Yitso 22
Yaa nɔ Ojaje Nyɔŋmɔ Wiemɔ lɛ Kɛ Ekaa
1. (a) Mɛɛ sanekpakpa Yesu kaselɔi lɛ jaje kɛjɛ Pentekoste afi 33 Ŋ.B. kɛyaa, shi te nɔyelɔi lɛ kɛ onukpai ni ji Yudafoi lɛ fee amɛnii yɛ he amɛha tɛŋŋ? (b) Mɛɛ saji wɔbaanyɛ wɔbi wɔ diɛŋtsɛ wɔhe yɛ enɛ he?
SAJI ni he hiaa fe fɛɛ yɛ adesai ayinɔsane mli fe afii 4,000 ni eho lɛ eba mli. Afɔ Nyɔŋmɔ diɛŋtsɛ Bi, Yesu Kristo mu, akɛ wɔsɛɛ be Maŋtsɛ yɛ shikpɔŋ muu lɛ fɛɛ nɔ. Yɛ Yesu gbele ni jamɔ mli henyɛlɔi lɛ kɛba lɛ fɛɛ sɛɛ lɛ, Yehowa etee e-Bi lɛ shi kɛjɛ gbohii ateŋ. Abaanyɛ atsɔ enɔ ni yiwalaheremɔ aba ni naanɔ wala ajɛ mli aba. Shi beni Yesu kaselɔi anɔkwafoi lɛ shiɛ sanekpakpa nɛɛ yɛ faŋŋ mli lɛ, ate shi awo amɛ waa. Klɛŋklɛŋ lɛ, ashɛrɛ bɔfoi lɛ ateŋ mɛi enyɔ awo tsuŋ, kɛkɛ ni no sɛɛ lɛ amɛ fɛɛ. Ayi amɛ ni afa amɛ ni amɛkpa wiemɔ ni amɛwieɔ yɛ Yesu gbɛi amli lɛ. (Bɔf. 4:1-3, 17; 5:17, 18, 40) Mɛni esa akɛ amɛfee? Ni kulɛ mɛni obaafee? Ani obaaya nɔ okɛ ekaa aye odase?
2. (a) Mɛɛ sane ni yɔɔ naakpɛɛ babaoo ehe hiaa ni ajaje yɛ wɔgbii nɛɛ amli? (b) Gbɛnaa nii ka namɛi anɔ akɛ amɛfee nakai?
2 Yɛ afi 1914 Ŋ.B. lɛ, sane ko ni yɔɔ naakpɛɛ ni he hiaa jeŋ fɛɛ lɛ ba mli. Ato Nyɔŋmɔ Maŋtsɛyeli ni yɔɔ Yesu Kristo dɛŋ lɛ ama shi diɛŋtsɛ yɛ ŋwɛi. Nɔ ni nyiɛ sɛɛ ji, ashɛrɛ Satan kɛ edaimonioi lɛ ashwie shikpɔŋ lɛ nɔ. (Kpoj. 12:1-5, 7-12) Nibii agbɛjianɔtoo nɛɛ naagbee gbii lɛ je shishi. Dani yinɔ ni na nibii ni tee nɔ yɛ 1914 lɛ fɛɛ aaagboi lɛ, Nyɔŋmɔ baakpata Satan nibii gbɛjianɔtoo muu lɛ fɛɛ hiɛ. (Mat. 24:34) Mɛi ni baaje mli lɛ baana naanɔ wala he gbɛkpamɔ yɛ amɛhiɛ. Nɔ ni kɛ Nyɔŋmɔ shishijee yiŋtoo lɛ baaba mli lɛ, shikpɔŋ muu lɛ fɛɛ baatsɔ Paradeiso. Kɛ okpɛlɛ nɛkɛ sanekpakpa nɛɛ nɔ momo lɛ, belɛ gbɛnaa nii ka onɔ akɛ okɛ mɛi krokomɛi aaaja enɛ. (Mat. 24:14) Shi te abaahere bo nɔ aha tɛŋŋ?
3. (a) Te gbɔmɛi hereɔ Maŋtsɛyeli lɛ he sane lɛ nɔ amɛhaa tɛŋŋ? (b) No hewɔ lɛ, mɛɛ sanebimɔ esa akɛ wɔkɛkpe?
3 Yɛ be mli ni mɛi komɛi kɛ miishɛɛ baahereo nɔ akɛ Maŋtsɛyeli lɛ jajelɔ lɛ, mɛi ni fa ji mɛi ni kɛ shikplikpiifeemɔ baatsu nii. (Mat. 24:37-39) Mɛi krokomɛi baaye ohe fɛo aloo amɛaate shi amɛwo bo waa. Yesu bɔ kɔkɔ akɛ shitee-kɛ-woo nɛɛ ekomɛi baaba kɛbaajɛ bo diɛŋtsɛ owekumɛi aŋɔɔ. (Luka 21:16-19) Ebaanyɛ eba hu yɛ onitsumɔ he loo yɛ skul. Ni nɔyelii egu Yehowa Odasefoi anitsumɔ lɛ yɛ gbɛ ni ejaaa nɔ yɛ shikpɔŋ lɛ nɔ hei sɔrɔtoi babaoo. Kɛ okɛ shihilɛi nɛɛ eko loo fɛɛ kpe lɛ, ani obaaya nɔ okɛ ekaa ajaje Nyɔŋmɔ Wiemɔ lɛ?
4. Ani mɔ ko fai shi ni eeetswa lɛ baanyɛ ama nɔ mi akɛ wɔbaanyɛ wɔya nɔ wɔsɔmɔ Nyɔŋmɔ yɛ anɔkwayeli mli?
4 Ŋwanejee ko bɛ he akɛ obaasumɔ ni ofee Nyɔŋmɔ sɔɔlɔ ni yɔɔ ekaa. Ni kɛlɛ, mɛi komɛi ni nu he akɛ nɔ ko nɔ ko bɛ ni baanyɛ akpale amɛ lɛ eshi Maŋtsɛyeli jajelɔi lɛ ateŋ. Nɔ ni tamɔɔɔ enɛ lɛ, mɛi krokomɛi kɛ mɛi ni tsutsu lɛ ekolɛ amɛsheɔ gbeyei lɛ etee nɔ ni amɛŋmɛɛɛ he akɛ Nyɔŋmɔ tsuji ni yɔɔ ekaa. Te ooofee tɛŋŋ ojie ohe kpo akɛ mɔ ni “damɔ shi shiŋŋ yɛ hemɔkɛyeli lɛ mli” lɛ?—1 Kor. 16:13.
WƆKƐ WƆHE AKAFƆ WƆ DIƐŊTSƐ WƆHEWALƐ NƆ
5. (a) Bɔni afee ni wɔjie wɔhe kpo akɛ Nyɔŋmɔ tsuji anɔkwafoi lɛ, mɛni ji shishijee taomɔ nii? (b) Mɛni hewɔ kpeei ahe hiaa wɔ nakai lɛ?
5 Shi nibii babaoo yɛ Nyɔŋmɔ tsulɔ anɔkwafo ni mɔ ko aaafee lɛ mli. Shi, amɛteŋ klɛŋklɛŋ nɔ ji Yehowa kɛ gbɛjianɔ ni eto lɛ nɔ ni wɔkɛ wɔhe aaafɔ. Mɛɛ gbɛ nɔ wɔtsɔɔ wɔjieɔ hekɛbɔfɔɔ nɛɛ kpo wɔtsɔɔ yɛ? Ekome ji asafoŋ kpeei ni wɔyaa. Ŋmalɛi lɛ woɔ wɔ hewalɛ ni wɔkakwa enɛ feemɔ. (Heb. 10:23-25) Mɛi ni amɛtee nɔ amɛhi shi akɛ Yehowa anɔkwa odasefoi yɛ shikplikpiifeemɔ aloo yɛ yiwaa shishi lɛ ebɔ mɔdɛŋ waa amɛtee nɔ amɛfee mɛi ni amɛkɛ amɛnanemɛi jalɔi yaa kpee daa. Ŋmalɛi lɛ ahe nilee ni wɔyɔɔ lɛ yaa hiɛ yɛ nɛkɛ kpeei nɛɛ ashishi, shi jeee nibii heei ni jeɔ kpo lɛ ji nɔ ni gbalaa wɔ. (Okɛto Bɔfoi lɛ Asaji 17:21 he.) Hiɛsɔɔ ni wɔyɔɔ yɛ anɔkwalei ni wɔle momo lɛ ahe lɛ yaa hiɛ, ni wɔleɔ gbɛi anɔ ni wɔɔtsɔ wɔkɛtsu nii lɛ hu jogbaŋŋ. Nɔkwɛmɔ nɔ ni Yesu fee efɔ shi eha wɔ lɛ kaa wɔjwɛŋmɔ kɛ wɔtsui mli diɛŋtsɛ. (Efes. 4:20-24) Agbalaa wɔ kɛbɛŋkɛɔ wɔnyɛmimɛi Kristofoi lɛ ahe yɛ jamɔ ni afee ekome yɛ mli lɛ mli ni awoɔ wɔ hewalɛ ni wɔya nɔ wɔfee Nyɔŋmɔ suɔmɔnaa nii. Yehowa mumɔ lɛ kɛ gbɛtsɔɔmɔ haa kɛtsɔɔ asafo lɛ nɔ, ni Yesu tsɔɔ nakai mumɔ lɛ nɔ ehiɔ wɔteŋ kɛ wɔbua wɔhe naa yɛ egbɛi amli.—Kpoj. 3:6; Mat. 18:20.
6. Kɛ agu Yehowa Odasefoi yɛ he ko lɛ, mɛni afeɔ yɛ kpeei ahe?
6 Ani oyaa kpee lɛ fɛɛ daa, ni okɛ nɔ ni onuɔ ni asusuɔ he lɛ toɔ oshihilɛ he? Yɛ bei komɛi amli lɛ, kɛ agu nitsumɔ lɛ, ehe bahiaa ni afee kpeei bibii yɛ mɛi ashiai amli. Hei nɛɛ kɛ bei ni akɛfeɔ lɛ baatsake ni ehiŋ haŋ mɛi pii yɛ be fɛɛ mli, ni kpeei lɛ ekomɛi po yɛ ni afeɔ lɛ gbɛkɛ beni je ena kwraa. Shi yɛ nɔ ni ehiii haaa wɔ loo oshara ni baanyɛ aba nɛɛ fɛɛ sɛɛ lɛ, nyɛmimɛi hii kɛ yei anɔkwafoi bɔɔ mɔdɛŋ diɛŋtsɛ ni amɛya kpeei nɛɛ eko fɛɛ eko.
7. (a) Mɛɛ gbɛ kroko nɔ wɔtsɔɔ wɔjieɔ wɔhe ni wɔkɛfɔɔ Yehowa nɔ lɛ kpo yɛ? (b) Enɛ baaye abua wɔ ni wɔya nɔ wɔkɛ ekaa ashiɛ yɛ mɛɛ gbɛ nɔ?
7 He ni akɛfɔɔ Yehowa nɔ lɛ hu jeɔ kpo yɛ eŋɔɔ ni aaatsɔ he kɛaaya yɛ sɔlemɔ mli daa lɛ mli—jeee akɛ nɔ ko kɛkɛ ni afeɔ, shi nɔ ni wɔnuɔ he kɛjɛɔ wɔtsui mli akɛ Nyɔŋmɔ yelikɛbuamɔ he miihia wɔ. Ani ofeɔ nakai? Yesu sɔle shii abɔ yɛ eshikpɔŋ nɔ sɔɔmɔ nitsumɔ lɛ mli. (Luka 3:21; 6:12, 13; 9:18, 28; 11:1; 22:39-44) Ni yɛ gbɛkɛ ni enɔ jetsɛremɔ asɛŋ lɛ lɛ, ewo ekaselɔi lɛ hewalɛ akɛ: “Nyɛshia kpe ni nyɛsɔlea, koni nyɛkabote kaa mli.” (Mar. 14:38) Kɛ wɔkɛ mɛi ni sumɔɔɔ ni amɛboɔ Maŋtsɛyeli lɛ he sane lɛ toi kpe lɛ, eeenyɛ eka wɔ ni wɔba sɔɔmɔ nitsumɔ lɛ shi. Kɛji akɛ gbɔmɛi ye wɔhe fɛo aloo amɛwa wɔ yi babaoo lɛ, eeeha wɔnu he akɛ esa akɛ wɔfee dioo ni wɔkɛjo enɛ naa foi. Shi kɛ wɔsɔle waa wɔbi Nyɔŋmɔ mumɔ lɛ koni eye ebua wɔ ni wɔya nɔ wɔwie kɛ ekaa lɛ, enɛ baabu wɔhe kɛjɛ shi ni wɔɔgbee yɛ kaa ni baaba wɔnɔ lɛ mli lɛ he.—Luka 11:13; Efes. 6:18-20.
ODASEYELI KƐ EKAA HE SAJI NI AŊMALA ASHWIE SHI
8. (a) Mɛni hewɔ nɔ ni aŋma afɔ shi yɛ Bɔfoi lɛ Asaji lɛ amli lɛ he hiaa wɔ titri lɛ? (b) Ha sanebimɔi ni akɛha yɛ kuku nɛɛ naagbee lɛ ahetoo, ni oma bɔ ni emli saji lɛ he baanyɛ aba sɛɛnamɔ aha wɔ lɛ nɔ mi.
8 Nɔ ni aŋmala ashwie shi yɛ Bɔfoi lɛ Asaji awolo lɛ mli lɛ he miihia waa kɛha wɔ fɛɛ. Egbaa wɔ bɔ ni bɔfoi lɛ kɛ mra be mli kaselɔi lɛ, ni ji gbɔmɛi ni yɔɔ henumɔi tamɔ wɔ nɔŋŋ, lɛ ye gbɛtsii nii anɔ ni amɛjie amɛhe kpo akɛ Yehowa Odasefoi anɔkwafoi ni yɔɔ ekaa. Nyɛhaa wɔpɛia nɔ ni aŋma afɔ shi lɛ ekomɛi amli kɛtsɔ sanebimɔi ni nyiɛ sɛɛ nɛɛ kɛ ŋmalɛi ni atsɛ lɛ anɔ. Yɛ be mli ni wɔfeɔ nakai lɛ, susumɔ bɔ ni bo diɛŋtsɛ lɛ ooona nɔ ni okaneɔ lɛ he sɛɛ lɛ he.
Ani bɔfoi lɛ le woloŋ jogbaŋŋ? Ani amɛji aŋkroaŋkroi ni yɛ fɔmɔ su naa lɛ, amɛsheee nɔ ni baaba ko kwraa gbeyei? (Bɔf. 4:13; Yoh. 18:17, 25-27; 20:19)
Mɛni ha Petro nyɛ ekɛ ekaa wie yɛ Yudafoi asaneyeli he ní bu Nyɔŋmɔ diɛŋtsɛ Bi lɛ fɔ yɛ otsii fioo mli dani no ba lɛ? (Bɔf. 4:8; Mat. 10:19, 20)
Mɛni bɔfoi lɛ feɔ yɛ otsii ni nyiɛ amɛmɔmɔ kɛ Akuashɔŋ lɛ hiɛ ni akɛ amɛ ba lɛ hiɛ lɛ mli? (Bɔf. 1:14; 2:1, 42)
Beni nɔyelɔi lɛ fa amɛ akɛ amɛkashiɛ yɛ Yesu gbɛi amli lɛ, mɛni ji hetoo ni Petro kɛ Yohane kɛha amɛ? (Bɔf. 4:19, 20)
Beni ajie amɛ lɛ sɛɛ lɛ, namɔ nɔ amɛkɛ amɛhiɛ fɔ kɛha yelikɛbuamɔ ekoŋŋ? Ani amɛkpa lɛ fai koni eha akpa amɛyi ni awaa lɛ, aloo mɛni? (Bɔf. 4:24-31)
Mɛni nɔ Yehowa tsɔ ekɛ yelikɛbuamɔ ha beni shitee-kɛ-wolɔi bɔ mɔdɛŋ ni amɛha akpa shiɛmɔ nitsumɔ lɛ? (Bɔf. 5:17-20, 33-40)
Yɛ mɛɛ gbɛ nɔ bɔfoi lɛ tsɔɔ akɛ amɛnuɔ yiŋtoo hewɔ ni ajie amɛ lɛ shishi? (Bɔf. 5:21, 41, 42)
Yɛ be mli ni agbɛ kaselɔi lɛ pii ashwa yɛ yiwaa ni mli wa lɛ hewɔ po lɛ, mɛni amɛtee nɔ amɛfee? (Bɔf. 8:3, 4; 11:19-21)
9. (a) Mɛɛ saji ni yɔɔ miishɛɛ jɛ nakai mra be mli kaselɔi lɛ asɔɔmɔ nitsumɔ lɛ mli ba? (b) Ebakɔ wɔhe yɛ mɛɛ gbɛ nɔ?
9 Nii ni amɛtsu yɛ sanekpakpa lɛ he lɛ efeee efolo. Abaptisi kaselɔi aaafee 3,000 yɛ Pentekoste afi 33 Ŋ.B. “Akɛ mɛi ni heɔ Nuŋtsɔ lɛ yeɔ, hii kɛ yei babaoo, bafata amɛhe.” (Bɔf. 2:41; 4:4; 5:14) Yɛ be ni sa mli lɛ abɔ amaniɛ akɛ Saul ni jɛ Tarso, yiwalɔi lɛ ateŋ mɔ ni ehiii lɛ po ebatsɔ Kristofonyo ni lɛ diɛŋtsɛ ekɛ ekaa miiye anɔkwale lɛ he odase. Abale lɛ akɛ bɔfo Paulo. (Gal. 1:22-24) Nitsumɔ ni je shishi yɛ klɛŋklɛŋ afii oha lɛ mli lɛ sɛɛ efoko. Emli ewa moŋ waa yɛ “naagbee gbii” nɛɛ amli ni eyashɛ shikpɔŋ lɛ hei sɔrɔtoi fɛɛ. Wɔna hegbɛ akɛ wɔkɛ wɔhe aaawo mli, ni yɛ be mli ni wɔfeɔ nakai lɛ, wɔbaanyɛ wɔkase nii kɛjɛ nɔkwɛmɔ nii ni odasefoi anɔkwafoi ni tsɔ hiɛ lɛ efee kɛfɔ shi lɛ mli.
10. (a) Mɛɛ hegbɛi Paulo na ekɛye odase? (b) Mɛɛ gbɛi anɔ otsɔɔ ogbɛɔ Maŋtsɛyeli lɛ he sane lɛ ohaa mɛi krokomɛi yɛ?
10 Beni Paulo kase anɔkwale ni kɔɔ Yesu Kristo he lɛ, eshashaooo shi. “Ni amrɔ lɛ nɔŋŋ eshiɛ yɛ kpee hei lɛ akɛ Yesu ji Nyɔŋmɔ Bi lɛ.” (Bɔf. 9:20) Ehiɛ sɔ Nyɔŋmɔ mlihilɛ ni esaaa ni ajie lɛ kpo yɛ ehe lɛ ni eyoo akɛ sanekpakpa lɛ ni enine eshɛ nɔ lɛ he miihia mɔ fɛɛ mɔ. Taakɛ afɔɔ feemɔ yɛ nakai gbii lɛ amli lɛ, akɛni eji Yudanyo hewɔ lɛ, eyaa kpee hei lɛ, he ni Yudafoi lɛ buaa amɛhe naa yɛ lɛ, koni eyaye odase yɛ jɛmɛ. Agbɛnɛ eshiɛ yɛ shia kɛ shia ni ekɛ gbɔmɛi susu saji ahe yɛ jarawoo hei. Ni eesumɔ ni eya shikpɔŋkukuji heei amli ni eyashiɛ sanekpakpa lɛ.—Bɔf. 17:17; 20:20; Rom. 15:23, 24.
11. (a) Yɛ mɛɛ gbɛ nɔ Paulo tsɔɔ yɛ akɛ, yɛ be mli ni eyɔɔ ekaa lɛ, ekɛ sanesɛɛkɔmɔ hu tsu nii yɛ gbɛ ni etsɔ nɔ eye odase lɛ mli? (b) Te wɔɔfee tɛŋŋ wɔjie nakai su lɛ kpo beni wɔyeɔ wekumɛi, nanemɛi nitsulɔi loo nanemɛi skulbii odase lɛ?
11 Paulo yɛ ekaa, shi ekɔɔ sane sɛɛ hu, taakɛ esa akɛ wɔfee lɛ. Edamɔ shiwoi ni Nyɔŋmɔ kɛha amɛblematsɛmɛi lɛ anɔ eshiɛ eha Yudafoi lɛ. Edamɔ nibii ni Helabii lɛ le lɛ anɔ ewie etsɔɔ amɛ. Yɛ bei komɛi amli lɛ, ekɛ lɛ diɛŋtsɛ eniiashikpamɔ yɛ be mli ni ekase anɔkwale lɛ tsu nii akɛ nɔ ni edamɔɔ nɔ ekɛyeɔ odase. Taakɛ etsɔɔ mli lɛ: “Shi sanekpakpa lɛ hewɔ mifeɔ enɛɛmɛi fɛɛ, bɔni afee ni mikɛ mɛi krokomɛi aja enɛ.”—1 Kor. 9:20-23; Bɔf. 22:3-21.
12. (a) Eyɛ mli akɛ eyɛ ekaa moŋ, shi mɛni Paulo fee bɔni afee ni ekɛ shitee-kɛ-wolɔi akabe yɛ be fɛɛ mli? (b) Mɛɛ be mli wɔbaanyɛ wɔkɛ nilee akase nakai nɔkwɛmɔ nɔ lɛ, ni yɛ mɛɛ gbɛ nɔ? (d) Hewalɛ ni haa wɔyaa nɔ wɔkɛ ekaa wieɔ lɛ baa kɛjɛɔ nɛgbɛ?
12 Kɛ shitee-kɛ-woo ba ni ebafee tamɔ nɔ ni esa akɛ ashiɛ sanekpakpa lɛ yɛ he kroko aloo afa kɛya shikpɔŋkuku kroko mli ni ayaye be ko lɛ, Paulo feɔ nakai moŋ fe ni ekɛ anɔkwale lɛ henyɛlɔi lɛ aaabe yɛ be fɛɛ mli. (Bɔf. 14:5-7; 18:5-7; Rom. 12:18) Shi ehiɛ gbooo sanekpakpa lɛ he. (Rom. 1:16) Eyɛ mli akɛ Paulo le akɛ mɛi ni teɔ shi woɔ amɛ lɛ bɛ bulɛ ni amɛfeɔ amɛ basabasa ni enɛ eŋɔɔɔ enaa hu moŋ, shi ‘ena ekaa kɛtsɔ wɔ-Nyɔŋmɔ lɛ nɔ’ koni eya nɔ eshiɛ. Yɛ shihilɛi ni mli wawai ni ekɛkpe lɛ fɛɛ sɛɛ lɛ, ekɛɛ: “Nuŋtsɔ lɛ fi misɛɛ ni ewo mi hewalɛ, koni atsɔ minɔ ama shiɛmɔ lɛ nɔ mi.” (1 Tes. 2:2; 2 Tim. 4:17) Kristofoi asafo lɛ yitso, Nuŋtsɔ Yesu yaa nɔ ekɛ hewalɛ ni he hiaa lɛ haa koni akɛtsu nitsumɔ ni egba efɔ shi kɛha wɔgbii nɛɛ.—Mar. 13:10.
13. Mɛni yeɔ ekaa ni Kristofonyo yɔɔ lɛ he odase, ni enɛ damɔ mɛni nɔ?
13 Wɔyɛ nɔ ni wɔbaadamɔ nɔ wɔya nɔ wɔkɛ ekaa ashiɛ Nyɔŋmɔ Wiemɔ lɛ, taakɛ Yesu Kristo kɛ Nyɔŋmɔ tsuji anɔkwafoi krokomɛi ni hi shi yɛ klɛŋklɛŋ afii oha lɛ mli lɛ fee lɛ. Enɛ etsɔɔɔ akɛ wɔbaafee keketee ni wɔbuuu nii. Ehe ehiaaa ni wɔfeɔ mɛi ni susuuu mɛi ahe loo mɛi ni nyɛɔ mɛi ni sumɔɔɔ lɛ anɔ amɛkɛ sane lɛ haa amɛ. Shi wɔnijiaŋ ejeee wui kɛ gbɔmɛi bɛ he miishɛɛ, ni asaŋ wɔsheee gbeyei ni wɔfeee dioo kɛ shitee-kɛ-woo ba. Wɔkɛ wɔnine tsɔɔ Nyɔŋmɔ Maŋtsɛyeli lɛ akɛ shikpɔŋ muu lɛ fɛɛ nɔ nɔyeli ni ja taakɛ Yesu fee lɛ. Wɔkɛ hekɛnɔfɔɔ wieɔ ejaakɛ wɔdamɔ Yehowa Jeŋ Muu Fɛɛ Maŋtsɛ lɛ najiaŋ ni esane ni wɔjajeɔ lɛ jɛɛɛ wɔŋɔɔ, shi moŋ lɛ eŋɔɔ ejɛ.—Fil. 1:27, 28; 1 Tes. 2:13.
Sanegbaa Ni Akɛtiɔ Mli
● Mɛni hewɔ ehe hiaa akɛ wɔkɛ Maŋtsɛyeli lɛ he sane aha mɔ fɛɛ mɔ ni wɔɔnyɛ lɛ? Shi mɛɛ nifeemɔi esa akɛ wɔkpa gbɛ?
● Te wɔɔfee tɛŋŋ wɔtsɔɔ akɛ wɔbɔɔɔ mɔdɛŋ akɛ wɔkɛ wɔhe aaafɔ wɔ diɛŋtsɛ wɔhewalɛ nɔ yɛ Yehowa sɔɔmɔ mli?
● Mɛni nii ni sɛɛnamɔ yɔɔ he wɔkaseɔ kɛjɛɔ Bɔfoi lɛ Asaji awolo lɛ mli?