“Yɛ Shai Kɛ Shia”
“NI AMƐFƆ̃ƆƆ nitsɔɔmɔ kɛ Kristo Yesu he sanekpakpa lɛ shiɛmɔ yɛ sɔlemɔ we lɛ kɛ agbɛnɛ yɛ shia kɛ shia be fɛɛ be.” (Bɔfoi lɛ Asaji 5:42, New World Translation) Yehowa Odasefoi fɔɔ nɛkɛ ŋmalɛ nɛɛ kɛ nɔ ni yɔɔ Bɔfoi lɛ Asaji 20:20 lɛ kɛ nitsumɔ bɔni afee ni amɛkɛma Ŋmalɛ naa nɔdaamɔ nɔ ni amɛyɔɔ yɛ shinaa-kɛ-shinaa naa shiɛmɔ nitsumɔ lɛ he lɛ nɔ mi. Shi kɛlɛ, mɛi ni wieɔ amɛshiɔ Yehowa Odasefoi yɛ Germany lɛ ateŋ mɛi komɛi ete shi amɛwo bɔ ni New World Translation lɛ tsɔɔ kuku nɛɛ shishi lɛ, ni amɛkɛɔ akɛ etsake shishinumɔ ni yɔɔ shishijee Hela wiemɔ lɛ mli lɛ.
Shi ani nɛkɛ wiemɔi nɛɛ damɔ anɔkwale ko nɔ? Dabida kwraa. Nɔ kome ji akɛ, kɛ hoo lɛ German Biblia shishitsɔɔlɔi krokomɛi ekpaa etsɔɔ nɛkɛ kuku nɛɛ shishi nakai nɔŋŋ. Amɛteŋ ekomɛi ji Zürcher Bibel ni asaa aŋma lɛ kɛ “New Testaments” ni Rupert Storr, Franz Sigge, kɛ Jakob Schafer fee (ni N. Adler ŋma lɛ ehee) lɛ. Ŋleshi Blɔfo shishitsɔɔmɔi pii kɛ enɛ kpaa gbee.
German woloŋlelɔ Hans Bruns kpɛlɛɔ eshishitsɔɔmɔ ni ji “yɛ shia kɛ shia,” ni yɔɔ Bɔfoi lɛ Asaji 5:42 lɛ nɔ, ni ekɛɔ akɛ: “Yɛ bɔ ni shishijee niŋmaai lɛ tsɔɔ lɛ naa lɛ, etamɔ nɔ ni amɛtee shia kɛ shia.” Hɛɛ, akɛ katʼ oiʹkon, ni ji shishijee wiemɔ ni yɔɔ ŋmalɛ nɛɛ mli lɛ tsuuu nii yɛ feemɔ wiemɔ mligbalamɔ shishinumɔ naa (“yɛ shia”), shi moŋ yɛ pii-feemɔ shishinumɔ naa, ni tsɔɔ yɛ faŋŋ mli akɛ “yɛ shia fɛɛ shia.” (Anaa katʼ oiʹkous, ni tsɔɔ ebabaoo feemɔ ni shishi ji “yɛ bɔ ni ato shiai lɛ anaa lɛ pɛpɛɛpɛ” lɛ yɛ Bɔfoi lɛ Asaji 20:20.) Woloŋlelɔi krokomɛi, tamɔ Heinz Schiirmann fiɔ shishinumɔ ni tsɔɔ nɛkɛ wiemɔi nɛɛ ashishi akɛ nɔ ni miitsɔɔ pii-feemɔ shishinumɔ nɛɛ sɛɛ. Horst Balz kɛ Gerhard Schneider, ni fee wiemɔi komekomei ashishitsɔɔmɔ wolo ni gbalaa Kpaŋmɔ Hee lɛ mli wiemɔi amli lɛ kɛɔ akɛ abaanyɛ atsɔɔ nɛkɛ wiemɔ nɛɛ shishi akɛ “shia nyiɛ shia sɛɛ.” Ŋleshi Blɔfo niiamlitaomɔ woji babaoo hu tsɔɔ nɛkɛ kuku nɛɛ shishi nakai nɔŋŋ.
No hewɔ lɛ, New World Translation lɛ edamɔ mɛi ni wieɔ shiɔ lɛ atutuamɔi lɛ anaa shikome ekoŋŋ. Nɔ ni he hiaa fe fɛɛ lɛ, eyɛ faŋŋ akɛ Biblia mli nɔdaamɔ nɔ ni yɔɔ shiŋŋ yɛ kɛha shia-kɛ-shia sɔɔmɔ nitsumɔ lɛ. (Okɛto Mateo 10:11-14; 24:14 he.) Eji hegbɛ ni Yehowa Odasefoi ena akɛ amɛaakase amɛnanemɛi ni hi shi yɛ klɛŋklɛŋ afii oha lɛ mli lɛ yɛ enɛ gbɛfaŋ.