Yitso Kome
Ekomefeemɔ yɛ Jamɔ Mli yɛ Wɔbe Nɛɛ Mli—Mɛni Etsɔɔ?
1, 2. (a) Mɛɛ miishɛɛ henaabuamɔ ko yaa nɔ yɛ wɔbe nɛɛ mli? (b) Mɛɛ hiɛnɔkamɔ ni yɔɔ naakpɛɛ gbɔmɛi ni yɔɔ tsuijurɔ lɛ yɔɔ?
GBƐJIANƆTOO ko ni yɔɔ miishɛɛ kɛha ekomefeemɔ yɛ jamɔ mli miiya nɔ yɛ jeŋ muu fɛɛ. Eebua gbɔmɛi akpekpei abɔ ni jɛ jeŋmaji, wekui, kɛ wiemɔi srɔtoi fɛɛ mli lɛ anaa eefee amɛ ekome. Aabua mɛi babaoo naa daa afi. Ayɔseɔ mɛnɛɛmɛi yɛ Biblia lɛ mli akɛ Yehowa “odasefoi” ni atsɛɔ amɛ akɛ “asafo babaoo.” Amɛjáa Nyɔŋmɔ “nyɔɔŋ kɛ shwane.” (Yesaia 43:10-12; Kpojiemɔ 7:9-15) Mɛni hewɔ amɛfeɔ enɛ? Ejaakɛ amɛ́bale Yehowa akɛ anɔkwa Nyɔŋmɔ kome pɛ. Enɛ kanyaa amɛ koni amɛha amɛshihilɛ kɛ ejalɛ gbɛ̀i lɛ akpã gbee. Agbɛnɛ hu amɛkase akɛ wɔyɛ ŋmɛnɛŋmɛnɛ yiwalɛ jeŋ ni etsɛŋ Nyɔŋmɔ baakpata hiɛ, ni ekɛ eparadeiso jeŋ hee lɛ ato najiaŋ lɛ “naagbee gbii lɛ” amli.—2 Timoteo 3:1-5, 13; 2 Petro 3:10-13.
2 Nyɔŋmɔ Wiemɔ lɛ woɔ shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ . . . Shi mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:10, 11) “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:29) “Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:4.
3. Akɛ anɔkwa ekomefeemɔ yɛ jamɔ mli lɛ miiba yɛ mɛɛ gbɛ nɔ?
3 Mɛi ni afeɔ amɛ ekome yɛ anɔkwa jamɔ mli bianɛ lɛ feɔ klɛŋklɛŋbii ni baahi shi yɛ nakai jeŋ hee lɛ mli. Amɛ́kase nɔ ni Nyɔŋmɔ suɔmɔnaa nii ji, ni amɛkɛ amɛnyɛmɔ ni fe fɛɛ miifee nakai. Beni Yesu tsɔɔ bɔ ni enɛ he hiaa ha lɛ, ekɛɛ akɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome pɛ lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Bɔfo Yohane ŋma akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.
Nɔ ni Etsɔɔ Diɛŋtsɛ
4. (a) Mɛni mɛi babaoo ni abuaa amɛnaa yɛ ekomefeemɔ mli yɛ jamɔ mli yɛ wɔbe nɛɛ mli lɛ tsɔɔ diɛŋtsɛ? (b) Te Biblia lɛ tsɔɔ nɛkɛ naabuamɔ nɛɛ mli ehaa tɛŋŋ?
4 Mɛni mɛi babaoo ni abuaa amɛnaa kɛyaa ekomefeemɔ yɛ jamɔ mli yɛ wɔbe nɛɛ mli lɛ tsɔɔ diɛŋtsɛ? Eji odaseyeli ni ka shi faŋŋ akɛ wɔshɛ yiwalɛ jeŋ nɛɛ naagbee lɛ he kpaakpa, ni Nyɔŋmɔ jeŋ hee lɛ baaje shishi no sɛɛ nɔŋŋ. Wɔkɛ wɔhiŋmɛii miiye Biblia mli gbalɛi ni gba naabuamɔ ni he hiaa nɛɛ efɔ̃ shi lɛ mlibaa he odase. Gbalɛ nɛɛ ekome kɛɔ akɛ: “Aaaba mli akɛ naagbee gbii lɛ [nɛkɛ naagbee gbii nɛɛ] amli lɛ Yehowa we gɔŋ lɛ [ejamɔ ni awó nɔ lɛ] aaama shi yɛ gɔji lɛ ayiteaŋ [kɛteke jamɔ fɛɛ jamɔ], . . . ni majimaji aaaho kɛaaba he; ni jeŋmaji pii aaatee ayakɛɛ akɛ: ‘Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ.’”—Mika 4:1, 2; Lala 37:34.
5, 6. (a) Ákɛ jeŋmaji lɛ miitsɔ amɛhe kɛmiiba Yehowa ŋɔɔ lɛ ji anɔkwale yɛ mɛɛ gbɛ nɔ? (b) Mɛɛ saji esa akɛ wɔbi wɔ diɛŋtsɛ wɔhe?
5 Yɛ be mli ni jeŋmaji fɛɛ kɛ amɛ diɛŋtsɛ amɛhe haaa yɛ Yehowa mumɔŋ we kɛha jamɔ lɛ, aŋkroaŋkroi akpekpei abɔ ni jɛ jeŋmaji fɛɛ mli lɛ miifee nakai. Yɛ be mli ni amɛkaseɔ yiŋtoo ni suɔmɔ yɔɔ mli lɛ kɛ Yehowa Nyɔŋmɔ su kɛ baŋ ni ŋɔɔ ni gbalaa mɛi lɛ ahe nii lɛ, etsirɛɔ amɛtsuii waa diɛŋtsɛ. Amɛkɛ heshibaa taoɔ ni amɛle nɔ ni Nyɔŋmɔ taoɔ yɛ amɛdɛŋ. Amɛsɔlemɔ tamɔ lalatsɛ lɛ nɔ̃, mɔ ni kɛɛ akɛ: “Tsɔɔmɔ mi ni mafee osuɔmɔnaa nii, ejaakɛ bo ji mi-Nyɔŋmɔ” lɛ.—Lala 143:10.
6 Ani onaa ohe yɛ nakai asafo babaoo ni Yehowa buaa amɛnaa bianɛ yɛ jamɔ ni efee ekome mli lɛ ateŋ? Ani bɔ ni ohereɔ famɔ ni onine eshɛ nɔ kɛjɛ e-Wiemɔ lɛ mli lɛ tsɔɔ akɛ oyɔseɔ diɛŋtsɛ akɛ Yehowa ji e-Jɛɛhe? ‘Obaanyiɛ etempɔŋi lɛ anɔ’ kɛyashɛ nɛgbɛ?
Bɔ ni Afeɔ ni Nine Shɛɔ Nɔ
7. (a) Yɛ naagbee lɛ abaaná ekomefeemɔ yɛ jamɔ mli kɛyashɛ nɛgbɛ? (b) Mɛni hewɔ ehe hiaa ni mɔ ko atsɔ Yehowa jálɔ bianɛ lɛ, ni te wɔɔfee tɛŋŋ wɔye wɔbua mɛi krokomɛi ni amɛfee nakai?
7 Yehowa yiŋtoo ji ni afee bɔɔ nii fɛɛ ni yɔɔ jwɛŋmɔ lɛ ekome yɛ anɔkwa jamɔ mli. Kwɛ bɔ ni wɔtsui shweɔ gbi nɔ ni mɛi fɛɛ ni yɔɔ wala mli lɛ aaajá anɔkwa Nyɔŋmɔ kome pɛ lɛ! (Lala 103:19-22) Shi dani enɛ aaanyɛ aba lɛ, esa akɛ Yehowa ajie mɛi fɛɛ ni kpooɔ akɛ amɛaafee ejalɛ suɔmɔnaa nii lɛ kɛya. Yɛ emɔbɔnalɛ naa lɛ, etsɔɔ hiɛ ekɛ nɔ ni ebaafee lɛ he kɔkɔbɔɔ haa, koni gbɔmɛi ni yɔɔ he fɛɛ he lɛ aná hegbɛ ni amɛkɛtsake amɛshihilɛ gbɛ̀i. (Yesaia 55:6, 7) No hewɔ lɛ, yɛ wɔgbii nɛɛ amli lɛ, akɛ faikpamɔ ni he hiaa nɛɛ miiha “jeŋ maŋ fɛɛ jeŋ maŋ kɛ akutso fɛɛ akutso kɛ majianɔ wiemɔi fɛɛ kɛ maŋ fɛɛ maŋ” akɛ: “Nyɛshea Nyɔŋmɔ gbeyei ni nyɛkɛ anunyam ahaa lɛ, ejaakɛ ekojomɔ ŋmɛlɛtswaa lɛ eshɛ; ni nyɛjáa mɔ ni fee ŋwɛi kɛ shikpɔŋ kɛ ŋshɔ kɛ nubui ni baa lɛ.” (Kpojiemɔ 14:6, 7) Ani okpɛlɛ nakai ninefɔɔ lɛ nɔ? Kɛji nakai lɛ, belɛ eji hegbɛ ni oná akɛ ofɔ̃ mɛi krokomɛi anine ni amɛbale ni amɛjá anɔkwa Nyɔŋmɔ lɛ.
8. Beni wɔkase shishijee Biblia mli tsɔɔmɔi lɛ sɛɛ lɛ, mɛɛ mɔdɛŋ esa akɛ wɔkɛ anɔkwayeli abɔ lolo koni wɔshwere kɛya hiɛ?
8 Jeee Yehowa yiŋtoo ji ni eha gbɔmɛi ni kɛɔ akɛ amɛheɔ lɛ amɛyeɔ shi yɛ nakai beaŋ nɔŋŋ lɛ amɛyaa nɔ amɛdiɔ amɛ diɛŋtsɛ amɛ pɛsɛmkunya nibii asɛɛ lɛ ajá lɛ. Nyɔŋmɔ miisumɔ ni gbɔmɛi abaná “esuɔmɔnaa nifeemɔ he anɔkwale nilee,” ni amɛjie enɛ kpo yɛ amɛshihilɛ mli. (Kolosebii 1:9, 10, NW) No hewɔ lɛ gbɔmɛi ni hiɛ sɔɔ nii ní kaseɔ Biblia mli shishijee tsɔɔmɔi ahe nii lɛ, miisumɔ ni amɛya amɛhiɛ kɛyashɛ Kristofoi adalɛ mli. Nɔ ni amɛshweɔ ji ni amɛle Yehowa jogbaŋŋ diɛŋtsɛ, ni amɛha e-Wiemɔ lɛ he shishinumɔ ni amɛyɔɔ lɛ mli alɛɛ ni emli akwɔ, ni amɛkɛtsu nii yɛ amɛshihilɛ mli kɛmɔ shi. Amɛtaoɔ ni amɛjie wɔŋwɛi Tsɛ lɛ sui lɛ akpo ni amɛkwɛ saji taakɛ ekwɛɔ amɛ lɛ. Enɛ tsirɛɔ amɛ koni amɛtao gbɛ̀i ni amɛaatsɔ nɔ amɛná yiwalaheremɔ nitsumɔ ni ehaa atsuɔ yɛ shikpɔŋ nɔ ŋmɛnɛ yɛ wɔgbii nɛɛ amli lɛ mli gbɛfaŋnɔ. Ani bo hu oshweɔ enɛ?—Marko 13:10; Hebribii 5:12–6:3.
9. Anɔkwa ekomefeemɔ hiɔ bianɛ yɛ mɛɛ gbɛ̀i anɔ?
9 Biblia lɛ tsɔɔ akɛ esa akɛ gbɔmɛi ni sɔmɔɔ Yehowa lɛ afee gbɔmɛi ni amɛ́fee ekome. (Efesobii 4:1-3) Esa akɛ ekomefeemɔ nɛɛ ahi shi bianɛ, eyɛ mli moŋ akɛ jeŋ ni mli egbala mli wɔyɔɔ lɛ, ni wɔmiipele yɛ emuu ni wɔyeee lɛ shishi lolo. Yesu kɛ hiɛdɔɔ sɔle akɛ ekaselɔi lɛ fɛɛ aná anɔkwa ekomefeemɔ mli ŋɔɔmɔ. Mɛni enɛ baatsɔɔ? Klɛŋklɛŋ lɛ, amɛbaaná amɛkɛ Yehowa kɛ e-Bi lɛ teŋ wekukpaa kpakpa. Nɔ ni ji enyɔ lɛ, amɛkɛ amɛhe baafee ekome. (Yohane 17:20, 21) Bɔni afee ni enɛ aba mli lɛ, Kristofoi asafo lɛ sɔmɔɔ ákɛ gbɛjianɔtoo ni Yehowa tsɔɔ nɔ etsɔɔ ewebii anii.
Mɛɛ Nibii kɛ Ekomefeemɔ Baa?
10. (a) Mɛni wɔnáa kɛji akɛ wɔ diɛŋtsɛ wɔkɛ Biblia lɛ tsu nii ni wɔkɛsusu sanebimɔi ni kɔɔ wɔhe lɛ ahetooi ahe lɛ? (b) Tsɔɔmɔ nibii ni kɛ Kristofoi a-ekomefeemɔ baa lɛ mli kɛtsɔ sanebimɔi ni áto naa yɛ kuku nɛɛ mli lɛ ahetoohamɔ nɔ.
10 Akadi nibii titrii kpawo ni kɛ ekomefeemɔ yɛ jamɔ mli baa yɛ shishigbɛ lɛ. Yɛ be mli ni ohaa sanebimɔi ni fata he nɛɛ ahetoo lɛ, susumɔ bɔ ni eko fɛɛ eko saa wekukpaa ni kã okɛ Yehowa kɛ onanemɛi Kristofoi lɛ ateŋ lɛ he jogbaŋŋ. Kɛ osusu nɛkɛ saji otii nɛɛ ahe ni okane ŋmalɛi ni atsɛ shi aŋmalako emli saji lɛ, ebaaye ebua bo ni oná ŋwɛi nilee, jwɛŋmɔŋ nyɛmɔ, kɛ sanesɛɛkɔmɔ—sui ni he hiaa wɔ fɛɛ lɛ. (Abɛi 5:1, 2; Filipibii 1:9-11) Susumɔ nɛkɛ saji nɛɛ ahe ekomekome.
(1) Wɔkpɛlɛɔ hegbɛ ní Yehowa yɔɔ akɛ lɛ etoɔ nɔ ni hi kɛ nɔ ni ehiii he mla emaa shi lɛ nɔ. “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛi fɛɛ mli, ni lɛ eeejaje otempɔŋi lɛ!”—Abɛi 3:5, 6.
Mɛni hewɔ esa akɛ wɔtao Yehowa ŋaawoo kɛ gbɛtsɔɔmɔ beni wɔkpɛɔ wɔyiŋ lɛ? (Lala 146:3-5; Yesaia 48:17)
(2) Wɔyɛ Nyɔŋmɔ Wiemɔ lɛ ákɛ nɔ ni baatsɔɔ wɔ gbɛ. “Beni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli akɛ Nyɔŋmɔ wiemɔ, taakɛ bɔ ni eji hu lɛɛlɛŋ lɛ, shi jeee akɛ gbɔmɛi awiemɔ ko ni, mɔ hu ni tsuɔ hewalɛ nii yɛ nyɛ ni nyɛheɔ nyɛyeɔ lɛ amli lɛ.”—1 Tesalonikabii 2:13.
Mɛɛ oshara yɔɔ feemɔ ni wɔɔfee nɔ ni “wɔsusuɔ” kɛkɛ akɛ eja lɛ mli? (Abɛi 14:12; Yeremia 10:23, 24; 17:9)
Kɛji akɛ wɔleee ŋaawoo ni Biblia lɛ kɛhaa yɛ sane ko he lɛ, mɛni esa akɛ wɔfee? (Abɛi 2:3-5; 2 Timoteo 3:16, 17)
(3) Wɔ fɛɛ wɔnáa mumɔŋ niyenii kome too ni ato he gbɛjianɔ lɛ he sɛɛ. “Obii lɛ fɛɛ aaafee Yehowa kaselɔi.” (Yesaia 54:13) “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ [hiɛkpatamɔ] gbi lɛ miibɛŋkɛ nɛɛ.”—Hebribii 10:24, 25.
Mɛɛ sɛɛnamɔi mɛi ni kɛ mumɔŋ niyenii he gbɛjianɔ ni Yehowa eto lɛ tsuɔ nii kɛmɔɔ shi lɛ náa? (Yesaia 65:13, 14)
(4) Yesu Kristo ji wɔ-Hiɛnyiɛlɔ, jeee gbɔmɔ adesa ko. “Akatsɛ nyɛ Rabi; ejaakɛ mɔ kome ji nyɛ tsɔɔlɔ (lɛ ji Kristo); shi nyɛ fɛɛ lɛ, nyɛmimɛi ji nyɛ. Ni nyɛkatsɛa mɔ ko nyɛtsɛ hu yɛ shikpɔŋ lɛ nɔ; ejaakɛ mɔ kome ji nyɛtsɛ, mɔ ni yɔɔ ŋwɛi lɛ. Asaŋ akatsɛ nyɛ nuŋtsɔmɛi hu; ejaakɛ mɔ kome ji nyɛ nuŋtsɔ, lɛ ji Kristo.”—Mateo 23:8-10.
Ani esa akɛ wɔteŋ mɔ ko anu he akɛ wɔnɔ kwɔlɔ fe mɛi krokomɛi? (Romabii 3:23, 24; 12:3)
(5) Wɔkɛ wɔhiɛ fɔ̃ɔ Nyɔŋmɔ Maŋtsɛyeli nɔyeli lɛ nɔ akɛ adesai ahiɛnɔkamɔ kome pɛ ni yɔɔ. “No hewɔ lɛ, esa akɛ nyɛsɔle nɛkɛ akɛ: ‘Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.’ No hewɔ lɛ nyɛyaa nɔ nyɛtaoa maŋtsɛyeli lɛ kɛ ejalɛ lɛ tsutsu.”—Mateo 6:9, 10, 33, NW.
Yɛ mɛɛ gbɛ nɔ ‘maŋtsɛyeli lɛ tsutsu ni ataoɔ’ lɛ yeɔ ebuaa ni ebuɔ wɔ ekomefeemɔ lɛ he lɛ? (Mika 4:3; 1 Yohane 3:10-12)
(6) Mumɔ krɔŋkrɔŋ lɛ haa mɛi ni jáa Yehowa lɛ náa sui ni he hiaa Kristofoi a-ekomefeemɔ. “Mumɔ lɛ yibii ji suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ.”—Galatabii 5:22, 23.
Mɛni esa akɛ wɔfee koni Nyɔŋmɔ mumɔ lɛ awo yibii yɛ wɔmli? (Bɔfoi lɛ Asaji 5:32)
Nyɔŋmɔ mumɔ lɛ ni wɔyɔɔ lɛ náa hewalɛ yɛ wekukpaa ni kã wɔkɛ nanemɛi Kristofoi lɛ ateŋ lɛ nɔ yɛ mɛɛ gbɛ nɔ? (Yohane 13:35; 1 Yohane 4:8, 20, 21)
(7) Nyɔŋmɔ anɔkwa jálɔi fɛɛ náa e-Maŋtsɛyeli lɛ he sanekpakpa lɛ shiɛmɔ nitsumɔ lɛ mli gbɛfaŋnɔ. “Abaashiɛ maŋtsɛyeli lɛ he sanekpakpa nɛɛ yɛ shikpɔŋ ni ayɔɔ nɔ lɛ nɔ he fɛɛ he ni akɛye jeŋmaji lɛ fɛɛ odase; ni no dani naagbee lɛ aaaba.”—Mateo 24:14, NW.
Mɛni esa akɛ ekanya wɔ koni wɔsumɔ akɛ wɔɔná nɛkɛ shiɛmɔ nitsumɔ nɛɛ mli gbɛfaŋnɔ kɛmɔ shi? (Mateo 22:37-39; Romabii 10:10)
11. Kɛji akɛ wɔkɛ Biblia mli anɔkwalei tsu nii yɛ wɔshihilɛi amli lɛ, mɛni jɛɔ mli baa?
11 Yehowa ni wɔjáa lɛ yɛ ekomefeemɔ mli lɛ gbalaa wɔ kɛbɛŋkɛɔ lɛ, ni ehaa wɔnyɛɔ wɔnáa wɔkɛ wɔnanemɛi heyelilɔi lɛ anaanyobɔɔ mli ŋɔɔmɔ ni shɛjeɔ wɔ mii. Lala 133:1 kɛɔ akɛ: “Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ!” Kwɛ bɔ ni mɔ he jɔɔ lɛ ehaa ákɛ eeetsi ehe kɛaajɛ je lɛ kɛ emli pɛsɛmkunya, jeŋba shara, kɛ awuiyeli lɛ fɛɛ he, ni ekɛ mɛi ni sumɔɔ Yehowa diɛŋtsɛ ni amɛboɔ emlai atoi lɛ aaabua amɛhe naa!
Kwá Sui ni kɛ Mligbalamɔi Baa Lɛ
12. Mɛni hewɔ ehe hiaa ni wɔkwa heyeli mumɔ lɛ?
12 Esa akɛ wɔkwa sui ni kɛ mligbalamɔi baa lɛ, bɔni afee ni wɔkafite wɔ jeŋ muu fɛɛ ekomefeemɔ ni jara wa lɛ. Enɛɛmɛi ateŋ ekome ji heyeli mumɔ ni haa atsiɔ he kɛjɛɔ Nyɔŋmɔ kɛ emlai ahe lɛ. Yehowa yeɔ ebuaa wɔ koni wɔkwa su nɛɛ kɛtsɔ mɔ ni kɛba ni ji Satan Abonsam ni ekpaa ehe mama lɛ nɔ. (2 Korintobii 4:4; Kpojiemɔ 12:9) Satan ji mɔ ni laka Adam kɛ Hawa koni amɛku amɛhiɛ amɛshwie nɔ ni Nyɔŋmɔ ewie lɛ nɔ, koni amɛkpɛ yiŋ ni kɛ Nyɔŋmɔ suɔmɔnaa nii kpãaa gbee lɛ. Nɔ ni jɛ mli ba ji amanehulu kɛha amɛ kɛ wɔ hu. (1 Mose 3:1-6, 17-19) Nɔ ni eyi je nɛɛ mli obɔ ji heyeli mumɔ kɛmiijɛ Nyɔŋmɔ kɛ emlai ahe. No hewɔ lɛ ehe miihia ni wɔjie nakai mumɔ lɛ kɛjɛ wɔmli.
13. Mɛni baatsɔɔ kɛji akɛ wɔkɛ anɔkwayeli miisaa wɔhe kɛha shihilɛ yɛ Nyɔŋmɔ jalɛ jeŋ hee lɛ mli?
13 Ákɛ nɔkwɛmɔnɔ lɛ, susumɔ Yehowa shiwoo ni yɔɔ miishɛɛ, ákɛ ekɛ ŋwɛi hee kɛ shikpɔŋ hee ni “jalɛ hiɔ mli” baato ŋmɛnɛŋmɛnɛ yiwalɛ jeŋ nɛɛ najiaŋ lɛ he okwɛ. (2 Petro 3:13) Ani esaaa akɛ no tsirɛɔ wɔ koni wɔje shishi wɔsaa wɔhe akɛ wɔɔhi shi yɛ nakai be lɛ mli beni jalɛ nifeemɔ heɔ shi lɛ? Enɛ tsɔɔ Biblia mli ŋaawoo ni mli kã shi faŋŋ nɛɛ toiboo, akɛ: “Nyɛkasumɔa je lɛ aloo nibii ni yɔɔ je lɛŋ. Kɛji mɔ ko miisumɔ je lɛ, belɛ Tsɛ lɛ suɔmɔ lɛ bɛ emli.” (1 Yohane 2:15, NW) No hewɔ lɛ wɔkpooɔ je nɛɛ su lɛ—eheyeli su, bɔ ni esusuɔ ekome ehe kɛtekeɔ nɔ lɛ, ejeŋba shara kɛ awuiyeli lɛ. Wɔkɛfeɔ wɔsu akɛ wɔɔbo Yehowa toi kɛjɛ wɔtsui mli diɛŋtsɛ, ni nɔ ni heloo ni yeee emuu lɛ shweɔ akɛ wɔfee lɛ kɔɔɔ he eko. Wɔshihilɛ gbɛ fɛɛ yeɔ odase akɛ wɔkɛ wɔjwɛŋmɔ kɛ yiŋtoi ema Nyɔŋmɔ suɔmɔnaa nifeemɔ nɔ.—Lala 40:9.
14. (a) Mɛni hewɔ ehe hiaa akɛ wɔɔmɔ hegbɛ lɛ mli bianɛ koni wɔkase Yehowa gbɛ̀i lɛ ni wɔnyiɛ sɛɛ yɛ wɔshihilɛi amli lɛ? (b) Mɛni ŋmalɛi ni atsɛ yɛ kuku lɛ mli lɛ tsɔɔ kɛhaa wɔ diɛŋtsɛ?
14 Kɛ́ be ni Yehowa eto ni ebaakpata nɛkɛ yiwalɛ nibii agbɛjianɔtoo nɛɛ kɛ mɛi fɛɛ ni sumɔɔ egbɛ̀i lɛ ahiɛ lɛ shɛ lɛ, eshashaoŋ shi. Etsiŋ nakai be lɛ etoŋ ni etsakeŋ tɛi ni efolɔ eshwie shi lɛ bɔni afee ni emɛ mɛi ni bɔɔ mɔdɛŋ lolo akɛ amɛaakpɛtɛ je lɛ he beni amɛkɛ tsui fã-kɛ-fã kaseɔ ni amɛfeɔ Nyɔŋmɔ suɔmɔnaa nii lɛ. Be ni amɛkɛaafee he nɔ ko lɛ nɛ! (Luka 13:23, 24; 17:32; 21:34-36) Belɛ kwɛ miishɛɛ ni eji, ákɛ wɔmiina asafo babaoo lɛ ni miimɔ hegbɛ ni jara wa waa nɛɛ mli, ni amɛkɛ miishɛɛ miitao tsɔsemɔ ni Yehowa tsɔɔ e-Wiemɔ kɛ egbɛjianɔtoo lɛ nɔ ekɛhaa lɛ, ní amɛnyiɛ yɛ egbɛ̀i lɛ anɔ yɛ ekomefeemɔ mli kɛmiiya jeŋ hee lɛ mli lɛ! Ni babaoo ni wɔkaseɔ Yehowa he nii lɛ, babaoo hu ni wɔbaasumɔ lɛ ni wɔsumɔ akɛ wɔɔsɔmɔ lɛ.
Sanegbaa ni Akɛtiɔ Mli
• Mɛni ji Yehowa yiŋtoo yɛ jamɔ he?
• Beni wɔkase Biblia shishijee tsɔɔmɔi lɛ asɛɛ lɛ, mɛɛ nɔyaa kroko esa akɛ wɔbɔ mɔdɛŋ waa ni wɔtao?
• Mɛni wɔbaanyɛ wɔfee ákɛ aŋkroaŋkroi koni wɔkɛ Yehowa jálɔi krokomɛi lɛ ahi shi yɛ ekomefeemɔ mli?
[Mfoniri ni yɔɔ baafa 4]
‘Heshibalɔi lɛ aaahi shikpɔŋ lɛ nɔ ni amɛmii aaashɛ amɛhe yɛ hejɔlɛ babaoo mli’