Peaca Dháiví

Nuair a fuair Sól bás, déanadh rí de Dháiví. Bhí sé 30 bliain d’aois. Oíche amháin, tar éis dó a bheith ag rialú ar feadh roinnt blianta, chonaic sé bean álainn ó dhíon a pháláis. Fuair sé amach gur Baitseaba an t-ainm a bhí uirthi agus go raibh sí pósta ag saighdiúir darbh ainm Úiríá. Thug Dáiví cuireadh do Bhaitseaba a theacht go dtína phálás. Tar éis dó luí léi, bhí Baitseaba ag súil le páiste. Bhí Dáiví ag iarraidh an rud a bhí déanta aige a cheilt. Dúirt sé le ginearál an airm, Úiríá a chur chun tosaigh sa gcath agus ansin tarraingt siar uaidh. Maraíodh Úiríá sa gcath. Ina dhiaidh sin, phós Dáiví Baitseaba.

Chonaic Iehova na drochrudaí go léir a rinne Dáiví. Meas tú céard a dhéanfadh sé? Chuir Iehova an fáidh Nátán chuig Dáiví. Dúirt Nátán leis: ‘Bhí fear saibhir ann a raibh go leor caoirigh aige, agus fear bocht nach raibh aige ach uainín beag amháin agus bhí an-chion aige air. Thóg an fear saibhir uan an fhir bhoicht.’ Bhuail fearg Dáiví agus dúirt: ‘Tá an bás tuillte ag an bhfear saibhir sin!’ Ansin dúirt Nátán le Dáiví: ‘Is tusa an fear saibhir!’ Bhí Dáiví croíbhriste, agus d’admhaigh sé: ‘Pheacaigh mé in aghaidh Iehova.’ Tharraing an peaca seo go leor trioblóide ar Dháiví agus ar a theaghlach. Chuir Iehova pionós ar Dháiví, ach lig sé dó maireachtáil de bhrí go raibh sé ionraic agus uiríseal.

Bhí fonn ar Dháiví teampall a thógáil d’Iehova, ach chuir Iehova an cúram sin ar a mhac Solamh. Thosaigh Dáiví ag fáil rudaí faoi réir do Sholamh agus dúirt: ‘Caithfidh teampall Iehova a bheith ina theach an-bhreá. Tá Solamh fós óg, ach cabhróidh mise leis rudaí a fháil faoi réir.’ Chuir Dáiví go leor dá chuid airgid féin ar fáil le haghaidh an obair thógála. Fuair sé oibrithe oilte. Bhailigh sé ór agus airgead, agus fuair sé crainn céadair ó Thuír agus ó Shíodón. Nuair a bhí sé ag teannadh le deireadh a shaoil thug Dáiví pleananna an teampaill do Sholamh. Dúirt sé leis: ‘Iehova a dúirt liom iad seo ar fad a scríobh síos duit. Tabharfaidh Iehova cúnamh duit. Ná bíodh eagla ort. Bíodh misneach agat agus tabhair faoin obair.’