Yitso 10

Gbɛfaa ni Kɛ Amɛ Tee Yerusalem

ESHƐ agbiɛnaa be mli. Ni be eshɛ kɛha Yosef weku lɛ, kɛ nanemɛi kɛ wekumɛi krokomɛi hu akɛ amɛaafa gbɛ kɛya Yerusalem taakɛ amɛfeɔ yɛ agbiɛnaa be mli daa afi lɛ koni amɛyaye Hehoo lɛ. Beni amɛje gbɛfaa ni jɛkɛmɔ aaashɛ shitoi 65 lɛ shishi lɛ, no mli lɛ mɔ fɛɛ mɔ ena miishɛɛ tamɔ bɔ ni amɛnaa miishɛɛ daa lɛ. Yesu eye afii 12 yɛ be nɛɛ mli, ni ekɛ miishɛɛ krɛdɛɛ ko miikpa gbijurɔyeli lɛ gbɛ.

Kɛha Yesu kɛ eweku lɛ, Hehoo lɛ jeee gbi kome mli nifeemɔ ko kɛkɛ. Amɛhiɔ shi hu kɛhaa Akpiti Gbijurɔ ni nyiɛ sɛɛ ni akɛ gbii kpawo yeɔ, ni amɛbuɔ no akɛ Hehoo be lɛ fa lɛ hu yeli. Enɛ hewɔ lɛ, gbɛfaa muu lɛ fɛɛ, kɛjɛ be mli ni amɛshiɔ amɛshia yɛ Nazaret, kɛ be ni amɛkɛhiɔ Yerusalem lɛ fɛɛ heɔ aaafee otsii enyɔ. Shi afi nɛɛ, yɛ nɔ ko ni kɔɔ Yesu he lɛ hewɔ lɛ, ehe be babaoo fe nɛkɛ.

Naagba lɛ baje kpo faŋŋ yɛ be mli ni amɛkuɔ amɛsɛɛ kɛjɛɔ Yerusalem lɛ. Yosef kɛ Maria susu akɛ Yesu fata ewekumɛi kɛ nanemɛi akuu ni efee ekome kɛfaa gbɛ lɛ ahe. Shi beni je na ni amɛwa koni amɛwɔ lɛ, amɛnaaa lɛ, ni amɛtee lɛ taomɔ yɛ mɛi ni fata amɛhe kɛfaa gbɛ lɛ fɛɛ ateŋ. Shi amɛnaaa lɛ yɛ he ko he ko. No hewɔ lɛ Yosef kɛ Maria ku amɛsɛɛ kɛtee Yerusalem tɔɔ koni amɛyatao lɛ.

Amɛtao lɛ gbi muu fɛɛ, shi amɛnaaa lɛ. Gbi ni ji enyɔ lɛ nɔ hu lɛ amɛnaaa lɛ. Yɛ naagbee lɛ, gbi ni ji etɛ lɛ nɔ lɛ, amɛtee sɔlemɔwe lɛ. Jɛmɛ ni amɛna Yesu ni eta Yudafoi tsɔɔlɔi lɛ ateŋ, yɛ emli asai lɛ ekome nɔ, ni eebo amɛ toi ni eebibii amɛ saji hu.

Maria bi lɛ akɛ: “Mibi, mɛɛba ofee wɔ nɛkɛ? Naa, mikɛ otsɛ etao bo kɛ awerɛho.”

Yesu naa kpɛ ehe akɛ amɛleee he ni amɛbaana lɛ yɛ. Ebi amɛ akɛ: “Mɛɛba ni nyɛtaoɔ mi? Ani nyɛleee akɛ esa mi akɛ mihiɔ shi yɛ nii ni ji mi-Tsɛ nɔ lɛ mli?”

Yesu nuuu shishi nɔ hewɔ ni efɔlɔi lɛ leee enɛ lɛ. No hewɔ lɛ, Yesu kɛ efɔlɔi lɛ ku amɛsɛɛ kɛba shia ni etee nɔ eba ehe shi eha amɛ. Etee nɔ eda yɛ nilee kɛ gbɔmɔtso fɛɛ mli ni ehiɛ ba nyam yɛ Nyɔŋmɔ kɛ gbɔmɛi fɛɛ ahiɛ. Hɛɛ, kɛjɛ egbekɛbiiashi tɔɔ lɛ, Yesu fee nɔkwɛmɔ nɔ kpakpa, jeee yɛ mumɔŋ nibii asɛɛdii mli kɛkɛ, shi moŋ yɛ bulɛ ni ejie kpo etsɔɔ efɔlɔi lɛ hu mli. Luka 2:40-52; 22:7.

▪ Mɛɛ agbiɛnaa be mli gbɛ ko Yesu kɛ eweku lɛ faa, ni be enyiɛ eheɔ?

▪ Mɛni ba yɛ gbɛ ni amɛfa yɛ be mli ni Yesu eye afii 12 lɛ mli?

▪ Mɛɛ nɔkwɛmɔ nɔ Yesu fee efɔ shi eha obalaŋtai ni yɔɔ ŋmɛnɛ lɛ?