Sanebimɔi ni Jɛ Kanelɔi Adɛŋ

Te esa akɛ Kristofonyo abu gbɔbimɔ kɛ loohɛɛ eha tɛŋŋ?

Biblia lɛ eteee shi ewooo kooloo gbɔbimɔ aloo loohɛɛ. (5 Mose 14:4, 5, 9, 20; Mateo 17:27; Yohane 21:6) Shi kɛlɛ, ehe miihia ni Kristofoi ni gbɔbiɔ aloo amɛhɛɔ looi lɛ asusu Ŋmalɛ mli shishitoo mlai komɛi ahe.

Nyɔŋmɔ ŋmɛ Noa kɛ eseshibii lɛ gbɛ koni amɛgbe kooloi amɛye, shi dani amɛaafee nakai lɛ esa akɛ amɛfɔse kooloi lɛ alá lɛ amɛshwie shi dã. (1 Mose 9:3, 4) Nɛkɛ famɔ nɛɛ maa nɔ mi akɛ esa akɛ abu kooloo wala akɛ ejɛ Nyɔŋmɔ ŋɔɔ. No hewɔ lɛ, Kristofoi egbeee kooloi kɛkɛ koni amɛtsɔɔ akɛ amɛhe esa waa kɛ nakai feemɔ loo koni amɛkɛjie amɛhiɛtserɛ, ni amɛkɛ yitsoŋwalɛ hu efeee nakai ni amɛkɛtsɔɔ akɛ amɛbɛ bulɛ kɛha wala.—Abɛi 12:10.

Nɔ̃ kroko hu ni esa akɛ wɔsusu he ji bɔ ni wɔfeɔ wɔnii wɔhaa yɛ kooloi agbee he lɛ. Bɔfoi lɛ ateŋ mɛi ni ji wuoyalɔi lɛ atsui nyɔ amɛmli yɛ looi babaoo ni amɛgbe lɛ hewɔ. Kɛlɛ, nɔ ko bɛ ni tsɔɔ akɛ amɛshwã yɛ hesaai ni amɛkɛhɛɔ loo amɛkɛ gbɔbiɔ lɛ he, aloo ákɛ amɛkɛ mɛi krokomɛi shi akaŋ yɛ loohɛɛ loo gbɔbimɔ mli koni amɛkɛtsɔɔ amɛnyɛmɔi, loo koni amɛkɛtsɔɔ miishɛɛ ni amɛnáa yɛ loohɛɛ loo gbɔbimɔ mli.—Lala 11:5; Galatabii 5:26.

No hewɔ lɛ, esa akɛ wɔbi wɔhe akɛ: ‘Ani mibuɔ wala taakɛ Yehowa buɔ wala lɛ? Ani gbɔbimɔ loo loohɛɛ ehé misusumɔ fɛɛ, ni no he sane sɔŋŋ migbaa? Ani bɔ ni mihiɔ shi mihaa lɛ tsɔɔ akɛ minyãa kooloi ni agbɔbiɔ amɛ loo agbeɔ amɛ kɛha miishɛɛnamɔ kɛkɛ lɛ he, aloo mikɛ mishihilɛ tsɔɔ akɛ Nyɔŋmɔ sɔɔlɔ ji mi? Ani gbɔbimɔ loo loohɛɛ haa mikɛ mɛi ni heee yeee lɛ bɔɔ gbagbalii loo ehaa mikuɔ mihiɛ mishwieɔ miweku lɛ nɔ?’—Luka 6:45.

Gbɔbilɔi kɛ wuoyalɔi komɛi baanu he akɛ tɔmɔ bɛ he ákɛ amɛaaku amɛhiɛ amɛshwie Kristofoi anitsumɔi anɔ yɛ gbɔbimɔ kɛ loohɛɛ beaŋ. Shi kɛlɛ, kɛ́ wɔkɛ nɔ kroko yeee sɔɔmɔ ni wɔkɛhaa Nyɔŋmɔ lɛ najiaŋ lɛ, wɔkɛ no tsɔɔ akɛ wɔyɛ hemɔkɛyeli kɛ hekɛnɔfɔɔ yɛ emli. (Mateo 6:33) Kɛfata he lɛ, Kristofoi yeɔ “Kaisare” mlai fɛɛ ni kɔɔ gbɔbimɔ kɛ loohɛɛ he lɛ anɔ, kɛji nɔyelɔi lɛ kwɛɔ ni aye mlai nɛɛ anɔ loo amɛfeee nakai po.—Mateo 22:21; Romabii 13:1.

Bɔni afee ni wɔsusumɔ kɛ bɔ ni Yehowa buɔ gbɔbimɔ kɛ loohɛɛ ehaa lɛ akpã gbee lɛ, ekolɛ ebaabi ni mɛi komɛi ajaje amɛsusumɔ yɛ Yehowa shishitoo mlai lɛ ahe. (Efesobii 4:22-24) Shi kɛlɛ, esa akɛ wɔjie bulɛ kpo wɔtsɔɔ yiŋ ni mɛi krokomɛi ejɛ amɛhenilee mli amɛkpɛ lɛ. Bɔfo Paulo kɛ ŋaawoo ni sa jogbaŋŋ ha yɛ sane nɛɛ he akɛ: “Nyɛkahaa wɔkojokojoa wɔhe dɔŋŋ; shi enɛ moŋ nyɛkojoa, akɛ mɔ ko akato tɛmɔnɔ ko loo pampi ko eha enyɛmi.” (Romabii 14:13) Kɛ́ wɔjie suɔmɔ ni ŋkomeŋfa bɛ mli kɛ bulɛ ni tamɔ nɛkɛ kpo lɛ, ehaa toiŋjɔlɛ hiɔ asafo lɛ mli, ni esaa wɔ-Feelɔ ni ji wala fɛɛ Jɛɛhe lɛ hiɛ.—1 Korintobii 8:13.a

[Shishigbɛ niŋmaa]