Yitso 11
Yohane Saa Gbɛ lɛ Eto
AFII nyɔŋma-kɛ-kpawo eho kɛjɛ be mli ni Yesu ji gbekɛ ni eye afii 12 ni ebiɔ tsɔɔlɔi lɛ anii yɛ sɔlemɔwe lɛ. Afi 29 Ŋ.B. lɛ agbiɛnaa be mli ni, ni etamɔ nɔ ni mɔ fɛɛ mɔ miiwie Yesu nyɛkwɛ binuu Yohane, ni shiɛɔ yɛ maji ni ebɔle Yordan Faa lɛ he fɛɛ kɛkpe lɛ mli lɛ he.
Yohane ji mɔ ko ni asumɔɔ esane waa, yɛ ehefɛo kɛ ewiemɔ fɛɛ mli. Yooma he tsɔi akɛfee atade ni ewoɔ lɛ, ni ekɛ too he wolo kpaai efi emliteŋ. Eniyenii ji baalabii kɛ ŋa nɔ wo. Ni eshɛɛ sane lɛ hu? “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ.”
Nɛkɛ shɛɛ sane nɛɛ ha etoibolɔi lɛ amii shɛ amɛhe. Mɛi pii yoo akɛ ehe miihia ni amɛtsake amɛtsuii, ni tsɔɔ akɛ amɛtsake amɛjeŋba ni amɛshi amɛtsutsu shihilɛ gbɛ lɛ akɛ nɔ ni esaaa. No hewɔ lɛ, gbɔmɛi lɛ jɛ Yordan niiaŋ fɛɛ, kɛ Yerusalem tete po amɛba Yohane ŋɔɔ babaoo, ni ebaptisi amɛ, ni ekɛ amɛ wo Yordan faa lɛ mli nui lɛ ashishi. Mɛni hewɔ?
Yohane baptisiɔ gbɔmɛi lɛ akɛ amɛtsuiaŋ ni amɛjɛ amɛtsake kɛjɛ eshai ni amɛfee amɛshi Nyɔŋmɔ Mla kpaŋmɔ lɛ he lɛ he okadi loo enɔkpɛlɛmɔ. No hewɔ lɛ, beni Farisifoi kɛ Sadukifoi komɛi ba Yordan faa lɛ naa lɛ, Yohane bu amɛ fɔ. Ekɛɛ amɛ akɛ: “Shikpãai ashwiei.” “No hewɔ lɛ nyɛwoa yibii ni sa tsuitsakemɔ; ni nyɛkabɔi kɛɛmɔ yɛ nyɛyiŋ akɛ: ‘Wɔtsɛ ji Abraham;’ ejaakɛ miikɛɛ nyɛ akɛ, Nyɔŋmɔ aaanyɛ atee bii ashi kɛjɛ tɛi nɛɛ amli eha Abraham. Shi agbɛnɛ hu lema lɛ ka tsei lɛ ashishifai lɛ anɔ momo; no hewɔ lɛ tso fɛɛ tso ni wooo yibii kpakpai lɛ, aaatoo lɛ ashɛ afɔ la mli.”
Akɛni mɛi pii miibo Yohane toi waa hewɔ lɛ, Yudafoi lɛ tsu osɔfoi lɛ kɛ Levibii lɛ kɛtee eŋɔɔ. Mɛnɛɛmɛi bi lɛ akɛ: “Namɔ jio?”
Yohane kpɛlɛ nɔ akɛ: “Jeee mi ji Kristo lɛ.”
Ni amɛbi lɛ akɛ: “Namɔ jio mɔ? Elia jio?”
Ni eha hetoo akɛ: “Jeee lɛ ji mi.”
“Gbalɔ lɛ jio?”
“Dabi!”
No hewɔ lɛ amɛbi lɛ ekoŋŋ akɛ: “Namɔ jio? koni wɔna hetoo ko wɔyaha mɛi ni tsu wɔ lɛ. Te okɛɔ yɛ bo diɛŋtsɛ ohe tɛŋŋ?”
Yohane tsɔɔ mli akɛ: “Mi ji mɔ gbee ni boɔ yɛ ŋa lɛ nɔ akɛ: ‘Nyɛjajea Nuŋtsɔ lɛ [Yehowa] gbɛ lɛ,’ taakɛ gbalɔ Yesaia kɛɛ lɛ.”
Ni amɛbi lɛ akɛ: “Kɛ jeee Kristo lɛ aloo Elia aloo Gbalɔ lɛ jio lɛ, mɛɛ hewɔ obaptisiɔ mɔ?”
Ni eha hetoo akɛ: “Mi lɛ mibaptisiɔ yɛ nu mli, shi mɔ ko damɔ nyɛteŋ ni nyɛ nyɛleee lɛ, lɛ ji mɔ ni baa yɛ misɛɛ ni etsɔ mihiɛ lɛ.”
Yohane miisaa gbɛ lɛ kɛtsɔ gbɔmɛi lɛ ni esaa amɛ ni amɛna tsui kpakpa ni amɛkɛkpɛlɛ Mesia, mɔ ni baatsɔ Maŋtsɛ lɛ nɔ lɛ nɔ. Yohane wie Mɔ nɛ he akɛ: “Shi mɔ ni baa yɛ misɛɛ lɛ, ehe wa fe mi, etokotai tete, misaaa mɔ ni hiɛɔ.” Yɛ anɔkwale mli lɛ, Yohane kɛɛ po akɛ: “Mɔ ni baa yɛ misɛɛ lɛ, etsɔ mihiɛ, ejaakɛ eyɛ dani miyɔɔ.”
Enɛ hewɔ lɛ, Yohane shɛɛ sane, ni ji “ŋwɛi maŋtsɛyeli lɛ ebɛŋkɛ” lɛ bafeɔ maŋ adafitswaa ko ni tsɔɔ akɛ eshwɛ fioo ni Maŋtsɛ ni Yehowa ehala lɛ, Yesu Kristo sɔɔmɔ nitsumɔ lɛ baaje shishi. Yohane 1:6-8, 15-28; Mateo 3:1-12; Luka 3:1-18; Bɔfoi lɛ Asaji 19:4.
▪ Mɛɛ gbɔmɔ nɛkɛ Yohane ji?
▪ Mɛni hewɔ ni Yohane baptisiɔ gbɔmɛi lɛ?
▪ Mɛni hewɔ ni Yohane baanyɛ akɛɛ akɛ Maŋtsɛyeli lɛ ebɛŋkɛ lɛ?