Ani Nyɔŋmɔ Boɔ Osɔlemɔi Atoi?
KƐJƐ be mli ni Yesu kɛ Sɔlemɔ Nɔkwɛmɔ nɔ lɛ ha ekaselɔi lɛ nɛɛ, akɛ sɔlemɔi akpekpei toi akpekpei abɔ efɔ Nyɔŋmɔ hiɛ. Mɛi pii tĩɔ nɛkɛ sɔlemɔ nɛɛ wiemɔi lɛ amli amɛkɛɔ lɛ nakai pɛpɛɛpɛ. Shi anuɔ he yɛ hei babaoo akɛ sɔlemɔi pii yɛ ni ahaaa hetoo. Ani Nyɔŋmɔ boɔ wɔsɔlemɔi atoi lolo? Mɛni haa sɔlemɔ feɔ nɔ ni ekpɛlɛɔ nɔ?
Klɛŋklɛŋ lɛ, esa akɛ wɔhe wɔye akɛ Nyɔŋmɔ baabo wɔsɔlemɔi atoi. “Mɔ ni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛgbɛ lɛ anyɔmɔwolɔ hu.”—Hebribii 11:6.
Kɛkɛ lɛ esa akɛ wɔkɛ anɔkwayeli asɔle wɔha Nyɔŋmɔ ni enɛ yɛ naakpɛɛ? Shi Yesu bɔ kɔkɔ akɛ: “Kɛ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpee hei lɛ kɛ gbɛjegbɛi akoji lɛ anaa amɛsɔle, koni mɛi ana amɛ. Lɛlɛŋ, miikɛɛnyɛ akɛ: Amɛnine eshɛ amɛnyɔmɔwoo nɔ momo.” (Mateo 6:5) No hewɔ lɛ, sɔlemɔi kakadaji ni afɔɔ lɛ hoo yɛ maŋ teŋ bɔni afee ni akɛsa toibolɔi ahiɛ lɛ esaaa Nyɔŋmɔ hiɛ. Ebooo sɔlemɔi ni tamɔ nɛkɛ lɛ atoi.
Agbɛnɛ hu, esaaa akɛ wɔyaa Nyɔŋmɔ ŋɔɔ ni wɔmiibi ni eyoo wɔ. Nyɔŋmɔ boɔ heshibalɔi ni sumɔɔ akɛ amɛfee nɔ ni ja, ni amɛkpɛlɛɔ nɔ akɛ amɛji eshafeelɔi lɛ asɔlemɔi atoi.—Luka 18:9-14; 1 Petro 3:12.
Ani shidaamɔ krɛdɛɛ ko he miihia kɛ wɔmiisɔle? Nɔ ni aŋma yɛ Biblia mli lɛ tsɔɔ akɛ Nyɔŋmɔ tsuji tsɔ gbɛi sɔrɔtoi anɔ amɛsɔle; shi kɛ̃lɛ abo amɛsɔlemɔi atoi. Mɛi komɛi kula shi; mɛi komɛi damɔ shi. Nehemia sɔle be mli ni edamɔ Persia maŋtsɛ lɛ hiɛ. Yona sɔle kɛjɛ ŋshɔŋloo kpeteŋkpele lɛ musuŋ, ni eeewa akɛ ooonyɛ otsɔɔ bɔ ni efee egbɔmɔtso yɛ sɔlemɔ mli. (Daniel 6:10; 1 Maŋtsɛmɛi 8:22; Nehemia 2:1-5; Yona 2:1, 2) No hewɔ lɛ yɛ be mli ni wɔbaasumɔ ni wɔtsɔ gbɛ ko ni baaha wɔjwɛŋ wɔsɔlemɔ lɛ nɔ lɛ, nɔ ni he hiaa lɛ ji ni wɔɔsumɔ yɛ anɔkwale mli akɛ wɔɔbɛŋkɛ Nyɔŋmɔ yɛ sɔlemɔ mli. Wɔbaanyɛ wɔfee nakai yɛ be fɛɛ mli, yɛ he fɛɛ he yɛ shihilɛi sɔrɔtoi fɛɛ mli.—Efesobii 6:18.
Gbɛ Ni Hi Lɛ
Yehowa Nyɔŋmɔ kɛ gbɛ ko efɔ shi ni no nɔ esa akɛ wɔtsɔ wɔbɛŋkɛ lɛ. Yesu tsɔɔ mli akɛ: “Miji gbɛ lɛ . . . Mɔ ko mɔ ko baaa Tsɛ lɛ ŋɔɔ akɛ ja etsɔ minɔ.”—Yohane 14:6, NW.
Mɛi pii heɔ yeɔ yɛ anɔkwale mli akɛ kɛji akɛ amɛsɔle yɛ “hetselɔ” ko gbɛi amli aloo po yɛ Yesu shikpɔŋ nɔ nyɛ, Maria, gbɛi amli lɛ, abaabo amɛ toi. Shi kɛji akɛ wɔmiisumɔ ni “wɔ-Tsɛ” lɛ abo wɔsɔlemɔi atoi diɛŋtsɛ lɛ, yɛ anɔkwale mli lɛ, esa akɛ wɔtsɔ gbɛ ni akɛfɔ shi lɛ nɔ. No pɛ nɔ wɔbaatsɔ wɔbɛŋkɛ Nyɔŋmɔ. Taakɛ Yesu kɛɛ lɛ: “Nɔ fɛɛ nɔ he fai ni nyɛaakpa Tsɛ lɛ migbɛi anɔ lɛ eeehanyɛ.”—Yohane 16:23.
Jeee Nɔ Ni Atiɔ Mli Akɛɔ
Beni Yesu kɛ Sɔlemɔ Nɔkwɛmɔ nɔ lɛ ha lɛ, ani eyiŋtoo ji ni esɛɛnyiɛlɔi lɛ ati emli wiemɔi lɛ amli ni amɛkɛɛ lɛ nakai pɛpɛɛpɛ be fɛɛ be ni amɛaasɔle amɛha Nyɔŋmɔ lɛ? Ojogbaŋŋ eje sɔlemɔ lɛ shishi akɛ: “Belɛ esa akɛ nyɛsɔle yɛ nɛkɛ gbɛ nɔ,” jeee kɛ ‘nɛkɛ wiemɔi.’ (Mateo 6:9, NW) Yɛ be kroko mli lɛ Yesu kaselɔi lɛ kɛɛ lɛ akɛ: “Nuŋtsɔ, tsɔɔmɔ wɔ sɔlemɔ.” Yɛ hetoohamɔ mli lɛ, Yesu sɔle kɛ wiemɔi ni tamɔ Sɔlemɔ Nɔkwɛmɔ lɛ nɔŋŋ, shi ekɛ wiemɔi krokomɛi tsu nii. Ekɛɛ akɛ: “Ataa, ha ogbɛi lɛ he atse. Ha omaŋtsɛyeli lɛ aba. Ha wɔgbi lɛ nɔ aboloo taakɛ bɔ ni gbi lɛ taomɔ nii ji. Ni okɛ wɔhe eshai ake wɔ. Ejaakɛ wɔ hu wɔkɛkeɔ mɛi ni hiɛɔ wɔ nyɔmɔ; ni okɛ wɔ akaba kaa mli.” No hewɔ lɛ Sɔlemɔ Nɔkwɛmɔ nɔ lɛ ji nɔkwɛmɔ nɔ loo mfoniri ko ni tsɔɔ gbɛ ni esa akɛ wɔtsɔ nɔ wɔsɔle. Etsɔɔ wɔ nibii ni esa akɛ wɔsɔle yɛ he, kɛ bɔ ni nibii lɛ ahe hiaa ha yɛ nɔkwɔlɛ loo hehiamɔ naa.—Luka 11:1-4.
Yɛ enɛ hewɔ lɛ, ani Nyɔŋmɔ baabo sɔlemɔi ni akaneɔ kɛjɛɔ wolo mli lɛ atoi? Kɛji akɛ oyɛ bi lɛ, ani obaasumɔ ni ekɛ bo awie kɛtsɔ wiemɔi ni yɔɔ wolo mli ni mɔ ko etsɔ hiɛ eŋmala eshwie shi eha lɛ lɛ anɔ? Aloo obaasumɔ ni ejɛ lɛ diɛŋtsɛ etsui mli ewie? Yehowa Nyɔŋmɔ miisumɔ ni wɔjɛ wɔtsui mli wɔwie wɔ tsɔɔ lɛ, shi jeee kɛmiijɛ sɔlemɔ wolo mli. Maŋtsɛ David kɛɛ: “Nyɛfɔsea nyɛtsui nyɛshwiea [Nyɔŋmɔ] ehiɛ.” (Lala 62:9) Agbɛnɛ hu, Yesu bɔ wɔ kɔkɔ: “Shi kɛ nyɛmiisɔle lɛ, nyɛkatia nibii lɛ nɔŋŋ mli nyɛwiea shii abɔ.”—Mateo 6:7.
Nɔ Ni Kɛ Nyɔŋmɔ Suɔmɔnaa Nii Kpaa Gbee
Bɔfo Yohane kɛɛ wɔ akɛ: “Ni enɛ ji ekaa ni wɔyɔɔ yɛ [Nyɔŋmɔ] ehiɛ lɛ, akɛ, kɛji wɔba nɔ ko yɛ esuɔmɔnaa lɛ, eboɔ wɔ toi.” (1 Yohane 5:14) Naa taomɔ nii kroko ni Nyɔŋmɔ baanyɛ adamɔ nɔ abo wɔsɔlemɔi atoi. Esa akɛ wɔsɔlemɔ lɛ kɛ Nyɔŋmɔ suɔmɔnaa nii akpa gbee. Agbɛnɛ hu, kɛ wɔmiisɔle lɛ, esa akɛ wɔfee nii bɔ ni kɛ wɔsɔlemɔi lɛ aaakpa gbee.
Kornelio, klɛŋklɛŋ afii oha lɛ mli asraafoi asafoatsɛ lɛ “kpaa Nyɔŋmɔ fai daa.” Yehowa bo esɔlemɔi atoi ni eye ebua lɛ koni ekase ŋwɛi suɔmɔnaa nii lɛ babaoo. Ani oosumɔ ni Nyɔŋmɔ abo esɔlemɔi atoi? Belɛ kanemɔ Biblia lɛ ni ole nɔ ni Nyɔŋmɔ suɔmɔnaa nii ji, koni osɔlemɔi kɛ Nyɔŋmɔ suɔmɔnaa nii akpa gbee. Yɛ Nyɔŋmɔ gbɛtsɔɔmɔ naa lɛ, Yehowa Odasefoi aaasumɔ akɛ amɛkɛ nakai tsɔɔmɔ lɛ nɔŋŋ aha bo ni amɛye amɛbua bo yɛ enɛ mli taakɛ bɔfo Petro kɛha Kornelio lɛ.—Bɔfoi lɛ Asaji 10:2-5.
“Nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ.” (Filipibii 4:6, 7) Nyɛyaa nɔ nyɛbia—klɛŋklɛŋ, kɛha nibii ni kɔɔ Nyɔŋmɔ he: egbɛi, emaŋtsɛyeli lɛ kɛ esuɔmɔnaa nii. Kɛkɛ lɛ bi nibii ni kɔɔ bo diɛŋtsɛ ohe kɛ onanemɛi gbɔmɛi ahe. Feemɔ nakai ni ekɛ nɔ ni Yesu wie he yɛ Sɔlemɔ Nɔkwɛmɔ nɔ lɛ mli lɛ akpa gbee. Tsu Nyɔŋmɔ taomɔ nii kɛha sɔlemɔ lɛ he nii, koni Yehowa kɛ duromɔ abo osɔlemɔi otoi.