SANEBIMƆI NI BIBLIA LƐ EHA HETOO

Ani Nyɔŋmɔ boɔ sɔlemɔi fɛɛ toi?

Nyɔŋmɔ boɔ maji fɛɛ anɔ bii atoi. (Lala 145:18, 19) Nyɔŋmɔ Wiemɔ ni ji Biblia lɛ woɔ wɔ hewalɛ akɛ wɔkɛ lɛ awie nɔ fɛɛ nɔ ni gbaa wɔnaa lɛ he. (Filipibii 4:6, 7) Kɛlɛ, sɔlemɔi komɛi esaaa Nyɔŋmɔ hiɛ. Ákɛ nɔkwɛmɔnɔ lɛ, ehiɛ esɔɔɔ sɔlemɔ ni akpe awo yitsoŋ akɛɔ lɛ trilii, ni ji wiemɔ kome too lɛ nɔŋŋ ni akɛɔ lɛ shii abɔ lɛ.​—Kanemɔ Mateo 6:7.

Kɛfata he lɛ, Yehowa booo mɛi ni jeɔ gbɛ amɛkuɔ amɛhiɛ amɛshwieɔ emla lɛ nɔ lɛ asɔlemɔi atoi. (Abɛi 28:9) Ákɛ nɔkwɛmɔnɔ lɛ, yɛ Biblia beaŋ lɛ, Nyɔŋmɔ kpoo akɛ ebaabo Israelbii ni gbe gbɔmɛi lɛ asɔlemɔi atoi. Belɛ eyɛ faŋŋ akɛ, dani Nyɔŋmɔ baabo wɔsɔlemɔi atoi lɛ, esa akɛ wɔshɛ taomɔnii komɛi ahe.​—Kanemɔ Yesaia 1:15.

Mɛni esa akɛ wɔfee koni Nyɔŋmɔ abo wɔsɔlemɔi atoi?

Kɛ́ wɔbɛ hemɔkɛyeli lɛ, wɔnyɛŋ wɔbɛŋkɛ Nyɔŋmɔ yɛ sɔlemɔŋ. (Yakobo 1:5, 6) Esa akɛ wɔná hekɛnɔfɔ̃ɔ akɛ eji mɔ ko ni yɔɔ diɛŋtsɛ, ni esusuɔ wɔhe hu. Kɛ́ wɔkase Biblia lɛ, wɔbaanyɛ wɔwaje wɔhemɔkɛyeli lɛ, ejaakɛ hemɔkɛyeli krɔŋŋ damɔ Nyɔŋmɔ Wiemɔ lɛ mli odaseyelii kɛ naashiwoi lɛ anɔ.​—Kanemɔ Hebribii 11:1, 6.

Esa akɛ wɔjɛ anɔkwayeli kɛ heshibaa mli wɔsɔle. Nyɔŋmɔ Bi, Yesu po jɛ heshibaa mli esɔle. (Luka 22:41, 42) No hewɔ lɛ, yɛ nɔ najiaŋ ni wɔbaatsɔɔ Nyɔŋmɔ nɔ ni esa akɛ efee lɛ, esa akɛ wɔbɔ mɔdɛŋ wɔkase Biblia lɛ koni wɔnu etaomɔ nii lɛ ashishi. Kɛkɛ lɛ, wɔbaanyɛ wɔsɔle koni ekɛ Nyɔŋmɔ suɔmɔnaanii akpã gbee.​—Kanemɔ 1 Yohane 5:14.