Be Ni Yesu Ji Oblanyo Fioo Lɛ

Yosef kɛ Maria kɛ amɛbii lɛ, ni ji Yesu kɛ enyɛmimɛi hii kɛ yei lɛ, hi Nazaret. Yosef tsu nii akɛ kapintafonyo bɔ ni afee ni enyɛ ekwɛ eweku lɛ. Etsɔɔ amɛ Yehowa kɛ E-Mla lɛ he nii. Ekɛ eweku lɛ yaa kpeehe lɛ koni amɛyajá Nyɔŋmɔ, ni ekɛ amɛ yaa Yerusalem shi kome daa afi kɛhã Hehoo lɛ.

Be ni Yesu ye afii 12 lɛ, amɛweku lɛ fã gbɛ kakadaŋŋ kɛtee Yerusalem, tamɔ bɔ ni amɛfeɔ daa afi lɛ. Mɛi pii hu ba Yerusalem kɛhã Hehoo lɛ. Be ni aye Hehoo lɛ agbe naa lɛ, Yosef kɛ Maria yi gbɛ akɛ amɛmiiya shĩa. Amɛsusu akɛ Yesu fata mɛi ni amɛkɛfãa gbɛ lɛ ahe. Shi be ni amɛbɔi lɛ taomɔ yɛ amɛwekumɛi lɛ ateŋ lɛ, amɛnaaa lɛ.

Amɛku amɛsɛɛ kɛtee Yerusalem ni amɛtao lɛ gbii etɛ sɔŋŋ, shi amɛnaaa lɛ. Naagbee lɛ, amɛtee sɔlemɔ shĩa lɛ. Be ni amɛtee lɛ, naa Yesu ta yɛ tsɔɔlɔi lɛ ateŋ ni eebo amɛ toi jogbaŋŋ ni eebibii amɛ saji ni nilee yɔɔ mli. Tsɔɔlɔi lɛ anaa kpɛ amɛhe waa ni amɛ hu amɛbɔi lɛ saji bimɔ. Hetoi ni ehã amɛ lɛ fee amɛ naakpɛɛ waa. Amɛna akɛ enuɔ Yehowa Mla lɛ shishi.

Be ni Yosef kɛ Maria enaaa Yesu lɛ, amɛhao waa. No hewɔ lɛ, Maria bi lɛ akɛ: ‘Mibi, wɔtao bo yɛ he fɛɛ he! Nɛgbɛ otee?’ Yesu here nɔ akɛ: ‘Ani nyɛleee akɛ esa akɛ mahi mi-Tsɛ shĩa lɛ?’

Yesu kɛ efɔlɔi lɛ tee shĩa yɛ Nazaret. Yosef tsɔɔ lɛ kapinta nitsumɔ lɛ. Kɛ́ okwɛ lɛ, mɛɛ gbɔmɔ nɛkɛ Yesu da ebatsɔ? Be ni edaa lɛ, ehiɛ kã shi waa, ni Nyɔŋmɔ kɛ gbɔmɛi fɛɛ sumɔɔ esane.