Klɛŋklɛŋ lɛ Ashwie Amɛ, ni Sɛɛ Mli lɛ Ahere Amɛ Hiɛmɛɛ

AFII komɛi ni eho nɛ lɛ, Santiago kɛ eŋa, Lourdes, fã kɛtee Huillcapata maŋ ni yɔɔ fɛo lɛ mli yɛ Peru koni amɛyashiɛ Biblia mli hiɛnɔkamɔ he shɛɛ sane lɛ amɛtsɔɔ mɛi ni yɔɔ jɛmɛ lɛ. Shi kɛlɛ, etsɛɛɛ ni osɔfo ko jɛ Cuzco eba ni ebatsɛ́ maŋbii lɛ fɛɛ kpee. Osɔfo lɛ bɔ maŋbii lɛ kɔkɔ akɛ jɛmɛ ní Yehowa Odasefoi lɛ eba lɛ baaha gbele hela aba, ni snoo baanɛ̃ waa ni ebaagbe amɛtsinai lɛ ni ebaakpata amɛŋmɔshi nibii hu ahiɛ.

“Gbalɛ” nɛɛ ná mɛi babaoo anɔ hewalɛ, ni yɛ nɔ ni fa fe nyɔji ekpaa mli lɛ, maŋbii lɛ ateŋ mɔ ko mɔ ko ekpɛlɛɛɛ nɔ akɛ Santiago kɛ Lourdes kɛ lɛ akase Biblia lɛ. Maŋ nɔyelɔ sɛɛmɔ ni atsɛɔ lɛ Miguel, ni eji maŋ onukpa lɛ tswia Santiago kɛ Lourdes tɛi ni eshwie amɛ yɛ gbɛjegbɛ lɛ nɔ. Shi ákɛ Kristofoi lɛ, amɛkɛ mɛi fɛɛ hi shi yɛ toiŋjɔlɛ mli be fɛɛ be.

Yɛ sɛɛ mli lɛ, maŋbii lɛ ateŋ mɛi komɛi kpɛlɛ nɔ ákɛ akɛ amɛ abakase Biblia lɛ. Miguel po tsake esu. Santiago kɛ lɛ bɔi nikasemɔ, ni ekpa dãatɔɔ ni ebatsɔ mɔ ni he jɔ. Yɛ naagbee mli lɛ, Miguel kɛ eŋa, kɛ ebiyei lɛ ateŋ mɛi enyɔ kpɛlɛ Biblia mli anɔkwale lɛ nɔ.

Ŋmɛnɛ, Yehowa Odasefoi yɛ asafo ní miishwere waa yɛ nɛkɛ maŋ nɛɛ mli. Miguel yɛ he miishɛɛ akɛ tɛi ni etswia Santiago kɛ Lourdes lɛ ateŋ babaoo esaaa amɛhe, ni ehiɛ sɔɔ gbalashihilɛ mli hefatalɔi lɛ waa yɛ toiŋjɔlɛ su kpojiemɔ he nɔkwɛmɔnɔ kpakpa ni amɛfee lɛ hewɔ.

[Mfoniri ni yɔɔ baafa 32]

Toiŋjɔlɛ su ni Santiago kɛ Lourdes (yiteŋgbɛ) jie lɛ kpo lɛ ha Miguel (ninejurɔgbɛ kwraa) tsake esu