May

Yehowa hã akɛ Mateo wolo lɛ, Marko wolo lɛ, Luka wolo lɛ, kɛ Yohane wolo lɛ fata Biblia lɛ mli woji lɛ ahe koni no aye abua wɔ ni wɔle e-Bi lɛ jogbaŋŋ. Woji ejwɛ nɛɛ wieɔ Yesu shihilɛ kɛ esɔɔmɔ nitsumɔ lɛ he. Amɛhãa wɔleɔ nibii ni ewie, nibii ni efee, kɛ bɔ ni enu he ehã yɛ saji ahe. Woji ejwɛ nɛɛ yeɔ amɛbuaa wɔ ni wɔsusuɔ bɔ ni Yesu hi shi ehã lɛ he waa. Kɛ́ wɔbaawie lɛ, wɔnaa Yesu naji anaa yɛ woji nɛɛ amli. No hewɔ lɛ, kɛ́ wɔkase woji nɛɛ, wɔbaale Yesu jogbaŋŋ diɛŋtsɛ, ni no baaye abua wɔ ni wɔnyiɛ enanemaahei lɛ asɛɛ kpaakpa. Kɛ́ wɔmiitao wɔná woji ejwɛ nɛɛ ahe sɛɛ jogbaŋŋ lɛ, belɛ jeee kanemɔ pɛ kɛkɛ esa akɛ wɔkane. Esa akɛ wɔhe be wɔkase amɛ jogbaŋŋ ni wɔjwɛŋ amɛmli saji lɛ anɔ. (Okɛto Yoshua 1:8 lɛ he.) Kɛ́ ookane saji ni yɔɔ woji nɛɛ amli lɛ, feemɔ ohe mfoniri akɛ oyɛ jɛmɛ ni nɔ ni okaneɔ lɛ tee nɔ. Feemɔ ohe mfoniri akɛ oona nɔ ni yaa nɔ lɛ, oonu gbɛɛmɔi lɛ, ni oonu he tamɔ bɔ ni mɛi ni yɔɔ jɛmɛ lɛ nu he amɛhã lɛ. Agbɛnɛ hu, taomɔ nii amli yɛ asafo lɛ woji lɛ amli. w21.04 4-5 kk. 11-​13

Afii pii dani Yesu baaba shikpɔŋ lɛ nɔ lɛ, Yehowa hã ale yɛ e-Wiemɔ lɛ mli akɛ abaatsɔɔ Mesia lɛ sɛɛgbɛ ahe jwiɛtɛi kapɛji 30. (Zak. 11:​12, 13) Ehã ale hu akɛ, enanemɛi ni bɛŋkɛ lɛ kpaakpa lɛ ateŋ mɔ kome ni baatsɔɔ esɛɛgbɛ. (Lala 41:9) Gbalɔ Zakaria hu ŋma akɛ: “Tswaa tookwɛlɔ lɛ nɔ, ní tooku lɛ agbɛ ashwã.” (Zak. 13:7) Mɛi ni hiɛ tsui kpakpa lɛ hãaa nibii nɛɛ ni tee nɔ lɛ atɔ̃tɔ amɛnane. Moŋ lɛ, be ni amɛna akɛ gbalɛi nɛɛ eba mli yɛ Yesu gbɛfaŋ lɛ, ehã amɛhemɔkɛyeli lɛ mli wa. Ani nakai nɔŋŋ eji ŋmɛnɛ? Hɛɛ. Yɛ wɔbei nɛɛ amli lɛ, nyɛmimɛi komɛi ni ale amɛ waa lɛ eshi anɔkwale lɛ, amɛtsɔmɔ jamɔkwalɔi, ni amɛka akɛ amɛbaagbala mɛi krokomɛi kɛje anɔkwale lɛ mli. Amɛtsɔ adafitswaa woji, redio, TV, kɛ Intanɛt lɛ nɔ amɛgbɛ Yehowa Odasefoi ahe saji fɔji kɛ saji ni bɛ mli amɛshwã. Shi mɛi ni hiɛ tsui kpakpa lɛ hãaa nibii ni tamɔ nɛkɛ lɛ atɔ̃tɔ amɛnane. Amɛle akɛ Biblia lɛ egba akɛ nibii tamɔ nakai baaba.​—Mat. 24:​24; 2 Pet. 2:​18-22. w21.05 11 kk. 12; 12-​13 kk. 18-​19

Biblia lɛ hãa wɔnaa akɛ be ni be shwieɔ mli lɛ, abanuɔ anɔkwale lɛ shishi jogbaŋŋ. (Kol. 1:​9, 10) Yehowa hãa wɔnuɔ anɔkwale lɛ shishi fiofio. No hewɔ lɛ, esa akɛ wɔto wɔtsui shi wɔmɛ lɛ kɛyashi ebaahã wɔnu shishi jogbaŋŋ. Kɛ́ Gbɛtsɔɔmɔ Kuu lɛ na akɛ esa akɛ wɔtsake bɔ ni wɔnuɔ Biblia lɛ fã ko shishi wɔhãa lɛ, amɛhãa wɔleɔ tsakemɔ nɛɛ amrɔ nɔŋŋ. Ŋmɛnɛ lɛ, sɔlemɔi pii hu tsakeɔ amɛtsɔɔmɔi lɛ, shi amɛ lɛ amɛfeɔ nakai koni amɛkɛsa amɛsɔlemɔbii lɛ ahiɛ loo koni ­amɛkɛ je lɛ anyiɛ. Shi Yehowa Odasefoi feɔ tsakemɔi yɛ amɛtsɔɔmɔi lɛ amli koni amɛsumɔ Nyɔŋmɔ waa ni amɛnyiɛ Yesu nanemaahei lɛ asɛɛ kpaakpa. (Yak. 4:4) Jeee nɔ ni eba nɔ yɛ je lɛ mli lɛ nɔ wɔdamɔɔ wɔfeɔ tsakemɔi, shi moŋ kɛ́ wɔnu Biblia lɛ shishi jogbaŋŋ lɛ, no ji nɔ ni hãa wɔfeɔ tsakemɔi lɛ. Enɛ hãa anaa faŋŋ akɛ, wɔsumɔɔ anɔkwale lɛ!​—1 Tes. 2:​3, 4. w21.10 22 kk. 12

Mɛni obaanyɛ ofee kɛ́ oonu he akɛ ohe efee shoo? Hemɔ be osusu nibii ni Yehowa miifee kɛmiiye eebua bo lɛ ahe. (Lala 55:​22) Enɛ baaye abua bo ni ona akɛ Yehowa shiko bo. Agbɛnɛ hu, susumɔ nɔ ni Yehowa miifee kɛmiiye eebua nyɛmimɛi krokomɛi koni amɛhe akafee shoo lɛ he. (1 Pet. 5:​9, 10) Nyɛmi nuu ko ni atsɛɔ lɛ Hiroshi ni lɛ pɛ ji Odasefonyo yɛ eweku lɛ mli afii pii nɛ lɛ wie akɛ: “Mɔ fɛɛ mɔ miimia ehiɛ eesɔmɔ Yehowa, ni enɛ woɔ wɔ mɛi ni wɔwekumɛi lɛ ateŋ mɔ ko kwraa bɛ anɔkwale lɛ mli lɛ hewalɛ.” Kɛfata he lɛ, sɔlemɔ daa, kanemɔ Biblia lɛ, ni oya asafoŋ kpeei. Jɛɛ otsuiŋ ogba Yehowa bɔ ni onuɔ he ohãa diɛŋtsɛ. Ehe miihia ni okane Nyɔŋmɔ Wiemɔ lɛ daa, ni ojwɛŋ saji ni hãa onaa akɛ Yehowa sumɔɔ bo lɛ anɔ. Nyɛmimɛi komɛi kpeɔ ŋmalɛi ni shɛjeɔ amɛmii waa, tamɔ Lala 27:​10 kɛ Yesaia 41:​10 lɛ amɛwoɔ amɛyitsoŋ. Nɔ ni nyɛmimɛi komɛi hu feɔ ni yeɔ ebuaa amɛ waa ji akɛ, kɛ́ amɛmiisaa amɛhe kɛhã asafoŋ kpeei loo amɛmiikane Biblia lɛ, amɛtswaa nɔ ni arikɔdi lɛ ni amɛboɔ toi, ni enɛ hãaa amɛnu shoofeemɔ he. w21.06 9-​10 kk. 5-8

Ani owekunyo ko loo onaanyo ko ni osumɔɔ esane waa lɛ egbo ni no hewɔ lɛ ooye awerɛho? Belɛ, kanemɔ mɛi ni gboi ni atee amɛ shi ni awie amɛhe yɛ Biblia lɛ mli lɛ ahe sane koni no ahã hemɔkɛyeli ni oyɔɔ akɛ abaatee gbohii lɛ ashi lɛ mli awa. Ani ashwie owekunyo ko kɛje asafo lɛ mli ni no ehã otsui ekumɔ? Belɛ, kasemɔ nibii ni baahã ohe oye waa akɛ, Yehowa tsɔsemɔ lɛ nɔ bɛ. Naagba fɛɛ naagba ni okɛbaakpe lɛ, ŋɔɔ lɛ akɛ hegbɛ ni oná ni okɛbaahã ohemɔkɛyeli lɛ mli awa. Jɛɛ otsuiŋ osɔle ohã Yehowa. Kaatse ohe kɛje onyɛmimɛi Kristofoi lɛ ahe, moŋ lɛ, okɛ amɛ abɔ gbagbalii. (Abɛi 18:1) Feemɔ nibii ni baaye abua bo ni oya nɔ osɔmɔ Yehowa kɛ́ amɛfeemɔ hãa okaiɔ omanehulu lɛ po. (Lala 126:​5, 6) Yaa asafoŋ kpeei kɛ shiɛmɔ daa, ni okane Biblia lɛ daa gbi. Be fɛɛ be lɛ, susumɔ nibii kpakpai pii ni Yehowa ewo shi akɛ ebaafee ehã wɔ wɔsɛɛ lɛ ahe. Kɛ́ ona bɔ ni Yehowa yeɔ ebuaa bo lɛ, ohemɔkɛyeli lɛ mli baawa. w21.11 22 kk. 11; 24 kk. 17

Mɛni hewɔ abaanyɛ atsɛ Yesu kaselɔi lɛ akɛ “bibii nɛɛ”? Je lɛ buɔ mɛi ni yɔɔ nii, mɛi ni ehe gbɛ́i, kɛ mɛi ni yɔɔ hegbɛi wuji lɛ akɛ mɛi ni he hiaa waa yɛ shihilɛ mli. Shi Yesu kaselɔi lɛ ateŋ mɛi pii jeee niiatsɛmɛi loo mɛi ni ehe gbɛ́i loo mɛi ni yɔɔ hegbɛi wuji. Enɛ hewɔ lɛ, je lɛ ebuuu amɛ, ni enaa amɛ akɛ mɛi bibii komɛi kɛkɛ. (1 Kor. 1:​26-29) Shi jeee nakai Yehowa naa amɛ. Mɛni ba ni Yesu wie “bibii nɛɛ” ahe lɛ? Ekaselɔi lɛ yabi lɛ sane. Amɛbi lɛ akɛ: “Namɔ ji agbo fe fɛɛ yɛ ŋwɛi Maŋtsɛyeli lɛ mli?” (Mat. 18:1) Yɛ Yesu beiaŋ lɛ, Yudafoi pii sumɔɔ ni mɛi ana amɛ akɛ amɛnɔ kwɔlɔ. Woloŋlelɔ ko wie akɛ: “Nɔ ni he hiaa amɛ fe fɛɛ yɛ shihilɛ mli ji, ni mɛi kɛ woo baahã amɛ, ni amɛhe gbɛ́i.” Akɛni gbɛ́ihemɔ kɛ anunyam taomɔ ehe shi waa yɛ Yudafoi lɛ ateŋ hewɔ lɛ, Yesu le akɛ ja ekaselɔi lɛ emia amɛhiɛ waa dani amɛbaanyɛ amɛjie nakai su gbonyo lɛ kɛje amɛtsui mli. w21.06 20 kk. 2; 21 kk. 6, 8; 22 kk. 9

Bɔfo Paulo fee nɔkwɛmɔnɔ kpakpa ehã asafoŋ onukpai. Akɛ nɔkwɛmɔnɔ lɛ, be ni ehe bahia ni ewo Kristofoi ni yɔɔ Tesalonika lɛ ŋaa lɛ, efee nakai oya nɔŋŋ. Shi dani ebaawo amɛ ŋaa lɛ, ejie amɛyi yɛ hemɔkɛyeli ni amɛyɔɔ, suɔmɔ mli ni amɛjɛɔ amɛtsuɔ nii waa, kɛ amɛshifimɔ lɛ hewɔ. Agbɛnɛ hu, ewie nibii ni tsɔɔ akɛ ele akɛ amɛkɛ shihilɛi ni mli wawai miikpe ni amɛmiifi shi yɛ amɛyi ni awaa lɛ fɛɛ sɛɛ. (1 Tes. 1:3; 2 Tes. 1:4) Ekɛɛ amɛ po akɛ, amɛmiifee nɔkwɛmɔnɔ kpakpa amɛmiihã Kristofoi krokomɛi. (1 Tes. 1:​8, 9) Kwɛ bɔ ni nyɛmimɛi lɛ amii baashɛ amɛhe waa akɛ Paulo ejɛ etsuiŋ ejie amɛyi! Enɛ hãa wɔnaa faŋŋ akɛ, Paulo sumɔɔ enyɛmimɛi lɛ waa. Ni no hewɔ enyɛ ewo amɛ ŋaa kpakpa yɛ woji enyɔ ni eŋmala eyahã amɛ lɛ amli lɛ.​—1 Tes. 4:​1, 3-5, 11; 2 Tes. 3:​11, 12. w22.02 15 kk. 6

Satan tsɔɔ amale jamɔŋ hiɛnyiɛlɔi lɛ anɔ ehãa mɛi nuɔ he akɛ Yehowa yitsoŋ wa, ni lɛ ehãa adesai piŋɔ. Mɛi komɛi po kɛɛ kɛ́ gbekɛ ko gbo lɛ, Nyɔŋmɔ ni ebawó lɛ koni eyatsɔ bɔfo yɛ ŋwɛi. Enɛ lɛ, musubɔɔ wiemɔ diɛŋtsɛ ni! Shi wɔ lɛ, wɔle akɛ Yehowa ji Tsɛ ni yɔɔ suɔmɔ waa. No hewɔ lɛ, kɛ́ hela mɔ wɔ waa loo wɔsuɔlɔ ko gbo lɛ, wɔshwaaa Yehowa kɔkɔɔkɔ. Wɔheɔ wɔyeɔ akɛ wɔsɛɛ ko lɛ, Yehowa baatsa wɔhelai fɛɛ, ni ebaatee mɛi ni egboi lɛ shi. Wɔbaakɛɛ mɛi fɛɛ ni yɔɔ tsui kpakpa lɛ akɛ Yehowa ji Nyɔŋmɔ ni yɔɔ suɔmɔ. Enɛ baahã Yehowa aná hetoo kpakpa ehã Abonsam, mɔ ni wieɔ eshiɔ lɛ lɛ. (Abɛi 27:11) Yehowa musuŋ tsɔɔ lɛ yɛ ewebii lɛ ahe. No hewɔ lɛ, kɛ́ ena ni wɔmiipiŋ yɛ wɔyi ni awaa, hela ko ni emɔ wɔ, loo wɔtɔmɔi ahewɔ lɛ, egbaa enaa waa. (Lala 22:​23, 24) Kɛ́ wɔmiipiŋ lɛ, Yehowa nuɔ he ehãa wɔ; eesumɔ ni efo wɔpiŋmɔ lɛ sɛɛ, ni ebaafo sɛɛ hu.​—Okɛto 2 Mose 3:​7, 8; Yesaia 63:9 lɛ he. w21.07 9-​10 kk. 9-​10

Etsɛŋ adesai ni boɔ Yehowa toi lɛ baasumɔ Yehowa ni amɛjá lɛ kɛya naanɔ. Enɛ ji hegbɛ ni fe fɛɛ ni adesa ko baanyɛ aná. Yesu baatsu naagbai fɛɛ ni ba be ni Adam kɛ Hawa gbo Nyɔŋmɔ nɔ toi ni amɛje eweku lɛ mli lɛ ahe nii. Yehowa baatee mɛi akpekpei abɔ shi, ni amɛbaaná hegbɛ amɛhi shi kɛya naanɔ yɛ shikpɔŋ ni asaa nɔ fɛfɛo ni etsɔ paradeiso lɛ nɔ, ni hela mɔŋ amɛ dɔŋŋ. (Luka 23:​42, 43) Fiofio lɛ, Yehowa tsuji fɛɛ ni yɔɔ shikpɔŋ lɛ nɔ ni efee ekome akɛ weku kɛmiijá lɛ lɛ baaye emuu, ni Yehowa kɛ “anunyam kɛ agbojee” ni David wie he lɛ baafi amɛ akekere. Kɛ́ ofata “asafoku babaoo” lɛ he lɛ, oyɛ hiɛnɔkamɔ ni nɔ bɛ! (Kpo. 7:9) Nyɔŋmɔ sumɔɔ bo; ni eetao otsɔ eweku lɛ mli nyo. No hewɔ lɛ, bɔɔ mɔdɛŋ fɛɛ ni obaanyɛ ni ofee nibii ni sa ehiɛ. Daa gbi lɛ, jwɛŋmɔ nibii ni Yehowa ewo shi akɛ ebaafee ehã bo lɛ ahe, ni ohã amɛkã otsui nɔ. Ohiɛ asɔ hegbɛ ni oná akɛ obaajá Yehowa wɔ-Tsɛ ni yɔɔ ŋwɛi ni sumɔɔ wɔ lɛ, kɛ agbɛnɛ hu, hiɛnɔkamɔ ni oyɔɔ akɛ obaajie eyi kɛya naanɔ lɛ! w21.08 7 kk. 18-​19

Gbalɔ Yeremia hu kɛ nɔ ni fe afii 40 shiɛ eyɛ mli akɛ mɛi lɛ booo lɛ toi ni amɛte shi amɛwo lɛ. Bɔ ni ‘mɛi lɛ jɛɔ lɛ ni amɛyeɔ ehe fɛo’ lɛ je enijiaŋ wui aahu akɛ, kulɛ eetao ekpa shiɛmɔ po. (Yer. 20:​8, 9) Shi ekpaaa! Mɛni ye ebua lɛ ni etee nɔ eshiɛ ni emiishɛɛ etãaa lɛ? Ekɛ ejwɛŋmɔ ma saji enyɔ komɛi ni he hiaa waa lɛ anɔ. Klɛŋklɛŋ nɔ lɛ ji, sane ni Yehowa fã lɛ akɛ eyashiɛ lɛ baahã ‘ahi ahã mɛi lɛ wɔsɛɛ ni amɛná hiɛnɔkamɔ.’ (Yer. 29:​11) Nɔ ni ji enyɔ lɛ ji, Nyɔŋmɔ gbɛ́i ni kã enɔ lɛ. (Yer. 15:​16) Ŋmɛnɛ lɛ, sane ni wɔ hu wɔshiɛɔ lɛ hãa mɛi náa hiɛnɔkamɔ, ni agbɛnɛ hu, Yehowa gbɛ́i lɛ kã wɔnɔ. Kɛ́ wɔkɛ wɔjwɛŋmɔ ma nibii enyɔ ni he hiaa nɛɛ anɔ lɛ, no lɛ mɛi bo wɔ toi jio, amɛbooo wɔ toi jio lɛ, wɔbaatsu shiɛmɔ nitsumɔ lɛ kɛ miishɛɛ. No hewɔ lɛ, kɛ́ okɛ mɔ ko miikase nii ni eyaaa ehiɛ oyayaayai bɔ ni otaoɔ lɛ, kaahã onijiaŋ je wui. Esa akɛ oto otsui shi kɛ́ okɛ mɛi miikase nii.​—Yak. 5:​7, 8. w21.10 27 kk. 12-​13

Ekɔɔɔ he eko afii abɔ ni wɔkɛsɔmɔ Yehowa lɛ, esa akɛ wɔya nɔ wɔfee nibii ni baahã wɔhemɔkɛyeli lɛ mli awa. Mɛni hewɔ? Ejaakɛ kɛ́ wɔfeee nakai lɛ, wɔhemɔkɛyeli lɛ mli baagbɔjɔ. Tamɔ bɔ ni wɔkase kɛtsɔ hiɛ lɛ, hemɔkɛyeli ji nibii ni wɔnaaa lɛ ahe odaseyeli ni yɔɔ faŋŋ. Ni kɛ́ wɔnaaa nɔ ko lɛ, ewaaa akɛ wɔjwɛŋmɔ baaje nɔ. No hewɔ ni Paulo tsɛ hemɔkɛyeli ni abɛ lɛ akɛ “esha ni lalaa wɔ oya lɛ.” No hewɔ lɛ, mɛni baaye abua wɔ ni wɔhemɔkɛyeli lɛ mli akagbɔjɔ? (2 Tes. 1:3) Klɛŋklɛŋ lɛ, sɔlemɔ okpa Yehowa fai daa ni edro bo emumɔ krɔŋkrɔŋ lɛ. Mɛni hewɔ? Ejaakɛ hemɔkɛyeli fata yibii ni mumɔ lɛ woɔ lɛ he. (Gal. 5:​22, 23) Kɛ́ Yehowa kɛ emumɔ krɔŋkrɔŋ lɛ yeee ebuaaa wɔ lɛ, wɔnyɛŋ wɔná hemɔkɛyeli ni mli wa. Kɛ́ wɔkpa Yehowa fai be fɛɛ be ni ehã wɔ emumɔ lɛ, ekɛbaahã wɔ. (Luka 11:​13) Wɔbaanyɛ wɔsɔle wɔkɛɛ lɛ akɛ: “Hã wɔhemɔkɛyeli lɛ ada.” (Luka 17:5) Nɔ ni ji enyɔ lɛ, kasemɔ Nyɔŋmɔ Wiemɔ lɛ daa.​—Lala 1:​2, 3. w21.08 18-​19 kk. 16-​18

Nibii kpakpai pii yɛ ni mɛi ni edara lɛ baanyɛ atsu. Eyɛ mli akɛ ekolɛ bianɛ lɛ amɛbɛ gbɔmɔtsoŋ hewalɛ tamɔ tsutsu ko lɛ moŋ, shi akɛni amɛkɛ afii pii esɔmɔ Yehowa hewɔ lɛ, amɛyɛ niiashikpamɔi babaoo. Yehowa baanyɛ ekɛ amɛ atsu nii yɛ gbɛi srɔtoi anɔ. Akɛ nɔkwɛmɔnɔ lɛ, Biblia lɛ ewie Yehowa tsuji anɔkwafoi komɛi ni tee nɔ amɛsɔmɔ Yehowa yɛ amɛgbɔlɛ beiaŋ lɛ ahe, ni wɔbaanyɛ wɔkase amɛ. Be ni Yehowa hala Mose akɛ gbalɔ kɛ Israel maŋ lɛ hiɛnyiɛlɔ lɛ, no mli lɛ ená aaafee afii 80. Be ni gbalɔ Daniel ná afii 90 kɛ sɛɛ po lɛ, Yehowa tee nɔ ekɛ lɛ tsu nii lolo akɛ egbalɔ. Ni be ni akɛ mumɔ tsirɛ bɔfo Yohane ni eŋma Kpojiemɔ wolo lɛ, no mli lɛ, lɛ hu eeenyɛ efee akɛ ená afii 90 kɛ sɛɛ. Awieee Simeon ni ji “jalɔ ni sheɔ Nyɔŋmɔ gbeyei” lɛ he babaoo yɛ Biblia lɛ mli, shi no mli lɛ, Yehowa le mɔ ni eji, ni ehã lɛ hegbɛ ni ena Yesu be ni afɔ lɛ lɛ, ni egba gbalɛi yɛ Yesu kɛ emami he.​—Luka 2:​22, 25-35. w21.09 3-4 kk. 5-7

Fɔlɔi, esa akɛ nyɛkwɛ jogbaŋŋ ni nyɛkɛ nyɛbii lɛ ateŋ mɔ kome akato mɔ kroko he loo ni nyɛkpa gbɛ akɛ amɛbaafee nɔ ko ni amɛhewalɛ shɛɛɛ. Kɛ́ nyɛfee enɛ lɛ, ebaanyɛ ehã nyɛbii lɛ anijiaŋ aje wui. (Efe. 6:4) Nyɛmi yoo ko ni atsɛɔ lɛ Sachiko lɛ wie akɛ: “Mimami kɛɛ kɛ́ afee kaa lɛ, esa akɛ mafo fɛɛ ni mitɔ̃ɔɔ ekome po. Shi minyɛɛɛ. Eyɛ mli akɛ ni migbe skul naa nɛɛ afii pii eho moŋ, shi bei komɛi lɛ, nɔ ni tee nɔ nɛɛ hãa minuɔ he akɛ Yehowa nyaaa nɔ ni minyɛɔ mitsuɔ yɛ esɔɔmɔ lɛ mli lɛ he.” Maŋtsɛ David wie akɛ ‘eshweee nibii wuji’ loo ‘nibii ni fe lɛ.’ Akɛni eba ehe shi hewɔ lɛ, ehe jɔ lɛ, ni eyeee etsui. (Lala 131:2) Fɔlɔi, mɛni nyɛkaseɔ yɛ nɔ ni David wie nɛɛ mli? Esa akɛ nyɛkpɛlɛ nɔ akɛ, jeee nɔ fɛɛ nɔ nyɛ loo nyɛbii lɛ baanyɛ afee, ni enɛ baahã ana akɛ nyɛbaa nyɛhe shi. Esa akɛ nyɛle nibii ni nyɛbii lɛ bɔɔ mɔdɛŋ yɛ mli kɛ nibii ni amɛbɔɔɔ mɔdɛŋ yɛ mli, ni nyɛye nyɛbua amɛ ni amɛkɛ otii ni amɛbaanyɛ amɛshɛ he amamɔ amɛhiɛ. w21.07 21-​22 kk. 5-6

Yehowa ehã wɔ fɛɛ heyeli. Ni tsɔɔ akɛ wɔbaanyɛ wɔkpɛ wɔyiŋ kɛji wɔbaabo lɛ toi aloo wɔboŋ lɛ toi. Mɛi komɛi yɛ ni amɛfɔlɔi efeee nɔkwɛmɔnɔ kpakpa amɛhãaa amɛ, shi amɛhala akɛ amɛbaasɔmɔ Yehowa, ni amɛye lɛ anɔkwa kɛbashi bianɛ. Mɛi komɛi hu yɛ ni amɛfɔlɔi bɔ mɔdɛŋ amɛkɛ Biblia mli shishitoo mlai tsɔse amɛ, shi be ni amɛdara lɛ amɛshi anɔkwale lɛ. No hewɔ lɛ, sane lɛ kɛkɛ ji akɛ, wɔteŋ mɔ fɛɛ mɔ baakpɛ eyiŋ kɛji ebaasɔmɔ Yehowa aloo esɔmɔŋ lɛ. (Yos. 24:​15) No hewɔ lɛ, kɛ́ ashwie obi ko yɛ asafo lɛ mli ni owerɛ eho ohe lɛ, kaanu he kɔkɔɔkɔ akɛ bo ejɛ! Bei komɛi lɛ, fɔlɔi komɛi shiɔ anɔkwale lɛ kɛ amɛweku lɛ po. (Lala 27:​10) Enɛ baanyɛ agba gbekɛbii ni buɔ amɛfɔlɔi ni amɛnaa amɛ akɛ mɛi ni amɛbaanyɛ amɛkase lɛ anaa waa. Ani ashwie opapa loo omami kɛje asafo lɛ mli? Kɛ́ nakai lɛ, Yehowa nuɔ he ehãa bo waa, ni ele bɔ ni sane lɛ dɔɔ bo ehãa. Esumɔɔ bo waa, ni eŋɔɔ enaa akɛ ooye lɛ anɔkwa. Kaimɔ akɛ, jeee bo ejɛ ni opapa loo omami shi anɔkwale lɛ. w21.09 27 kk. 5-7

Wɔbaanyɛ wɔkɛ Kristofonyo ko ni ehe ebahia ni ashwie lɛ kɛje asafo lɛ mli lɛ ato too ko ni bɛ hewalɛ lɛ he, ejaakɛ yɛ mfonirifeemɔŋ lɛ, lɛ hu ebɛ hewalɛ, ni tsɔɔ akɛ wekukpaa kpakpa bɛ ekɛ Yehowa teŋ. (Yak. 5:​14) Tamɔ bɔ ni mɔ ko ni bɛ hewalɛ lɛ baanyɛ ekɛ ehela lɛ atsɛŋe mɛi krokomɛi lɛ, nakai nɔŋŋ mɔ ko ni wekukpaa kpakpa bɛ ekɛ Yehowa teŋ lɛ baanyɛ ekɛ ejeŋba gbonyo lɛ afite mɛi krokomɛi. Enɛ hewɔ bei komɛi lɛ, ehe bahiaa ni ashwie eshafeelɔ ko kɛje asafo lɛ mli lɛ. Shwiemɔ lɛ, eji tsɔsemɔ, ni ehãa anaa akɛ Yehowa sumɔɔ etsuji anɔkwafoi lɛ. Agbɛnɛ hu, ebaanyɛ ehã eshafeelɔ lɛ ana akɛ gbɛ ni ekɔ lɛ ehiii kwraa, ni no baanyɛ ahã etsake etsui. Mɔ ni ashwie lɛ baanyɛ eya nɔ eba asafoŋ kpeei koni ekase Yehowa he nii ni no ahã ehemɔkɛyeli lɛ mli awa ekoŋŋ. Asafo lɛ woji lɛ hu yɛ ni enine baanyɛ ashɛ nɔ ni ekane, ni ebaanyɛ ekwɛ JW Broadcasting. Agbɛnɛ hu, kɛ́ asafoŋ onukpai lɛ na akɛ eetsake lɛ, amɛbaanyɛ amɛwo lɛ ŋaa yɛ be kɛ beiaŋ ni amɛhã lɛ gbɛtsɔɔmɔi ni baaye abua lɛ ni ehe awa ekoŋŋ yɛ hemɔkɛyeli lɛ mli koni anyɛ ahe lɛ kɛba asafo lɛ mli ekoŋŋ. w21.10 10 kk. 9, 11

Bɔ ni blema Kristofoi lɛ já Yehowa amɛhã lɛ, nakai nɔŋŋ wɔfeɔ ŋmɛnɛ. Akɛ nɔkwɛmɔnɔ lɛ, bɔ ni no mli lɛ ato amɛhe gbɛjianɔ ahã lɛ, nakai pɛpɛɛpɛ ato wɔ hu wɔhe gbɛjianɔ ŋmɛnɛ. No mli lɛ, amɛyɛ nɔkwɛlɔi gbɛfalɔi, asafoŋ onukpai, kɛ asafoŋ sɔɔlɔi tamɔ bɔ ni wɔ hu wɔyɔɔ lɛ pɛpɛɛpɛ. (Fip. 1:1; Tito 1:5) Bɔ ni amɛkɛ Yehowa mlai ni kɔɔ bɔlɛnamɔ kɛ gbalashihilɛ, kɛ lá he lɛ tsu nii lɛ, nakai nɔŋŋ wɔ hu wɔfeɔ ŋmɛnɛ. Ni bɔ ni amɛshwieɔ eshafeelɔi ni tsakeee amɛtsui lɛ kɛjeɔ asafo lɛ mli lɛ, nakai wɔ hu wɔfeɔ ŋmɛnɛ. (Bɔf. 15:​28, 29; 1 Kor. 5:​11-13; 6:​9, 10; Heb. 13:4) Biblia lɛ hãa wɔleɔ akɛ “hemɔkɛyeli kome” ko loo jamɔ kome ko yɛ ni sa Nyɔŋmɔ hiɛ. (Efe. 4:​4-6) Eji hegbɛ kpele ni wɔná akɛ wɔfata Yehowa webii lɛ ahe, wɔbale anɔkwale lɛ, ni wɔle nɔ ni eto eyiŋ akɛ ebaafee wɔsɛɛ. Nyɛhãa wɔyaa nɔ wɔhiɛa wɔhemɔkɛyeli lɛ mli kpɛŋŋ, ni wɔná nɔmimaa ni mli wa akɛ anɔkwa jamɔ lɛ nɛ. w21.10 22-​23 kk. 15-​17

Maŋtsɛ Yehoshafat kɛ naagba wu­lu ko kpe. Amonbii, Moabbii, kɛ mɛi babaoo ni jɛ Seir gɔji lɛ anɔ ba koni amɛkɛ lɛ kɛ eweku lɛ kɛ emaŋbii lɛ abawu. (2 Kro. 20:​1, 2) Mɛni Yehoshafat fee yɛ naagba nɛɛ he? Esɔle ebi Yehowa ni eye ebua lɛ ni ewaje lɛ. Sɔlemɔ ni Yehoshafat jɛ heshibaa mli esɔle ni abɔ he amaniɛ yɛ 2 Kronika 20:​5-12 lɛ hãa wɔnaa akɛ, ekɛ ehiɛ fɔ̃ Yehowa, e-Tsɛ ni yɔɔ ŋwɛi ni sumɔɔ lɛ lɛ nɔ. Yehowa tsɔ Levinyo ko ni atsɛɔ lɛ Yahaziel lɛ nɔ ekɛ Yehoshafat wie ni ekɛɛ lɛ wiemɔi ni yɔɔ ŋmɛnɛ ŋmalɛ lɛ mli lɛ. Yehoshafat kɛ ehiɛ fɔ̃ e-Nyɔŋmɔ lɛ nɔ ni efee bɔ ni ekɛɛ lɛ lɛ pɛpɛɛpɛ. Be ni lɛ kɛ emaŋbii lɛ yaa koni amɛkɛ amɛhenyɛlɔi lɛ ayakpe lɛ, jeee asraafoi ni le tawuu lɛ ni ehã amɛnyiɛ hiɛ. Shi moŋ ehã lalɔi ni ehiɛɛɛ tawuu nii lɛ nyiɛ hiɛ. Yehowa ye shi ni ewo Yehoshafat lɛ nɔ ni ekpãtã Yehoshafat henyɛlɔi lɛ ahiɛ.​—2 Kro. 20:​18-23. w21.11 15-​16 kk. 6-7

Be fɛɛ be ni wɔkɛ naagba ko baakpe lɛ, wɔbaanyɛ wɔná nɔmimaa akɛ Yehowa baaye ebua wɔ ni wɔya nɔ wɔye lɛ anɔkwa. (2 Kor. 4:​7-9) Wɔle akɛ, Yehowa baaya nɔ ejie suɔmɔ ni tsakeee kpo etsɔɔ wɔ, ejaakɛ Biblia lɛ kɛɔ akɛ: “Yehowa hiŋmɛi kã mɛi ni sheɔ lɛ gbeyei lɛ ahe, mɛi ni mɛɔ esuɔmɔ ni tsakeee lɛ.” (Lala 33:​18-22) Be ni wɔbatsɔmɔko Yehowa tsuji lɛ, no mli lɛ wɔnáa suɔmɔ ni ejieɔ kpo etsɔɔ adesai fɛɛ lɛ pɛ he sɛɛ. Shi amrɔ nɛɛ ni wɔbatsɔmɔ etsuji lɛ, wɔmiiná esuɔmɔ ni ­tsakeee lɛ hu he sɛɛ. Nakai suɔmɔ lɛ tsirɛɔ Yehowa ni ebuɔ wɔhe. Eshiŋ wɔ kɔkɔɔkɔ, ni ebaaye eshiwoi fɛɛ anɔ. Eesumɔ ni ekɛ wɔ ahi shi akɛ nanemɛi kɛya naanɔ. (Lala 46:​1, 2, 7) No hewɔ lɛ, ekɔɔɔ he eko naagbai ni wɔkɛbaakpe lɛ, Yehowa baahã wɔ hewalɛ ni he hiaa wɔ lɛ koni wɔnyɛ wɔya nɔ wɔsɔmɔ lɛ. w21.11 6-7 kk. 17-​18

Wɔteŋ mɛi pii le mɛi ni amɛbɛ mɛi ni amɛkɛtsuɔ nii, mɛi ni amɛkɛyaa skul, loo amɛwekumɛi amɛwo amɛmli afii pii. Kɛ́ obaakai lɛ, Yosef nyɛmimɛi nyɔŋma lɛ bɛ lɛ amɛwo amɛmli ni no hã amɛnyɛ lɛ ni amɛfee nɔ ko ni ehiii kwraa. (1 Mo. 37:​2-8, 25-28) Shi Yosef efeee enii tamɔ amɛ kwraa! Be ni ená hegbɛ akɛ ebaafee amɛ nɔ ko kɛtse lɛ, ena amɛ mɔbɔ moŋ. Yosef ebɛɛɛ amɛ ewooo emli. Moŋ lɛ, ekɛ amɛ ye tamɔ bɔ ni 3 Mose 19:​18 lɛ kɛɔ akɛ wɔkɛ mɛi aye lɛ. (1 Mo. 50:​19-21) Bɔ ni Yosef kɛ enyɛmimɛi lɛ ahe ke amɛ ni ebɛɛɛ amɛ ewooo emli loo efeee amɛ nɔ ko kɛtseee lɛ ji nɔkwɛmɔnɔ kpakpa kɛhã Kristofoi fɛɛ ni miitao amɛsa Nyɔŋmɔ hiɛ lɛ. Yesu wie akɛ esa akɛ wɔkɛ mɛi ni tɔ̃ɔ wɔnɔ lɛ ahe ake amɛ. (Mat. 6:​9, 12) Nakai nɔŋŋ bɔfo Paulo hu wo Kristofoi fɛɛ ŋaa akɛ: “Mɛi ni asumɔɔ, nyɛkatɔa nyɛ diɛŋtsɛ nyɛhe owele.”​—Rom. 12:​19. w21.12 11 kk. 13-​14

Gbɛkɛ kwraa yɛ Nisan 14, 33 Ŋ.B. lɛ, Yesu tee Getsemane abɔɔ lɛ mli. Be ni eshɛ jɛmɛ lɛ, efɔse etsuiŋ eshwie Yehowa hiɛ. (Luka 22:​39-​44) Nɛkɛ be nɛɛ mli Yesu kɛ “bolɔmɔi ni naa wa kɛ yaafonui sɔle kɛkpa fai kɛ hiɛdɔɔ” lɛ. (Heb. 5:7) Nakai gbɛkɛ lɛ, ni ji gbɛkɛ ni enɔ jetsɛremɔ lɛ abaagbe lɛ lɛ, mɛni esɔle ebi? Esɔle ni Yehowa aye abua lɛ ni eya nɔ eye lɛ anɔkwa ni efee esuɔmɔnaa nii. Yehowa nu sɔlemɔ ni Yesu sɔle kɛkpa lɛ fai kɛ hiɛdɔɔ ni eye ebua lɛ lɛ, ni etsu ŋwɛibɔfo ko ni ebawo lɛ hewalɛ. Yesu na akɛ sɔ̃ ni tsii kã enɔ akɛ eye Yehowa anɔkwa ni etse egbɛ́i lɛ he. Be ni Yesu sɔle kɛkpa Yehowa fai kɛ hiɛdɔɔ ni eye ebua lɛ lɛ, Yehowa bo lɛ toi. Mɛni hewɔ? Ejaakɛ no mli lɛ nɔ ni he hiaa Yesu fe fɛɛ ji, ni ebaaye Yehowa anɔkwa ni etse egbɛ́i lɛ he. Kɛ́ wɔ hu no nɔŋŋ ji nɔ ni he hiaa wɔ fe fɛɛ lɛ, no lɛ, kɛ́ wɔsɔle kɛkpa lɛ fai kɛ hiɛdɔɔ ni eye ebua wɔ lɛ, ebaabo wɔ toi.​—Lala 145:​18. w22.01 17-18 kk. 15-​17

Akɛni wɔkɛ wɔhe wooo pɔlitis kɛ maŋ saji amli hewɔ lɛ, mɛi pii sumɔɔɔ wɔsane. Amɛsusuɔ akɛ esa akɛ wɔfɔ̃ oshiki. Shi wɔ lɛ wɔle akɛ kɛ́ wɔhala adesa ko akɛ wɔnɔyelɔ lɛ, belɛ wɔmiikpoo Yehowa. (1 Sam. 8:​4-7) Mɛi komɛi hu susuɔ akɛ kulɛ esa akɛ wɔmamɔ skul kɛ helatsamɔhei ni wɔfee nibii krokomɛi kɛye wɔbua mɛi. Shi akɛni wɔfeee nibii nɛɛ ni mɛi susuɔ akɛ no baatsu naagbai ni amɛkɛkpeɔ lɛ ahe nii shi moŋ wɔkɛ wɔjwɛŋmɔ maa shiɛmɔ nitsumɔ lɛ nɔ hewɔ lɛ, amɛsumɔɔɔ wɔsane. Mɛni esa akɛ wɔfee koni wɔnane akatɔ̃tɔ? (Mat. 7:​21-23) Esa akɛ wɔkɛ wɔjwɛŋmɔ ama nitsumɔ ni Yesu efã wɔ akɛ wɔtsu lɛ nɔ. Esaaa akɛ wɔfiteɔ wɔbe yɛ pɔlitis kɛ maŋ saji ahe. Wɔsumɔɔ mɛi, ni naagbai ni amɛkɛkpeɔ lɛ haoɔ wɔ waa. Shi wɔle akɛ nɔ ni hi fe fɛɛ ni wɔbaanyɛ wɔfee kɛye wɔbua amɛ ji, ni wɔbaatsɔɔ amɛ Nyɔŋmɔ Maŋtsɛyeli lɛ he nii, ni wɔye wɔbua amɛ ni amɛkɛ Yehowa abɔ naanyo. w21.05 7 kk. 19-​20

Ŋmɛnɛ lɛ, nɔyelɔi pii kɛɛ amɛjáa Nyɔŋmɔ, shi amɛsumɔɔɔ ni amɛŋmɛɔ hegbɛ ni amɛyɔɔ lɛ he koni Nyɔŋmɔ aye amɛnɔ. Nɔyelɔi ni yɔɔ ŋmɛnɛ lɛ teɔ shi amɛwoɔ mɔ ni Yehowa efɔ lɛ mu lɛ, ni amɛwaa esɛɛnyiɛlɔi anɔkwafoi lɛ ayi tamɔ bɔ ni nɔyelɔi lɛ fee yɛ Yesu beiaŋ lɛ pɛpɛɛpɛ. (Bɔf. 4:​25-28) Mɛni Yehowa kɛɔ jeŋmaji lɛ? No ji nɔ ni wɔnaa yɛ Lala 2:​10-12 lɛ. Jɛmɛ kɛɔ akɛ: “No hewɔ lɛ, agbɛnɛ, nyɛ maŋtsɛmɛi, nyɛyoa nii asɛɛ; nyɛ shikpɔŋ lɛ nɔ kojolɔi, nyɛhãa ajajea nyɛ. Nyɛsɔmɔa Yehowa kɛ gbeyeishemɔ, nyɛmii ashɛa nyɛhe waa, shi nyɛkwɛa jogbaŋŋ. Nyɛkɛ woo ahãa bi lɛ, kɛjeee nakai lɛ Nyɔŋmɔ mli baafu ni abaakpãtã nyɛhiɛ yɛ gbɛ lɛ nɔ, ejaakɛ Nyɔŋmɔ mlifu lɛ baa oya. Mɛi fɛɛ ni baa lɛ abo lɛ yɛ miishɛɛ.” Akɛni Yehowa mli hi hewɔ lɛ, ehã mɛi fɛɛ ni teɔ shi amɛwoɔ sane ni wɔshiɛɔ lɛ be ni amɛtsake amɛtsui ni amɛfi e-Maŋtsɛyeli lɛ sɛɛ. Shi be ni eshwɛ lɛ faaa dɔŋŋ. (Yes. 61:2) No hewɔ lɛ, amrɔ nɛɛ ji be ni ehe miihia waa ni mɛi atao anɔkwale lɛ ni amɛbasɔmɔ Yehowa. w21.09 15-​16 kk. 8-9

Nɔ ni Paulo tsɔɔ yɛ ŋmɛnɛ ŋmalɛ lɛ mli ji akɛ, esa akɛ wɔmii ashɛ nɔ fɛɛ nɔ ni wɔyɔɔ lɛ he. (Fip. 4:​12) Nɔ ni he hiaa fe fɛɛ yɛ wɔshihilɛ mli ji, wekukpaa ni yɔɔ wɔ kɛ Nyɔŋmɔ teŋ lɛ, shi jeee heloonaa nibii ni wɔyɔɔ lɛ. (Hab. 3:​17, 18) Susumɔ nɔ ni Mose kɛɛ Israelbii lɛ be ni amɛnyiɛ ŋa lɛ nɔ afii 40 lɛ he okwɛ. Ekɛɛ amɛ akɛ: “Yehowa, o-Nyɔŋmɔ lɛ, ejɔɔ bo yɛ nɔ fɛɛ nɔ ni ofeɔ lɛ mli. . . . Yehowa, o-Nyɔŋmɔ lɛ, kɛ bo ehi shi afii 40 nɛɛ fɛɛ, ni nɔ ko nɔ ko he ehiako bo.” (5 Mo. 2:7) Yɛ nakai afii 40 lɛ amli fɛɛ lɛ, Yehowa hã Israelbii lɛ mana amɛye. Agbɛnɛ hu, amɛtadei, ni ji atadei ni amɛkɛshi Ejipt lɛ fiteee. (5 Mo. 8:​3, 4) Kɛ́ wɔhiɛ sɔɔ nibii ni wɔyɔɔ lɛ, Yehowa baaná wɔhe miishɛɛ. Yehowa miisumɔ ni wɔmii ashɛ nibii bibii po ni ekɛdroɔ wɔ lɛ ahe ni wɔna akɛ amɛji edɛŋ nikeenii. w22.01 5 kk. 10-​11

Kɛ́ wu ji bo lɛ, osɔ̃ ji ni okwɛ weku lɛ, ni enɛ hewɔ lɛ, otsuɔ nii waa koni onyɛ obu oweku lɛ he ni oye obua amɛ. Kɛ́ okɛ naagbai kpe lɛ, ekolɛ obaanu he akɛ bo diɛŋtsɛ obaanyɛ otsu he nii. Shi okɛ ohe akafɔ̃ bo diɛŋtsɛ ohe nɔ. Moŋ lɛ, hemɔ be ni okome osɔle obi Yehowa ni eye ebua bo. Kɛfata he lɛ, okɛ oŋa afee ekome ni nyɛjɛ nyɛtsuiŋ nyɛsɔle nyɛhã Yehowa. Agbɛnɛ hu, taomɔ Yehowa dɛŋ gbɛtsɔɔmɔ kɛtsɔ Biblia lɛ kɛ asafo lɛ woji lɛ ni obaakase lɛ nɔ, ni okɛ ŋaawoo ni obaaná yɛ mli lɛ atsu nii. Ekolɛ mɛi komɛi enaŋ nilee ni yɔɔ yiŋ ni obaadamɔ Biblia lɛ nɔ okpɛ lɛ mli. Amɛbaakɛɛ bo akɛ kɛ́ oyɛ shika kɛ heloonaa nibii lɛ, no ji nɔ ni baanyɛ abu oweku lɛ he jogbaŋŋ. Shi kaimɔ nɔ ni Maŋtsɛ Yehoshafat fee lɛ. (2 Kro. 20:​1-30) Ekɛ enifeemɔ tsɔɔ akɛ ekɛ ehiɛ fɔ̃ɔ Yehowa nɔ. Yehowa kwaaa nuu anɔkwafo nɛɛ, ni ekwaŋ bo hu.​—Lala 37:​28; Heb. 13:5. w21.11 15 kk. 6; 16 kk. 8

Yehowa bɔ wɔ tamɔ bɔ ni eyɔɔ lɛ, no hewɔ lɛ wɔsumɔɔ ni aye jalɛ sane. (1 Mo. 1:​26) Shi akɛni wɔyeee emuu hewɔ lɛ, jeee be fɛɛ be wɔnyɛɔ wɔkojoɔ yɛ jalɛ naa, kɛ́ wɔsusuɔ akɛ wɔle anɔkwalei fɛɛ ni kɔɔ sane ko he po. Akɛ nɔkwɛmɔnɔ lɛ, be ni Ninivebii lɛ tsake amɛtsui ni Yehowa na amɛ mɔbɔ lɛ, eŋɔɔɔ Yona naa kwraa. (Yona 3:​10–​4:1) Shi mɔbɔ ni Yehowa na amɛ lɛ hewɔ lɛ, ekpãtãaa mɛi 120,000 kɛ sɛɛ ni yɔɔ Ninive maŋ lɛ mli lɛ ahiɛ. No hewɔ lɛ, kɛ́ okwɛ lɛ, Yehowa kɛ Yona lɛ, namɔ eyakojooo yɛ jalɛ naa? Ekã shi faŋŋ akɛ, Yona ni. Kɛ́ Yehowa kpɛ yiŋ ko lɛ, ejeee doo akɛ etsɔɔ wɔ nɔ hewɔ ni ekpɛ nakai yiŋ lɛ. Yɛ blema lɛ, Yehowa hã etsuji komɛi tsɔɔ amɛsusumɔi yɛ yiŋ komɛi ni ekpɛ loo eyaakpɛ lɛ ahe. (1 Mo. 18:​25; Yona 4:​2, 3) Ni bei komɛi lɛ, etsɔɔ amɛ nɔ hewɔ ni ekpɛɔ yiŋ komɛi. (Yona 4:​10, 11) Shi kɛ́ Yehowa yaafee nɔ ko lɛ, ehe ehiaaa ni ebiɔ wɔ gbɛ dã, ni kɛ́ efee egbe naa hu lɛ, ejeee doo akɛ etsɔɔ wɔ nɔ hewɔ ni efee nakai.​—Yes. 40:​13, 14; 55:9. w22.02 3-4 kk. 5-6

Ja wɔnaa ‘mɛi krokomɛi akɛ amɛnɔ kwɔlɔ fe wɔ’ dani wɔbaanyɛ wɔ­na wɔhe akɛ ‘gbekɛbii kwraa.’ (Fip. 2:3) Ni kɛ́ wɔna wɔhe akɛ gbekɛbii lɛ, ebaawa akɛ wɔbaatɔ̃tɔ mɔ ko nane. Wɔnyɛmimɛi lɛ ateŋ mɔ fɛɛ mɔ nɔ kwɔ fe wɔ yɛ nɔ ko mli. Ni kɛ́ wɔkɛ wɔjwɛŋmɔ ma amɛsui kpakpai lɛ anɔ lɛ, ewaŋ kwraa akɛ wɔbaana enɛ. No hewɔ lɛ, esa akɛ wɔbo ŋaa ni Paulo wo Korintobii lɛ toi. Ekɛɛ amɛ akɛ: “Namɔ hãa esoroɔ bo yɛ mɔ kroko he? Anɔkwa, mɛni oyɔɔ ni jeee hã ahã bo? No hewɔ lɛ, kɛ́ hã ahã bo lɛ, mɛni hewɔ oshwãa tamɔ nɔ ni jeee hã ahã bo lɛ?” (1 Kor. 4:7) Esa akɛ wɔkwɛ jogbaŋŋ ni wɔkafee nɔ ko ni baahã efee tamɔ nɔ ni wɔmiigbala mɛi ajwɛŋmɔ kɛmiiba wɔnɔ loo wɔmiinu he akɛ wɔnɔ kwɔlɔ fe mɛi krokomɛi. Kɛ́ nyɛmi nuu ko le wiemɔhãmɔ waa loo nyɛmi yoo ko nyɛɔ ekɛ mɛi jeɔ Biblia mli nikasemɔ shishi yɛ gbɛ ni waaa kwraa nɔ lɛ, esa akɛ ekwɛ jogbaŋŋ ni ekɛkashwã, shi moŋ lɛ ekɛ yijiemɔ lɛ fɛɛ ahã Yehowa. w21.06 22 kk. 9-​10

Nyɛmimɛi pii ena akɛ nyɛsɛɛ nɛɛ kɛ́ amɛtee shiɛmɔ lɛ amɛnine shɛɛɛ mɛi pii anɔ. Yɛ amɛteŋ mɛi komɛi agbɛfaŋ lɛ, tsũi wujiwuji ni atara naa geeti ni aŋmɛɛɛ mɔ fɛɛ mɔ kɛkɛ gbɛ ni ebote mli lɛ fa waa yɛ amɛshikpɔŋkuku lɛ mli. Tsũi nɛɛ ekomɛi yɛ ni be ni obaaya lɛ, bulɔ ta naa, ni kɛ́ mɛi ni yɔɔ jɛmɛ lɛ ateŋ mɔ ko ekɛko bo akɛ oba lɛ, ­aŋmɛŋ bo gbɛ ni obote mli. Yɛ hei komɛi lɛ, shiɛlɔi lɛ eyaninaaa mɛi lɛ yɛ shĩa, loo amɛshiɛɔ yɛ hei ni etse amɛhe banee ni mɛi pii bɛ jɛmɛ. Nyɛmimɛi nɛɛ foɔ gbɛ kakadaŋŋ kɛyaa mɛi ashĩai, ni bei komɛi po kɛ́ amɛtee lɛ, amɛyaninaaa mɛi lɛ yɛ shĩa. Kɛ́ okɛ naagbai nɛɛ eko miikpe po lɛ, kaahã onijiaŋ je wui ni okpa shiɛmɔ. Tsakemɔ be ni okɛyaa shiɛmɔ lɛ. Kɛ́ wɔtee shiɛmɔ be ni mɛi fɔɔ shĩa hilɛ lɛ, ekolɛ wɔnine baashɛ mɛi pii anɔ, ejaakɛ mɔ fɛɛ mɔ lɛ kɛ́ etee maŋ lɛ mli lɛ, ebaa shĩa kɛ̃. Nyɛmimɛi pii ena akɛ kɛ́ amɛtee shiɛmɔ shwane loo gbɛkɛnaashi lɛ amɛnine shɛɔ mɛi pii anɔ. Agbɛnɛ hu nakai beiaŋ lɛ, shĩatsɛmɛi lɛ efeee nɔ ko tsɔ, ni enɛ hewɔ lɛ amɛboɔ sane lɛ toi. w21.05 15 kk. 5, 7

Ani nakai nɔŋŋ eji ŋmɛnɛ? Hɛɛ! Kɛ́ mɛi miiye amɛfɔmɔ gbi loo Blonya loo gbii juji krokomɛi ni kɛ Biblia lɛ kpãaa gbee ni Yehowa Odasefoi kɛ amɛhe wooo mli lɛ, kɛkɛ lɛ amɛmli efu. Mɛi komɛi hu amli fuɔ kɛ́ Yehowa Odasefoi kɛ amɛhe wooo gbii juji ni tsɔɔ maŋhedɔɔ loo yarafeemɔ kusumii ni kɛ Biblia lɛ kpãaa gbee lɛ amli. Ekolɛ, mɛi ni tamɔ nɛkɛ lɛ nuɔ he akɛ amɛmiijá Nyɔŋmɔ yɛ gbɛ ni esumɔɔ lɛ nɔ. Shi akɛni amɛsumɔɔ je lɛ kusumii moŋ fe Biblia lɛ mli tsɔɔmɔi ni amɛkɛbaatsu nii lɛ hewɔ lɛ, amɛjamɔ lɛ esaaa ehiɛ. (Mar. 7:​8, 9) Mɛni esa akɛ wɔfee koni wɔnane akatɔ̃tɔ? Esa akɛ wɔsumɔ Yehowa mlai lɛ kɛ eshishitoo mlai lɛ waa. (Lala 119:​97, 113, 163-165) Kɛ́ wɔsumɔɔ Yehowa lɛ, wɔkɛ wɔhe woŋ kusumii ni esaaa ehiɛ lɛ amli. Esaaa akɛ wɔhãa nɔ ko nɔ ko he hiaa wɔ fe Yehowa suɔmɔnaa nii ni wɔbaafee. w21.05 6 kk. 15-​16

Te wɔbaafee tɛŋŋ wɔkɛ bɔfo Paulo ŋaawoo lɛ atsu nii? Esa akɛ wɔkase Biblia lɛ daa, wɔsɔle be fɛɛ be, ni wɔkɛ ekãa atsu nitsumɔ ni Yehowa kɛhã wɔ akɛ wɔtsu lɛ. Kɛ́ wɔfee nibii nɛɛ, wɔhemɔkɛyeli lɛ mli baawa. (2 Tim. 4:​4) Kɛ́ wɔyɛ hemɔkɛyeli lɛ, wɔtsui efaŋ kɛ́ wɔnu amaniɛbɔi gbohii ni kɔɔ Yehowa webii lɛ ahe. (Yes. 28:​16) Kɛ́ wɔsumɔɔ Yehowa, e-Wiemɔ lɛ, kɛ wɔnyɛmimɛi lɛ, mɛi ni eshi anɔkwale lɛ nyɛŋ atɔ̃tɔ wɔnane. Yɛ Yesu beiaŋ lɛ, mɛi babaoo booo lɛ toi. Shi mɛi babaoo hu bo lɛ toi ni amɛbatsɔmɔ esɛɛnyiɛlɔi. Wɔle akɛ kɛ́ hooo kwraa lɛ, Yudafoi lɛ asaneyelihe wulu lɛ mli bii lɛ ateŋ mɔ kome kɛ “osɔfoi lɛ ateŋ mɛi babaoo” batsɔmɔ esɛɛnyiɛlɔi. (Bɔf. 6:7; Mat. 27:​57-60; Mar. 15:​43) Ŋmɛnɛ hu lɛ, mɛi babaoo hãaa nibii gbohii ni awieɔ yɛ Odasefoi lɛ ahe lɛ atɔ̃tɔ amɛnane. Mɛni hewɔ? Ejaakɛ amɛkase Biblia lɛ, ni amɛsumɔɔ nibii ni amɛkase yɛ Biblia lɛ mli lɛ. Nyɔŋmɔ Wiemɔ lɛ kɛɔ akɛ: “Mɛi ni sumɔɔ omla lɛ yɛ toiŋjɔlɛ babaoo; nɔ ko nɔ ko hãaa amɛnane atɔ̃tɔ.”​—Lala 119:​165, shn. w21.05 13 kk. 20-​21

Bɔfo Paulo le akɛ jeee lɛ diɛŋtsɛ enyɛmɔ naa enyɛ etsu nibii ni etsu yɛ Yehowa sɔɔmɔ lɛ mli lɛ. Yehowa tsɔ emumɔ krɔŋkrɔŋ lɛ nɔ ewaje Paulo ni enyɛ etsu esɔɔmɔ nitsumɔ lɛ he nii pɛpɛɛpɛ yɛ eyi ni awa, tsuŋ ni awo lɛ, kɛ naagbai krokomɛi ni ekɛkpe lɛ fɛɛ sɛɛ. Agbɛnɛ hu, ehe bahia ni Timoteo, ni ji oblanyo ni fata Paulo he lɛ kɛ ehiɛ afɔ̃ Nyɔŋmɔ nɔ akɛ ebaawaje lɛ koni enyɛ etsu esɔɔmɔ nitsumɔ lɛ. Timoteo fata Paulo he yɛ emaŋsɛɛ sɔɔmɔ nitsumɔ lɛ mli, ni amɛtee hei shɔŋŋshɔŋŋ. Kɛfata he lɛ, Paulo tsu lɛ ni eyasara asafoi komɛi ni ewo amɛ hewalɛ. (1 Kor. 4:​17) Ekolɛ Timoteo nu he akɛ enyɛŋ etsu nitsumɔ nɛɛ. Ni eeenyɛ efee akɛ enɛ hewɔ Paulo wo lɛ ŋaa akɛ, ‘ekafee nɔ ko ni hãŋ abu lɛ yɛ oblanyo ni eji lɛ hewɔ’ lɛ. (1 Tim. 4:​12) No mli lɛ, Timoteo hu yɛ naagba ko ni tamɔ ŋmei yɛ eheloo lɛ mli. No ji ‘ehe ni yeɔ kpitiokpitio lɛ.’ (1 Tim. 5:​23) Shi Timoteo le akɛ Yehowa baatsɔ emumɔ krɔŋkrɔŋ lɛ nɔ ewaje lɛ koni enyɛ eshiɛ sane kpakpa lɛ ni esɔmɔ enyɛmimɛi lɛ.​—2 Tim. 1:7. w21.05 21-22 kk. 6-7

Kɛ́ wɔyaawo mɔ ko ŋaa lɛ, esa akɛ wɔhã shishitoo mla ni yɔɔ Yakobo 1:​19 lɛ ahi wɔjwɛŋmɔ mli. Jɛmɛ kɛɔ akɛ: “Esa akɛ mɔ fɛɛ mɔ he afee oya kɛ sane toiboo, ekaye ehe oyai kɛwie, emli akafu oya.” Ekolɛ asafoŋ onukpa ko baasusu akɛ ele shihilɛ mli ni mɔ lɛ tsɔɔ. Shi ani ele lɛɛlɛŋ? Abɛi 18:​13 lɛ kɛɔ akɛ: “Mɔ ni hãa sane hetoo dani eboɔ sane lɛ mli toi lɛ, eefee buulu ni eeshwie ehiɛ shi hu.” No hewɔ lɛ, nilee yɛ mli akɛ asafoŋ onukpa lɛ baahã mɔ lɛ awie klɛŋklɛŋ ni ebo lɛ toi jogbaŋŋ. Ni tsɔɔ akɛ, ebaabi mɔ lɛ saji ni mɔ lɛ atsɔɔ lɛ shihilɛ mli ni etsɔɔ diɛŋtsɛ. Asafoŋ onukpa lɛ baanyɛ abi lɛ akɛ: “Te nibii yaa lɛ tɛŋŋ?” “Mɛni manyɛ mafee kɛye mabua bo?” Kɛ́ asafoŋ onukpai lɛ to amɛtsui shi amɛbi mɔ lɛ saji ni amɛna shihilɛ fɛɛ ni mɔ lɛ tsɔɔ mli lɛ, ewaaa akɛ amɛbaaye amɛbua mɔ lɛ ni amɛwo lɛ hewalɛ. Kɛ́ wɔjɛ Ŋmalɛ lɛ mli wɔwo wɔnyɛmimɛi lɛ ŋaa, shi wɔhãaa amɛna akɛ wɔsumɔɔ amɛ, wɔnuɔ amɛ shishi, ni wɔmiisumɔ ni wɔye wɔbua amɛ lɛ, ebaawa kɛhã amɛ akɛ amɛkɛ nakai ŋaawoo lɛ baatsu nii. w22.02 17 kk. 14-​15