Sanebimɔi Ni Jɛ Kanelɔi Adɛŋ

Kɛ́ nyɛmi nuu loo nyɛmi yoo ko kɛ mɔ ko ni jeee eŋa loo ewu ye jenamɔ muu fɛɛ yɛ tsũ kome mli ní jeee shihilɛ ko ni amɛnyɛŋ he nɔ ko amɛfee lɛ hewɔ lɛ, ani eji esha ni esa akɛ ato saneyeli ajinafoi akuu yɛ he?

Hɛɛ. Kɛ́ jeee shihilɛ ko ni amɛnyɛŋ he nɔ ko amɛfee lɛ hewɔ eba lɛ nakai lɛ, abaato saneyeli ajinafoi akuu, ejaakɛ bɔ ni shihilɛ lɛ yɔɔ lɛ hewɔ lɛ, ewa waa akɛ abaahe aye akɛ amɛbɔɔɔ ajwamaŋ.​—1 Kor. 6:18.

Be fɛɛ be ni nyɛmi ko kɛ mɔ ko ni jeee eŋa loo ewu baaye jenamɔ muu fɛɛ yɛ tsũ kome mli lɛ, esa akɛ onukpai akuu lɛ atao sane lɛ mli fitsofitso koni amɛkwɛ kɛji esa akɛ ato saneyeli ajinafoi akuu yɛ he lo. Amɛbaanyɛ amɛkɛ sanebimɔi ni nyiɛ sɛɛ nɛɛ atao sane lɛ mli: Ani mɛi enyɔ lɛ sumɔɔ amɛhe ni ekolɛ amɛmiito gbɛjianɔ po ni amɛbote gbalashihilɛ mli? Ani awo amɛ ŋaa pɛŋ yɛ bɔ ni amɛkɛ amɛhe sharaa lɛ he? Mɛni hã amɛye jenamɔ muu fɛɛ yɛ tsũ kome mli lɛ? Ani amɛkpaŋ akɛ amɛbaafee nakai? Ani nɔ ko yɛ ni kulɛ amɛbaanyɛ amɛfee yɛ shihilɛ lɛ he, aloo nɔ ko bɛ ni kulɛ amɛbaanyɛ amɛfee yɛ he? Akɛ nɔkwɛmɔnɔ lɛ, ani nɔ ko ni amɛkpaaa gbɛ loo oshara ko loo naagba ko hewɔ eba lɛ nakai lɛ? (Jaj. 9:11) Nɛgbɛ amɛkã amɛwɔ? Akɛni esoro shihilɛ fɛɛ shihilɛ hewɔ lɛ, ekolɛ ehe baahia ni onukpai lɛ asusu saji krokomɛi hu ahe kɛfata he.

Kɛ́ nɔ fɛɛ nɔ fee faŋŋ lɛ, onukpai akuu lɛ baakpɛ amɛyiŋ kɛji esa akɛ ato saneyeli ajinafoi akuu.