Bɔ Ni Obaafee Okase Biblia Lɛ Jogbaŋŋ Ni Oná He Miishɛɛ Hu

Yoshua miikane Mla lɛ; Yeriko gbogboi lɛ miikumɔ, shi Rahab shĩa lɛ kumɔɔɔ; Yoshua ehole eniji anɔ kɛtee ŋwɛi eesɔle

YEHOWA kɛ nitsumɔ ko wo Yoshua dɛŋ. Ekɛɛ lɛ akɛ lɛ ebaanyiɛ Israelbii lɛ ahiɛ kɛya Shiwoo Shikpɔŋ lɛ nɔ. Yoshua kɛ naagbai pii baakpe yɛ nitsumɔ nɛɛ mli. No hewɔ lɛ, Yehowa wo lɛ hewalɛ ekɛɛ: ‘Feemɔ ekãa, ni owaje ohe waa. Ye mi-Mla lɛ nɔ. Kanemɔ jetsɛremɔ kɛ jenamɔ fɛɛ, bɔ ni afee ni oye nɔ fɛɛ nɔ ni aŋma yɛ mli lɛ nɔ jogbaŋŋ; ejaakɛ no baahã oye omanye, ni ofee onii yɛ hiɛshikamɔ mli.’—Yos. 1:7, 8.

Bei ni wɔyɔɔ mli nɛɛ ji “bei krɛdɛi ni mli shihilɛ wa,” ni no hewɔ lɛ, wɔ hu wɔkɛ naagbai baakpe. (2 Tim. 3:1) Enɛ hewɔ lɛ, esa akɛ wɔ hu wɔbo ŋaa ni Yehowa wo Yoshua lɛ toi, ni wɔkane Biblia lɛ daa ni wɔkɛ emli shishitoo mlai lɛ atsu nii kɛ́ wɔkɛ kai kpe. Kɛ́ wɔfee nakai lɛ, wɔ hu wɔbaaye omanye tamɔ bɔ ni Yoshua ye omanye lɛ.

Shi wɔteŋ mɛi babaoo leee bɔ ni akaseɔ nii, loo wɔnyaaa nikasemɔ he. Kɛ̃lɛ, wɔ fɛɛ wɔle akɛ ehe miihia waa ni wɔkase Biblia lɛ. Ŋaawoi ni yɔɔ akrabatsa ni yitso ji, “Nibii Komɛi Ni Baaye Abua Bo” lɛ mli lɛ baaye abua wɔ ni wɔnyɛ wɔkase nii jogbaŋŋ ni ekasemɔ aŋɔɔ wɔnaa hu.

Lalatsɛ lɛ lá akɛ: “Tsɔɔmɔ mi gbɛ yɛ okitãi lɛ agbɛ lɛ nɔ, ejaakɛ nomɛi ahe mimii shɛɔ.” (Lala 119:35) Bo hu obaanyɛ oná Nyɔŋmɔ Wiemɔ lɛ kasemɔ he miishɛɛ waa. Kɛ́ okase Biblia lɛ jogbaŋŋ lɛ, obaaná mumɔŋ jwetrii babaoo.

Ŋmɛnɛ lɛ, Yehowa ekɛko wɔteŋ mɔ ko mɔ ko akɛ enyiɛ maŋ ko hiɛ, tamɔ ekɛɛ Yoshua lɛ. Shi wɔ hu wɔkɛ naagbai kpeɔ. No hewɔ lɛ, esa akɛ wɔkase Nyɔŋmɔ Wiemɔ lɛ ni wɔkɛ nibii ni wɔkaseɔ lɛ atsu nii. Kɛ́ wɔfee nakai lɛ, wɔ hu wɔbaaye omanye ni wɔbaafee wɔnii yɛ hiɛshikamɔ mli.

NIBII KOMƐI NI BAAYE ABUA BO

Sɔlemɔ dani obɔi nikasemɔ. Yehowa hã aŋmala nibii ni etaoɔ ni wɔle lɛ yɛ Biblia lɛ mli koni wɔná he sɛɛ. No hewɔ lɛ, kɛ́ oyaakane Biblia lɛ, sɔlemɔ ni Yehowa aye abua bo ni onu nɔ ni oyaakane lɛ shishi, ni onyɛ okai, ni onyɛ okɛtsu nii yɛ oshihilɛ mli.—Ezr. 7:10.
Be ni okaneɔ Biblia lɛ loo asafo lɛ woji lɛ, bi ohe saji. Obaanyɛ obi ohe akɛ: ‘Mɛni nɔ ni mikaneɔ nɛɛ tsɔɔ mi yɛ Yehowa he? Mɛɛ tsakpãa yɔɔ nɔ ni mikaneɔ nɛɛ kɛ sane oti titri ni Biblia lɛ wieɔ he lɛ teŋ? Mɛɛ gbɛ nɔ manyɛ mikɛ sane nɛɛ aye abua mɛi krokomɛi?’
Jwɛŋmɔ nɔ ni okaseɔ lɛ nɔ. Kɛ́ okane kɛshɛ he ko lɛ, mɛɛ ni ojwɛŋ nɔ ni okane lɛ nɔ. Bi ohe akɛ: ‘Te sane nɛɛ hãa minuɔ he mihãa tɛŋŋ? Mɛni hewɔ ehãa minuɔ he nakai? Te ekɔɔ shihilɛi ni mikɛkpe be ko ni eho, shihilɛ mli ni miyɔɔ amrɔ nɛɛ, loo shihilɛi ni ekolɛ mikɛbaakpe wɔsɛɛ lɛ ahe ehãa tɛŋŋ? Mɛɛ gbɛ nɔ manyɛ mikɛ Biblia mli shishitoo mlai kɛ ŋaawoo nɛɛ atsu nii yɛ mishihilɛ mli?’ (Hiob 23:5; Lala 49:3) Kwɛmɔ akɛ obaanyɛ otsɔɔ nɔ hewɔ ni Yehowa kɛɛ wɔkafee nibii komɛi lɛ. Kɛ́ mɔ ko he sane okaneɔ lɛ, susumɔ bɔ ni kulɛ nibii anaa baayakpa ahã eji efee enii yɛ gbɛ kroko nɔ lɛ he.—5 Mo. 32:28, 29.
Feemɔ nibii ahe mfoniri. Akɛ nɔkwɛmɔnɔ lɛ, ani obaanyɛ ofee be ni Yosef nyɛmimɛi lɛ hɔ̃ɔ lɛ amɛhãa Ishmaelbii lɛ he mfoniri yɛ ojwɛŋmɔ mli? (1 Mo. 37:18-28) Mɛni onaa? Mɛɛ gbɛɛmɔi onuɔ? Mɛɛ ŋmai onuɔ? Eji bo ji Yosef kulɛ, mɛni baaya nɔ yɛ ojwɛŋmɔŋ ni te obaanu he ohã tɛŋŋ? Ni eji ofata enyɛmimɛi hii lɛ loo Ishmaelbii lɛ ahe hu kulɛ, te obaanu he ohã tɛŋŋ? Kɛ́ ofee nibii ahe mfoniri nɛkɛ lɛ, obaanu nɔ ni okaseɔ lɛ shishi jogbaŋŋ.
Okɛ nibii ni asafo lɛ efee lɛ atao nii amli. Kasemɔ bɔ ni akɛ woji kɛ niiamlitaomɔ nibii ni yɔɔ Intanɛt lɛ nɔ ni yɔɔ owiemɔ mli lɛ tsuɔ nii ahãa. Kɛ́ oleee bɔ ni akɛ eko tsuɔ nii ahãa jogbaŋŋ lɛ, hã mɔ ko atsɔɔ bo. Watch Tower Publications Index lɛ loo Niiamlitaomɔ Wolo Kɛhã Yehowa Odasefoi lɛ baawa bo ni ona saji ni aŋma yɛ nibii pii ahe, kɛ bɔ ni agbala ŋmalɛi komɛi amli ahã yɛ wɔwoji lɛ amli. Saji krokomɛi ni fata he ni yɔɔ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ sɛɛ lɛ baanyɛ awa bo ni ole maji kɛ shikpɔji ashikamɔ, be ni nibii komɛi tee nɔ, nibii atsiimɔ, amɛfalɛ, loo amɛkɛlɛ, kɛ saji krokomɛi ni tamɔ nakai. Kɛ́ eko yɛ wiemɔ ko ni obaanyɛ okane lɛ mli lɛ, kɛtsu nii.
Tĩi otii ni omɔmɔ yɛ nɔ ni okase lɛ mli lɛ amli bɔ ni afee ni ohiɛ akakpa nɔ. Nɔ kroko ni hi waa ni baaye abua bo ni ohiɛ akakpa nɔ ni okase lɛ nɔ ji, ni obaagba mɛi krokomɛi. Kwɛmɔ akɛ obaanyɛ okɛ otii ni omɔmɔ lɛ eko atsu nii yɛ shiɛmɔ nitsumɔ lɛ mli lo. Kɛ́ ofee nibii nɛɛ lɛ, otii ni omɔmɔ lɛ baaka ojwɛŋmɔ mli ni obaanyɛ okɛye obua mɛi krokomɛi hu.