Sanebimɔi ni Jɛ Kanelɔi Adɛŋ
Be sɛɛkɛlɛ enyiɛ Hiob kɛna amanehulu?
Mɛi komɛi susuɔ akɛ Hiob kaai lɛ tee nɔ afii babaoo, shi Hiob wolo lɛ ewieee amanehulu be kakadaŋŋ ni tamɔ nɛkɛ he.
Etamɔ nɔ ni Hiob kaai lɛ mli klɛŋklɛŋ fã, weku mli bii ni gboi kɛ enibii ni hiɛ kpata lɛ ba mli yɛ be kukuoo ko mli. Wɔkaneɔ akɛ: “Ni eba mli akɛ gbi ko, beni [Hiob] ebihii kɛ ebiyei lɛ yeɔ nii ní amɛnuɔ wein yɛ amɛnyɛmi nukpa lɛ we lɛ.” (Wɔma efã ko nɔ mi.) Hiob nine shɛ amaniɛbɔɔ ni eko nyiɛ eko sɛɛ lɛ nɔ, ní tsɔɔ nibii ni elaaje—etsinai, etejii, etooi, eyomai, kɛ etsuji ni kwɛɔ nakai kooloi lɛ anɔ lɛ. Eyɛ faŋŋ akɛ, enɛ sɛɛ nɔŋŋ pɛ kɛkɛ ni Hiob ná enu ebihii kɛ ebiyei, ní “yeɔ nii ní amɛnuɔ wein yɛ amɛnyɛmi nukpa lɛ we lɛ” gbele he. Etamɔ nɔ ni enɛɛmɛi fɛɛ ba mli yɛ gbi kome mli.—Hiob 1:13-19.
Hiob kaai lɛ mli fã ni nyiɛ sɛɛ lɛ hé be babaoo. Satan bɛŋkɛ Yehowa ni ejaje etsɔɔ lɛ akɛ Hiob yeŋ anɔkwa kɛ́ amanehulu lɛ sa ehe jogbaŋŋ—lɛ diɛŋtsɛ egbɔmɔtso. Kɛkɛ ni aha “asanei ní jaraa tsɛ̃rɛ̃” Hiob “kɛjɛ enaneshi aahu kɛyashi eyiteŋ pampam.” Ekolɛ nɛkɛ tsɛŋemɔ hela nɛɛ ni gbɛ eshwã egbɔmɔtso muu lɛ fɛɛ he lɛ tsɛ fioo. Ni ekolɛ eŋɔ be fioo koni mɛi ni baafee emiishɛjelɔi ni ba eŋɔɔ lɛ aná anu “amanehulu . . . nɛɛ fɛɛ” he adafitswaa lɛ he.—Hiob 2:3-11.
Elifaz jɛ Teman yɛ Edom shikpɔŋ nɔ, ni Zofar jɛ he ko yɛ Arabia kooyi-anaigbɛ, no hewɔ lɛ maji amli ni amɛjɛ lɛ kɛ Hiob nɔ̃ lɛ teŋ jɛkɛɛɛ yɛ Uz, he ni ekolɛ eyɔɔ Arabia kooyigbɛ lɛ. Shi kɛlɛ, Shuhinyo ji Bildad, ni anuɔ shishi akɛ emaŋbii lɛ hi Eufrate faa lɛ naa. Kɛ Bildad yɛ akutso mli he ni eyɔɔ lɛ yɛ nakai be lɛ mli lɛ, no lɛ ekolɛ ebaaŋɔ lɛ otsii loo nyɔji abɔ dani enu Hiob shihilɛ lɛ he ní efã gbɛ kɛya Uz. Yɛ anɔkwale mli lɛ, ebaanyɛ eba mli akɛ mɛi etɛ lɛ yɛ hei ni bɛŋkɛ akutso mli he ni Hiob yɔɔ lɛ beni emanehulu lɛ je shishi lɛ. Yɛ fɛɛ mli lɛ, beni Hiob nanemɛi etɛ lɛ ba lɛ, “amɛho amɛtara ehe yɛ shikpɔŋ nyɔɔŋ nyɔɔŋ kɛ shwane shwane gbii kpawo sɔŋŋ” ni amɛwieee.—Hiob 2:12, 13.
Kɛkɛ ni Hiob kaai lɛ mli naagbee nɔ̃ lɛ ba, nɔ ni emli saji ni yɔɔ fitsofitso lɛ eyi wolo lɛ mli yitsei babaoo amli obɔ lɛ. Naataamɔ saji loo wiemɔi srɔtoi yɛ ni mɛi ni asusuɔ akɛ amɛji miishɛjelɔi lɛ kɛ amɛhe wo mli, ni bei pii lɛ Hiob ha amɛ hetoo. Beni no ba naagbee lɛ, oblanyo Elihu kã amɛhiɛ, ni Yehowa jɛ ŋwɛi ejaje Hiob.—Hiob 32:1-6; 38:1; 40:1-6; 42:1.
No hewɔ lɛ, ekolɛ Hiob amanehulu lɛ kɛ enaa tsabaa ni ená lɛ ba yɛ nyɔji fioo komɛi amli, ekolɛ nɔ ni shɛɛɛ afi. Ekolɛ ole kɛjɛ niiashikpamɔ mli akɛ etamɔ nɔ ni kaai ni mli wa lɛ hiɔ shi kɛyaa naanɔ. Ni kɛlɛ, esaaa akɛ wɔhiɛ kpaa nɔ akɛ amɛbaa naagbee, taakɛ eba lɛ yɛ Hiob gbɛfaŋ lɛ. Ekɔɔɔ he eko bei abɔ ni kaai ni wɔkɛkpeɔ lɛ yaa nɔ lɛ, nyɛhaa yelikɛbuamɔ ni Nyɔŋmɔ kɛhaa lɛ ahia wɔjwɛŋmɔ mli, taakɛ ejeɔ kpo yɛ wiemɔi ni jɛ mumɔŋ nɛɛ mli lɛ, akɛ: “Wɔmrɔmrɔ amanehulu, ní jaraaa nɛɛ, miitsu naanɔ anunyam babaoo ní teke nɔ ní jara wa aahu eha wɔ.” (2 Korintobii 4:17) Bɔfo Petro ŋma akɛ: “Duromɔ fɛɛ Nyɔŋmɔ ni tsɛ́ nyɛ kɛba enaanɔ anunyam lɛ mli yɛ Kristo Yesu mli lɛ, kɛ́ nyɛna amanehulu fioo nɛɛ etã lɛ, lɛ diɛŋtsɛ eeesaa nyɛ pɛ ni eeewaje nyɛ ni eeewo nyɛ hewalɛ ni eeeha nyɛfĩ shi shiŋŋ.”—1 Petro 5:10.