Abɛbua Lɛ Shishinumɔ
Mɛni Hewɔ Henyɛlɔ Naashɔmɔi Ni Akpaa He Fai lɛ Ji Shishiumɔ Lɛ?
NILELƆ ni mumɔ tsirɛ lɛ lɛ yɔse enɛ: ‘Suɔlɔ mɔ pilamɔi lɛ anɔkwale ni; shi henyɛlɔ naashɔmɔi ni akpaa he fai lɛ ji shishiumɔ.’ (Abɛi 27:6, NW) Te esa akɛ anu nɛkɛ wiemɔi nɛɛ ashishi aha tɛŋŋ?
Mɔ ni sumɔɔ bo lɛ baapila bo yɛ okadi gbɛ nɔ, yɛ anɔkwayeli mli. Ekɛ suɔmɔ baawo bo ŋaa kɛjɛ etsui mli kɛ hiɛnɔkamɔ akɛ eeefee bo ekpakpa. Ehe ehiaaa ni okpa anɔkwa shieŋtsɛ lɛ fai kɛha yelikɛbuamɔ ni tamɔ nɛkɛ aloo ni ekã bo kɛ ehe miihia bo. Ni kwɛ nilelɔ ni oootsɔ kɛ okɛ mlijɔlɛ kpɛlɛ ŋaawoo ni he hiaa, hiɛkamɔ ni jajeɔ mɔ, loo kamɔ ni he hiaa lɛ nɔ lɛ!
Shi kɛ ootao ni mɔ ko ni nyɛɔ bo lɛ afee bo ejurɔ ko lɛ, esa akɛ okpa lɛ fai. Mɛni hewɔ? Ejaakɛ nyɛ ni enyɛɔ bo lɛ eŋmɛŋ lɛ gbɛ koni eshɔ onaa. Shi moŋ, ebaasumɔ ni ekɛ bo aye yɛ yiwalɛ gbɛ nɔ. Ejurɔ fɛɛ ejurɔ ni eeefee bo lɛ baaba kɛtsɔ tɔlɛ kɛ faikpamɔ babaoo ni jɛ ogbɛfaŋ lɛ nɔ.
Nɔ ni yɔɔ miishɛɛ yɛ enɛ gbɛfaŋ ji Yesu Kristo abɛi lɛ ekome. Ewie yoo okulafo ko ni kojolɔ ko ni sheee Nyɔŋmɔ gbeyei loo ebuuu gbɔmɔ lɛ ye jalɛ sane ehalɛ lɛ he. Te fee tɛŋŋ ni yoo nɛɛ ye omanye? Kojolɔ lɛ kwɛ koni aye jalɛsane ni yoo lɛ taoɔ lɛ aha lɛ kɛtsɔ fai ni etee nɔ ekpa lɛ aahu lɛ nɔ. Yesu kɛ nɛkɛ nɔkwɛmɔ nɔ nɛɛ tsu nii koni eha ekaselɔi lɛ anu bɔ ni “esa akɛ asɔleɔ daa ni ekaje tsine” lɛ shishi.—Luka 18:1-8.
Yɛ Mɛɛ Gbɛ Nɔ Jalɔi Ayi Bafaa Kɛ Mɛi Fɔji Ahiɛ Kpata?
Abɛi 28:28 kɛɔ akɛ: “Kɛ mɛi fɔji te shi lɛ, mɛi teeteeɔ amɛhe; shi beni amɛhiɛ kpataa lɛ, belɛ jalɔi ayi miifa.” Enɛ baa mli anɔkwale yɛ mɛɛ gbɛ nɔ?
Mɛi fɔji ‘teɔ shi’ yɛ hewalɛ mli, ekolɛ akɛ nɔyelɔi yiwalɔi. Yɛ nakai be lɛ mli lɛ, jalɔ teeɔ ehe. Ebaanyɛ efee nakai akɛni eeshe amɛnɔnyɛɛ lɛ gbeyei lɛ hewɔ. Ni mɛni hewɔ esaaa akɛ efeɔ nakai? Eji anɔkwale akɛ “gbɔmɔ eye enyɛmi gbɔmɔ nɔ kɛye lɛ awui.”—Jajelɔ 8:9, NW.
Shi kɛ mɛi fɔji lɛ ahiɛ kpata lɛ, jalɔi ‘ayi bafaa.’ Yɛ mɛɛ gbɛ nɔ? Eka shi faŋŋ akɛ jalɔi lɛ jeɔ kpo kɛjɛɔ hei ni amɛyateetee amɛhe yɛ lɛ, ni anaa amɛ yɛ faŋŋ mli. Anaa amɛ ejaakɛ amɛtsɔmɔ tamɔ mɛi ni amɛyi efa ejaakɛ ehe ehiaaa ni amɛyatee amɛhe dɔŋŋ. Kɛ jalɔ miiye nɔ lɛ, amɛgbalaa efɔŋ feelɔi atoi ni amɛhaa jalɛ shihilɛ yaa nɔ. Nɔ ni baajɛ enɛ mli aba hu ji mɛi ni ejaaa lɛ ayifalɛ ni baaba shi kɛ jalɔi ni amɛyi baafa.—Okɛto Abɛi 28:12; 29:2 he.
Etsɛŋ ni mɛi ni ja lɛ baana ni akpata efɔŋ feelɔi ahiɛ kɛjɛ shikpɔŋ nɔ yɛ “Yehowa mlifu gbi” ni baa kɛ foi lɛ mli. No hewɔ lɛ, taomɔ jalɛ sɛɛ gbɛ, taomɔ heshibaa sɛɛ gbɛ taakɛ ŋwɛi taomɔ nii lɛ tsɔɔ lɛ, ni abaabaa oyi kɛbote Nyɔŋmɔ jeŋ hee lɛ mli, he ni jalɔi ayi baafa diɛŋtsɛ yɛ lɛ.—Zefania 2:2, 3; 2 Petro 3:11-13.