Ha Sane Nɔjwɛŋmɔ Afee Nɔ ni Yɔɔ Miishɛɛ Kɛha Bo
SANE nɔjwɛŋmɔ ji nifeemɔ ni ekolɛ mɛi komɛi sumɔɔɔ kwraa. Ekolɛ amɛbaabu sane nɔjwɛŋmɔ akɛ eji nifeemɔ ni wa ní biɔ ni asusu nɔ ko he waa. Ekolɛ ebaagbá mɛi ni tamɔ nɛkɛ lɛ anaa akɛ amɛjwɛŋŋ sane nɔ, titri lɛ kɛ́ amɛkane sɛɛnamɔ ni yɔɔ sane nɔjwɛŋmɔ he lɛ. (Filipibii 4:8) Shi kɛlɛ, kɛ́ wɔjwɛŋ Yehowa he anɔkwalei ni wɔkase, esui kpakpai, nibii ni yɔɔ naakpɛɛ ní efee, etaomɔ nii, kɛ eyiŋtoo ni yɔɔ miishɛɛ lɛ anɔ lɛ, no baanyɛ afee gbɛ ni yɔɔ miishɛɛ waa ni atsɔɔ nɔ akɛtsuɔ be he nii, ni nakai ji nɔ ni esa akɛ afee. Mɛni hewɔ?
Yehowa Nyɔŋmɔ ji jeŋ muu fɛɛ Nɔyelɔ ni Nɔ Kwɔ Fe Fɛɛ ni eeya nɔ eetsu nii bɔni afee ni ekɛha eyiŋtoo kpeteŋkpele lɛ aba mli. (Yohane 5:17) Shi kɛlɛ, esusuɔ nɔ ni yɔɔ ejálɔi lɛ ateŋ mɔ fɛɛ mɔ jwɛŋmɔ mli lɛ he. Lalatsɛ David le enɛ jogbaŋŋ, ni Nyɔŋmɔ kɛ mumɔ tsirɛ lɛ ni eŋma akɛ: “Yehowa, otao mimli ni ole mi. Ole mishitamɔ kɛ mishitee mli fɛɛ, oyooɔ miyiŋtoo yɛ shɔŋŋ beebe.”—Lala 139:1, 2.
Ekolɛ shishijee lɛ, mɔ ko baabu lalatsɛ lɛ wiemɔi nɛɛ akɛ ejeɔ mɔ nijiaŋ wui. Ekolɛ mɔ lɛ baasusu akɛ, ‘Eyɛ mli akɛ Nyɔŋmɔ “yɛ shɔŋŋ” moŋ, shi enaa susumɔ fɔŋ fɛɛ susumɔ fɔŋ ni baa mijwɛŋmɔ mli lɛ.’ Eji anɔkwale akɛ ehi jogbaŋŋ akɛ wɔɔsusu nakai. Enɛ baanyɛ aye abua wɔ ni wɔwu wɔshi susumɔi gbohii, ni kɛji akɛ nakai susumɔi ba wɔjwɛŋmɔ mli hu lɛ, esa akɛ wɔjaje wɔtsɔɔ Nyɔŋmɔ, ni wɔná hekɛnɔfɔɔ akɛ ebaadamɔ hemɔkɛyeli ni wɔyɔɔ yɛ Yesu kpɔmɔ afɔleshaa lɛ mli lɛ nɔ ekɛke wɔ. (1 Yohane 1:8, 9; 2:1, 2) Shi yɛ nakai beaŋ nɔŋŋ lɛ, esa akɛ wɔkai akɛ Yehowa kɛ jwɛŋmɔ ni ja pɛiɔ ejálɔi lɛ asusumɔi amli ekwɛɔ. Kɛji akɛ wɔkɛ hiɛsɔɔ susu ehe lɛ, egbalaa ejwɛŋmɔ kɛbaa wɔnɔ.
Ekolɛ obaabi akɛ: “Ani Yehowa gbalaa ejwɛŋmɔ kɛyaa ejálɔi akpekpei abɔ ni yɔɔ lɛ fɛɛ asusumɔi kpakpai lɛ anɔ diɛŋtsɛ?” Ekã shi faŋŋ akɛ efeɔ nakai diɛŋtsɛ. Yesu ma nɔ mi akɛ Yehowa susuɔ wɔhe, ni ewie akɛ Yehowa gbalaa ejwɛŋmɔ kɛyaa afilimatai bibii po anɔ, ni ekɛfata he akɛ: “Nyɛjara wa fe afilimatai babaoo.” (Luka 12:6, 7) Afilimatai nyɛŋ asusu Yehowa he. No hewɔ lɛ, kɛji akɛ esusuɔ amɛhe lɛ, belɛ esusuɔ wɔhe waa fe amɛ, ni enáa ehe ní wɔteŋ mɔ fɛɛ mɔ susuɔ lɛ he miishɛɛ waa! Hɛɛ, taakɛ David fee lɛ, wɔbaanyɛ wɔkɛ hekɛnɔfɔɔ asɔle akɛ: “Ha . . . mitsui mli jwɛŋmɔi asa ohiɛ, Yehowa, mitɛsaa kɛ mikpɔ̃lɔ!”—Lala 19:15.
Wɔnaa odaseyeli kroko hu ni tsɔɔ akɛ Yehowa náa enɔkwa jálɔi lɛ asane nɔjwɛŋmɔ he miishɛɛ waa lɛ yɛ wiemɔi ni akɛ mumɔ tsirɛ gbalɔ Maleaki ni eŋma lɛ amli. Egba kɛkɔ wɔgbii nɛɛ ahe akɛ: ‘Kɛkɛ ni mɛi ni sheɔ Yehowa gbeyei lɛ kɛ amɛhe wie, ni Yehowa bo toi, ni enu, ni aŋma kaimɔ wolo yɛ ehiɛ aha mɛi ni sheɔ Yehowa gbeyei lɛ, kɛ mɛi ni jwɛŋɔ egbɛi lɛ he lɛ.’ (Maleaki 3:16) Le ni wɔɔle akɛ Yehowa yaa nɔ ‘eboɔ’ ehe ni wɔsusuɔ lɛ “toi” lɛ baanyɛ aha ehe sane ni wɔjwɛŋɔ nɔ lɛ afee nɔ ni yɔɔ miishɛɛ diɛŋtsɛ. Enɛ hewɔ lɛ, eba akɛ wɔkɛ lalatsɛ lɛ baakpã gbee, mɔ ni ŋma akɛ: “Majwɛŋ onitsumɔi lɛ fɛɛ he, ni masusu onifeemɔi lɛ ahe.”—Lala 77:13.