. Ar deireadh, beidh ríocht ann a bheidh deighilte—beidh cuid di láidir cosúil le hiarann, agus beidh cuid eile di lag cosúil le cré. Is í Ríocht Dé an chloch ar rinneadh sliabh aisti. Scriosfaidh sí na ríochtaí seo uile agus seasfaidh sí féin go deo.’

Thit Nabúcadnazar béal faoi ar an talamh os comhair Dhainéil. Dúirt sé: ‘D’inis do Dhia an bhrionglóid seo duit. Níl aon Dia eile mar é.’ Chuir Nabúcadnazar Dainéil i gceannas ar na fir feasa, agus rinne sé rialtóir de ar chúige na Bablóine. An bhfeiceann tú an chaoi ar fhreagair Iehova paidir Dhainéil?