Mɛni Hewɔ Mɛi Pii Agbãla Fiteɔ?

“Farisifoi lɛ ba eŋɔɔ ni amɛbatsɔ lɛ amɛkɛɛ akɛ: Ani eja akɛ nuu shwieɔ eŋa yɛ sane fɛɛ sane hewɔ?”—Mateo 19:3.

YESU gbii lɛ amlibii lɛ ateŋ mɛi komɛi bi kɛji gbalashihilɛ baanyɛ aye omanye loo esa akɛ nuu kɛ eŋa ahi shi daa akɛ gbalashihilɛ mli hefatalɔi. Yesu kɛɛ amɛ akɛ: “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, ‘nuu kɛ yoo ebɔ amɛ’? Ni ekɛɛ: ‘Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ Belɛ agbɛnɛ amɛjeee mɛi enyɔ dɔŋŋ, shi moŋ heloo kome; no hewɔ lɛ, nɔ ni Nyɔŋmɔ eŋɔtsa lɛ, akaha gbɔmɔ miigbala mli.”a (Mateo 19:4-6) No hewɔ lɛ eyɛ faŋŋ akɛ, Nyɔŋmɔ to gbalashihilɛ shishi ni ehi shi daa.

Ŋmɛnɛ lɛ, yɛ maji babaoo anɔ lɛ, gbalashihilɛi 100 mlijaa 40 loo nɔ ni fa fe nakai ‘amli gbalaa,’ ni no kɛ gbalatsemɔ baa. Ani Biblia mli ŋaawoi ni kɔɔ gbalashihilɛ he lɛ abe eho? Ani eeenyɛ efee akɛ gbalashihilɛi yeee omanye akɛni Nyɔŋmɔ etooo shishi jogbaŋŋ lɛ hewɔ?

Susumɔ nɔkwɛmɔnɔ nɛɛ he okwɛ: Gbalashihilɛ mli hefatalɔi srɔtoi enyɔ komɛi yahe kar henɔ kome too lɛ nɔŋŋ. Mɔ kome kɛ eŋa lɛ hiɛɔ amɛkar lɛ jogbaŋŋ. Amɛkar lɛ fiteee. Mɔ kroko lɛ kɛ eŋa lɛ ehiɛɛɛ amɛkar lɛ jogbaŋŋ, ni amɛkudɔɔ lɛ basabasa hu. Amɛkar lɛ fite ni amɛshi amɛma he ko. Mɛni ha hefatalɔi ni ji enyɔ lɛ akar lɛ fite lɛ? Ani naagba lɛ jɛ kar lɛ aloo nɔtsɛmɛi lɛ? Ekã shi faŋŋ akɛ, nɔtsɛmɛi lɛ titri ji mɛi ni sa shwamɔ.

Nakai nɔŋŋ hu gbalashihilɛi babaoo ni yeee omanye lɛ etsɔɔɔ akɛ gbalashihilɛ ehiii. Gbalashihilɛi akpekpei abɔ ni yeɔ omanye lɛ maa enɛ nɔ mi. Gbalashihilɛi nɛɛ haa miishɛɛ hiɔ aŋkroaŋkroi, wekui, kɛ akutsoŋbii ateŋ, ni amɛtsui nyɔɔ amɛmli. Shi taakɛ kar ji lɛ, kɛ́ gbalashihilɛ sɛɛ baatsɛ lɛ, esa akɛ ahiɛ lɛ jogbaŋŋ ni asaa lɛ yɛ be kɛ beaŋ.

Kɛ́ kpaakpo obote gbalashihilɛ mli jio, obote mli afii nyɔŋmai abɔ nɛ jio lɛ, Biblia mli ŋaawoi baanyɛ aye abua bo ni ogbala lɛ asɔ ni ewaje lɛ. Obaana enɛ he nɔkwɛmɔnii komɛi yɛ baafai ni nyiɛ sɛɛ lɛ amli.

[Shishigbɛ niŋmaa]