“Miwala Shihilɛ Mli Gbii ni Hi Fe Fɛɛ lɛ Ateŋ Ekome”
BEYONDBLUE, ni ji Australia nitsumɔhe ko ni nɔyeli lɛ kwɛɔ nɔ lɛ kɛɛ akɛ: “Jwɛŋmɔŋ nɔnyɛɛ ji sane ni afɔɔ he amaniɛbɔɔ fe fɛɛ, ni eeenyɛ efee akɛ no ji nɔ titri ni haa oblahii kɛ oblayei náa jwɛŋmɔŋ naagba.” Niiamlitaomɔi etsɔɔ akɛ aaafee oblahii kɛ oblayei ni yɔɔ Australia lɛ ateŋ mɛi 100,000 náa jwɛŋmɔŋ nɔnyɛɛ daa afi.
Jwɛŋmɔŋ nɔnyɛɛ náa Kristofoi oblahii kɛ oblayei hu anɔ hewalɛ. Shi kɛlɛ, Yehowa mli hemɔkɛyeli eye ebua amɛteŋ mɛi babaoo ni amɛnyɛ amɛye susumɔi gbohii anɔ, ni amɛye omanye akɛ oblahii kɛ oblayei. Yɛ nakai feemɔ mli lɛ, amɛnáa mɛi krokomɛi anɔ hewalɛ kpakpa. Yɛ mɛɛ gbɛ nɔ?
Bo lɛ susumɔ Claire ni eye afii 18 lɛ niiashikpamɔ lɛ he okwɛ. Lɛ kɛ enyɛ yaa Yehowa Odasefoi asafoŋ kpeei yɛ Melbourne. Beni Claire tsɛ kpoo weku lɛ, Claire baná jwɛŋmɔŋ nɔnyɛɛ. Shi eŋwɛi Tsɛ Yehowa mli hemɔkɛyeli ni eyɔɔ lɛ mli wa be fɛɛ be. Gbi ko lɛ, weku lɛ datrɛfonyo ni gbɛi ji Lydia lɛ tee Claire shĩa koni eyakwɛ Claire mami ní bɛ hewalɛ lɛ. No sɛɛ lɛ, ejɛ esuɔmɔ mli ekɛ etsɔne wó Claire kɛtee he ko ni shwapoi babaoo yɔɔ. Beni amɛyaa yɛ gbɛ lɛ nɔ lɛ, ebi Claire kɛji eyɛ nuu ni ekɛ lɛ nyiɛɔ. Claire gbála mli etsɔɔ lɛ akɛ, ákɛ Yehowa Odasefoi ateŋ mɔ kome lɛ, ekɛ hii enyiɛɛɛ kɛkɛ. Enɛ ha datrɛfonyo lɛ naa kpɛ ehe. No sɛɛ lɛ, Claire tsɔɔ bɔ ni Biblia lɛ eye ebua lɛ koni ekɛ nilee akpɛ eyiŋ yɛ shihilɛ mli. Yɛ sɛɛ mli lɛ, Claire kɛɛ datrɛfonyo lɛ akɛ ebaaba ebaha lɛ Biblia he wolo ni ye ebua lɛ jogbaŋŋ lɛ eko. Wolo lɛ gbɛi ji Questions Young People Ask—Answers That Work.
Beni Lydia nine shɛ wolo lɛ nɔ lɛ, gbii etɛ sɛɛ lɛ etswa Claire mami tɛlifoŋ ni etsɔɔ bɔ ni enya wolo lɛ kanemɔ he waa eha. No sɛɛ lɛ, ebi ni aha lɛ woji lɛ ekpaa kɛfata he, koni ekɛha enanemɛi datrɛfoi lɛ. Beni Claire kɛ woji lɛ yaha datrɛfonyo lɛ, etsɔɔ bɔ ni enya Claire hemɔkɛyeli lɛ he waa eha. Claire bi koni ekɛ datrɛfonyo lɛ akase Biblia lɛ, ni ekpɛlɛ nɔ.
Claire kɛ datrɛfonyo lɛ kase nii nyɔji babaoo beni datrɛfonyo lɛ ekpa kɛha shwane niyeli lɛ. No sɛɛ lɛ, Lydia bi Claire kɛji ebaasumɔ ni ewie jwɛŋmɔŋ nɔnyɛɛ ní oblahii kɛ oblayei náa lɛ he yɛ kpee ko ni abaafee kɛsusu sane nɛɛ he lɛ shishi. Eyɛ mli akɛ Claire she gbeyei moŋ, shi ekpɛlɛ nɔ. Mɛi ni fa fe 60 tee nakai kpee lɛ. Jwɛŋmɔŋ hela he nitsulɔi ejwɛ—ní amɛ fɛɛ amɛdara lɛ—kɛ toibolɔi lɛ wie. No sɛɛ lɛ ebashɛ Claire nɔ koni lɛ hu ewie. Ema nɔ hewɔ ni ehe hiaa ni oblahii kɛ oblayei aná amɛkɛ Nyɔŋmɔ teŋ wekukpaa lɛ nɔ mi. Egbála mli etsɔɔ akɛ, Yehowa Nyɔŋmɔ susuɔ oblahii kɛ oblayei ahe waa diɛŋtsɛ ni eyeɔ ebuaa mɛi fɛɛ ni baa eŋɔɔ kɛha yelikɛbuamɔ kɛ miishɛjemɔ lɛ. Kɛfata he lɛ, etsɔɔ hekɛnɔfɔɔ ni eyɔɔ akɛ etsɛŋ ni Yehowa baajie gbɔmɔtsoŋ helai kɛ jwɛŋmɔŋ helai srɔtoi fɛɛ kɛya lɛ. (Yesaia 33:24) Mɛni jɛ odaseyeli kpakpa nɛɛ mli kɛba?
Claire kɛɛ akɛ: “Mɛi babaoo ba miŋɔɔ beni akpa kpee lɛ, ni amɛbakɛɛ mi akɛ amɛnya he waa akɛ amɛaanu ni oblayoo ko miiwie Nyɔŋmɔ he. Miha Young People Ask woji 23. Toibolɔi lɛ ateŋ gbekɛbii yei etɛ ha mi amɛtɛlifoŋ nɔmbai. Amrɔ nɛɛ akɛ gbekɛbii yei etɛ nɛɛ ateŋ mɔ kome miikase Biblia lɛ. Eji miwala shihilɛ mli gbii ni hi fe fɛɛ lɛ ateŋ ekome.”